Kitini 9
Inki mutindu beto kezaba nde beto kezinga na “bilumbu ya nsuka”?
1, 2. Inki mutindu beto lenda zaba kana nde beto kezinga na bilumbu ya nsuka?
INKI mutindu beto lenda ndima nde beto ke na kuzinga na nsungi yina Kimfumu ya Nzambi tatula nsuka na ngidika ya bubu yai ya luyalu ya bantu? Inki mutindu beto kezaba nde beto mepusana ngolo kibeni na nsungi yina Nzambi tatula nsuka na mambi yonso mpi na bampasi?
2 Balongoki ya Yezu Kristu zolaka zaba mambu yai. Bau yufulaka yandi inki “kidimbu” tamonisa kumonana nandi na kati ya nkembo ya Kimfumu mpi ya “nsuka ya ngidika ya bima yai.” (Matai 24:3) Yezu vutulaka na kutendulaka bamambu ya kyadi yina zolaka monisa nde bantu mekota na “ntangu ya nsuka,” “bilumbu ya nsuka” ya ngidika ya bima ya ntangu yai. (Daniel 11:40; 2 Timote 3:1) Keti beto memona na mvunkama yai bidimbu yango? Inga, beto kemona yau, mingi mpenza!
Bitumba ya ntoto ya mvimba
3, 4. Inki mutindu bitumba ya mvunkama yai lungisaka mbikudulu ya Yezu?
3 Yezu bikulaka nde: “Nsi mosi takwisa kunwanisa nsi yankaka mpi kimfumu mosi takwisa kunwanisa kimfumu yankaka.” (Matai 24:7) Na 1914, ntoto ya mvimba kotaka na mvwalangasa na bitumba na mpila nde ba nsi mpi bimfumu kotaka na mutindu ya kuswaswana na bitumba yonso ya yitaka salama ntete. Na kuyibukaka mvita yai, ba historiens kebinga yau nde Bitumba ya Nene. Yau vandaka bitumba ya ntete ya kuluta nene na nkenda ya bantu, bitumba ya ntete ya ntoto ya mvimba. Kiteso ya basoda mpi ba civils 20 000 000 vidisaka luzingu na bau, ntalu ya kuluta mingi kibeni ata yau vanda inki bitumba ya ntama.
4 Bitumba ya Ntete ya Ntoto ya mvimba tulaka luyantiku ya bilumbu ya nsuka. Yezu tubaka nde bamambu yai mpi yankaka zolaka vanda “luyantiku ya bampasi.” (Matai 24:8) Yau ke kyeleka mpi nde na Bitumba ya Zole ya ntoto ya mvimba basoda mpi ba civils kiteso ya 50 000 000 vidisaka luzingu na bau ya kuluta mingi ata yau vanda inki bitumba ya salamaka ntete. Na mvunkama yai ya 20, bantu kuluta 100 000 000 kufwããka na bamvita, kuluta bambala iya ya ntalu ya bantu yina kufwããka na bamvula 400 kana beto tula yau na bumbidi! Yau kemonisa nde luyalu ya bantu mebwa ngolo!
Banzikisa yankaka
5-7. Inki banzikisa yankaka kemonisa nde beto kezinga na bilumbu ya nsuka?
5 Yezu tubilaka mpi bamambu yankaka yina zolaka monisa nde beto ke na bilumbu ya nsuka nde: “Ntoto tanikana ngolo, mpi maladi [bimbefo] ya imbi tavanda na bisika ya mutindu na mutindu mpi banzala ya ngolo.” (Luka 21:11) Bampasi yai monanaka mbotembote kubanda 1914, na ntangu yina bampasi ya ngolo kumaka mingi.
6 Tuka ntangu yina, kunikana ya ntoto mekuma kusalama mingi kibeni, mpi yau mefwa bantu mingi. Grippe espagnole mpamba mefwa bantu 20 000 000 bonso Bitumba ya Ntete ya ntoto ya mvimba—bankaka ketuba nde bantu kufwããka kiteso ya 30 000 000 to kuluta. SIDA mefwa kiteso ya bankama ya mafunda ya bantu mpi yau talenda fwa mpi dyaka ba millions ya bantu na bilumbu kekwisa. Konso mvula, ba millions ya bantu kekufwa sambu na bamaladi ya ntima, cancer, mpi na bimbefo yankaka. Ba millions yankaka kekufwa sambu na nzala. Kukonda ntembe, ‘bampunda ya Nzayikusu’ mpi bamambu na yau ke na kulungana, disonga, banzala, mpi bamaladi mebwisa ntalu ya bantu mingi kubanda 1914.—Nzayikusu 6:3-8.
7 Yezu bikulaka mpi dyaka sambu na yina ketadila kuyela ya kugonda ya bantu to mubulu ya ke na kusalama na bisika yonso. Yandi tubaka nde: “Sambu mambu ya imbi takwisa mingi, yau yina, zola ya bantu mingi tabwa madidi.”—Matai 24:12.
