Dilongi Ya 13

Inki Mutindu Nge Lenda Sengumuna Dibundu ya Kyeleka?

Keti mabundu yonso kele ya mbote na meso ya Nzambi, to mosi kaka? (1)

Sambu na inki mabundu mingi ketubaka nde yau kele ya Bukristu? (2)

Inki mutindu nge lenda kuzaba Bakristu ya kyeleka? (3-7)

1. Yezu kuyantikaka dibundu mosi ya Bukristu ya kyeleka. Yau yina bubu yai, nitu, to kimvuka, ya bansambidi ya kyeleka ya Yehowa Nzambi fwete kuvanda mosi kaka. (Yoane 4:​23, 24; Efezo 4:​4, 5) Biblia kelonga nde bantu fyoti kaka kele na nzila ya fyoti ya luzingu.​—⁠Matayo 7:​13, 14.

2. Biblia kuyitaka kutuba nde, na nima ya lufwa ya bantumwa, malongi ya luvunu ti bikalulu yina kele ve ya Bukristu takota malembemalembe na kati ya dibundu ya Bukristu. Bantu tabenda bankwikidi na kulanda bau na kisika ya Kristu. (Matayo 7:​15, 21-23; Bisalu 20:​29, 30) Yau yina beto kemona mabundu mingi ya kuswaswana yina ketuba nde yau kele ya Bukristu. Inki mutindu beto lenda kuzaba Bakristu ya kyeleka?

3. Kidimbu ya kuluta nene yina keswaswanisa Bakristu ya kyeleka kele nde bau kele ti zola ya kyeleka na kati na bau. (Yoane 13:​34, 35) Bau kelongamaka ve na kuyindula nde bau kele mbote kuluta bantu ya bikanda mpi bampusu ya nitu ya nkaka. Bau kelongamaka mpi ve na kuyina bantu ya bansi ya nkaka. (Bisalu 10:​34, 35) Yau yina, bau kevukanaka ve na bamvita. Bakristu ya kyeleka ketadilanaka bamosi ti bankaka bonso bampangi ya babakala ti ya bankento.​—⁠1 Yoane 4:​20, 21.

4. Kidimbu ya nkaka ya dibundu ya kyeleka kele nde bamambere na yau kele ti luzitu ya mudindu sambu na Biblia. Bau kendimaka yau bonso Ndinga ya Nzambi mpi kekwikilaka na mambu ya yau ketubaka. (Yoane 17:17; 2 Timoteo 3:​16, 17) Bau ketadilaka Ndinga ya Nzambi bonso ya mfunu kuluta bangindu ya bantu to bikalulu ya bantu. (Matayo 15:​1-3, 7-9) Bau kesalaka ngolo na kuzinga na kuwakana ti Biblia na luzingu na bau ya lumbu na lumbu. Yau yina, bau kelongaka ve kima mosi mpi kesadilaka kima ya nkaka.​—⁠Tito 1:​15, 16.

5. Dibundu ya kyeleka fwete kupesa lukumu na zina ya Nzambi mpi. (Matayo 6:⁠9) Yezu kuzabisaka zina ya Nzambi, Yehowa. Bakristu ya kyeleka fwete kusala kiteso mosi. (Yoane 17:​6, 26; Roma 10:​13, 14) Inki bantu yina na kati ya kimvuka na beno ya bantu kesongaka bankaka zina ya Nzambi?

6. Bakristu ya kyeleka fwete kusamuna mambu metala Kimfumu ya Nzambi. Yezu kusalaka mutindu yina. Yandi vandaka kutuba ntangu yonso na yina metala Kimfumu. (Luka 8:⁠1) Yandi kutumaka balongoki na yandi na kusamuna nsangu yai na ntoto ya mvimba. (Matayo 24:14; 28:​19, 20) Bakristu ya kyeleka kekwikilaka nde kaka Kimfumu ya Nzambi yau mosi tanata ngemba ti lutaninu ya kyeleka na ntoto yai.​—⁠Nkunga 146:​3-5.

7. Balongoki ya Yezu fwete kuvanda ve bantu ya inza yai ya mbi. (Yoane 17:16) Bau kekotaka ve na mambu ya politiki ya inza yai ti na maswana na kati ya bimvuka ya bantu. Bau kebuyaka nkadilu, bisalu mpi bikalulu ya mbi yina kemonanaka mpenza na kati ya inza. (Yakobo 1:27; 4:⁠4) Keti nge lenda kuzaba kimvuka mosi ya dibundu na nzyunga na nge yina kele ti bidimbu yai ya Bukristu ya kyeleka?

[Bifwanisu ya kele na lutiti 26, 27]

Bakristu ya kyeleka kezolanaka bamosi ti bankaka, kezitisaka Biblia, mpi kesamunaka mambu ya metala Kimfumu ya Nzambi