Dilongi Ya 3

Yezu Kristu Kele Nani?

Sambu na inki Yezu kebingamaka Mwana “ya ntete” ya Nzambi? (1)

Sambu na inki yandi kebingamaka “Ndinga”? (1)

Sambu na inki Yezu kukwisaka na zulu ya ntoto bonso muntu? (2-4)

Sambu na inki yandi kusalaka bimpa? (5)

Kubika fyoti, Yezu tasala inki? (6)

1. Yezu kuzingaka na zulu bonso muntu ya kimpeve na ntwala ya kukwisa na ntoto. Yandi kuvandaka kigangwa ya ntete ya Nzambi mpi, na mpila yina yandi kebingamaka Mwana “ya ntete” ya Nzambi. (Kolosai 1:15; Kusonga 3:14) Yezu kele Mwana mosi kaka ya Nzambi kugangaka yandi mosi. Yehowa kusadilaka Yezu na ntwala ya kwisa na ntoto bonso “ngudi ya nsadi” (NW) na yandi sambu na kuganga bima yonso ya nkaka na zulu ti na ntoto. (Bingana 8:​22-31; Kolosai 1:​16, 17) Nzambi kusadilaka mpi Yezu bonso kinati-ndinga na Yandi. Yau yina Yezu kebingama “Ndinga.”​—⁠Yoane 1:​1-3; Kusonga 19:⁠13.

2. Nzambi kutindaka Mwana na Yandi awa na ntoto na kukatulaka luzingu na yandi na zulu mpi na kutulaka yau na kati ya kibutilu ya Maria. Yau yina, Yezu kuvandaka ve ti tata ya kinsuni. Yau yina, yandi kubakaka ata disumu ve to kukonda kukuka. Nzambi kutindaka Yezu na ntoto sambu na bikuma tatu: (1) Kulonga beto kyeleka na yina ketadila Nzambi (Yoane 18:37), (2) kulunda kwikama ya kukuka, na kubikilaka beto mbandu ya kulanda (1 Piere 2:21), mpi (3) kutambika luzingu na yandi sambu na kukatula beto na kimpika ya disumu mpi lufwa. Sambu na inki yau kuvandaka mfunu?​—⁠Matayo 20:⁠28.

3. Na kukolamaka na bansiku ya Nzambi, muntu ya ntete, Adami, kusalaka yina ya Biblia kebinga “disumu.” Yau yina Nzambi kuzengilaka yandi nkanu ya lufwa. (Kuyantika 3:​17-19) Yandi kulungisaka ve bansiku ya Nzambi, na yau yandi kuvandaka dyaka ve ya kukuka. Malembemalembe, yandi kununaka mpi kufwaka. Adami kukabulaka disumu na bana na yandi yonso. Yau yina beto mpi kenunaka, kebelaka, mpi kefwaka. Inki mutindu bantu lenda kuguluka?​—⁠Roma 3:23; 5:⁠12.

4. Yezu kuvandaka muntu ya kukuka kaka bonso Adami. Kansi, na luswaswanu ya Adami, yandi vandaka na bulemfu ya kukuka mpenza na Nzambi ata na kati ya mumekamu ya kuluta ngolo. Yau yina, yandi lendaka kutambika luzingu na yandi ya bumuntu ya kukuka sambu na kufuta disumu ya Adami. Yau yai ya Biblia ketubila bonso “nkudulu.” Ebuna, bana ya Adami lendaka kukatulama na kimpika ya lufwa. Bayina yonso ketulaka lukwikilu na bau na Yezu lenda kulolulama masumu na bau mpi kubaka luzingu ya mvula na mvula.​—⁠1 Timoteo 2:​5, 6; Yoane 3:16; Roma 5:​18, 19.

5. Ntangu yandi kuvandaka na ntoto, Yezu kubelulaka bantu ya maladi, kudisaka bantu ya nzala, mpi kulembikaka mipepe. Yandi kufutumunaka nkutu bafwa. Sambu na inki yandi kusalaka bimpa? (1) Yandi vandaka kuwa mawa ya bantu yina vandaka kunyokwama mpi yandi zolaka kusadisa bau. (2) Bimpa na yandi kumonisaka nde yandi kuvandaka Mwana ya Nzambi. (3) Yau vandaka kumonisa yina ya yandi tasala sambu na bantu ya bulemfu ntangu yandi tayala bonso Mfumu na zulu ya ntoto.​—⁠Matayo 14:14; Marko 2:​10-12; Yoane 5:​28, 29.

6. Yezu kufwaka mpi Nzambi kufutumunaka yandi bonso kigangwa ya kimpeve, mpi yandi kuvutukaka na zulu. (1 Piere 3:18) Kubanda pana, Nzambi mekumisaka yandi Mfumu. Kubika fyoti, Yezu takatula mambi ti bampasi yonso na ntoto yai.​—⁠Nkunga 37:​9-11; Bingana 2:​21, 22.

[Bifwanisu ya kele na lutiti 7]

Na kati ya kisalu ya Yezu kuvandaka kulonga, kusala bimpa, mpi kutambika luzingu na yandi sambu na beto