8. Inki mutindu mbikudulu ya 2 Timote mukapu 3 kelungana na nsungi na beto?
8 Ntama, Bible yitaka bikula sambu na yina ketadila kubeba ya bikalulu ya bantu bubu yai nde: “Na bilumbu ya nsuka, ntangu ya mpasi takwisa. Sambu bantu takudizola bau mosi, tavanda kaka na zola ya mbongo, bantu takuditombola, tavanda na lulendo, mpi tatuba imbi, mpi talemfuka ve na bibuti, mpi takonda matondo, mpi takonda zola ya kyeleka, tatuba kitemwe ya luvunu, takonda diyala, mpi tavanda na makasi mingi, takonda zola ya mambu ya mbote, bau tavanda bangyekudi, bantu ya ntu ngolo, bantu ya ditombola, bantu ya zola luzolo ya ntoto kansi ya Nzambi ve. Bau tavanda na kifwani ya vumi ya Nzambi, kansi bau tabuya ngolo na yau; katuka na kati na bau . . . Kansi bantu ya imbi mpi bantu ya luvunu takwisa mingi sambu bau takusa bantu yankaka mpi takudikusa bau mosi.” (2 Timote 3:1-13) Mambu yai yonso kemonana pwelele mpenza na meso na beto.
Dyambu yankaka
9. Inki dyambu salamaka na mazulu ya kukukanaka ti luyantiku ya bilumbu ya nsuka awa na ntoto?
9 Dyambu yankaka ikele ya kebasisa kuyela ya bampasi yai na mvunkama yai. Na ngwakana na luyantiku ya bilumbu ya nsuka na 1914, ke na dyambu mosi ya metula bantu na kigonsa mosi ya nene. Na yau, ikele dyambu ya mbikudulu ya mukanda ya nsuka ya Bible ketubila nde: “Mvita vandaka na zulu, Michel [Yezu na nkembo na mazulu] ti banzyo nandi, bo nwanaka ti dragon [Satana], dragon ti banzyo nandi [bampeve ya imbi] nwanaka mpi. Kansi dragon nungaka ve, yo yina yandi, kumosi ti banzyo nandi, bau vandaka dyaka na nswa ve ya kuvanda na kati ya mazulu. Dragon yina ya nene bau losaka yandi na nsi. Yandi nyoka ya nkulu yina bau kebingaka Satana mpi Diabulu, yandi muntu kekusaka bantu yonso. Bau losaka yandi kumosi ti banzyo nandi na ntoto.”—Nzayikusu 12:7-9.
10, 11. Inki kumilaka bantu ntangu Satana mpi bampeve ya imbi nandi losamaka na ntoto?
10 Ebuna, inki mambu yau basisaka sambu na dibuta ya bantu? Mbikudulu kelanda na kutuba nde: “Kansi mawa mingi na ntoto mpi na mbu! Sambu Satana mekwisa kukulumuka kuna na beno; yandi medasuka, sambu yandi kezaba nde ntangu mebikala mingi dyaka ve sambu na yandi.” Ee, Satana kezaba nde ngidika nandi mekuma na nsuka na yau, mpi yandi kesala ngolo sambu na kudyengumuna bantu na Nzambi na ntwala nde yandi ti nsi nandi yai kufwa. (Nzayikusu 12:12; 20:1-3) Inki mutindu bigangwa ya kimpeve ya imbi yina kele mutindu bau sadilaka imbi kimpwanza na bau ya kupona! Inki mutindu bamambu ya ntitisa monanaka awa na ntoto nansi ya bupusi na bau, mingimingi kubanda 1914!
11 Yau ke dyambu ya ngituka ve sambu Yezu yitaka bikula nde: “Awa na nsi-ntoto, bantu na ba nsi yonso tamona mpasi na ntima. Bau tamona boma mingi sambu na . . . Bantu tafwa ngambu sambu na boma ntangu bau tayindula mambu yina kekwisa kubwa awa na nsi-ntoto.”—Luka 21:25, 26.
Nsuka ya luyalu ya bantu mpi ya bampeve ya imbi mefinama
12. Inki mbikudulu mosi ya nsuka mebikala ya talungana na ntwala ya nsuka ya ngidika yai?
12 Bambikudulu ikwa ya Bible mebikala na kulungana na ntwala nde Nzambi kufwa ngidika ya bubu yai? Fyoti kibeni! Mosi ya nsuka kele yina ya ke na 1 Tesalonika 5:3, ya ketuba nde: “Ntangu bau tatuba nde ngemba, mambu yonso kele mbote, kaka na ntangu yina lufwa takwisila bau nswalu.” (Kuwakana Yampa) Yau kemonisa nde nsuka ya ngidika yai tayantika “ntangu bau tatuba.” Na kintulumukinu lufwa tabula nsi na ntangu yina bau vandaka kukana ve, ntangu dikebi ya bantu vandaka kaka na kivuvu ya ngemba mpi yenge na bau.
