Kitini 11
Lufulu ya ntoto yampa metulama kubanda bubu yai
1, 2. Na kulungana ya mbikudulu ya Bible, inki ke na kusalama kibeni na meso na beto?
DYAMBU yankaka ya kyese kele nde lufulu ya ntoto yampa ya Nzambi ke na kutulama mpenza bubu yai, ataku nsi yai ya Satana ke na kubeba. Na meso na beto mpenza, Nzambi ke na kuvukisa bantu ya makanda yonso mpi ke na kubongisa bau sambu na kusala lufulu ya kibuka yampa ya bantu yina tayinga nswalu nsi ya bubu yai ya mekabwana. Na kati ya Bible, na 2 Petelo 3:13, kibuka yampa ya bantu yina mebingama nde “ntoto yampa.”
2 Mbikudulu ya Bible ketuba mpi dyaka nde: “Na bilumbu ya nsuka [ntangu yai ya beto ke na kuzinga] . . . bantu mingi takwenda mpi tatuba nde: ‘Beno kwisa, beto tombuka na ngumba ya Jéhovah [lusambu nandi ya kyeleka], . . . mpi yandi talonga beto banzila na yandi, mpi beto tatambula na banzila nandi.’ ”—Isaya 2:2, 3.
3. (a) Mbikudulu ya Isaya ke na kulungana na kati ya banani? (b) Inki mutindu mukanda ya nsuka ya Bible ketubila yau?
3 Mbikudulu yina ke na kulungana bubu yai kati na bayina ke na kulemfuka na ‘banzila ya Nzambi mpi ke na kutambula na kati na yau.’ Mukanda ya nsuka ya Bible ketubila kibuka ya ngemba mpi ya zola ya nza ya mvimba ya bantu nde “kibuka ya nene . . . bau mekatuka na nsi yonso ya bantu mpi makanda yonso ya bantu mpi bandinga yonso,” dibuta mosi ya kyeleka ya nza ya mvimba ya kesadila Nzambi na bumosi. Mpi Bible ketuba dyaka nde: “Bayai ikele bau ya katuka na mbungulu ya nene.” Mpidyai, bau taguluka na nsuka ya ngidika ya bima ya imbi yai.—Nzayikusu 7:9, 14; Matai 24:3.
Dibuta mosi ya kyeleka ya nza ya mvimba
4, 5. Sambu na inki dibuta ya nza ya mvimba ya ba Témoins de Jéhovah menunga na kusalama?
4 Ba millions ya ba Témoins de Jéhovah na masonga yonso kesala ngolo na kuzinga na ngwakana na bantuma mpi na banzila ya Nzambi. Kivuvu na bau ya luzingu ya mvula na mvula metulama na ntoto yampa ya Nzambi. Na bikalulu ya luzingu na bau ya lumbu na lumbu na bulemfu na minsiku ya Nzambi, bau kemonisa yandi luzolo na bau ya kulemfuka na mutindu nandi ya kuyala kubanda bubu yai tii na kati ya ntoto yampa. Bisika yonso, bau ketadila ve nsi to mpusu na bau ya nitu, bau kelemfuka na minsiku ya mutindu mosi—yina ya Nzambi metula na Ndinga nandi. Yau yina bau ke na bumpangi ya kyeleka ya ntoto ya mvimba, kibuka mosi ya ntoto yampa ya mesalama na Nzambi.—Isaya 54:13; Matai 22:37, 38; Yoane 15:9, 14.
5 Ba Témoins de Jéhovah kekuditubila ve nde kele na ngolo na bau mosi bau mesala dibuta mosi ya nza ya mvimba. Bau kezaba nde yau ke kisalu ya ngolo ya mpeve ya Nzambi mesala na bantu yina kekulemfukila bansiku nandi. (Bisalu 5:29, 32; Galatia 5:22, 23) Yau ke kisalu ya Nzambi. Mutindu Yezu tubaka nde: “Mambu yina ya bantu lenda sala ve, Nzambi lenda sala yau.” (Luka 18:27) Mpi Nzambi yina salaka na mpila nde nza yai ya mezinga mingi ke kaka yandi yina kesala mpi nde ntoto yampa ya kibuka ya bantu kuzinga ntangu mingi.
