Kapu 129

Bambonika ya Nkaka

BALONGOKI kele kaka ya kulemba nitu. Bau kebakisa ve ntendula ya mazyamu ya mpamba, bau kekwikila mpi ve bansangu ya bankento. Ebuna na nima na Lumingu, Kleopasi ti longoki ya nkaka mekatuka na Yeruzalemi sambu na kwenda na Emausi, kitamina ya kiteso ya bakilometere 11.

Na nzila, ntangu bau kesolula mambu ya kilumbu yango, nzenza mosi mekuta bau. Yandi meyufula bau nde: “Inki mambu yina ya beno ke kwenda kutuba na nzila?”

Balongoki metelama, baluse na bau mawamawa, mpi Kleopasi mevutula nde: “Bantu yonso ke zingaka na Yeruzalemi kuzaba mambu yina me bwa kuna na bilumbu yai, ebuna kaka nge mpamba zaba yo ve?” Yandi meyufula nde: “Nki mambu?”

Bau mevutula nde: “Mambu yina bwilaka Yesu, muntu ya bwala Nazareti. . . . Bambuta na beto ya banganga-Nzambi ti bambuta na beto ya nkaka, bo pesaka yandi na Pilate sambu yandi zengila yandi ndola ya lufwa ti kutula yandi na zulu ya [nti, NW]. Beto vandaka kutula ntima nde yandi muntu ta gulusa bantu ya Israele.”

Kleopasi ti nkundi na yandi meta mambu ya kuyituka ya kilumbu yango​—⁠kumonana ya kuyituka ya bawanzyo ti mazyamu ya mpamba​—⁠kansi na nima bau mendima nde bau kebakisa ve ntendula ya mambu yai. Nzenza menganina bau nde: “Beno kele mayele ve! Beno ke kwikilaka nswalu ve mambu yina yonso ya baprofete tubaka! Keti mfunu vandaka ve Mesia na kumona mpasi ti na kubaka lukumu na yandi?” Na nina, yandi metendudila bau mikapu ya bansonama ya santu ya ketadila Kristu.

Na nsukansuka, bau mekuma mfinama ti Emausi, mpi nzenza mesala bonso nde yandi kelanda na kukwenda. Sambu bau kezola kuzaba mambu ya kuluta mingi, balongoki medodokila nde: “Kwisa kubikala ti beto sambu ntangu me dinda, mpimpa ke zola kubwa.” Ebuna muntu yango mebikala ti bau, sambu na kudya. Ntangu yandi mesala kisambu mpi mezenga mampa mpi mepesa bau yau, bau mebakisa nde yandi kele kibeni Yezu ya melwata nitu ya kimuntu. Kansi na nima, yandi mevila.

Ntangu yai, bau mebakisa sambu na inki nzenza yango kuzabaka mambu mingi! Bau keyufula nde: “Si ntima na beto vandaka kubula sambu na kiese, ntangu yandi vandaka kwenda kusolula ti beto na nzila, ti ntangu yandi vandaka kutendula beto mambu yina kele na Mukanda ya Nzambi.” Nkatu kuvingila, bau metelama mpi bau mevutuka nswalu na Yeruzalemi, kisika bau mekuta bantumwa ya nkaka ti bayina kele ya kuvukana ti bau. Na ntwala Kleopasi ti nkundi na yandi kutuba, bankaka meyita kutuba na kyese yonso nde: “Ya kieleka, Mfumu Yesu me telama na lufwa! Simoni me mona yandi!” Na nima bayina zole meta mutindu Yezu kumonanaka mpi na bau. Yai mbala ya iya ya yandi memonika na bantu ya kuswaswana na kati ya balongoki na yandi na kilumbu yango yina.

