Kapu 130

Na Nzadi ya Galilea

NTANGU yai, bantumwa mevutuka na Galilea, mutindu Yezu kutubilaka bau na ntwala. Kansi bau kebakisa ve mambu ya bau fwete kusala kuna. Na nima ya mwa ntangu, Piere metubila Toma, Natanaele, Yakobo ti mpangi na yandi Yoane, ti bantumwa ya nkaka zole nde: “Mono ke kwenda kuloba.”

Bau yonso sambanu mevutula nde: “Beto mpi ke kwenda na nge nzila mosi.”

Na mpimpa yonso, bau mekanga ve ata kima mosi. Kansi, ntangu ya nsemo kebasika Yezu mekwisa kumonana na lweka ya masa, kansi bantumwa kebakisa ve nde yina kele Yezu. Yandi meboka nde: “Baleke, keti beno kele na kima ya kudya?” (NW)

Bau meboka kuna na masa nde: “Ve.”

Yandi metuba nde: “Beno losa bukondi na beno na lweka ya bwatu na diboko ya kibakala, ebuna beno ta mona bambisi.” Mpi ntangu bau mesala yau, bau mekuka ve na kubasisa bukondi na bau sambu yau kele ya kufuluka na bambisi.

Yoane meboka nde: “Yai kele Mfumu!”

Ntangu yandi mewa mpila yina, Piere mekangisa lele na yandi ya zulu na luketu, sambu yandi katulaka bilele na yandi, mpi yandi mekudilosa na kati ya nzadi. Na nima, yandi mekasa na kiteso ya bametere 90. Bantumwa ya nkaka melanda yandi na bwatu ya fyoti, na kubendaka bukondi ya kufuluka ti bambisi.

Ntangu bau mekuma na lweka ya masa, bau mekuta diziku ya tiya ya makala, ti bambisi na zulu na yau, mpi mampa. Yezu ketuba nde: “Beno kwisa kunata ndambu ya bambisi yina ya beno me kanga sesepi yai.” Piere mekota na kati ya bwatu mpi mebenda bukondi na lweka ya masa. Yau kele ti bambisi 153 ya nene!

Yezu mebinga nde: “Beno kwisa kudia.”

Ata mosi ve na kati na bau mebaka kikesa ya kuyufula nde, “Nge kele nani?” sambu bau yonso kezaba nde yina kele Yezu. Yai kele mbala na yandi ya nswambwadi ya yandi kemonana na nima ya lufutumuku na yandi, mpi mbala na yandi ya tatu na bantumwa na kimvuka. Ntangu yai yandi mepesa madya ya suka, na kukabisilaka mosi mosi na kati na bau mampa ti bambisi.

Ntangu bau memanisa na kudya, yau kemonana nde Yezu kele na kutala bambisi ya mingi ya kukangamaka, yandi keyufula Piere nde: “Simoni mwana ya Yoane, [keti nge kezolaka mono kuluta bayai, NW]?” Na ntembe ve yandi kezola kutuba nde, keti nge kele ya kukangama mingi na kisalu ya kuloba bambisi kuluta na kisalu ya mono kulongaka nge na kusala?

Piere mevutula nde: “E, Mfumu, nge zaba nde mono ke zolaka nge.”

Yezu mevutula nde: “Keba bana-mameme na mono.”

Dyaka, na mbala ya zole, yandi meyufula nde: “Simoni, mwana ya Yoane, nge ke zolaka mono?”

Piere mevutula nde: “E, Mfumu, nge zaba nde mono ke zolaka nge.”

Yezu metuma dyaka nde: “Keba mameme na mono.”

Na nima, na mbala ya tatu, yandi meyufula yandi nde: “Simoni, mwana ya Yoane, nge ke zolaka mono?”

Ntangu yai, Piere mekudiwa mawa. Ngatu yandi kekudiyufula kana Yezu kebefula kwikama na yandi. Sambu, ntama mingi ve, ntangu Yezu vandaka kusambisama sambu na luzingu na yandi, Piere kubuyaka yandi mbala tatu nde yandi kuzaba yandi ve. Ebuna Piere ketuba nde: “Mfumu, nge zaba mambu yonso; nge zaba nde mono ke zolaka nge.”

Yezu metuma na mbala ya tatu nde: “Keba mameme na mono.”

Na yau, Piere kele ve yandi mosi kaka muntu ya Yezu ketubila, yandi ketubila mpi bankaka, Yezu kezola kumonisa bau inki kisalu yandi kezola kumona bau na kusala. Kubika fyoti yandi takatuka na ntoto, mpi yandi kezola nde bau kubaka ntwala na kusamuna na bantu yina tatwadisama na lupangu ya mameme ya Nzambi.

Kaka mutindu bau kukangisaka Yezu mpi bau kufwaka yandi sambu yandi kusalaka kisalu ya Nzambi kupesaka yandi na kusala, ebuna, yandi kesonga ntangu yai nde, Piere tamona mpasi ya mutindu mosi. Yandi ketubila yandi nde: “Ntangu nge vandaka mwana, nge vandaka kulwata mukaba na nge nge mosi, ebuna nge vandaka kwenda konso ndambu ya nge vandaka kuzola; kansi ntangu nge ta kuma mbuta, nge ta tandula maboko na nge, muntu ya nkaka ta lwatisa nge mukaba na nge, ebuna yandi ta nata nge na ndambu yina ya nge ta zola ve kwenda.” Ata nkutu kugondama na kisika ya bantu ya nkaka kevingila Piere, Yezu kesyamisa yandi nde: “Fula na kulanda mono.” (NW)

Na ntangu yandi mebaluka, Piere memona Yoane mpi meyufula yandi nde: “Mfumu, ebuna nki mambu ta kwisila yandi yai?”

Yezu mevutula nde: “Kana mono zola nde yandi zinga tii na ntangu mono ta kwisa kuvutuka diaka, keti mambu yina me tadila nge? Kansi nge, [fula na kulanda mono, NW].” Bangogo yai ya Yezu balongoki mingi kubakisaka yau nde ntumwa Yoane tafwa ve ata inki mutindu. Kansi, mutindu ntumwa Yoane kutendulaka yau na nima, Yezu kutubaka ve nde yandi tafwa ve, kansi Yezu kutubaka kaka nde: “Kana mono zola nde yandi zinga tii na ntangu mono ta kwisa kuvutuka diaka, keti mambu yina me tadila nge?”

Na nima, Yoane kutubaka dyaka dyambu yai ya kufuluka na ntendula nde: “Yesu salaka diaka mambu ya nkaka mingi. Kana bo sonikaka mambu yonso mosi-mosi na mikanda, mono banza bisika zolaka kulunga ve na nsi-ntoto ya mvimba sambu na kutula mikanda yina.” Yoane 21:​1-25; Matayo 26:32; 28:​7, 10.

▪ Inki kemonisa nde bantumwa kemona ve kima ya bau fwete kusala na Galilea?

▪ Inki mutindu bantumwa mezaba Yezu na Nzadi ya Galilea?

▪ Ntangu yai, mbala ikwa Yezu memonana kubanda lufutumuku na yandi?

▪ Inki mutindu Yezu metubila mingi mambu ya yandi kezola nde bantumwa kusala?

▪ Inki mutindu Yezu memonisa mutindu ya Piere tafwa?

▪ Inki komantere ya Yezu na yina metadila Yoane balongoki mingi kubakisaka ve mbote?