Kapu 132

Na Diboko ya Kibakala ya Nzambi

KUTYAMUKA ya mpeve santu na Pantekoti kele nzikisa yina kemonisa nde Yezu mekuma na zulu. Mbona-meso ya kupesamaka na Etiene ntangu fyoti na nima, kemonisa mpi nde Yandi kumaka kuna. Kaka na ntwala yandi kubulama matadi sambu na kimbangi na yandi ya kwikama, Etiene ketuba nde: “Tala, mono ke mona zulu me kanguka, Mwana-muntu me telama na diboko ya kibakala ya Nzambi.”

Na ntangu yandi kele na diboko ya kibakala ya Nzambi, Yezu kevingila ntuma yina takatuka na Tata na yandi nde: “Kwenda kuyala na kati ya bambeni na nge.” (NW) Kansi na kuvingilaka, tii kuna yandi kubaka kiyeka na zulu ya bambeni na yandi, inki Yezu kesala? Yandi keyala na zulu ya balongoki na yandi ya kupakulama, na kutwadisaka bau na kisalu na bau ya kusamuna mpi na kubongisaka bau na kukuma bankundi bamfumu ti yandi na Kimfumu ya Tata na yandi na nzila ya lufutumuku.

Mu mbandu, Yezu mesola Saule (yina kuzabanaka na nima na zina ya bantu ya Roma nde, Polo) sambu na kunata na ntwala kisalu ya kukumisa bantu balongoki na bansi ya nkaka. Saule kele na kikesa ya mingi sambu na Nsiku ya Nzambi, kansi yandi ketwadisama na bamfumu ya dibundu ya Bayuda. Yau yina, Saule mendima kaka ve nde bau kufwa Etiene, kansi mpi yandi mekwenda na Damasi na nswa ya mfumu ya banganga-Nzambi Kaifa sambu na kukanga konso bakala to nkento yina ya yandi takuta kuna, bayina kele balandi ya Yezu sambu na kunata bau na Yeruzalemi. Kansi, ntangu Saule kele na nzila, nsemo ya ngolo memonana na kintulumukina na nzyunga na yandi mpi yandi mebwa na ntoto.

Ndinga mosi ya mekatuka na kisika ya kukonda kumonana meyufula nde: “Saule, Saule, sambu na nki nge ke monisa mono mpasi?” Saule meyufula nde: “Mfumu, nge nani?”

Ndinga mevutula nde: “Mono Yesu, muntu yina ya nge ke monisa mpasi.”

Saule, yina mefwa meso sambu na nsemo ya kimangu, Yezu mesonga yandi na kwenda na Damasi mpi na kuvingila bantuma. Na nima Yezu memonana na mbona-meso na Ananiasi, mosi na kati ya balongoki na yandi. Sambu na Saule, Yezu metubila Ananiasi nde: “Yandi kele muntu ya mono me solaka na kuzabisa zina na mono na bantu yina kele Bayuda ve, na bantotila na bo ti na bantu ya Israele.”

Ya kyeleka, na nsadisa ya Yezu, Saule (yina mezabanaka nde Polo) ti baevanzeliste ya nkaka kubakaka bambutu ya mingi na kisalu na bau ya kusamuna ti ya kulonga. Na masonga yonso, kiteso ya bamvula 25 na nima Yezu memonana na yandi na nzila ya Damasi, Polo kesonika nde “nsangu ya mbote mesamunama na lugangu yonso ya kele na nsi ya zulu.” (NW)

Na nima ya bamvula ya nkaka mingi, Yezu mepesa ndandana ya bambona-meso na ntumwa na yandi ya zola, Yoane. Na nzila ya bambona-meso yai ya Yoane ketendula na mukanda ya Biblia ya Kusonga, yandi mezinga kibeni sambu na kumona Yezu kevutuka na ngolo ya Kimfumu. Yoane memona nde “na nsadisa ya mpeve santu” (NW) bau kunataka yandi na ntwala na ntangu ya “kilumbu ya Mfumu.” Inki “kilumbu” yango?

