Mambu ya Mbote na Bilumbu Ke Kwisa

Satana ti bademo na yandi ta kusaka ve bantu ntangu yonso. Yehowa me kulaka bo dezia na zulu. (Kusonga 12:9) Na bilumbu ke kwisa, Nzambi ta tadila mambu ya Satana ti bademo na yandi. Na mbonameso mosi ya Nzambi songaka yandi, ntumwa Yoane tubaka nde: “Ebuna mono monaka wanzio ke katuka na zulu mpi ke kwisa kukulumuka, yandi vandaka ti nsapi ya dibulu ya nda mpi muniololo mosi ya nene na diboko na yandi. Yandi simbaka dragoni, nioka ya ntama, yina kele Diabulu mpi Satana, mpi yandi kangaka yandi bamvula 1 000. Ebuna yandi losaka yandi na dibulu ya nda, kangaka yo, mpi tulaka kidimbu na zulu na yo, sambu yandi kusa diaka ve makanda tii kuna bamvula 1 000 ta suka.” (Kusonga 20:1-3) Na nima, bo ta fwa Diabulu ti bademo na yandi kimakulu.​—Kusonga 20:10.

Bantu ya mbi mpi ta fwa.​—Nkunga 37:9, 10; Luka 13:5.

Bafwa Ta Zinga Diaka

Ntangu bo ta fwa Satana ti bademo na yandi, Yehowa ta natila bantu mambote mingi. Yibuka nde bafwa ke zingaka ve, bo ke vandaka ve na luzingu. Yezu fwanisaka lufwa ti mpongi​—mpongi ya ngolo ya kukonda bandosi. (Yoane 11:11-14) Yandi tubaka mpidina sambu yandi zabaka nde, ntangu ta kwisa sambu bantu yonso ya me lalaka na lufwa kuvutuka diaka na luzingu. Yandi tubaka nde: “Ntangu ke kwisa ntangu bantu yonso yina kele na maziamu ya kuyibuka ta . . . basika.”​—Yoane 5:28, 29; fwanisa ti Bisalu 24:15.

Bo ta vutuka na luzingu awa na ntoto. Na kisika ya baluzayisu ya lufwa, bo ta pesaka beto baluzayisu ya kiese ya bantu yina me vutuka na luzingu! Beto ta vanda kibeni na kiese ya mingi ya kuyamba bantu ya beto ke zolaka ya ta basika na maziamu.