Kusolula na Nzila ya Mikanda

MIKANDA metomisaka luzingu mpi bikalulu ya bantu mingi. Mikanda mingi na kati ya mikanda ya Masonuku ya Kigreki ya Bukristu kuvandaka mikanda na luyantiku. Bubu yai, beto lenda sonika mikanda sambu na kusyamisa Bakristu ya mpa, kulanda kusolula ti banduku, kupesa kikesa na bampangi ya babakala ti ya bankento yina mebaka mikumba ya nene, kupesa ngolo na bayina kenwana ti bampasi, mpi kupesa bansangu yina kele mfunu sambu na kusala bisalu ya dibundu.​—1 Tes. 1:1-7; 5:27; 2 Pie. 3:1, 2.

Kusonika mikanda kele mpi mutindu ya mbote ya kuta kimbangi. Na bisika yankaka, kele ti babwala ya beto lenda ta ve kimbangi kukonda mpasi. Bantu yankaka kevandaka ve na banzo na bo mbala mingi, mpi beto kekutanaka ti bo ve na ntangu beto kesamunaka nzo na nzo. Bankaka kezingaka na bisika ya kingenga.

Maladi, ntangu ya mbi, to couvre feu lenda kangisa nge ntangu yankaka na nzo na nge. Keti nge takuka kusonika mukanda sambu na kuta kimbangi na mpangi na nge to na muntu mosi ya nge solulaka na yandi na dibaku ya mbote? Keti longoki na nge mosi ya Biblia mekwenda na kisika yankaka? Kana nge sonikila yandi mukanda yo lenda sadisa yandi na kulanda mpusa na yandi ya kimpeve. To mbala yankaka nge lenda tindila bantu yina mekwelana ntama mingi ve, bayina mekuma bibuti, to mefwila muntu ya bo kezolaka bansangu ya kufwana ya Masonuku.

Kuta Kimbangi na Mukanda

Kana nge kesonika mukanda sambu na kuta kimbangi na muntu yina nge mekutanaka na yandi ntete ve, yantika ntete na kuzabisa yandi zina na nge. Nge lenda tendudila yandi nde nge kesalaka kisalu ya luzolo ya mbote yina kesalama na bansi mingi. Kana nge mona nde yo kele mbote na kusala yo, zabisa yandi nde nge kele Mbangi ya Yehowa. Zabisa muntu yango sambu na nki nge kesonikila yandi olie ya kukwenda kutala yandi nge mosi. Sonika bonso nde yandi kele na ntwala na nge ebuna nge kesolula ti yandi. Kansi, na kuwakana ti lutwadisu yina kelomba beto na ‘kuvanda mayele bonso bambuluku kansi ntima ya pima bonso bapizio,’ yindula mbote kiteso ya bansangu ya metadila nge ya nge fwete songa yandi.​—Mat. 10:16.

Sonika na mukanda mambu ya nge zolaka kusonga muntu yina kana nge kwendaka kutala yandi nge mosi. Nge lenda soba fyoti bangogo ya luyantiku ya nge tabaka na kamukanda Inki Mutindu Nge Lenda Kuyantika mpi Kulanda Masolo to sadila nsonga ya Masonuku yina nge tabaka na nimero ya mpa ya Kisalu na Beto ya Kimfumu. Nge lenda yula ngyufula mpi nge syamisa muntu yina na kuyindula mambu ya yo ketuba. Bansamuni yankaka ketendulaka kaka nde beto kele ti programe sambu na kupesa bamvutu na bangyufula ya Biblia ya ofele mpi na nima bo ketangaka ndambu ya bantu-dyambu ya bakapu yina kele na mukanda mosi ya beto kesadilaka na kulonguka Biblia. Mbandu ya mukanda mosi yina nge lenda sonika sambu na kupesa kimbangi kele na lutiti 73. Yo lenda pesa nge ndambu ya bangindu, kansi yo kele mbote na kusoba mambu yina kele na kati. Kana ve, na nima ya bilumbu, bantu lenda baka mukanda yina mosi mbala mingi.

Bantu yankaka kezolaka ve kutanga mukanda ya nda yina mekatuka na munzenza. Yo yina, nge tamonisa mayele kana mukanda na nge kuvanda ya nkufi. Mukanda na nge fwete vanda ya nkufi kana ve muntu yina tabaka yo tavanda na bulembu sambu na kutanga yo. Yo tavanda mbote na kukotisa na kati imvitasio na balukutakanu na Nzo ya Kimfumu. Nge lenda tula mpi trakiti, kamukanda, to nimero ya Nzozulu ya Nkengi to Réveillez-vous ! mpi tendudila yandi nde kana yandi mezola, nge lenda tindilaka yandi yo mbala na mbala. To nge lenda yula yandi kana yandi tazola nde nge kwenda kutala yandi na nzo sambu beno solula dyaka mingi disolo ya beno ketubila.

