Pesa Bantu Kikesa na Mutindu Mosi ya Mbote

BANKULUNTU fwete ‘zaba kupesa bantu yankaka kikesa na lusadisu ya malongi ya kieleka.’ (Tito 1:9) Na bantangu yankaka, bo fwete sala yo na ntwala ya mambu ya mpasi. Yo kele mfunu na kupesa bandongisila yina kewakana ti mambu yina Masonuku ketuba. Yo yina, bankuluntu fwete landa ndongisila yai: “Landa na kudipesa . . . na kupesa bantu kikesa.” (1 Tim. 4:13, NW) Ata beto ketubila ntetentete bankuluntu na disolo yai to bantu yina kesosa kukuma bankuluntu, bantangu yankaka bibuti kevandaka mpi na mfunu ya kupesa bana na bo kikesa to bampangi yina kelongukaka Biblia ti bantu kevandaka na mfunu ya kupesa balongoki ya Biblia kikesa. Bo yonso lenda sadila mambu ya beto ketubila na disolo yai.

Mambu Yina Kelombaka Kupesa Kikesa. Sambu na kuzaba ntangu ya kupesa kikesa, yo kele mfunu na kutadila bisika yina bo kepesa kikesa yina Biblia ketubila. Ntumwa Piere kusyamisaka bankuluntu na kulungisa mbote mukumba na bo ya bangungudi ya mameme ya Nzambi. (1 Pie. 5:1, 2) Polo kulongisilaka Tito na kupesa baleke kikesa nde bo “kudiyala.” (Tito 2:6) Polo kusyamisaka bampangi Bakristu na ‘kuwakana’ mpi na kubuya kuvukana ti bantu yina kesosaka kukabisa bampangi. (1 Kor. 1:10; Roma 16:17; Filp. 4:2) Ata Polo kusikisaka bantu ya dibundu ya Tesalonika sambu na mambu ya mbote ya bo vandaka kusala, yandi syamisaka bo na kusadila mbote malongi yina bo waka. (1 Tes. 4:1, 10) Piere kupesaka bampangi Bakristu kikesa na “kutina bampusa ya kimuntu.” (1 Pie. 2:11, NW) Yude kusyamisaka bampangi na yandi na “kunwana ngolo sambu na lukwikilu” (NW) sambu na bupusi ya bantu ya mbi yina vandaka ti bikalulu ya mbi. (Yude 3, 4) Biblia kesyamisa Bakristu yonso na kupesana kikesa na mpila nde ngolo ya luvunu ya disumu kukumisa bo ve ntima ngolo. (Baeb. 3:13) Piere kusyamisaka Bayuda yina kukwikilaka ntete ve na Kristu nde: “Beno ndima na kuguluka, beno tina bantu yai me vilaka.”​—Bis. 2:40.

Inki bikalulu kele mfunu sambu na kupesa bantu kikesa na mutindu mosi ya mbote na mambu ya mutindu yai? Inki mutindu muntu yina kepesa kikesa lenda pusa bantu na kusadila kukonda kusukinina mambu ya yandi ketuba kukonda kulomba bo na kusala yo na ngolo?

‘Sambu na Zola.’ Kana beto kepesa ve bantu kikesa ‘sambu na zola,’ yo lenda monana ngolo mingi. (Film. 9) Ya kyeleka, kana yo kelomba kusala dyambu mosi kukonda kusukinina, kutuba ya mutubi fwete monisa nde dyambu yango kele ya nswalu-nswalu. Kutuba ya mawete lenda monana bonso nde nge kebondila bo. Kansi, nge fwete tuba na kikesa mpi na mawi. Kusimba ntima ya bantu na zola yonso tapusa bawi na kusadila mambu ya bo kewa. Ntangu yandi vandaka kutubila mambu yina yandi mosi mpi banduku na yandi kusalaka, Polo kusongaka bantu ya Tesalonika nde: “Beno zaba nde beto [pesaka kikesa, NW] na konso muntu na kati na beno bonso tata ke salaka na bana na yandi mosi.” (1 Tes. 2:11) Bankuluntu yina vandaka kupesa bampangi yina kikesa ti zola yonso. Bika nde kutuba na nge kumonisa ntangu yonso dikebi ya masonga ya nge ketula na bawi na nge.

Tuba na mayele. Kupesa ve makasi na bantu yina nge kesosa kupusa na kusadila mambu ya nge ketuba. Kansi, kuwa mpi ve boma na kusonga bawi na nge ‘mambu yonso ya Nzambi kezolaka.’ (Bis. 20:27) Bantu ya ntima ya masonga yina kesepilaka na kubaka bandongisila tawila nge ve makasi to kuyina nge sambu nge mesyamisa bo na zola yonso na kusala mambu yina kele mbote.​—Nk. 141:5.

