Kapu 133

Yezu Memanisa Yonso ya Nzambi Kulombaka

NTANGU Ntotila, Kinwani-bitumba, Yezu Kristu takatula Satana ti inza na yandi ya kukonda lunungu, kyese ya inki mutindu yau tavanda! Luyalu ya Bamvula Funda ya ngemba ya Yezu tayantika na nsuka!

Na lutwadisu ya Yezu ti bankundi na yandi bantotila, baguluki ya Armagedoni takomba bamvindu ya mvita ya lunungu tabikisa. Yau kemonana nde, baguluki ya ntoto tabuta mpi bana, mpi bayai tavukana na kisalu ya kitoko ya kudima ntoto sambu na kukumisa yau masamba ya kufwanana na parke ya kitoko.

Na nima ya mwa ntangu, Yezu tabasisa ntalu ya kukonda kuzabana ya bantu na mazyamu na bau sambu na kuyangalala na Paladisu yai ya kitoko. Yandi tasala yau sambu na kulungisa lusilu na yandi ya ketuba nde: “Na ntangu ke kwisa, bantu yonso yina kele na maziamu [ya lubambukilu, NW], . . . bo ta basika na maziamu na bo.”

Na kati ya bantu yina ya Yezu tafutumuna, nsadi ya mambi yina kufwaka na lweka na yandi na nti ya mpasi tavanda. Yibuka nde Yezu kusilaka yandi nde: “Ya kyeleka mono ketubila nge bubu yai, Nge tavanda ti mono na kati ya Paladisu.” Ve, muntu yango tanatama ve na zulu sambu na kuyala ti Yezu bonso ntotila, Yezu takuma dyaka ve muntu sambu na kuzinga ti yandi na Paladisu ya ntoto. Kansi, Yezu tavanda ti nsadi ya mambi yina na sansa nde Yandi tafutumuna yandi sambu na kuzinga na kati ya Paladisu mpi yandi tamona nde bampusa na yandi, ya kinsuni ti ya kimpeve kesungiminama, mutindu yau memonisama na kifwanisu na lutiti ya kelanda.

Yindula fyoti! Na dikebi ya zola ya Yezu, dibuta yonso ya bantu​—⁠ya baguluki ya Armagedoni, ti bana na bau, mpi mafuku ya bafutumuki yina kelemfukilaka yandi​—⁠takuma na nkadilu ya bantu ya kukuka. Yehowa, na nsadisa ya Mwana na yandi ya mfumu, Yezu Kristu, tavanda ti bantu na mutindu mosi ya kimpeve. Mutindu ndinga ya kukatukaka na zulu yina Yoane kuwaka ketuba: “Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” Ata muntu mosi ve na zulu ya ntoto tamona mpasi to tabela.

Na nsuka ya Luyalu ya Yezu ya Bamvula Funda, mvwandilu tavanda kibeni mutindu Nzambi kukanaka yau na luyantiku ntangu yandi kutubilaka bantu ya ntete zole, Adami ti Eva, na kubuta mpi na kufulusa ntoto. Ee, ntoto tafuluka ti bantu ya lunungu mpi ya kukuka. Yau kele mpila yina sambu mambote ya nkudulu ya kimenga ya Yezu tapesama na konso muntu. Lufwa ya mekatukaka na disumu ya Adami tavanda dyaka ve!

Na yau, Yezu tavanda melungisa yonso ya Yehowa kulombaka yandi. Mpila yina, na nsuka ya bamvula funda, yandi tapesa Kimfumu ti dibuta ya bantu yina takuma ya kukuka na Tata na yandi. Na nima, Nzambi tabasisa Satana ti bampeve na yandi ya mbi na dibulu ya nda ya nkadilu ya kukonda kisalu ya kufwanana na lufwa. Sambu na inki lukanu?

Ee, na nsuka ya bamvula funda, mingi na kati ya bantu yina tazinga na Paladisu tavanda bafutumuki yina lukwikilu na bau memekamaka ntete ve. Na ntwala ya kufwa, bau bikaka ve kuzaba balusilu ya Nzambi mpi yau yina bau lendaka ve kumonisa lukwikilu na bau na balusilu yango. Yau yina, na nima ya kufutumuka mpi ya kulongama bakyeleka ya Biblia, yau vandilaka bau petepete na kati ya Paladisu, nkatu luteleminu, na kusadila Nzambi. Kansi kana bau kupesa Satana dibaku ya kumeka bau sambu na kuyambula kulanda na kusadila Nzambi, keti bau tamonisa kwikama na nsi ya mumekamu? Sambu na kupesa mvutu na ngyufula yai, Satana tabasisama.