6. Sambu na inki dibuta ya ba Témoins de Jéhovah lenda bingama nde kidimbu ya nkumbwa ya ntangu na beto?
6 Mpidina, mutindu ya luyalu ya Jéhovah na ntoto yampa keyita monana na mutindu yandi ke na kusala na lufulu sambu na ntoto yampa yina ke na kusalama bubu yai. Yina yandi mesala na ba Témoins nandi, ya ke, na nsansa mosi, kidimbu ya nkumbwa ya ntangu na beto. Sambu na inki? Sambu yandi mebongisa ba Témoins de Jéhovah na kukota na dibuta mosi ya kyeleka ya nza ya mvimba, ya lenda panzana ata fyoti ve sambu na bamambu ya nsi yina kekabulaka bantu, bamambu ya mpusu ya nitu, to mpi sambu na bamambu ya mabundu. Mutindu ntalu ya ba Témoins de Jéhovah ke ba millions mpi kezinga na ba nsi kuluta 200, bau mekangama sika mosi ngolo kibeni bonso nsinga mosi ya lenda zengama ve. Bumpangi yai ya nza ya mvimba, yau mosi mpamba na nkenda ya mvimba ya bantu, ya kyeleka ke kidimbu mosi ya nkumbwa ya ntangu na beto—kisalu ya Nzambi.—Isaya 43:10, 11, 21; Bisalu 10:34, 35; Galatia 3:28.
Inki mutindu kuzaba dikanda ya Nzambi
7. Yezu tubaka nde balongoki nandi ya kyeleka tazabana na inki?
7 Inki mutindu mpi dyaka kuzaba mbotembote dikanda yina Nzambi ke na kusadila bonso lufulu sambu na ntoto yampa nandi? Mpidina, banani ke na kulungisa ndinga ya Yezu yina ke na Yoane 13:34, 35? Yandi tubaka nde: “Mono kepesa beno nsiku yampa, beno zolana beno na beno, mutindu mono zolaka beno, beno zolana mpi beno na beno. Mpidina bantu yonso tazaba nde kyeleka beno ke balongoki na mono, kana beno ke na zola kati na beno.” Ba Témoins de Jéhovah kekwikilaka na ndinga ya Yezu mpi yau ke na bupusi na zulu na bau. Mutindu Ndinga ya Nzambi ketuma, “bau ke na zola ya mudindu sambu na bankaka.” (1 Petelo 4:8) Na mambu yai yonso, bau “kevwata [bau mosi] zola, sambu yau ke nsinga ya lunga.” (Kolose 3:14) Mpi zola ya bumpangi ke “budimbu” ya mekangisa bau ngolo na nza ya mvimba.
8. 1 Yoane 3:10-12 ketuba nde dikanda ya Nzambi tazabana mpi dyaka inki mutindu?
8 Mpi dyaka, 1 Yoane 3:10-12 ketuba nde: “Bana ya Nzambi mpi bana ya Diabulu kezabanaka na mambu yai: Konso nani ya sala lunungu ve ikele ya Nzambi ve mpi konso nani ya zola ve mpangi nandi. Sambu yai ke nsangu ya beno wããka tuka luyantiku, nde beto zolana beto na beto, bonso Kaini ve ya vandaka nkwa imbi mpi fwããka mpangi nandi.” Mutindu yina, dikanda ya Nzambi ke dibuta mosi ya nza ya mvimba ya kukonda mubulu.
Kidimbu yankaka sambu na kuzaba bau
9, 10. (a) Na nzila ya inki kisalu bansadi ya Nzambi mezabana na bilumbu ya nsuka yai? (b) Inki mutindu ba Témoins de Jéhovah lungisaka Matai 24:14?
9 Ikele na nzila yankaka ya kuzaba bansadi ya Nzambi. Na mbikudulu nandi sambu na yina ketadila nsuka ya nsi yai, Yezu tubaka bamambu mingi ya tamonisa nde yai ke nsungi ya bilumbu ya nsuka. (Tala Ndambu 9 ya kamukanda yai.) Kidimbu mosi ya nene ya mbikudulu yina metubilama na ndinga nandi ya ke na Matai 24:14: “Nsangu ya mbote yai ya kimfumu tasamunama na ntoto ya mvimba bonso kimbangi na makanda yonso, ebuna nsuka takwisa.”
