Bangyufula yina bantu ya kesepelaka na Nsangu keyulaka mbala mingi

Kana Nzambi kele zola, sambu na nki yandi mepesaka nzila na mambi?

NZAMBI muntu mepesaka nzila na mambi, mpi awa na ntoto bantu mingi mekudipesaka na kusala mambu ya mbi. Mu mbandu, bo kebasisaka bamvita, bo kelosaka babombi na zulu ya bana, bo kebebisaka ntoto, mpi kenataka nzala. Mafuku ya bantu kenwaka makaya mpi bo kebakaka maladi ya kansere, bo kesalaka bizumba mpi bo kebakaka maladi yina kekatukaka na kuvukisa nitu, bo kelutisaka kunwa malafu ya ngolo, yo yina bo kebakaka maladi ya fwa (cirrhose de foie), mpi buna na buna. Ya kyeleka, bantu ya mutindu yai kezolaka ve nde mambi yonso kumana. Kansi bo kezolaka kaka nde bambuma ya mbi yina bikalulu na bo kebutaka kuvanda dyaka ve. Ntangu bo kebukaka bambuma yina ya bo kekunaka, bo kedilaka nde, “Sambu na inki kaka mono?” Ebuna, bo kemonaka nde Nzambi kele muntu ya mbi, bonso mukanda ya Bingana 19:3 ketuba nde: “Bantu ya nkaka ke kudisosilaka bampasi na mambu na bo ya buzoba, ebuna na nima bo ke wilaka Mfumu Nzambi makasi.” Ebuna kana Nzambi kubuyisa bo na kusala mambu na bo ya mbi, bo tatuba nde yandi mebotula bo kimpwanza na bo.

Kikuma ya ngolo ya Yehowa mepesilaka nzila na mambi kele sambu na kupesa mvutu na ntembe ya Satana. Satana Dyabulu kutubaka nde Nzambi lendaka ve kutula awa na ntoto bantu yina talemfukilaka kaka Yandi kana minyoku kukwisila bo. (Yobi 1:​6-12; 2:​1-10) Yehowa kepesaka Satana nzila ya kuzinga sambu yandi baka okazio ya kumonisa kana ntembe yina yandi ketulaka kele ya kyeleka. (Kubasika 9:16) Satana kelanda na kunatila bantu bampasi bubu yai, yandi kepusa bantu na kubuya Nzambi, sambu na kusosa kumonisa nde ntembe na yandi kele ya kyeleka. (Kusonga 12:12) Kansi, Yobi kubikalaka kaka ya kwikama. Yezu mpi kusalaka buna. Bubu yai, Bakristu ya kyeleka mpi kesalaka mutindu mosi.​—⁠Yobi 27:5; 31:6; Matayo 4:​1-11; 1 Piere 1:​6, 7.

Mono kezola kukwikila na paladisu ya ntoto kisika bantu tazinga mvula na mvula, kansi, ngindu yai kele mbote mingi, keti yo tasalama mpenza?

Yina kele ngindu ya Biblia ve. Yo kele mpasi mingi na kundima ngindu yai kaka sambu bantu meyikanaka na kusala mambi tuka bamvu-nkama mingi kibeni. Ntangu Yehowa kugangaka ntoto, mpi yandi tubaka na bantu nde bo kufulusa yo na babakala ti bankento ya mbote yina tatalaka bimenina na yo ti bambisi na yo mpi kutanina yo sambu yo vanda kaka kitoko mpi yo beba ve. (Tala na balutiti 12 ti 17.) Na kisika ya kumona nde Paladisu ya Nzambi mesilaka meluta kitoko na mpila nde yo lenda salama ve, yo kele mbote na kundima nde luzingu yai ya mpasi melutana mbi na mpila nde yo lenda landa ve na kuvanda mutindu yina kukonda nsuka. Paladisu tayinga yo.

Inki mutindu mono lenda pesa mvutu na bantu ya maseka yina ketubaka nde Biblia ketubaka ve mambu ya kyeleka mpi yo kewakanaka ve ti siansi?

