Banani Kele Banduku ya Nzambi?

Yezu Kristu kele Mwana ya Yehowa mpi nduku na yandi ya ngolo ya yandi kezolaka mingi. Na ntwala ya kuzinga na ntoto bonso muntu, Yezu vandaka kuzinga na zulu. Yandi vandaka kigangwa ya ngolo ya kimpeve. (Yoane 17:5) Na nima, yandi kwisaka na ntoto sambu na kulonga bantu kyeleka yina metadila Nzambi. (Yoane 18:37) Yandi pesaka mpi luzingu na yandi ya kimuntu sambu na kugulusa bantu ya bulemfu na disumu ti na lufwa. (Roma 6:23) Ntangu yai, Yezu kele Ntotila ya Kimfumu ya Nzambi, disongidila, luyalu ya zulu yina tatula Paladisu na ntoto yai.—Kusonga 19:16.

Bawanzio mpi kele banduku ya Nzambi. Bawanzio kuyantikaka ve kuzinga awa na ntoto bonso bantu. Nzambi gangaka bo na zulu na ntwala ya kusala ntoto. (Yobi 38:4-7) Bawanzio kele mingi kibeni. (Daniele 7:10) Banduku ya Nzambi yai ya kezingaka na zulu kezolaka nde bantu kulonguka kyeleka yina metala Yehowa.—Kusonga 14:6, 7.

Nzambi kele dyaka ti banduku na zulu ya ntoto; yandi kebingaka bo bambangi na yandi. Na ntangu bo kesambisaka makambu, mbangi kezabisaka bantu mambu yina yandi mezaba sambu na muntu ya bo kesambisa to kima yina bo ketubila. Bambangi ya Yehowa kezabisaka bantu yankaka mambu yina bo mezaba sambu na yina metala Yehowa ti lukanu na yandi. (Yezaya 43:10) Mutindu bawanzio kesalaka, Bambangi mpi kezola kusadisa nge na kulonguka mambu ya kyeleka yina metala Yehowa. Bo kezola nde nge mpi nge kuma nduku ya Nzambi.