10 Keti beto kemona mbikudulu yai kelungana? Ee. Tuka bilumbu ya nsuka kuyantikaka na 1914, ba Témoins de Jéhovah kesamuna nsangu ya mbote na ntoto ya mvimba mutindu yau yidikamaka na Yezu, disonga, na banzo ya bantu. (Matai 10:7, 12; Bisalu 20:20) Ba millions ya ba Témoins kebinga bantu na konso nsi na kutubilaka bau sambu na yina ketadila ntoto yampa. Yau mepesa nge nzila nde na kuzwa kamukanda yai, mutindu kisalu ya ba Témoins de Jéhovah ke ya kunyema mpi ya kukabula ba millions ya mikanda yina ketubila Kimfumu ya Nzambi. Keti nge kezaba ata dibundu yankaka ya kesamunaka Kimfumu ya Nzambi nzo na nzo na ntoto ya mvimba? Mpi Malako 13:10 kemonisa nde kisalu ya kusamuna mpi ya kulonga yina fwete salama “ntete,” na ntwala nde nsuka kukwisa.
Bau kemonisa nde Satana ke mukusi
11. Inki dyambu yankaka ba Témoins de Jéhovah kelungisa na kulemfukaka na luyalu ya Nzambi?
11 Na kulemfukaka na bansiku mpi na bansikudukusu ya Nzambi, ba Témoins de Jéhovah kelungisa dyambu yankaka. Bau kemonisa nde Satana ke mukusi ntangu yandi tubaka nde bantu lenda vanda kwikama ve na Nzambi kana bau kutana na bampasi. (Yobo 2:1-5) Na kuvandaka kibuka ya ba millions ya bantu ya mekatuka na ba nsi yonso, ba Témoins kemonisa, bonso nitu mosi, kwikama na bau na luyalu ya Nzambi. Ataku bau ke bantu ya kukonda kulunga, bau kesimba ngolo dyambu ketadila luyalu ya Nzambi ya nza ya mvimba, ataku bupusi ya Satana kele.
12. Na kwikama na bau, mbandu ya banani ba Témoins de Jéhovah kelanda?
12 Bubu yai, ba millions ya ba Témoins de Jéhovah keyika kimbangi na bau na yina ya ba témoins ya ntangu ya ntama bayina monisaka kwikama na bau na Nzambi. Bamosi kati na bau vandaka Abel, Noa, Yobo, Abraham, Sara, Izaka, Yakobo, Deborah, Luta, Davidi, mpi Daniel, na kutanga kaka ndambu yina. (Ebeleo, mukapu 11) Mutindu Bible ketuba, bau ke ‘dituti ya nene ya batemwe ya kwikama.’ (Ebeleo 12:1) Bau mpi bankaka ti Yezu na balongoki nandi vandaka na kwikama na Nzambi.
13. Inki ndinga ya Yezu sambu na yina ketadila Satana kemonisa nde yau ke kyeleka?
13 Yau kendimisa kyeleka ya mambu yina Yezu tubaka sambu na yina ketadila Satana na bantwadisi ya mabundu nde: “Kansi ntangu yai beno kesosa kufwa mono, mono muntu ya tubilaka beno kyeleka yina ya mono wããka na Nzambi. . . . Beno basikaka na tata na beno Diabulu, beno zola sala luzolo ya tata na beno. Yandi ke mufwi ya bantu tuka luyantiku, yandi telamaka na kyeleka ve, sambu kyeleka ke na yandi ve. Ntangu yandi ketuba luvunu, yandi kekutuba sambu na yandi mosi, sambu yandi ke nkwa luvunu mpi tata na yau.”—Yoane 8:40, 44.
Inki nge kepona?
14. Inki dyambu ke na kusalama sambu na lufulu ya ntoto yampa bubu yai?
14 Lufulu ya ntoto yampa yina ke na kutulama bubu yai na Nzambi na kibuka ya ntoto ya mvimba na ba Témoins de Jéhovah ke na kukuma ntangu yonso ngolo. Konso mvu bankama ya mafunda ya bantu ke na kusadila kimpwanza na bau ya kupona, ya metungama na zulu ya nzayilu ya kyeleka, na kundima luyalu ya Nzambi. Bau kekuma ndambu ya kibuka ya ntoto yampa, na kusimbaka ngolo dyambu ketadila luyalu ya Nzambi ya nza ya mvimba, mpi yau kemonisa nde Satana ke mukusi.
