Kapu 121
Na Ntwala ya Sanedreni, na Nima na Pilate
MPIMPA mefinama na kumana. Piere mebuya Yezu mbala tatu, mpi bamambere ya Sanedreni memanisa kusambisa na bau ya kuvwenza mpi mepanzana. Kansi, na sukasuka ya Kitanu, bau mekutana dyaka, ntangu yai na nzo na bau ya Sanedreni. Lukanu na bau kemonana bonso nde ya kukusa kupesa kima ya kundimama na nsiku sambu na kusambisa ya mpimpa. Ntangu bau menata Yezu na ntwala na bau, bau metuba, mutindu bau kusalaka na mpimpa nde: “Tubila beto kana nge kele Mesia.”
Yezu mevutula nde: “Kana mono tubila beno nde mono kele Mesia, beno ta kwikila mono ve. Diaka, kana mono yula beno mambu mosi, beno ta pesa mono mvutu ve.” Kansi, Yezu memonisa nani yandi kele na kikesa yonso, na kutubaka nde: “Katuka ntangu yai, Mwana-muntu ta vanda na diboko ya kibakala ya [Nzambi, NW].”
Bau yonso meyufula nde: “Keti nge muntu kele Mwana-Nzambi?”
Yezu mevutula nde: “Beno bantu me tuba nde mono kele Mwana-Nzambi.”
Mvutu yai mefwana sambu bantu yai kubaka ngindu ya kugonda. Bau memona nde yau kele kuvwenza. Bau meyufula nde: “Nki mfunu ya kusosa diaka batemwe? Sambu beto mosi me wa mambu yina ya yandi mosi me tuba!” Na yau, bau mekangisa Yezu, bau menata yandi mpi bau mepesa yandi na maboko ya guvernere ya Roma, Ponse Pilate.
Yudasi, muntu yina kutekaka Yezu, vandaka kutala mutindu mambu keluta. Ntangu yandi memona nde Yezu bau mezengila yandi nkanu, yandi mewa mpasi na ntima. Ebuna yandi mekwenda na bamfumu ya banganga-Nzambi ti na bambuta-bantu sambu na kuvutula bibende ya palata 30, na kutendulaka nde: “Mono me sala masumu na kuteka [menga ya lunungu, NW].”
Bau mevutula nkatu mawa nde: “Keti mambu yina me tadila beto? Ve, yina kele mambu na nge mosi!” Ebuna, Yudasi melosa bibende ya palata yango na kati ya tempelo mpi mekwenda kumeka na kudikanga nsinga. Kansi, na ntembe ve, lutangu yina ya Yudasi mekangisa nsinga mezengana, mpi nitu na yandi mebwa na zulu ya matadi yina kele na nsi, kisika yau mepanzana.
Bambuta ya banganga-Nzambi kemona ve kima ya kusadila bibende yina ya palata. Bau ketuba nde: “Bansiku na beto ke pesaka beto nswa ve na kutula mbongo yai na [kibumbilu ya santu sambu yau kele ntalu ya menga, NW].” Yau yina, na nima ya kuwakana na kimvuka, bau mesumba kitini ya ntoto ya muntu yina kesalaka banzungu ti mbongo yango yina sambu na kuzikaka banzenza. Yau yina, kilanga yango kubingamaka “Ntoto ya Menga.”
Kele kaka na suka kibeni ntangu ya bau menata Yezu na nzo ya Guvernere Pilate. Kansi Bayuda yina kukwendaka ti yandi mebuya na kukota sambu bau keyindula nde kuvukana ya mutindu yina ti bantu ya makanda takumisa bau ya kukonda kugedila. Yau yina, sambu na kuyangidika bau, Pilate mebasika na nganda. Yandi meyufula nde: “Sambu na nki beno me kwisa kufunda muntu yai?”
Bau mevutula nde: “Kana yandi vandaka muntu ke salaka mbi ve, beto zolaka kwisa kunatila nge yandi ve.”
Na kubuyaka kukota na makambu ya nkani, Pilate mevutula nde: “Beno baka yandi beno mosi, ebuna beno sambisa yandi mutindu Bansiku na beno ke tuba.”
Na kusongaka ngindu na bau ya kugonda, Bayuda metuba nde: “Beto ke na nswa ve ya kufwa muntu.” Ya kyeleka, kana bau kufwaka yandi na Nkinsi ya Paki, ngatu bantu zolaka kubasisa mavwanga, sambu bantu mingi kepesaka mpenza Yezu luzitu. Kansi kana bau lenda kununga na kufwisa yandi na bantu ya Roma sambu na kikuma ya politiki, bau tanata ve makambu na ntwala ya bantu.
Yau yina bamfumu ya dibundu, nkatu kutubila kusambisa na bau ya ntete yina ya bau kuzengilaka Yezu nkanu nde yandi mevwenza, ntangu yai bau mebasisa bikuma ya nkaka. Bau metubila balufundu tatu: “Beto monaka muntu yai ke [1] kusa bantu na beto nde: [2] ‘Beno lenda futa mpaku na [Kaisali, NW] ve,’ mpi nde: [3] ‘Mono kele Kristo, [ntotila, NW].’ ”
Lufundu ya Pilate metudila dikebi, kele yina ya Yezu kutubaka nde yandi kele ntotila. Yau yina, yandi mekota dyaka na nzo, mebinga Yezu, mpi meyufula yandi nde: “Nge muntu kele ntotila ya Bayuda?” Na bangogo ya nkaka, keti nge mefwa nsiku na kutubaka nge mosi nde nge kele ntotila sambu na kutelamanina Kaisali?
Yezu kezola kuzaba kiteso ya mambu ya Pilate meyita kuwa na yina metala yandi, yau yina yandi keyufula nde: “Mambu yina ya nge me yula mono, nge me yindula yo nge mosi to bantu ya nkaka me tubila nge yo sambu na mono?”
Pilate memonisa nde yandi kezaba ve mambu na yandi mpi kezola kuzaba kyeleka. Yandi mevutula nde: “Keti mono kele Muyuda? Bantu ya dikanda na nge ti bambuta ya banganga-Nzambi me kwisa kunata nge na mono. Nge salaka nki?”
Yezu kesosa ve na kufika ngyufula yina ketadila kimfumu. Mvutu ya Yezu kepesa ntangu yai keyitukisa kibeni Pilate. Luka 22:66–23:3; Matayo 27:1-11; Marko 15:1; Yoane 18:28-35; Bisalu 1:16-20.
▪ Sambu na inki lukanu Sanedreni mevukana dyaka na suka?
▪ Inki mutindu Yudasi mefwa, mpi inki bau mesadila bibende yina 30 ya mbongo?
▪ Na kisika ya kufwa yandi bau mosi, sambu na inki Bayuda mezola bantu ya Roma kufwa Yezu?
▪ Inki balufundu Bayuda mefundila Yezu?