Kana muntu mekwikila na balusilu yai yo ketendula ve nde yandi meyindula mbote ve. “Na kukwikila, bantu fwete wa ntete nsangu.” Kana muntu kelonguka Ndinga ya Nzambi, mayele na yandi kekumaka mingi mpi lukwikilu na yandi keyelaka.​—⁠Roma 10:17; Baebreo 11:⁠1.

Bantu yina kesengumunaka mambu yina lutaka na ntangu ya Biblia kendimaka mambu mingi yina nkenda ya Biblia ketubaka nde yo kele ya kyeleka. Siansi ya kyeleka kendimaka mambu yina Biblia ketubaka. Mambu yai kelanda vandaka na kati ya Biblia banda ntama na ntwala nde bantu ya mayele ya inza kusengumuna yo: mambu yina vandaka kusalama ntangu Nzambi vandaka kuyidika ntoto, ntoto kele dimbuma, ata kima mosi mesimbaka yo ve, mpi bandeke kekatukaka na kisika mosi sambu na kwenda kuzinga na kisika yankaka.​—⁠Kuyantika, kapu 1; Yezaya 40:22; Yobi 26:7; Yeremia 8:⁠7.

Kima kemonisa nde Biblia kele mukanda mosi ya kupemama kele kulungana ya Bambikudulu. Daniele kuzabisaka na ntwala nde bangolo ya inza tabasika ti tabwa, mpi ntangu yina Mesia takwisa ti yina bo tafwa yandi. (Daniele, kapu 2 ti 8; Dn 9:​24-27) Bubu yai, bambikudulu yankaka kele na kulungana, ya kemonisa nde beto kele na “bilumbu ya nsuka.” (2 Timoteo 3:​1-5; Matayo, kapu 24) Bantu kele ve ti kiyeka ya kuzabisa mambu na ntwala mutindu yai. (Yezaya 41:23) Sambu na kuzaba mambu mingi yina tandimisa nge, tala mikanda La Bible: Parole de Dieu ou des hommes? mpi Y a-t-il un Créateur qui se soucie de vous?, mikanda ya Bambangi ya Yehowa kubasisaka.

Inki mutindu mono lenda longuka na kupesa mvutu na bangyufula ya Biblia?

Nge fwete longuka Biblia mpi kuyindulula mambu yina kele na kati na yo, na ntangu nge kesala yo, lomba mpeve ya Nzambi na kutwadisa nge. (Bingana 15:28; Luka 11:​9-13) Biblia ketuba nde: “Kansi kana muntu mosi na kati na beno ke na mayele ve, yandi lomba yo na Nzambi, ebuna Nzambi ta pesa yandi yo; sambu Nzambi ke zolaka kukaba mingi na bantu yonso na ntima ya mbote.” (Yakobo 1:⁠5) Dyaka, kele ti mikanda yankaka ya Biblia, yina lenda sadisa nge kana nge tanga yo. Mbala mingi, lusadisu ya bantu yankaka kele mfunu, mu mbandu ntangu Filipi kulongukaka ti muntu ya Etiopia. (Bisalu 8:​26-35) Bambangi ya Yehowa kelombaka ve mbongo na ntangu bo kelongukaka Biblia na banzo ti bantu yina kesepelaka na yo. Kuwa boma ve na kulomba bo na kusadisa nge.

Sambu na inki bantu mingi kemengaka Bambangi ya Yehowa mpi bo kesongaka mono nde mono longuka ve ti bo?

Bantu kumengaka kisalu ya kusamuna ya Yezu, ye yandi tubaka nde bo tamenga mpi balandi na yandi. Ntangu bantu yankaka kuyitukaka na kumona mutindu Yezu vandaka kulonga, bamfumu ya mabundu yina vandaka kumenga yandi kuyulaka nde: “Keti beno mpi yandi me kusa beno? Na kati ya bamfumu na beto ti na kati ya Bafarize, keti muntu mosi me ndimaka yandi?” (Yoane 7:​46-48; 15:20) Bantu mingi yina kelongisilaka beno nde beno longuka Biblia ve ti Bambangi kezabaka bo ve mbote-mbote to bo mosi kevandaka na bangindu ya mbi sambu na Bambangi. Longuka ti Bambangi, ebuna nge mosi tamona kana nge takuma kubakisa Biblia mbote to ve.​—⁠Matayo 7:​17-20.

