Bampeve Kele Ve Bigangwa ya Me Zingaka na Ntoto mpi Me Fwaka
Bampeve ke vandaka. Na insi yina bigangwa ya kimpeve yina ke monanaka ve kele, yo ke vandaka ti bampeve ya mbote mpi ya mbi. Keti bo kele bantu yina zingaka mpi fwaka na ntoto?
Ve. Kana muntu me fwa, yandi ke kwendaka ve kuzinga na insi ya bampeve, mutindu bantu mingi ke yindulaka. Inki mutindu beto me zaba yo? Sambu Biblia ke tubila yo. Biblia kele mukanda ya kieleka ya me katuka na Nzambi mosi kaka ya kieleka. Zina na yandi Yehowa. Yehowa muntu me salaka bantu; yandi me zaba mbote inki ke kuminaka bo kana bo me fwa.—Nkunga 83:18; 2 Timoteo 3:16.
Adami katukaka na ntoto, yandi vutukaka mpi na ntoto
Biblia ke tuba nde Nzambi salaka Adami, bakala ya ntete, “na mfututu ya ntoto.” (Kuyantika 2:7) Nzambi tulaka yandi na Paladisu, kilanga ya Edeni. Kana Adami lemfukaka na nsiku ya Yehowa, yandi zolaka ve kufwa; yandi zolaka kuvanda na luzingu awa na ntoto tii bubu yai. Kansi ntangu Adami zitisaka ve nsiku ya Nzambi na luzolo yonso, Nzambi songaka yandi nde: “Nge ta vutuka na ntoto, sambu bo bakaka nge na ntoto. Nge kele mfututu mpi nge ta vutuka na mfututu.”—Kuyantika 3:19.
Yo ke tendula inki? Adami vandaka na wapi na ntwala nde Yehowa kuganga yandi na mfututu? Ata kisika mosi ve. Yandi vandaka ve mpeve mosi buna na zulu ya vandaka me butuka ntete ve. Yandi vandaka ve ata kisika mosi. Yo yina ntangu Yehowa tubaka nde Adami “ta vutuka na ntoto,” yandi zolaka kutuba nde yandi ta fwa. Adami kumaka ve mpeve. Ntangu Adami fwaka, yandi vandaka diaka ve ti luzingu. Lufwa ke tendula kukonda luzingu.
Inki beto lenda tuba sambu na bantu ya nkaka ya me fwaka? Keti bo mpi bo kele diaka ve? Biblia ke pesa mvutu nde:
“Bo yonso [bantu mpi bambisi] ke kwenda kisika mosi. Bo yonso katukaka na mfututu, mpi bo yonso ke vutuka na mfututu.”—Longi 3:20.
“Bafwa . . . ke zabaka kima ve.”—Longi 9:5.
“Zola na bo, kimbeni na bo, mpi kimpala na bo me manaka ntama.”—Longi 9:6.
“Kisalu, lukanu, nzayilu, mpi mayele kele ve na Maziamu, kisika yina nge ke kwenda.”—Longi 9:10.
“[Muntu] ke vutukaka na ntoto; kaka na kilumbu yina mabanza na yandi ke vilaka.”—Nkunga 146:4.
Kaka bantu ya kele na luzingu bantu lenda sala mambu yai
Keti nge ke ndima kibeni ve mambu baverse yai ke tuba? Kana ee, yindula fioti diambu yai: Na mabuta mingi, bakala muntu ke sosaka mbongo sambu na kulungisa bampusa ya bantu ya dibuta na yandi. Kana yandi me fwa, mbala mingi dibuta na yandi ta kuma kukutana ti bampasi. Bantangu ya nkaka, nkento na yandi mpi bana na yandi ta vanda ve ti mbongo ya kusumbila madia. Mbala ya nkaka mpi bambeni ya bakala yina ta kuma kuniokula bo ngolo. Sesepi kudiyula nde: ‘Kana bakala yina kele na luzingu na insi ya bafwa, sambu na inki yandi ke landa ve kulungisa bampusa ya bantu ya dibuta na yandi? Sambu na inki yandi ke tanina bo ve na bantu ya mbi?’ Yo kele sambu Masonuku ke tubaka masonga: muntu yina kele ve na luzingu, yandi lenda sala ata kima mosi ve.—Nkunga 115:17.
Bafwa lenda sadisa ve bantu yina kele na nzala, bo lenda tanina mpi ve bantu kana bantu ya nkaka ke niokula bo
Keti yo ke tendula nde bafwa ta vutuka diaka ve na luzingu? Ve, mpidina ve. Beto ta tubila lufutumuku na nima. Kansi, yo ke tendula nde bafwa ke zabaka ve mambu ya nge ke sala. Bo ke monaka nge ve, bo lenda wa nge ve, mpi bo lenda solula ve ti nge. Nge fwete wa bo ve boma. Bo lenda sadisa nge ve, mpi bo lenda sala nge ve mbi.—Longi 9:4; Yezaya 26:14.