Kitini 8
Lukanu ya Nzambi kekwenda na kulungana na yau
1, 2. Inki ngidika Nzambi bakaka sambu na kukatula bampasi?
DIBUTA ya bantu kemona mpasi tuka bamvunkama mingi ya luyalu ya bantu bambendumuni mpi ya bampeve ya imbi. Kansi Nzambi na bamvunkama yai yonso, yandi bakaka bangidika sambu na kugulusa bantu na bupusi ya mambi mpi ya bampasi.
2 Na nsungi ya mbendumuka na Edeni, Nzambi yantikaka na kuzabisa lukanu nandi ya kusala luyalu yina zolaka kumisa ntoto paladisu sambu na bantu. (Genese 3:15) Na nima, Yezu, Kinati-ndinga ya nene ya Nzambi, sadilaka luyalu ya Nzambi yina ya bilumbu kekwisa bonso ntu ya disolo ya malongi nandi. Yandi tubaka nde yau tavanda kivuvu kaka mosi sambu na bantu yonso.—Daniel 2:44; Matai 6:9, 10; 12:21.
3. Inki mutindu Yezu bingaka luyalu ya ntoto ya bilumbu kekwisa, mpi sambu na inki?
3 Yezu bingaka luyalu ya Nzambi yina ya bilumbu kekwisa nde “kimfumu ya mazulu,” sambu yau tayala tuka zulu. (Matai 4:17) Yandi bingaka yau mpi nde “kimfumu ya Nzambi,” sambu Nzambi tavanda Munkwa na yau. (Luka 17:20) Na bamvunkama mingi ya meluta, Nzambi pesaka ngolo ya mpeve santu na bansadi nandi sambu na kusonika bambikudulu sambu na yina ketadila bayina tasala luyalu yango mpi yina yandi talungisa.
Ntotila yampa ya ntoto
4, 5. Inki mutindu Nzambi monisaka nde Yezu ke Ntotila yina yandi mepona?
4 Kuvandaka Yezu, yau meluta kiteso ya bamvula mafunda zole, muntu lungisaka bambikudulu mingi ya ketadila muntu yina tavanda Ntotila ya Kimfumu ya Nzambi. Yandi monisaka nde Nzambi ponaka yandi bonso Mfumu ya luyalu yina tatwadisa bantu yonso tuka mazulu. Dyaka mpi, na nima ya lufwa nandi, Nzambi futumusaka Yezu sambu na kuzinga na zulu bonso kigangwa ya kimpeve ya ngolo mpi ya kukonda kufwa. Batemwe ya lufutumuku nandi vandaka mingi.—Bisalu 4:10; 9:1-9; Roma 1:1-4; 1 Korinte 15:3-8.
5 Ebuna Yezu “vandaka na diboko ya kibakala ya Nzambi.” (Ebeleo 10:12) Kuna, yandi kingaka ntangu yina Nzambi tavwatisa yandi kimfumu sambu na kusala to kuyala bonso Ntotila ya Kimfumu ya zulu ya Nzambi. Mbikudulu ya Nkunga 110:1 lunganaka mutindu yina, sika wapi Nzambi tubaka na Yezu nde: “Vanda na diboko na mono ya kibakala tii ntangu mono tatula bambeni na nge nansi ya makulu na nge.”
6. Inki mutindu Yezu monisaka nde yandi melunga na kuvanda Ntotila ya Kimfumu ya Nzambi?
6 Ntangu yandi vandaka awa na ntoto, Yezu monisaka nde yandi melunga na kuzwa kiyeka yina. Ataku bambangika vandaka mingi, yandi bakaka lukanu ya kubikala kwikama na Nzambi. Na kusalaka mpidina, yandi monisaka nde Diabulu vandaka muntu ya luvunu ntangu yandi tubaka nde ata muntu mosi lenda vanda kwikama ve na Nzambi na ntangu ya kumekama. Yezu, muntu ya kulunga, ‘Adam ya zole,’ monisaka nde Nzambi kudikusamaka ve mutindu yandi gangaka bantu ya kulunga.—1 Korinte 15:22, 45; Matai 4:1-11.
7, 8. Inki mambote Yezu salaka ntangu yandi vandaka awa na ntoto, mpi yandi monisaka inki dyambu?
7 Nani ntwadisi meyitaka sala mambote mingi mpidyai bonso Yezu kaka na bamwa bamvula fyoti ya kisalu nandi ya bunzambi? Mutindu yandi kumaka ngolo na mpeve santu ya Nzambi, Yezu gulusaka bambefo, bantu ya makulu-kifu, bantu ya kufwa-meso, bantu ya makutu-kufwa, babàbá. Yandi futumusaka mpi bantu ya kufwa! Yandi salaka yau ndambu sambu na kumonisa yina yandi tasala sambu na mambote ya bantu yonso ntangu yandi takwisa kuvutuka na kati ya ngolo ya Kimfumu.—Matai 15:30, 31; Luka 7:11-16.