Sambu na inki Bambangi kekwendaka kutala bantu yina kele dezia ti lusambu na bo?

Ntangu bo kesalaka mutindu yai, bo kelandaka mbandu ya Yezu. Yandi kwendaka na Bayuda. Bayuda kuvandaka na lusambu na bo mosi, kansi na makambu mingi, lusambu yango vandaka kulonga ve mambu yina kele na Ndinga ya Nzambi. (Matayo 15:​1-9) Makanda yonso kele na mabundu na bo, yo vanda yina ya bo kebingaka ya Kikristu to ya Kikristu ve. Yo kele mfunu mingi nde bantu kukangama na malongi yina kewakana ti Ndinga ya yandi mosi Nzambi, mpi bikesa yina Bambangi kesalaka sambu na kusadisa bo na kuzaba yo kele kidimbu ya kemonisa nde bo kezolaka nkweno.

Keti Bambangi kekwikilaka nde kaka lusambu na bo mpamba kele ya kyeleka?

Muntu yonso yina kekudipesaka na lusambu na yandi fwete yindula sambu na kuzaba kana yo kele lusambu mosi ya kyeleka. Kana yo kele ve ya kyeleka, sambu na inki yandi talanda na kudipesa na yo? Biblia kelongisila Bakristu mpidiyai: “Beno [zikisa, NW] mambu yonso mbote-mbote, ebuna beno simba mambu ya mbote.” (1 Tesalonika 5:21) Konso muntu fwete sosa kuzikisa kana malongi yina yandi kekwikilaka kele na Masonuku to ve, sambu lukwikilu ya kyeleka kele kaka mosi. Efezo 4:5 kendimisa mambu yai, ntangu yo ketuba nde “Kaka Mfumu mosi mpamba kele, kaka lukwikilu mosi mpamba kele, kaka mbotika mosi mpamba kele.” Yezu kundimaka ve ngindu ya bilumbu yai, ya kekitisaka bantu ntima nde banzila kele mingi, disongidila mabundu kele mingi, kansi yonso kenataka na luguluku. Nkutu, yandi tubaka nde: “Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.” Bambangi ya Yehowa kekwikilaka nde bo memonaka nzila yango. Kana ve, bo zolaka kusosa lusambu yankaka.​—⁠Matayo 7:⁠14.

Keti bo kekwikilaka nde bo mpamba bantu taguluka?

Ve. Mafuku ya bantu yina kuzingaka na bamvu-nkama ya meluta, kansi bo vandaka ve Bambangi ya Yehowa tafutumuka, mpi tazwa okazio ya kubaka luzingu. Bantu mingi ya kezinga bubu yai lenda monisa pozisio na bo na kyeleka ti na lunungu na ntwala nde “mpasi ya nene” kukwisa, mpidina bo taguluka. Na ndambu yankaka, Yezu kutubaka nde beto fwete sambisa ve bantu yankaka. Beto kemonaka kaka na nganda; kansi Nzambi ketalaka ntima. Yandi kemonaka mbotembote mpi kesambisaka ti mawa. Yandi mepesaka mukumba ya kusambisa na maboko ya Yezu, kansi na maboko na beto ve.​—⁠Matayo 7:​1-5; 24:21; 25:⁠31.

Keti bantu yina kekwendaka na balukutakanu ya Bambangi ya Yehowa fwete pesa mbongo ya makabu?

Sambu na yina metala makabu ya mbongo, ntumwa Polo kutubaka nde: “Konso muntu fweti pesa mutindu yandi me kana na kupesa; kansi yandi lenda pesa ve ti kubokuta to sambu bo me pusa yandi na kupesa; sambu Nzambi ke zolaka nde bantu kupesa makabu ti kiese.” (2 Korinto 9:⁠7) Na Banzo ya Kimfumu mpi na bisika ya balukutakanu ya Bambangi ya Yehowa, bo kesalaka nsisani ve. Kansi bo ketulaka bakesi na mpila nde kana muntu mezola kupesa makabu, yandi pesa. Yo yina, ata muntu mosi ve kezabaka ikwa mpangi mepesa to kana bantu yankaka mepesa. Bamingi kevandaka na mwaye ya kupesa kuluta bantu yankaka, kansi bankaka kevandaka na mwaye ve ya kupesa ata kima mosi. Yezu monisaka ngindu ya mbote ntangu yandi tubilaka sanduku ya makabu yina vandaka na tempelo ya Yeruzalemi ti bantu yina vandaka kutula makabu na kati. Nzambi ketalaka kiteso ya mwaye yina muntu kele na yo ti mpeve yina yandi kepesila, kansi yandi ketalaka ntalu ya mbongo ve.​—⁠Luka 21:​1-4.