Mutindu Yo Fwete Monana na Meso

Tala ntangu yai mbandu ya mukanda yina kele awa. Nge tamona mambu yai: (1) Yo kele na ndonga, yo kele ve kisakasaka. (2) Ata bo mekwenda kubikisa amvelope na adresi yankaka, muntu yina tabaka mukanda na nge tamona kaka zina mpi adresi ya posita ya muntu yina metinda mukanda. (3) Lukanu ya mukanda kele pwelele mpi yo kele na paragrafe ya ntete. (4) Konso paragrafe ketubila ngindu mosi ya mfunu. (5) Na kuwakana ti lukanu na yo, mukanda yango kesadila ve kutuba ya balabala to ya luzitu mingi kibeni.

Na mukanda mosi ya luzitu bonso yina sekretere ya dibundu lenda tinda na biro ya filiale, beno fwete sonika zina ya dibundu, zina ya sekretere, adresi na yandi ya posita, mpi dati. Beno fwete sonika mpi zina ti adresi ya muntu to organizasio yina beno ketindila mukanda. Na nima na yo, sonika bangogo ya luzitu ya bo kesonikaka na ntwala ya kumanisa mukanda. Na nsuka ya mukanda, na bandinga yankaka bo kesonikaka bangogo yai na zulu ya mpwasa ya bo kebikaka sambu na kutula diboko na mukanda, “Bikala mbote,” to “Yamba mbote ya mekatuka na mono mpangi na nge kingandi.” Nge fwete tula siniatire na maboko.

Na konso mukanda ya nge kesonika, tula dikebi na mutindu nge kesonika bangogo, na gramere, na bidimbu ya kupemina, mpi bunkete. Mambu yai tapesa kilo na mukanda na nge mpi na nsangu yina kele na kati na yo.

Na nganda ya amvelope, sonika ntangu yonso adresi yina bo tavutudila nge mvutu, mbote yo vanda adresi na nge mosi ya posita. Kana nge mona nde yo tavanda mbote ve na kupesa adresi na nge ntangu nge keta kimbangi na banzenza na nzila ya mukanda, yula bankuluntu kana bo tandima nde nge sadila adresi ya Nzo ya Kimfumu na beno. Nge fwete sadila ve ata fyoti adresi ya la Société Watch Tower sambu na lukanu yai, sambu yo tamonisa neti nde mukanda yango mekatuka na biro ya la Société mpi yo tanata mavwanga. Kana nge metula ve adresi ya kuvutudila nge mvutu mpi nge metula mikanda na kati, yo lenda pesa mpi ngindu nde la Société muntu metinda yo.

Tula batembre ya kufwana, mingimingi kana nge metula mikanda na kati. Kana batembre kele ve ya kufwana, bo lenda futisa muntu yina tabaka mukanda mbongo ya zulu, mpi mambu yai takatula dikebi ya muntu yina na nsangu na nge. Kuvila ve nde na bansi mingi kana nge metula kamukanda to periodike na kati ya mukanda, ntalu ya bo kefutisaka na posita kevandaka mingi kuluta yina bo kefutaka sambu na mukanda.

Ndinga ya Mbote

Kana nge memanisa kusonika mukanda na nge, tanga yo sambu na kutesa mambu yina kele na kati. Yo kewakana nki mutindu? Keti yo kele ya mbote mpi ya mayele? Zola ti ntima ya mbote kele bikalulu yina beto kesalaka ngolo na kumonisa na bangwisana na beto ti bankaka. (Gal. 5:22, 23) Kana nge mona nde ndinga kele mbote ve to yo kele ti mwa ngindu ya mbi na kati, yidika bangogo yango.

Mukanda lenda kwenda na bisika yina nge lenda kwenda ve. Dyambu yai kesalaka nde yo vanda kisadilu mosi ya mfunu sambu na kisalu ya kusamuna. Sambu mukanda na nge kemonisaka nge mpi mambu yina nge kemonaka ya mfunu, yindula mbote mambu yina yo ketuba, mutindu yo kemonana na meso, mpi mutindu yo kewakana na makutu. Mbala yankaka yo kele kibeni kima yina tasadisa moyo mosi ya mfunu na kuyantika kutambula na nzila ya luzingu, na kukangama na nzila yina, mpi na kubaka kikesa ya kulanda yo.