Mbala mingi, yo kevandaka mbote na kusikisa muntu na masonga yonso mpi na dyambu mosi ya sikisiki na ntwala ya kupesa yandi bandongisila. Yindula mambu ya mbote yina bampangi na nge kesalaka, disongidila mambu yina kesepidisaka Yehowa: mu mbandu lukwikilu yina bo kemonisaka na kisalu na bo, zola yina kepusaka bo na kudipesa na kikesa yonso, mpi kukanga ntima na ntwala ya mambu ya mpasi ya bo kekutanaka na yo. (1 Tes. 1:2-8; 2 Tes. 1:3-5) Kusala mutindu yai tasadisa bampangi na nge na kumona nde nge kebaka bo na valere mpi kebakisa bo, mpi yo tasala nde bo ndima bandongisila yina talanda.

‘Na Kukanga Ntima Mpenza.’ Yo kelombaka kupesa kikesa ti ‘kukanga ntima mpenza.’ (2 Tim. 4:2) Yo ketendula inki? Kukanga ntima kekwendaka nzila mosi ti kuvanda ntima ya nda na ntwala ya mambu ya mbi to yina bantu ketuba sambu na kusosila muntu. Muntu yina mezaba kukanga ntima ketulaka kivuvu nde bawi na yandi tasadila mambu ya yandi ketuba. Kupesa kikesa ti mabanza ya mutindu yai tasadisa bawi na nge na kukonda kuyindula nde nge kemona bo bonso bantu ya kuluta mbi. Kutula ntima nde bampangi ya babakala ti ya bankento kezola kusadila Yehowa na ngolo na bo yonso tapesa bo nzala ya kusala mambu yina kele mbote.​—Baeb. 6:9.

‘Na Lusadisu ya Malongi ya Kyeleka.’ Inki mutindu nkuluntu mosi lenda ‘pesa kikesa na lusadisu ya malongi ya kyeleka’? Kana yandi ‘kelanda kaka nsangu yina ya beto lunga kutula ntima, nsangu yina ke kwendaka kiteso mosi na malongi na yandi.’ (Tito 1:⁠9) Na kisika ya kupesa bangindu na nge mosi, sadila Ndinga ya Nzambi sambu na kupesa ndongisila na nge kilo. Bika Biblia kusadisa nge na kuzaba mambu yina nge fwete tuba. Tanga mambote yina bo tabaka na kusadila mambu yina Biblia ketuba na dyambu ya nge ketubila. Yindula mambu ya mbi yina takumina bo ntangu yai mpi na bilumbu kekwisa sambu na kukonda kuzitisa Ndinga ya Nzambi. Ebuna sadila mambu yai sambu na kumonisa bawi na nge mfunu ya kusala mambu ya kewakana ti mambu yina nge ketuba.

Tendudila bawi na nge pwelele mambu ya bo fwete sala mpi mutindu bo fwete sala yo. Monisa bo mbotembote nde mambu ya nge ketuba mekatuka mpenza na Biblia. Kana Biblia kebikila konso muntu nswa ya kubaka konso desizio yina yandi mezola na dyambu mosi, tendudila bo bandilu ya kimpwanza yina. Na nima, na bangogo na nge ya nsuka, tuba mambu yina tapusa bawi na nge na kubaka lukanu ya kusadila mambu ya bo mewa.

Na “Masonga Yonso.” Sambu na kupesa bantu yankaka kikesa na mutindu mosi ya mbote, yo kelomba “kutuba na masonga yonso na lukwikilu.” (1 Tim. 3:13, NW) Inki kesadisaka muntu na kutuba na masonga yonso? ‘Mbandu ya mbote ya yandi kepesaka na mambu yonso’ ya kewakana ti mambu ya yandi kesyamisa bampangi na yandi na kusala. (Tito 2:6, 7; 1 Pie. 5:3) Kana yandi kesala mutindu yina, bantu yina yandi kesyamisa tabakisa nde muntu yina kesyamisa bo kelomba bo ve na kusala mambu yina yandi mosi kesalaka ve. Bo tabakisa nde bo lenda landa mbandu ya lukwikilu na yandi kaka mutindu yandi mosi kesalaka ngolo na kulanda mbandu ya Kristu.​—1 Kor. 11:1; Filp. 3:17.

Kupesa kikesa ti bandongisila yina kekatuka na Ndinga ya Nzambi mpi na zola yonso lenda natila bantu mambote mingi. Bantu yina kele ti mukumba ya kupesa bankaka kikesa ya mutindu yai fwete sala ngolo na kusala yo na mutindu mosi ya mbote.​—Roma 12:8.