Dilongi Ya 9
Bansadi ya Nzambi Fwete Kuvanda Bunkete
Sambu na inki beto fwete kuvanda bunkete na mambu yonso? (1)
Kuvanda bunkete na kimpeve? (2) na bikalulu? (3) na mabanza? (4) na kinsuni kesongidila inki? (5)
Inki bantubilu ya mbi beto fwete kubuya? (6)
1. Yehowa Nzambi kele bunkete mpi santu. Yandi kezola kumona bansambidi na yandi kubikala bunkete—na kimpeve, na bikalulu, na mabanza, mpi na kinsuni. (1 Piere 1:16) Yau kelombaka mpenza bikesa ya ngolo sambu na kubikala bunkete na meso ya Nzambi. Beto kezinga na kati ya inza ya mbi. Beto kele mpi ti bitumba ya kunwana ti mabanza na beto ya kusala mbi. Kansi beto fwete kuyambula ve.
2. Bunkete ya Kimpeve: Kana beto kezola kusadila Yehowa beto lenda ve kulanda na kukwikila na malongi to bikalulu ya lusambu ya luvunu. Beto fwete kubasika na lusambu ya luvunu mpi nkatu kusadila yau dyaka na konso inki mutindu yina. (2 Korinto 6:14-18; Kusonga 18:4) Kana beto melonguka kyeleka na yina metala Nzambi, beto fwete kusungimina na kukonda kukusama na bantu yina kelongaka luvunu.—2 Yoane 10, 11.
3. Bunkete ya Bikalulu: Yehowa kezola nde bansambidi na yandi kuvanda ti nkadilu ya Bakristu ya kyeleka ntangu yonso. (1 Piere 2:12) Yandi kemonaka mambu yonso ya beto kesalaka, ata nkutu yina kesalamaka na kinsweki. (Baebreo 4:13) Beto fwete kubuya mansoni mpi bisalu yonso ya mbi ya inza yai.—1 Korinto 6:9-11.
4. Bunkete ya Mabanza: Kana beto kufulusa mabanza na beto ti bangindu ya bunkete mpi ya kugedila, nkadilu na beto mpi tavanda ya bunkete. (Filipi 4:8) Kansi kana beto ketula mabanza na zulu ya mambu ya mbi, yau tapesa bisalu ya mbi. (Matayo 15:18-20) Beto fwete kubuya baluyangidilu yina lenda kubebisa mabanza na beto. Beto lenda kufulusa mabanza na beto ti bangindu ya bunkete na kulongukaka Ndinga ya Nzambi.
5. Bunkete ya Kinsuni: Sambu bau kemonisaka Nzambi, Bakristu fwete kulunda banitu mpi mvwatu na bau ya bunkete. Beto fwete kuyobisa maboko na beto na nima ya kukota na kabine, mpi beto fwete kuyobisa yau na ntwala ya kudya to ya kusimba madya. Kana beno kele ve ti ngidika mosi ya mbote ya kabine, matufi yonso fwete kuzikamaka. (Kulonga 23:12, 13) Kubikala bunkete na kinsuni kesadisaka na kuvanda na mavimpi ya mbote. Inzo ya Mukristu fwete kuvanda na ndonga mpi ya bunkete yau vanda na nganda ti na kati. Na kati ya kimvuka ya bantu, yau fwete kuvanda mbandu ya mbote.
6. Bunkete ya Ntubilu: Bansadi ya Nzambi fwete kutubaka ntangu yonso kyeleka. Bakusi takota ve na Kimfumu ya Nzambi. (Efezo 4:25; Kusonga 21:8) Bakristu kesadilaka ve ntubilu ya mbi. Bau kewidikilaka ve to ketubaka mpi ve bansaka ya mvindu to masolo ya mbi. Sambu na ntubilu na bau ya mbote, bau kekudimonisaka ya kuswaswana na kisalu to na nzo-nkanda mpi na banfinangani.—Efezo 4:29, 31; 5:3.
[Bifwanisu ya kele na lutiti 18, 19]
Bansadi ya Nzambi fwete kuvanda bunkete na mambu yonso