Kapu 120

Yandi Mebuyama na Kibansala

NA NIMA ya kuyambula Yezu na masamba ya Getsemane mpi ya kutina na kubanga ti bantumwa ya nkaka, Piere ti Yoane metelama na kutina na bau. Mbala ya nkaka bau mekutana ti Yezu ntangu bau kenata yandi na nzo ya Ana. Ntangu Ana metinda yandi na Kaifa, Mfumu ya banganga-Nzambi, Piere ti Yoane melanda na kitamina ya mbote, yau kemonana nde na ndambu mosi bau kebanga na kutula luzingu na bau mosi na kigonsa mpi na ndambu ya nkaka, bau kekudibanza sambu na mambu yina fwete kubwila Mfumu na bau.

Ntangu bau mekuma na lupangu ya nene ya Kaifa, Yoane mekuka na kukota na kati ya kibansala, sambu yandi mezabanaka ti mfumu ya banganga-Nzambi. Kansi, Piere mebikala ya kutelama na nganda na kyelo. Kansi, nswalu Yoane mevutuka sambu na kutuba na muntu ya kuvandaka na kyelo, nsadi ya mwana ndumba, mpi bau mepesa Piere nzila ya kukota.

Ntangu yai madidi mekwisa, mpi bantu ya kisalu ti bapolisi ya bamfumu ya banganga-Nzambi metula tiya ya makala. Piere mevukana ti bau sambu na kuyotila tiya na ntangu yandi kevingila nsukulu ya kusambisama ya Yezu. Kuna, na nsemo ya tiya, nkengi ya kyelo yina kukotisaka Piere metala yandi mbotembote. Yandi metuba nde: “Si nge mpi, nge vandaka ti Yezu, muntu ya ntoto ya Galilea!”

Piere mekuma bisakasaka mutindu bau mezaba yandi, yandi mebuya na ntwala na bau yonso nde yandi mezabaka ntete ve Yezu. Yandi ketuba nde: “Mono zaba ve mambu yina ya nge ke tuba. Mono ke [zaba yandi, NW] mpi ve.”

Ntangu yandi metuba mpila yina, Piere mebasika mfinama na kyelo ya lupangu. Kuna, mwana-nkento mosi memona yandi mpi metubila bayina kele ya kutelama na kisika yango nde: “Muntu yai mpi vandaka ti Yesu, muntu ya Nazareti.” Piere mebuya dyaka nde: “Mono zaba muntu yina ve!”

Piere mebikala na kibansala, na kumekaka kudibumba kibeni. Mbala ya nkaka, na ntangu yai yandi metekita ntangu yandi mewa nsusu medila na luyantiku ya suka na mudidi. Na ntangu yango yina, kusambisama ya Yezu kelanda, na ntembe ve yau kesalama na kisika mosi na zulu ya nzo ya kibansala yango. Na ntembe ve, Piere ti bantu ya nkaka kevingila na nsi, bau kemona bambangi ya mutindu na mutindu ya bau kenata kekwenda mpi kevutuka sambu na kuta kimbangi.

Kiteso ya ntangu mosi meluta kubanda Piere kuzabanaka mbala ya nsuka bonso nkundi ya kisalu ya Yezu. Ntangu yai, bantu mingi yina kele ya kutelama na nzyunga mekwisa na yandi mpi metuba nde: “Ya kieleka, nge mpi nge ke vandaka ti bo. Beto zaba nge na ndinga na nge!” Mosi na kati ya bantu ya kele na kibuka yango kele mpangi ya Malkusi, yina Piere kuzengaka dikutu. Yandi metuba nde: “Mono monaka nge ti yandi na kati ya [masamba, NW] yina ve?”

Piere mevutula ti ngolo yonso nde: “Mono zaba muntu yina ve!” Ya kyeleka, yandi kemeka na kundimisa bau nde bau yonso kele na kuvila, na kudisingaka mpi na kudyaka ndefi sambu na mambu yango, na kudibingilaka mambi kana yandi ketuba ve kyeleka.

Kaka ntangu Piere mebuya na mbala ya tatu, nsusu medila. Mpi na ntangu yango yina, Yezu, yina kemonana nde yandi kele na mbalanda na zulu ya kibansala, mebaluka mpi metala yandi. Na mbala mosi, Piere meyibuka mambu ya Yezu kutubilaka yandi kaka mwa bangunga na ntwala na suku ya etaze nde: “Ntangu nsusu ta vanda me dila ntete ve mbala zole, nge ta buya mbala tatu nde nge zaba mono ve.” Ya kutungisama sambu na kizitu ya disumu na yandi, Piere mekwenda na nganda mpi meyantika kudila mingi kibeni.

Inki mutindu dyambu yai lendaka kusalama? Inki mutindu, na nima ya kundimisama mbotembote sambu na ngolo na yandi ya kimpeve, Piere lendaka kubuya Mfumu na yandi mbala tatu ya kulandana na ntangu fyoti? Nkatu mbefula, mambu yina mesalama memanisa yandi mayele. Kyeleka kele na kubalulama, mpi Yezu bau kebaka yandi bonso muntu ya mbi kibeni. Mambu ya kyeleka bau kesala nde yau kumonana ya luvunu, muntu ya kukonda makambu mekuma muntu ya mbi. Yau yina, sambu na bupusi ya mambu yina kesalama, Piere mezanga bukatikati. Na mbala mosi, kwikama na yandi mosi metungisama; na mawa na yandi ya mingi boma ya muntu mekanga yandi. Bika dyambu yina kukumina beto ve! Matayo 26:​57, 58, 69-75; Marko 14:​30, 53, 54, 66-72; Luka 22:​54-62; Yoane 18:​15-18, 25-27.

▪ Inki mutindu Piere ti Yoane mekuka na kukota na kibansala ya mfumu ya baganga-Nzambi?

▪ Ntangu Piere ti Yoane kele na kibansala, inki kesalama na nzo?

▪ Mbala ikwa nsusu medila, mpi mbala ikwa Piere mebuya nde yandi kuzaba ve Kristu?

▪ Mpila ya Piere mekudisinga mpi medya ndefi, yau ketendula inki?

▪ Inki mepusa Piere na kubuya nde yandi kezaba ve Yezu?