Nzayikusu ya kupesamaka na Yoane kemonisa nde na nima ya Luyalu ya Yezu ya Bamvula Funda, Satana tanunga na kukusa bantu mingi kibeni na kusadila Nzambi. Kansi na nima, ntangu kumekama ya nsuka tamana, Satana, bampeve na yandi ya mbi, ti bayina yonso ya yandi tanunga na kukusa tafwa kimakulu. Na ndambu ya nkaka, bantu yina tanunga na mumekamu, baguluki ya kwikama tazinga sambu na kuyangalala kimakulu ti balusakumunu ya Tata na bau ya zulu.

Yau kemonana pwelele nde, Yezu mesalaka, mpi talanda na kusala kisalu ya mfunu na kulungisaka balukanu ya nkembo ya Nzambi. Makwisa ya kitoko ya inki mutindu beto lenda kuvanda na yau yina tavanda mbutu ya mambu yonso ya yandi talungisa bonso Ntotila ya zulu mpi ya nene ya Nzambi. Kansi, beto lenda ve kuvila mambu yonso yina yandi salaka ntangu yandi vandaka muntu.

Yezu kwisaka na zulu ya ntoto na luzolo yonso mpi yandi longaka beto mambu yina metala Tata na yandi. Na zulu ya dyambu yai, yandi pesaka mbandu ya bankadulu ya mbote kibeni ya Nzambi. Yau kesimba bantima na beto ntangu beto ketadila kikesa na yandi ya kuluta mingi mpi ya bakala, mayele na yandi ya beto lenda kutesa ve, kingangu na yandi ya mingi na kulonga, lutwadisu na yandi ya kukonda boma, nkenda ti mawa na yandi ya mawete. Ntangu beto keyibuka mutindu yandi kumonaka mpasi ya kuluta sambu na kufuta nkudulu, kima kaka mosi yina beto lenda kubakila luzingu, ya kyeleka, bantima na beto kefuluka na ntonda sambu na yandi!

Ya kyeleka, muntu ya kuyituka ya inki mutindu beto memona na kulonguka yai ya luzingu ya Yezu! Bunene na yandi kemonana mpi yau lenda kubuyama ve. Beto kepusama na kundima bangogo ya guvernere ya Roma Ponse Pilate yina kutubaka nde: “Tala, muntu yandi yai!” Ee, ya kyeleka, “Muntu,” muntu ya kuluta nene ya ntangu yonso!

Kana beto kendima mbalu ya kimenga na yandi ya nkudulu, kilo ya masumu ti lufwa ya kukatukaka na Adami bau lenda kukatula beto yau, mpi Yezu lenda kukuma “Tata ya Mvula na Mvula” na beto. Bayina yonso kezola kubaka luzingu ya mvula na mvula fwete kubaka nzayilu ya Nzambi mpamba ve kansi mpi ya Mwana na yandi, Yezu Kristu. Bika kutanga na nge mpi kulonguka na nge ya mukanda yai kusadisa nge na kubaka nzayilu ya mutindu yina ya kepesaka luzingu! 1 Yoane 2:17; 1:7; Yoane 5:​28, 29; 3:16; 17:3; 19:5; Luka 23:​43, NW; Kuyantika 1:28; 1 Korinto 15:​24-28; Kusonga 20:​1-3, 6-10; 21:​3, 4; Yezaya 9:⁠6.

▪ Inki dibaku ya kyese baguluki ya Armagedoni ti bana na bau tavanda na yau?

▪ Banani tayangalala na Paladisu katula baguluki ya Aramagedoni ti bana na bau, mpi na inki mutindu Yezu tavanda ti bau?

▪ Inki mvwandilu tavanda na nsuka ya bamvula funda, mpi na nima inki Yezu tasala?

▪ Sambu na inki Satana tabasisama na dibulu ya nda, mpi na nsukansuka, inki takumina yandi kibeni ti bayina talanda yandi?

▪ Inki mutindu Yezu lenda kukuma “Tata ya Mvula na Mvula” na beto?