13, 14. Inki ke ntangu ya mpasi yina Yezu bikulaka, mpi inki mutindu yau talungana?
13 Nsi yai ya ke nansi ya bupusi ya Satana mekuma na nsuka na yau. Yau takuma na nsuka na yau nswalu na ntangu ya mpasi yina Yezu tubaka nde: “Ebuna mbungulu ya nene tavanda. Yau tavanda mpasi mosi ya ngolo yina ya mebwããka ntete ve tuka Nzambi salaka bima yonso tii bubu yai. Mpi ata mpasi yankaka ya mutindu yai tavanda dyaka ve.”—Matai 24:21.
14 Nsuka ya “mbungulu ya nene” tavanda bitumba ya Nzambi, Har-maguédon. Yina tavanda nsungi ya mbikudi Daniel tubaka ntangu Nzambi “tadyata mpi tatula nsuka na bimfumu yonso yina.” Yau tatendula nde nsuka ya ngidika ya baluyalu ya bantu ya dipanda na Nzambi. Luyalu ya Kimfumu nandi tayala tuka na mazulu ebuna tazāābaka mvimba bamambu yonso ya bantu. Daniel bikulaka mpi dyaka nde luyalu “tapesama ve na dikanda yankaka.”—Daniel 2:44; Nzayikusu 16:14-16.
15. Inki takumila bupusi ya Satana mpi bampeve ya imbi nandi?
15 Na ntangu yina bupusi yonso ya Satana mpi ya bampeve ya imbi tasuka. Bigangwa ya bambendumuni yina ya kimpeve tamana na mpila nde bau “kukusa bantu yonso” dyaka ve. (Nzayikusu 12:9; 20:1-3) Bau silamaka nde bau tafwa mpi bau kekinga lufwa na bau. Yau tavanda dyambu ya kyese sambu na bantu yonso na kuvanda dyaka ve na bupusi na bau ya imbi!
Nani taguluka? Nani taguluka ve?
16-18. Nani taguluka na nsuka ya ngidika yai, mpi nani taguluka ve?
16 Ntangu bamfundusu ya Nzambi tabula nsi yai, nani taguluka? Nani taguluka ve? Bible kemonisa nde bayina ya kezola luyalu ya Nzambi tataninama mpi bau taguluka. Bayina ya kezola ve luyalu ya Nzambi tataninama ata fyoti ve kansi bau tafwa kumosi ti nsi yai ya Satana.
17 Bingana 2:21, 22 ketuba nde: “Bantu ya mbote [bayina kelemfuka na luyalu ya Nzambi] tazinga na ntoto yai; kansi bantu yonso ya imbi [bayina kelemfuka ve na luyalu ya Nzambi], takatulama, yandi tatumuna bo mutindu bo ketumunaka matiti.”
18 Nkunga 37:10, 11 ketuba mpi nde: “Ntama mingi ve, buna bankwa imbi tavanda dyaka ve . . . Kansi bankwa dikulumusa tayala nsi, ye bau tamona kyese na ngemba ya nene.” Verset 29 keyika nde: “Balunungu tayala nsi mpi bau tavanda muna mvula na mvula.”
19. Inki ndongisila beto fwete lunda na ntima?
19 Beto fwete lunda na ntima ndongisila ya Nkunga 37:34, yina ketuba nde: “Tula vuvu na Jéhovah mpi landa bansiku nandi; yandi tapesa nge ngolo na kubaka ntoto, nge tamona mpi ntangu yandi takatula bantu ya imbi.” Versets 37 mpi 38 ketuba nde: “Tala muntu ya mbote mpi ya masonga; nge tamona nde muntu ya mutindu yai kele muntu ya ngemba. Kansi bafwi ya nsiku takatulama sikamosi; bilumbu ya bantu ya imbi ke na ntwala takatulama.”
20. Sambu na inki beto lenda tuba nde yai ke nsungi mosi ya kyese ya beto ke na kuzinga?
20 Yau tavanda dyambu ya kyese, ee, mpi ya ngyangalala na kuzaba nde ya kyeleka Nzambi kekudibanzaka na beto mpi nde nswalu yandi tatula nsuka na mambi yonso mpi bampasi! Yau ke dyambu ya kusepela na kumona nde bambikudulu ya kitoko yina talungana kansi kubika mwa ntangu fyoti!
[Kifwanisu ya kele na lutiti 20]
Bible bikulaka bamambu ya zolaka monisa “kidimbu” ya bilumbu ya nsuka
[Kifwanisu ya kele na lutiti 22]
Kubika fyoti, na Har-maguédon, bayina talemfuka na luyalu ya Nzambi ve tatumunama. Bayina talemfuka taguluka mpi takota na ntoto yampa mpi ya lunungu