Kapu 122

Yandi Mekatuka na Pilate Mekwenda na Erode mpi Mevutuka Dyaka

ATA nkutu Yezu mesosa ve na kubumbila Pilate nde yandi kele ntotila, yandi metendula nde Kimfumu na yandi kele ve ya kutelamanina Roma. Yezu metuba nde: “Kimfumu na mono kele ya nsi-ntoto yai ve; kana Kimfumu na mono vandaka ya nsi-ntoto yai, bantu na mono zolaka kwisa kunwana sambu bantu ya nkaka kupesa mono na maboko ya Bayuda ve. Kimfumu na mono kele ya nsi-ntoto yai ve.” Na yau, Yezu mendima mbala tatu nde yandi kele ti Kimfumu, ata nkutu yau kekatuka ve na ntoto.

Kansi, Pilate metubila yandi dyaka nde: “Mpidina, nge kele ntotila?” Disongidila, keti nge kele ntotila ata Kimfumu na nge kele ve ya nsi-ntoto yai?

Yezu mesonga Pilate nde yandi mesukisa mbote, na kuvutulaka nde: “Nge muntu me tuba nde mono kele ntotila. Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe na mambu yina kele ya kieleka. Konso muntu yina kele [na ndambu, NW] ya kieleka, yandi ke waka ndinga na mono.”

Ee, lukanu kibeni ya Yezu kuzingilaka na zulu ya ntoto kele ya kuta kimbangi na “kieleka,” mingimingi kyeleka yina metala Kimfumu. Yezu mebongisama na kuvanda ya kwikama na kyeleka yango ata nkutu yau kelomba yandi luzingu na yandi. Ata nkutu Pilate meyufula nde: “Kieleka kele nki?” yandi kevingila ve ntendula ya nkaka. Yina ya yandi mewa kele mingi sambu na kuzenga makambu.

Pilate mevutuka na kibuka ya kevingila na nganda. Na ntembe ve, ti Yezu na lweka na yandi, yandi metubila bambuta ya banganga-Nzambi ti bayina kele ti bau nde: “Mono ke mona mbi ve ya muntu yai me sala.”

Na makasi sambu na lukanu yai, kibuka meyantika kulatama nde: “Malongi na yandi ke [vengumuna, NW] bantu . . . Yandi yantikaka kulonga na ntoto ya Galilea, yandi vandaka kwenda kulonga na ntoto ya Yudea yonso, ebuna ntangu yai, yandi me kwisa kukuma awa.”

Kukonda kuyindula ya Bayuda ya kuvukisa ti kukonda kumona mbi na bau meyitukisa Pilate. Yau yina, ntangu bambuta ya banganga-Nzambi ti bambuta-bantu kelanda na kuboka, Pilate mebaluka na Yezu mpi meyufula nde: “Keti nge ke wa ve mambu yina yonso ya bo ke funda nge?” Kansi, Yezu memeka nkutu ve na kupesa mvutu. Kuvanda na yandi pima na ntwala ya balufundu ya buzoba keyitukisa Pilate.

Na ntangu yandi mezaba nde Yezu kele muntu ya Galilea, Pilate memona mpila ya kudikatula na makambu sambu na yandi. Mfumu ya Galilea, Erode Antipasi (mwana ya Erode ya Nene), kele na Yeruzalemi sambu na Paki, yau yina Pilate metinda Yezu na yandi. Na ntwala, Erode Antipasi kuzengisaka ntu ya Yoane Mbotiki, mpi na nima Erode kuwaka boma ntangu yandi kuwaka mambu yina metala bisalu ya kuyituka ya Yezu vandaka kusala, na kubangaka nde Yezu fwete kuvanda Yoane ya kutelamaka na kati ya bafwa.

Ntangu yai, Erode kele na kyese ya kuluta mingi, na kivuvu ya kumona Yezu. Yau kele ve sambu yandi kele kudibanza sambu na mambote ya Yezu to nde yandi kezola kusala ngolo sambu na kuzaba kana balufundu ya bau mefundila Yezu kele ya kyeleka to ve. Kansi, yandi kesosa kaka kuzaba mpi yandi ketula kivuvu ya kumona Yezu kusala mwa bimangu.

Kansi, Yezu mebuya na kusepedisa mpusa ya Erode. Yau yina, ntangu Erode keyufula yandi, yandi metuba ve ata ngogo mosi. Na nsoni yonso, Erode ti basoda na yandi yina kekengilaka yandi keseka Yezu. Bau melwatisa yandi lele mosi ya kesema mpi kevwenza yandi. Na nima, bau metinda yandi dyaka na Pilate. Na nsukansuka, Erode ti Pilate, bantu ya kuvandaka ntete bambeni, mekuma banduku ya mbote.

Ntangu Yezu mevutuka, Pilate mebinga bambuta ya banganga-Nzambi, bamfumu ya Bayuda kumosi ti bantu mpi metuba nde: “Beno me kwisa kunatila mono muntu yai nde: ‘Yandi ke kusaka bantu.’ Kansi mono me sambisa yandi na meso na beno, ebuna mono me mona ata mambu mosi ve ya mbi ya beno ke funda yandi. Erode mpi monaka mbi na yandi ve, sambu yandi me vutula yandi kwaku na beto. Muntu yai me sala kima ve yina ya beto lunga kufwa yandi. Yo yina, mono ke songa bantu na mono na kubula yandi fimbu, ebuna mono ke bika yandi.”

Na yau, mbala zole, Pilate metuba nde Yezu kele ve ti makambu. Yandi kele na mpusa kibeni ya kuyambula yandi, sambu yandi kebakisa nde banganga-Nzambi mepesa yandi kaka sambu na kimpala. Ntangu Pilate kelanda na kumeka kuyambula Yezu, yandi mepusama nkutu mingi na kusala mpila yina. Ntangu yandi kele na kiti na yandi ya kusambisa, nkento na yandi metindila yandi ndinga, na kusyamisaka yandi nde: “Kukota ve na mambu ya muntu yina me sala mbi ve, sambu na mpimpa yai mono me mona mpasi mingi na ndosi [na ntembe ve yau kukatukaka na Nzambi] sambu na yandi.”

Kansi, inki mutindu Pilate lenda kuyambula muntu yai ya kukonda makambu, mpila yandi kezaba nde yandi fwete kusala yau? Yoane 18:​36-38; Luka 23:​4-16; Matayo 27:​12-14, 18, 19; 14:​1, 2; Marko 15:​2-5.

▪ Inki mutindu Yezu mepesa mvutu na ngyufula yina metala kimfumu na yandi?

▪ “Kieleka” ya Yezu kutelaka kimbangi na ntangu ya luzingu na yandi na ntoto kele inki?

▪ Inki Pilate mezenga, inki mutindu bantu mesala, mpi inki Pilate mesala Yezu?

▪ Erode Antipasi kele nani, sambu na inki yandi mawa kyese mingi na kumona Yezu, mpi inki yandi mesala yandi?

▪ Sambu na inki Pilate kele na mpusa ya mingi ya kuyambula Yezu?