Kulonguka ya mbotembote ya bambikudulu ya Biblia, ti mbikudulu ya yandi mosi Yezu yina metala bilumbu ya nsuka, kemonisa nde “kilumbu ya Mfumu” kuyantikaka na 1914, mvula yina ya bantu lenda kuvila ve! Ebuna, yau vandaka na mvu 1914 ya Yezu kuvutukaka na mutindu mosi ya kukonda kumonana, nkatu kilolo ya bantu yonso mpi kaka bansadi na yandi ya kwikama bantu kuzabaka kuvutuka na yandi. Na mvula yango yina, Yehowa kupesaka Yezu ntuma ya kuyala na kati ya bambeni na yandi!

Na kulemfukilaka ntuma ya Tata na yandi, Yezu kugedisaka mazulu na kukatulaka Satana ti bampeve na yandi ya mbi, na kulosaka bau na zulu ya ntoto. Na nima ya kumona dyambu yai mesalama na mbona-meso, Yoane mewa ndinga ya mekatuka na zulu ketuba nde: “Ntangu yai lugulusu ti ngolo ti kimfumu ya Nzambi na beto ti kiyeka ya Kristu na yandi mekwisa!” (NW) Ee, na 1914 Kristu kuyantikaka na kuyala bonso Ntotila!

Nsangu ya mbote ya inki mutindu yai sambu na bansambidi ya Yehowa na zulu! Bau kesyamisa nde: “Nge zulu ti beno bantu ke zingaka kuna, beno vanda na kiese!” Kansi inki mvwandilu kele sambu na bayina kele na zulu ya ntoto? Ndinga ya kekatuka na zulu kelanda nde: “Mawa mingi na ntoto ti na nzadi-mungwa! Sambu Satana me kwisa kukulumuka kuna na beno; yandi me dasuka, sambu yandi me zaba nde ntangu mingi ve me bika na yandi.”

Ntangu yai kibeni, beto kele na nsungi yango yina ya ntangu mingi ve. Ntangu yai, bantu kemonisa kana bau mefwana na kukota na inza ya mpa ya Nzambi to na kufwa. Kyeleka kele nde, makwisa na nge mosi kesimbama na mutindu ya nge kevutula mvutu na nsangu ya mbote ya Kimfumu ya Nzambi yina kesamunama na ntoto ya mvimba na lutwadisu ya Kristu.

Na nima, Yezu tasala bonso Nsadi ya Nzambi sambu na kukatula ngidika ya bima ya Satana yonso ti bayina yonso ya kesadisa yau na zulu ya ntoto. Yezu talungisa kukatulama ya mambi yonso na mvita ya mebingama na Biblia nde Har–​Magedoni, to Armagedoni. Na nima na yau, Yezu Muntu ya kuluta nene na luyalanganu na nima ya Yehowa Nzambi, tasimba Satana ti bampeve na yandi ya mbi mpi yandi takanga bau bansinga sambu na bamvula funda na kati ya “dibulu ya nda,” disongidila, nkadilu ya kukonda kisalu ya kufwanana na lufwa. Bisalu 7:​55-60; 8:​1-3; 9:​1-19; 16:​6-10; Nkunga 110:​1, 2; Baebreo 10:​12, 13; 1 Piere 3:22; Luka 22:​28-30; Kolosai 1:​13, 23; Kusonga 1:​1, 10; 12:​7-12; 16:​14-16; 20:​1-3; Matayo 24:⁠14.

▪ Na nima ya kumata ya Yezu na zulu, na wapi yandi kele, mpi inki yandi kevingila?

▪ Na zulu ya nani Yezu keyala na nima ya kumata na zulu, mpi inki mutindu luyalu na yandi kemonisama?

▪ Inki ntangu “kilumbu ya Mfumu” kuyantikaka, mpi inki dyambu kusalamaka na luyantiku na yau?

▪ Inki mutindu kisalu ya kusamuna ya kelanda bubu yai kesimba mosi mosi na kati na beto?

▪ Ntangu kisalu ya kusamuna yai tamana, inki dyambu talanda?