Kitini 4
Nzambi Ke Zabisa Beto Mambu ya Me Tala Balukanu na Yandi
1, 2. Inki mutindu beto ke zaba nde Nzambi ke pesa bamvutu na bantu yina kekudiyula bangyufula na masonga yonso?
NZAMBI ya zola ke zabisa balukanu na yandi na bantu yina ke sosaka yandi na masonga yonso. Yandi ke pesa bamvutu na bantu yina ke kudiyula sambu na nki yandi me pesaka nzila na bampasi?
2 Biblia ke tuba nde: “Kana nge sosa [Nzambi], yandi ta bika nde nge mona yandi.” “ele ti Nzambi mosi na zulu yina ke zabisaka binsweki.” “Yehowa Mfumu ya Kuluta Nene ta sala kima ve Kana yandi me monisa ntete ve diambu na yandi ya kinsweki na bansadi na yandi bambikudi.”—1 Bansangu 28:9; Daniele 2:28; Amosi 3:7.
Na Wapi Beto Ta Zwa Bamvutu?
3. Na wapi beto lenda zwa bamvutu na bikuma yina Nzambi me pesaka nzila na bampasi?
3 Bamvutu na bangyufula yina ya ke tadila kikuma yina Nzambi me pesaka nzila na mambu ya mbi mpi mutindu yandi ta yidika yo kele na mukanda ya kupemama yina bo sonikaka sambu na mambote na beto. Mukanda yango kele Biblia, Ndinga na yandi. “Masonuku yonso kele ya kupemama na Nzambi mpi yo kele mfunu sambu na kulonga, sambu na kunganina, sambu na kusungika mambu, sambu na kupesa ndola na lunungu, sambu muntu ya Nzambi kuvanda ya kukuka kibeni, mpi ya kufwana kibeni sambu na konso kisalu ya mbote.”—2 Timoteo 3:16, 17.
4, 5. Sambu nki beto lenda fwanisa ve ata fyoti Biblia ti mikanda yonso ya nkaka?
4 Biblia me swaswana ti mikanda yonso ya nkaka. Yo kele na masolo ya kyeleka ya luzingu ya bantu, yantika lugangu ya bantu mpi nkutu ata na ntwala na yo. Dyaka, mambu na yo ke tadila mpi bilumbu na beto sambu bambikudulu na yo ke tadila nsungi na beto mpi bilumbu kekwisa.
5 Ata mukanda mosi ke tubaka mambu ya kyeleka ya me tala luzingu ya bantu bonso Biblia. Mu mbandu, bubu yai bamaniskri ya bansoniki ya ntangu ya Ntama ke mingi dyaka ve. Kansi, beto ke na maniskri ya Biblia; ya nkaka kele kitini mpi ya nkaka kele ya mvimba: kiteso ya bamanikri 6 000 ya Masonuku ya Kiebreo (mikanda 39 ya “Kuwakana ya Ntama”) mpi kiteso ya 13 000 ya Masonuku ya Kigreki ya Bukristu (mikanda 27 ya “Kuwakana ya Mpa”).
6. Sambu na nki beto fwete ndima nde Biblia ya bubu yai kele kibeni kiteso mosi ti masonama ya kupemama ya luyantiku?
6 Nzambi Nkwa-Ngolo, yina pesaka bantu mpeve santu sambu na kusonika Biblia, taninaka bamaniskri yina ya ntama. Ba Biblia ya beto kele ti yo bubu yai kele kiteso mosi ti masonama ya kupemama ya luyantiku. Dyambu ya nkaka ya ke pesa kyese kele nde bamaniskri ya nkaka ya Masonuku ya Kigreki ya Bukristu me luta ve mvu-nkama mosi kana beto fwanisa yo ti bamaniskri ya luyantiku. Bamaniskri ya masonuku ya Ntama yina beto kele ti yo kele na nima ya bamvu-nkama mingi na kutadila bansoniki na yo.
Dikabu ya Nzambi
7. Inki beto lenda tuba na yina me tala Biblia?
7 Biblia kele mukanda yina bo me kabulaka mingi kuluta mikanda yonso. Bo me nyemaka ba Biblia kiteso ya bamiliare tatu. Ata mukanda mosi ve ke pusana na ntalu yai. Dyaka, bo me balulaka Biblia na mvimba to na ndambu na bandinga kiteso ya 2 000. Yo ke monana nde bantu kuluta 98 na kati ya nkama kele ti ba Biblia.
8-10. Tanga mwa bikuma yina fwete pusa beto na kutudila Biblia dikebi ya mingi?
8 Yo me fwana kibeni nde beto tudila Biblia dikebi ya mingi sambu yo ke monisa nde yo me katuka na Nzambi mpi yo ke pesa banzikisa ya pwelele ti ya kyeleka.a Biblia ke tendula lukanu ya luzingu, kikuma yina bampasi kele na nsi-ntoto, mpi yo ke tubila mambu yina bilumbu ke kwisa me bumbila beto. Ata mukanda mosi ve lenda sala mutindu yai.
9 Ya kyeleka, Biblia kele nsangu yina me katuka na Nzambi sambu na bantu. Yandi ta mbwisaka bantu yina sonikaka yo na nzila ya ngolo to mpeve na yandi; kiteso ya bantu 40 sonikaka Biblia. Yo yina, Nzambi ke tubilaka beto na nzila ya Ndinga na yandi, Biblia Musantu. Ntumwa Paulo sonikaka nde: “Ntangu beno ndimaka ndinga ya Nzambi, yina beno waka na beto, beno ndimaka yo ve bonso ndinga ya bantu, kansi mutindu yo kele kibeni, bonso ndinga ya Nzambi.”—1 Tesalonika 2:13.
10 Abraham Lincoln, président ya kumi na sambanu ya Etats-Unis, tubaka sambu na Biblia nde yo kele “dikabu ya kuluta mbalu yina Nzambi me pesaka bantu . . . Kana Biblia ve, beto zolaka ve kuzaba mambu ya mbote mpi ya mbi.” Ntangu yai, beto tubila mambu yina dikabu yai ya mbalu ke zabisa beto na yina me tala mutindu bampasi yantikaka, sambu na nki Nzambi me pesaka nzila na bampasi mpi nki yandi ta sala sambu na kumanisa yo.
[Banoti na nsi ya lutiti]
a Nge ta mona bantendula ya nkaka mingi sambu na yina ke tadila bukyeleka ya Biblia na mukanda La Bible: Parole de Dieu ou des hommes? yina basikaka na 1989 na Watchtower Bible and Tract Society of New York, Inc.
[Kifwanisu ya kele na lutiti 10]
Bible, ya mepemama na Nzambi, ke nsangu yina yandi kezabisa na dibuta ya bantu