Na kintulumukina Yezu memonana mbala ya tanu. Ata nkutu byelo kele ya kukangisa sambu balongoki kebanga Bayuda, yandi mekota, yandi metelama kibeni na katikati na bau, mpi metuba nde: “Ngemba kuvanda na beno.” (NW) Bau mewa boma, na kuyindulaka nde bau memona mpeve. Ebuna na kutendulaka nde yandi kele mbona-meso ve, Yezu metuba nde: “Sambu na nki mabanza na beno me kuma bisakasaka? Sambu na nki beno ke na ntima zole? Beno tala maboko na mono, ti makulu na mono: mono yandi yai Yesu. Beno kwisa kusimba mono, beno tala mono; sambu [mpeve, NW] ke vandaka na misuni to na mikwa ve, kansi mono ke na yo mutindu beno ke mona.” Ata mpidina, bau kekwikila kibeni ve.

Sambu na kusadisa bau na kubakisa nde yandi kele kibeni Yezu, yandi meyufula nde: “Keti beno ke na kima ya kudia awa?” Na nima ya kundima kitini ya mbisi ya masa ya kuyoka mpi kudya yau, yandi ketuba nde: “Yai kele mambu ya mono tubilaka beno, ntangu mono vandaka kaka ti beno [na ntwala ya lufwa na mono], nde mambu yina yonso ya bo sonikaka sambu na mono na mikanda ya Bansiku ya Moize, na mikanda ya baprofete, ti na mukanda ya Bankunga, mambu yina fweti kulunga.”

Na kulandaka kima yina fwete kubingama kulonguka ya Biblia ti bau, Yezu kelonga nde: “Mambu yina ya bo sonikaka na Mukanda ya Nzambi yo yai: Mesia fweti fwa, ebuna yandi fweti telama na lufwa na kilumbu ya tatu. Na zina na yandi, balonguki na yandi fweti zabisa bantu na kubalula ntima sambu Nzambi kulolula bo sambu na masumu ya bo me sala. Bo fweti zabisa nsangu yai ntete na bwala Yeruzalemi, ebuna na nima na makanda yonso ya bantu. Beno kele batemwe ya mambu yai.”

Kana sambu na inki kikuma, Toma kele ve na lukutakanu yai ya mfunu ya Lumingu na nkokila. Ebuna na bilumbu yina ya melanda, bankaka ketela yandi yau na kyese yonso nde: “Beto monaka Mfumu Yezu.”

Toma mebuya nde: “Kana mono kumona ve kisika yina ya bansonso kotaka na maboko na yandi, kana mono kutula ve musapi na mono na bisika yina ya bansonso vandaka, mpi kana mono kutula ve diboko na mpanzi na yandi, mono ta ndima mambu yina ve.”

Ebuna, bilumbu nana na nima balongoki kele dyaka ya kuvukana na kati ya nzo. Ntangu yai, Toma kele ti bau. Ata nkutu byelo kele ya kukanga, Yezu mekota dyaka na katikati na bau mpi metuba nde: “Ngemba kuvanda na beno.” (NW) Na nima, yandi mebaluka na Toma, mebingisa yandi nde: “Kwisa kutula musapi na nge awa; tala maboko na mono. Kwisa kutula diboko na nge na mpanzi na mono. Kutulaka ntembe diaka ve, kansi kwikila.”

Toma metuba nde: “Mfumu na mono! Nzambi na mono!”

Yezu meyufula nde: “Keti nge me ndima mono sambu nge me mona mono? Kiese na bantu yina ta tula ntima na mono, ata bo kumona mono ve!” Luka 24:​11, 13-48; Yoane 20:​19-29.

▪ Inki mambu nzenza meyufula balongoki yina zole ya kekwenda na Emausi?

▪ Inki mambu nzenza metuba yina mebudisa bantima ya balongoki na kati na bau?

▪ Inki mutindu balongoki mebakisa kana nzenza yango kele nani?

▪ Ntangu Kleopasi ti nkundi na yandi mevutuka na Yeruzalemi, inki nsangu ya kyese bau mewa?

▪ Tanga bambala tanu ya Yezu memonana na balongoki na yandi mpi inki mambu mesalama na bantangu yango?

▪ Inki dyambu mesalama bilumbu nana na nima ya kumonana ya tanu ya Yezu, mpi inki mendimisa Toma na nsukansuka nde Yezu kele na luzingu?