15. Inki kisalu ya kukabula Yezu ke na kusala na bilumbu na beto?
15 Na kuponaka luyalu ya Nzambi, bau melunga na kutulama na “diboko ya kibakala” ya Kristu mutindu yandi kekabula “mameme” na “bankombo.” Na mbikudulu nandi sambu na yina ketadila bilumbu ya nsuka, Yezu bikulaka nde: “Makanda yonso tavukana na ntwala na yandi, mpi yandi takabula bantu mutindu ngungudi kekabulaka mameme na bankombo. Yandi tatula mameme na diboko nandi ya kibakala, kansi bankombo na diboko nandi ya kinkento.” Mameme ke bantu ya dikulumusa bayina mevukana kumosi mpi kesadisa bampangi ya Kristu, ya kelemfuka na luyalu ya Nzambi. Bankombo ke bantu ya ntu nsita bayina ya kebuya bampangi ya Kristu mpi kesimba ata fyoti ve luyalu ya Nzambi. Ebuna inki dyambu tamonana? Yezu tubaka nde: “Bayai [bankombo] takwenda na lufwa ya mvula na mvula, kansi balunungu [mameme] na luzingu ya mvula na mvula.”—Matai 25:31-46.
16. Inki nge fwete sala kana nde nge kezola zinga na kati ya Paladisu yina kekwisa?
16 Kyeleka, Nzambi kekudibanza sambu na beto! Kubika fyoti yandi tayidika ntoto paladisu mosi ya kitoko. Keti nge kezola zinga na kati ya Paladisu? Kana nde yau ke mpidyai, monisa luzolo na nge na bangidika ya Jéhovah na kulongukaka sambu na yina ketadila yandi mpi sadila mambu yina nge kelonguka. “Beno sosa Jéhovah, awa ya beno lenda mona yandi; beno samba yandi awa ya yandi kele penepene. Muntu ya imbi kubika nzila na yandi ya imbi, muntu ya nku kubika bangindu na yandi ya nku; bau vutuka na Jéhovah yandi tawila bau mawa.”—Isaya 55:6, 7.
17. Sambu na inki beto ke na ntangu ve ya kuvidisa to ya kulutisa sambu na kupona nani beto tasadila?
17 Yai ke ntangu ya kuvidisa to ya kulutisa ve. Nsuka ya ngidika yai ya menuna mefinama. Ndinga ya Nzambi kelongisila nde: “Zola nsi ve; ye bima ikele na kati ya nsi ve. Kana muntu kuzola nsi, zola ya Tata ke na kati na yandi ve . . . Nsi tavila ye zola na yau; kansi yina ya sala luzolo ya Nzambi tazinga mvula na mvula.”—1 Yoane 2:15-17.
18. Inki bamambu ya nge fwete sala ya tapesa nge nzila na kundima ya kyeleka nde nge tazinga na kati ya ntoto yampa ya kitoko ya Nzambi?
18 Dikanda ya Nzambi ke na kubongisama sambu na luzingu ya mvula na mvula. Bau ke na kulonguka bamambu mingi ya kimpeve mpi bamambu yankaka ya ke mfunu sambu na kuyedisa paladisu. Beto kesyamisa nge na kupona Nzambi nswalu bonso Ntotila mpi na kusimba kisalu yai ya kepesa lugulusu yina yandi ke na kulungisa na bisika yonso na nza ya mvimba bubu yai. Longuka Bible ti ba Témoins de Jéhovah, mpi kwisa longuka na kuzaba Nzambi yina kekudibanza ya kyeleka sambu na nge mpi yina tatula nsuka na bampasi. Mutindu yina nge mpi takuma mosi ya bayina kesala lufulu ya ntoto yampa. Ebuna nge lenda vanda na vuvu kukonda ntembe na kundimama na Nzambi mpi kuzinga mvula na mvula na kati ya ntoto yampa ya kitoko yina yandi tasala.
[Kifwanisu ya kele na lutiti 31]
Ba Témoins de Jéhovah ke na dibuta ya bumpangi ya kyeleka ya nza ya mvimba
[Kifwanisu ya kele na lutiti 32]
Lufulu ya ntoto yampa ya Nzambi ke na kutulama kubanda bubu yai