Kapu 127

Yandi Mezikama na Kitanu​—Mazyamu ya Mpamba na Lumingu

YAI kele Kitanu na nsuka ya nima ya midi mpi Kisabatu ya Nisani 15 tayantika ya ntangu tadinda. Nitu ya Yezu ya kufwa kele na zulu ya nti, kansi bamiyibi yina zole ya kele ti yandi kele kaka na luzingu. Kitanu na nima ya midi mebingama Lubongisu sambu yai kele ntangu ya bantu kebongisaka madya mpi kumanisa konso kisalu yina ya nkaka ya nswalunswalu ya lenda kuvingila ve tii kuna na nima ya Kisabatu.

Kisabatu yina mebika fyoti na kuyantika kele kaka ve Kisabatu yina kesalamaka mbala na mbala (kilumbu ya nsambwadi ya mposo) kansi mpi ya mbala zole, to Kisabatu ya “nene.” Yau mebingama mutindu yai sambu Nisani 15, yina kele kilumbu ya ntete ya bilumbu nsambwadi ya Nkinsi ya Bagato ya Kukonda Kifunisu (yau kevandaka kaka Kisabatu ata yau mebwa na konso kilumbu yina ya mposo), mebwa kilumbu mosi ti Kisabatu yina kesalamaka mbala na mbala.

Na kutadila Nsiku ya Nzambi, bau lenda kubikisa ve banitu yau kulala mpimpa ya mvimba na zulu ya nti. Yau yina, Bayuda melomba na Pilate nde lufwa ya bantu yina kegondama kusalama nswalu na kubukaka makulu na bau. Na yau, basoda mebuka makulu ya bamiyibi yina zole. Kansi sambu Yezu kemonana nde yandi mefwa, makulu na yandi bau mebuka yau ve. Dyambu yai kelungisa mukapu: “Bo ta buka ata mukwa na yandi mosi ve.”

Kansi, sambu na kundima nde Yezu mefwa kibeni, soda mosi mekotisa yandi dikonga na mpanzi. Dikonga metobula penepene na ntima na yandi, mpi na mbala mosi menga ti masa mebasika. Ntumwa Yoane, yina kele moni-mambu yango, keta nde dyambu yai melungisa mukapu ya nkaka: “Bantu ta tala muntu yina ya bo tobulaka dikonga.”

Yozefi muntu ya mbanza ya Arimatea mpi mambere ya Sanedreni, kele mpi pana na kisika ya kugonda mesalama. Yandi kubuyaka na kundima mambu ya kukonda lunungu ya kinzonzi ya nene kuzengilaka Yezu. Yozefi kele na masonga yonso longoki ya Yezu, ata nkutu yandi vandaka kuwa boma na kudimonisa. Kansi, ntangu yai, yandi memonisa kikesa mpi mekwenda na Pilate sambu na kulomba nitu ya Yezu. Pilate mebingisa ntete polisi ya kuvandaka na mukumba yango, ya polisi yango mendimisa nde Yezu mefwa, Pilate mepesa nswa.

Yozefi mebaka nitu yango mpi mekangisa yau na lele mosi ya bunkete na kubongisaka yau sambu na luziku. Nikodemo, mambere ya nkaka ya Sanedreni kesadisa yandi. Nikodemo mpi kukukaka ve na kutuba lukwikilu na yandi na Yezu sambu yandi vandaka kubanga kuvidisa pozisio na yandi. Kansi ntangu yai, yandi menata mananasi yina kele na kiteso ya bakilograme 33 ya mire mpi ya ba aloesi ya ntalu. Bau mekangisa nitu ya Yezu na bitembe ya mananasi yai, kaka mutindu Bayuda kevandaka ti kikalulu ya kubongisa banitu sambu na luziku.

Na nima, nitu yango menatama na mazyamu ya mbambukilu ya mpa ya Yozefi kutimunaka na kati ya ditadi na masamba yina kele mfinama. Na nsuka, bau metula ditadi ya nene na zulu ya mazyamu yango. Sambu na kuzika yandi na ntwala ya Kisabatu, bau mebongisa nitu nswalunswalu. Yau yina, Maria madelene ti Maria mama ya Yakobo ya Leke, yina, mbala ya nkaka vandaka kusadisa na kubongisa, mekwenda nswalu na nzo sambu na kubongisa mananasi ya kuluta mingi ti mafuta ya nsudi. Na nima ya Kisabatu, bau meyilama sambu na kubongisa dyaka nitu ya Yezu na mpila nde yau kutaninama bilumbu mingi.

Na kilumbu ya kulanda, yina kele Sabala (Kisabatu), bambuta ya banganga-Nzambi ti Bafarize mekwenda na Pilate mpi metuba nde: “Mfumu, beto me yibuka nde, muntu yai ya luvunu ntangu yandi vandaka na moyo, yandi vandaka kutuba nde: ‘Nzambi ta tedimisa mono na lufwa na kilumbu ya tatu.’ Ebuna tinda bantu na kwenda kukengila maziamu tii na kilumbu ya tatu; mpidina, balonguki na yandi lenda kwenda kukatula yandi ve sambu na kutubila bantu nde: ‘Nzambi me tedimisa yandi na lufwa.’ Luvunu yai ya nsuka lenda luta yina ya ntete na mbi.”

Pilate mevutula nde: “Beno baka basoda, beno kwenda kukengila maziamu mbote-mbote mutindu beno lenda sala.” Ebuna bau mekwenda mpi bau metula lutaninu na mazyamu na kutulaka ditadi mpi na kutulaka basoda ya Roma bonso bankengi.

Na sukasuka na Lumingu, Maria Magdala ti maria mama ya Yakobo, kumosi ti Salome, Yoana, mpi bankento ya nkaka, menata mananasi na mazyamu sambu na kubongisa nitu ya Yezu. Na nzila, bau ketuba bau na bau nde: “Nani ta katudila beto ditadi yina kele na munoko ya maziamu?” Kansi ntangu bau mekuma, bau mekuta nde ndikunu ya ntoto kusalamaka mpi wanzyo ya Yehowa mekatula ditadi. Bankengi metina, mpi mazyamu kele ya mpamba! Matayo 27:57–28:2; Marko 15:42–16:4; Luka 23:50–24:​3, 10; Yoane 19:​14, 31– Yn 20:1; 12:42; Levi 23:​5-7; Kulonga 21:​22, 23; Nkunga 34:20; Zakaria 12:⁠10.

▪ Sambu na inki Kitanu mebingama Lubongisu, mpi Kisabatu ya “nene” kele inki?

▪ Inki mikapu melungana na yina metala nitu ya Yezu?

▪ Inki Yozefi ti Nikodemo mesala sambu na kuzika Yezu, mpi inki kuwakana bau kele na yau ti Yezu?

▪ Inki kima banganga-Nzambi melomba Pilate na kusala, mpi inki mutindu yandi mepesa mvutu?

▪ Inki dyambu mesalama na sukasuka ya Lumingu?