Kana mono kuma Mbangi ya Yehowa, keti mono mpi fwete samuna bonso bo?

Kana muntu mekuma ti nzayilu mingi yina metala lusilu ya Paladisu ya ntoto yina tavanda na nsi ya kiyeka ya Kimfumu ya Kristu, yandi lenda monisa nzala ya kuzabisa balusilu yango na bantu yankaka. Nge mpi lenda sala mpidina. Yo kele nsangu ya mbote!​—⁠Bisalu 5:​41, 42.

Kusala buna kele mutindu mosi ya mbote ya kumonisa nde nge kele longoki ya Yezu Kristu. Na kati ya Biblia, bo kebingaka Yezu nde “temwe ya kwikama mpi ya kyeleka.” Ntangu yandi vandaka awa na ntoto, Yezu longaka nde: “Kimfumu ya Nzambi me kuma penepene,” mpi yandi tindaka balongoki na yandi na kusala kiteso mosi. (Kusonga 3:​14, NW; Matayo 4:17; 10:⁠7) Na nima, Yezu tumaka balandi na yandi nde: “Beno kwenda kukumisa bantu yonso balonguki na mono: . . . beno longa bo.” Yandi tubaka dyaka nde na ntwala nsuka ya ntoto kukwisa, “bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo.”​—⁠Matayo 24:14; 28:​19, 20.

Mitindu ya kulonga nsangu yai ya mbote kele mingi. Disolo ti banduku mpi na bantu ya kuzabana kekangudilaka mbala mingi muntu nzila ya kuta kimbangi. Bantu yankaka kesalaka yo na nzila ya mikanda ya bo kesonikaka to bo kesadilaka telefone. Bankaka dyaka ketindaka mikanda yina kevandaka na malongi yina bo keyindula nde bantu na bo ya kuzabana tasepela mpenza na yo. Sambu bo kevandaka na nzala ya kukutana ti konso muntu, Bambangi kekwendaka kunata nsangu nzo na nzo.

Biblia kepesa beto imvitasio yai ya kyese: “Mpeve ya Nzambi ti nkento yina ya Mwana-dimeme ke kwela, [kelemba ve na kutuba, NW] nde: ‘Kwisa!’ Konso muntu yina ke wa mambu yai, yandi mpi kutuba nde: ‘Kwisa!’ Konso muntu yina ke na nzala ya masa, yandi kwisa. Konso muntu yina ke zola kunwa masa ya moyo, yandi baka yo ya mpamba.” (Kusonga 22:17) Kutubila bantu yankaka mambu yina metala Paladisu ya ntoto ti balusakumunu na yo kele dyambu mosi ya muntu fwete sala na luzolo na yandi mpenza, mpi ntima na yandi fwete vanda kibeni na nzala ya kuzabisa bantu yankaka nsangu yai ya mbote.

Beto kezaba mbote nde nge kele na bangyufula yankaka yina ketadila Bambangi ya Yehowa ti malongi na bo. Mbala yankaka, nge tatula ntembe na mambu yankaka yina kele na kamukanda yai. Beto tazola kupesa mvutu na bangyufula na nge. Bisika kele mingi ve na kati ya kamukanda yai, yo yina, beto kelomba nge na kuyula bangyufula na nge na Bambangi yina kele na bwala na nge. Nge lenda kwenda kuyula bo na balukutakanu yina kesalamaka na Nzo ya Kimfumu na bo to ntangu bo takwisa kutala nge na nzo na nge. To nge lenda tinda bangyufula na nge na Association “Les Témoins de Jéhovah.” Nge lenda sadila adresi mosi ya mebonga na nge na kati ya ba adresi yai kele awa na nsi.