Kapu 131

Bambonika ya Nsuka, mpi Pantekoti ya Mvu 33 T.B.

NA NTANGU mosi, Yezu mesala bangidika sambu bantumwa kukuta yandi na ngumba mosi na Galilea. Yau kemonana nde bau mesonga mpi balongoki ya nkaka, mpi kimvuka ya bantu kuluta 500 mevukana. Lukutakanu ya kyese ya inki mutindu yau kele ntangu Yezu memonana mpi meyantika na kulonga bau!

Na kati ya mambu yango, Yezu ketendudila kibuka ya nene nde Nzambi mepesaka yandi kiyeka yonso na zulu ti na ntoto. Yandi kesyamisa bau nde: “Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya [mpeve santu, NW], beno longa bo mpi na kulanda mambu yonso ya mono vandaka kusonga beno na kusala.”

Yindula ntete! Bankento, babakala, ti bana bau yonso mebaka kisalu yai mosi ya kukumisa bantu balongoki. Batelemini tameka na kukangisa kisalu na bau ya kusamuna mpi ya kulonga, kansi Yezu kesyamisa bau nde: “Beno fweti zaba mbote nde mono ta vandaka ti beno bilumbu yonso tii na nsuka ya [ngidika ya bima yai, NW].” Yezu tabikala ti balandi na yandi na nsadisa ya mpeve santu, sambu na kusadisa bau na kulungisa kisalu na bau.

Na kimvuka, Yezu mekudimonisa na balongoki na yandi nde yandi kezinga na nsungi ya bilumbu 40 na nima ya lufutumuku na yandi. Na ntangu ya mbonika na yandi yai, yandi melonga bau mambu yina metala Kimfumu ya Nzambi, mpi yandi metubila mingi mikumba ya bau kele na yau bonso balongoki na yandi. Na okazyo mosi yandi memonana nkutu na mpangi na yandi ya mama mosi Yakobo mpi mendimisa muntu yai ya kuvandaka kundima ntete ve nde Yandi kele kibeni Kristu.

Ntangu bantumwa kele kaka na Galilea, na ntembe ve, Yezu metuma bau na kuvutuka na Yeruzalemi. Ntangu yandi mekutana ti bau kuna, yandi metubila bau nde: “Beno katuka ve na Yeruzalemi. Beno fweti vingila kaka mambu yina ya Tata Nzambi silaka ti ya mono zabisaka beno. Yoane vandaka kubotika bantu na masa, kansi na nima ya bilumbu fioti, bo ta botika beno na [mpeve santu].”

Na nima, Yezu mekutana dyaka ti bantumwa na yandi mpi menata bau na nganda ya mbanza tii na Betania, yina kele na ndambu ya esti ya Ngumba ya Baolive. Na ngituka yonso, ata yandi metuba mambu yonso yina metala kukwenda na yandi na zulu yina mefinama, bau kekwikila kaka nde Kimfumu tatulama na zulu ya ntoto. Yau yina, bau keyufula nde: “Mfumu, keti na ntangu yo [yai] nge [ke] vutula diaka kimfumu na bantu ya Israele?”

Na kisika ya kumeka dyaka na kusongisa mbakisa na bau ya mbi, Yezu mevutula kaka nde: “Yo kele mambu na beno ve na kuzaba ntangu to bilumbu yina ya Tata Nzambi kanaka na kiyeka na yandi mosi.” Na nima, na kutubilaka mingi dyaka kisalu ya bau fwete kusala, yandi ketuba nde: “Beno ta baka ngolo ntangu [m]peve ya Nzambi ta kwisa kukulumuka na zulu ya ntu na beno. Ebuna beno ta zabisa nsangu na mono na bwala Yeruzalemi, na ntoto ya Yudea yonso, na ntoto ya Samaria yonso, tii na nsuka ya ntoto.”

Na meso na bau, Yezu meyantika na kumata na zulu, mpi na nima matuti mefika yandi na mpila nde bau kemona yandi dyaka ve. Na nima ya kukatula nitu na yandi ya kinsuni, yandi memata na zulu bonso muntu ya kimpeve. Ntangu bau yonso 11 kelanda na kutala na zulu, bantu 2 mekwisa kumonana na bau na bilele ya mpembe. Bawanzyo yai ya kulwataka nitu ya kinsuni meyufula nde: “Beno bantu ya Galilea, sambu na nki beno me telama awa, ke tala na zulu? Muntu yai Yezu, ya Nzambi me tombula na meso na beno tii na zulu, yandi ta kwisa kuvutuka diaka mutindu mosi bonso ya beno me mona yandi ke kwenda na zulu.”

Mutindu ya Yezu mekatuka kubikisa ntoto kele ya kukonda kubula kilolo ya bantu yonso mpi kaka balandi na yandi ya kwikama ketala. Yau yina, yandi tavutuka mpi na mutindu yina​—⁠ya kukonda kubula kilolo ya bantu yonso mpi kaka balandi na yandi ya kwikama bantu taswasukisa nde yandi mevutuka mpi yandi meyantika kumonana na yandi na ngolo ya Kimfumu.

Ntangu yai, bantumwa mekulumuka na Ngumba ya Baolive, bau mesabuka Muwanda ya Kidroni, mpi bau mekota dyaka na Yeruzalemi. Bau mevanda kuna sambu na kulemfukila ntuma ya Yezu. Na nima ya bilumbu kumi, na ntangu ya Nkinsi ya Bayuda ya Pantekoti ya mvu 33 T.B., ntangu balongoki 120 kele ya kuvukana na suku ya zulu na Yeruzalemi, na kintulumukina, makelele bonso yina ya mupepe ya ngolo mefuluka na kati ya nzo yonso. Baludimi bonso ya tiya memonana, mpi ludimi mosi mosi mevanda na zulu ya konso muntu yina kele pana, mpi balongoki yonso meyantika na kutuba na bandinga ya kuswaswana. Yai kele kutyamuka ya mpeve santu ya Yezu kusilaka! Matayo 28:​16-20; Luka 24:​49-52; 1 Korinto 15:​5-7; Bisalu 1:​3-15; 2:​1-4.

▪ Na banani Yezu mepesa bantuma ya kukwendila na ngumba ya Galilea, mpi inki bantuma yango?

▪ Inki nsyamisa Yezu mepesa sambu na balongoki na yandi, mpi inki mutindu yandi tavanda ti bau?

▪ Na nima ya lufutumuku na yandi, Yezu memonana na balongoki na yandi bantangu ikwa, mpi inki mambu yandi melonga bau?

▪ Yezu memonana na inki muntu yina kuvandaka kibeni ve longoki na yandi na ntwala ya lufwa na yandi?

▪ Inki balukutakanu ya nsuka zole Yezu mesala ti bantumwa na yandi, mpi inki mesalama na baokazyo yango?

▪ Na inki sansa Yezu tavutuka na mutindu mosi bonso yina ya yandi mekwenda?

▪ Inki mambu mesalama na Pantekoti ya mvu 33 T.B.?