8 Yezu salaka mambote mingi ntangu yandi vandaka awa na ntoto, nkutu longoki nandi Yoane tubaka nde: “Yezu salaka dyaka mambu yankaka mingi. Kana bau sonikaka mambu yonso mosi-mosi na mikanda, mono banza, bisika zolaka kulunga ve na nsi-ntoto ya mvimba sambu na kutula mikanda yina.”—Yoane 21:25.a
9. Sambu na inki bantu yina vandaka na nzala na masonga yonso vandaka kwisa na Yezu?
9 Yezu vandaka muntu ya pima mpi ya ntima mawa, yandi vandaka na zola ya mudindu sambu na bantu yankaka. Yandi vandaka sadisa bansukami mpi bantu yina vandaka na mpasi, kukonda tula luswaswanu to kuponapona kati na bamvwama to bantu ya nene. Bantu yina vandaka na nzala ya masonga yonso vutulaka na kubinga ya zola ya Yezu nde: “Beno kwisa na mono, beno yonso bantu yina melemba, sambu beno kenata kilo ya nene, ebuna mono tapesa beno ntangu ya kupema. Beno baka kilo na mono, beno nata yau; beno vanda balongoki na mono, sambu mono ke muntu ya pima, mono ke muntu ya ntima ya mbote; ebuna beno tazaba kupema. Kilo yina ya mono tapesa beno yau kele mpasi ve na kunata, sambu yau kele kilo mingi ve.” (Matai 11:28-30) Bantu yina vandaka tita Nzambi vandaka kwisa na yandi mpi vandaka kinga luyalu nandi na ntima zuluzulu.—Yoane 12:19.
Bantwadisi bilandi
10, 11. Banani tatambwisa ntoto kumosi ti Yezu?
10 Luyalu ya bantu ke na bantwadisi bilandi: yau ke kiteso mosi mpi sambu na yina ketadila Kimfumu ya zulu ya Nzambi. Yezu takabula lutwadisu ya ntoto ti bantu yankaka, sambu yandi pesaka lusilu na banduku nandi ya kisalu nde bau tayala ntoto kumosi ti yandi bonso bantotila.—Yoane 14:2, 3; Nzayikusu 5:10; 20:6.
11 Mpidina, katula Yezu, ntalu ya bantu fyoti tafutumuka sambu na luzingu ya zulu. Bau kesala Kimfumu ya Nzambi yina tanatila bantu mambote ya kukonda nsuka. (2 Korinte 4:14; Nzayikusu 14:1-3) Jéhovah tulaka lufulu ya luyalu yina tanatila dibuta ya bantu mambote ya mvula na mvula.
Luyalu ya dipanda mekuma na nsuka
12, 13. Inki Kimfumu ya Nzambi tasala kubika mwa ntangu fyoti?
12 Na mvunkama ya makumi zole, Nzambi kotaka mbala mosi na mambu ya ntoto. Mutindu tatendula yau mbotembote ndambu 9 ya kamukanda yai, bambikudulu ya Bible kemonisa nde Kimfumu ya Nzambi mpi ya Kristu tulamaka tuka 1914 mpi yai ke ntangu ya kufwa ngidika ya Satana. Kimfumu yina ke pene na ‘kuyala na kati ya bambeni ya Kristu.’—Nkunga 110:2.
13 Sambu na yau, mbikudulu ya Daniel 2:44 ketuba nde: “Na ntangu ya bantotila yina [ya ke na kuyala bubu yai], Nzambi ya zulu tatelamisa kimfumu mosi [na zulu], yau takufwa ata fyoti ve, mpi kimfumu yina tapesama ve na dikanda yankaka [luyalu ya bantu tavanda dyaka ata fyoti ve]. Yau [Kimfumu ya Nzambi] tadyata mpi tafwa bimfumu yonso yina, mpi yau mosi tayala kimakulu.”—Kuwakana ya Ntama.
14. Tanga mwa mambote yina tamonana na nsuka ya luyalu ya bantu.
14 Ntangu luyalu yonso ya dipanda na Nzambi takatulama, Kimfumu ya Nzambi tayala ntoto ya mvimba. Na kuvandaka na zulu, yau tabebisama ata fyoti ve na muntu. Luyalu tavanda kisika yau vandaka ntete na luyantiku, na zulu, pene na Nzambi. Sambu luyalu ya Nzambi tayala ntoto ya mvimba, ata muntu mosi takusama dyaka ve na dibundu ya luvunu, na bafilozofi ya mpambampamba ya bantu to na mabanza ya bantu ya politike. Bima yina tavanda dyaka ata fyoti ve.—Matai 7:15-23; Nzayikusu, mikapu 17 tii 19.
[Banoti na nsi ya lutiti]
a Nge tamona bangindu mingi ya metendulama ya luzingu ya Yezu na mukanda Le plus grand homme de tous les temps, yina basisamaka na 1991 na la Société Watchtower.
[Bangiufula ya Disolo ya Kulonguka]
[Kifwanisu ya kele na lutiti 18]
Ntangu yandi vandaka awa na ntoto, Yezu gulusaka bantu ya maladi mpi futumusaka bafwa na mpila nde yandi monisa yina yandi tasala na kati ya nsi yampa
[Kifwanisu ya kele na lutiti 19]
Kimfumu ya zulu ya Nzambi tabuka to tafwa mitindu yonso ya luyalu ya dipanda na yandi