Dilongi Ya 4
Dyabulu Kele Nani?
Satana Dyabulu—yandi kukatukaka na wapi? (1, 2)
Inki mutindu yandi kekusaka bantu? (3-7)
Sambu na inki nge fwete kununga Dyabulu? (7)
1. Ngogo “dyabulu” kesongidila muntu yina ketubaka luvunu ya mbi sambu na muntu ya nkaka. “Satana” kesongidila mbeni to mutelemini. Yai kele bazina yina mepesamaka na mbeni ya nene ya Nzambi. Na luyantiku, yandi vandaka wanzyo ya kukuka na zulu ti Nzambi. Kansi, na nima, yandi vandaka kuyindula kuluta mingi sambu na yandi mosi mpi zolaka lusambu yina mefwana na kupesama na Nzambi.—Matayo 4:8-10.
2. Wanzyo yai, Satana, kutubaka na Eva na kusadilaka nyoka. Na kutubilaka yandi luvunu, yandi kunataka yandi na kukolama na Nzambi. Mpila yina, Satana kutelamaninaka yina kebingama “kimfumu” ya nzambi to pozisio na yandi, bonso muntu ya Kuluta Kuzanguka. Yandi kuyufulaka kana Nzambi keyalaka na mutindu yina melunga mpi sambu na mambote mpenza ya bantu na Yandi. Satana kubasisaka mpi bambefula nde ata muntu mosi ve lenda kusikila ya kwikama na Nzambi. Na kusalaka dyambu yai, Satana kudikumisaka mbeni ya Nzambi. Yau yina, yandi kumaka kubingama Satana Dyabulu.—Kuyantika 3:1-5; Yobi 1:8-11; Kusonga 12:9.
3. Satana kemekaka na kukusa bantu na kusambilaka yandi. (2 Korinto 11:3, 14) Mutindu mosi ya yandi kekusaka bantu kele na nzila ya lusambu ya luvunu. Kana dibundu kelongaka luvunu na yina metala Nzambi, yau kesalaka mpenza lukanu ya Satana. (Yoane 8:44) Bantu yina kele bamambere ya mabundu ya luvunu lenda kuyindula na masonga yonso nde bau kele na kusambila Nzambi ya kyeleka. Kansi bau kele mpenza na kusadila Satana. Yandi kele ‘nzambi ya inza yai.’—2 Korinto 4:4, NW.
4. Lusambu ya bampeve ya mbi kele mwaye ya nkaka ya Satana kesadilaka sambu na kutula bantu na bupusi na yandi. Bau lenda kubinga bampeve ya mbi sambu na kutanina bau, na kukota bankaka nsoki, na kuyita kutuba mambu ya makwisa, to na kusala bimpa. Satana kele ngolo ya mbi na nima ya bisalu yina yonso. Sambu na kuyangidika Nzambi, beto fwete kuvanda ve na kuwakana ata fyoti ti lusambu ya bampeve ya mbi.—Kulonga 18:10-12; Bisalu 19:18, 19.
5. Satana kekusaka mpi bantu na mwaye ya zola ya mpusu ya nitu ya kuluta mingi mpi na lusambu ya bimvuka ya politiki. Bantu mingi keyindulaka nde insi to mpusu ya nitu na bau kele kitoko kuluta ya bankaka. Kansi, yau kele kyeleka ve. (Bisalu 10:34, 35) Bantu ya nkaka ketadilaka bangidika ya politiki sambu na kumanisa bampasi ya bantu. Na kusalaka mpila yina, bau kebuya Kimfumu ya Nzambi. Yau kele mvutu mosi kaka na bampasi na beto.—Daniele 2:44.
6. Mwaye ya nkaka ya Satana kesadilaka sambu na kukusa bantu kele na kupukumunaka bau na nsadisa ya bampusa ya mbi. Yehowa ketubila beto na kubuya bisalu ya mbi sambu yandi kuzaba nde yau takota beto nsoki. (Galatia 6:7, 8) Bantu mingi lenda kuzola nde nge kuvukana ti bau na bisalu ya mutindu yina. Kansi, yibuka nde kele mpenza Satana muntu kezola nde nge kusala mambu yina.—1 Korinto 6:9, 10; 15:33.
7. Satana lenda kusadila munyokudi to luteleminu sambu na kunata nge na kuyambula Yehowa. Bamingi na kati ya bantu na nge ya zolwa talenda kuwa makasi sambu nge kelonguka Biblia. Bankaka lenda kuseka nge. Nani kele kisina ya luzingu na nge? Satana kezola kubangisa nge sambu nde nge yambula kulonguka mambu yina metala Yehowa. Kubikisa ve Satana kununga! (Matayo 10:34-39; 1 Piere 5:8, 9) Na kunungaka Dyabulu, nge lenda kuyangidika Yehowa mpi kumonisa nde nge kesimba mpenza luyalu na Yandi.—Bingana 27:11.
[Bifwanisu ya kele na lutiti 9]
Lusambu ya luvunu, mpi lusambu ya bampeve ya mbi ti zola ya insi kekusaka bantu
[Kifwanisu ya kele na lutiti 9]
Nunga Satana na kulandaka kulonguka mambu yina metala Yehowa