KAPU 15

Dilongi Sambu na Kuvanda Muntu ya Mbote

KETI nge mezaba kana kuvanda ti bangindu ya mbi sambu na muntu ketendula inki?— Kuvanda ti bangindu ya mbi sambu na muntu ketendula kukonda kuzola muntu yango kaka sambu mbala yankaka yandi ke ya kuswaswana ti beto to yandi ketubaka ndinga yina meswaswana ti ya beto. Yo yina, kuvanda na bangindu ya mbi ketendula kuvanda ti mawi to mabanza ya mbi sambu na muntu na ntwala ya kuzaba yandi mbotembote.

Keti nge keyindula nde yo ke mbote na kukonda kuzola muntu na ntwala ya kuzaba mbotembote kana yandi ke muntu ya nki mutindu to kaka sambu yandi ke ya kuswaswana ti nge?— Ve, kuvanda na bangindu ya mbi sambu na muntu ke mbote ve. Beto fwe konda ve kumonisa bumbote na muntu kaka sambu mbala yankaka yandi ke ya kuswaswana ti beto.

Yindula fyoti. Keti nge mezaba muntu mosi yina mpusu ya nitu na yandi ke ya kuswaswana ti ya nge to yina ketubaka ndinga ya kuswaswana ti ya nge?— Ziku nge mezaba nkutu bantu yina kemonanaka ya kuswaswana sambu bo salaka aksida to sambu bo belaka maladi mosi buna. Keti nge kevandaka ti ntima ya mbote mpi ya zola sambu na bayina ke ya kuswaswana ti nge?—

Kana beto kewila Longi ya Nene, Yezu Kristu, beto tamonisaka ntima ya mbote na bantu yonso. Beto fwe vandaka mbote ti konso muntu kukonda kutala insi to mpusu ya nitu na yandi. Beto fwe vandaka mbote ti yandi. Yezu muntu kulongaka dilongi yai ata bantu mingi ve kekwikilaka yo. Bika beto tubila yo.

Muyuda mosi ya kuvandaka na bangindu ya mbi sambu na bankaka kwisaka na Yezu mpi yandi yulaka ngyufula nde: ‘Nki mu fwe sala sambu na kuzinga mvula na mvula?’ Yezu kuzabaka nde ziku muntu yina vandaka kusosa nde yandi tubila yandi nde beto fwe monisaka ntima ya mbote kaka na bantu yina beto ke na bo mpusu ya nitu mosi to insi mosi. Yo yina, na kisika ya kupesa mvutu yandi mosi, Yezu kuyulaka muntu yina nde: ‘Nsiku ya Nzambi ketuba nde beto fwe sala inki?’

Muntu yina kuvutulaka nde: ‘Nge fwe zola Yehowa Nzambi na nge na ntima na nge yonso, mpi nge fwe zola mpangi na nge bonso nge mosi.’ Yezu kutubaka nde: ‘Nge metuba mbote. Landa na kusala mutindu yina ebuna nge tabaka luzingu ya mvula na mvula.’

Kansi, muntu yango kuzolaka ve kumonisa ntima ya mbote to ya zola na bantu yina kuvandaka ya kuswaswana ti yandi. Yo yina yandi sosaka kikuma ya kudinungisila. Yandi yulaka Yezu nde: ‘Nani ke mpenza mpangi na munu?’ Ziku yandi zolaka nde Yezu kutuba nde: “Bampangi na nge kele banduku na nge,” to “Bantu yina beno ke na bo mutindu mosi.” Sambu na kupesa mvutu na ngyufula yina, Yezu kutaka disolo ya Muyuda mosi ti Musamaria mosi. Disolo yango yo yai.

Muntu mosi kukatukaka na bwala ya Yeruzalemi, yandi vandaka kwenda na Yeriko. Muntu yango kuvandaka Muyuda. Ntangu yandi vandaka kukwenda, miyibi kukangaka yandi. Bo bulaka yandi mingi tii kuna yandi bwaka na ntoto mpi bo bakaka mbongo ti bilele na yandi. Miyibi yina kubulaka yandi ngolo kibeni mpi bo bikaka yandi penepene na lufwa na lweka ya nzila.

Mwa ntangu fyoti na nima, nganga-Nzambi mosi kwisaka kuluta na nzila yina. Yandi monaka muntu yina bo lwadisaka mingi mpenza. Kana yo vandaka nge, inki nge zolaka kusala?— Nganga-Nzambi kulutaka na lweka yankaka ya nzila. Yandi telamaka nkutu ve. Yandi salaka ata kima mosi ve sambu na kusadisa muntu yina.

Na nima, muntu yankaka ya kesambilaka mingi kwisaka kuluta na nzila yina. Muntu yango kuvandaka Mulevi yina vandaka kusala na tempelo ya Yeruzalemi. Keti yandi telamaka sambu na kusadisa muntu yina?— Ve. Yandi mpi kusalaka kaka mutindu nganga-Nzambi kusalaka.

Nsukansuka, Musamaria mosi kwisaka kuluta. Keti nge kemona mutindu yandi kekwisa na lweka ya nzila?— Yandi monaka Muyuda melala kuna ti bamputa mingi na nitu. Zaba nde Bantu ya Samaria mingi vandaka kuwakana ve ata fyoti ti Bayuda. (Yoane 4:9) Ebuna, keti Musamaria yai kuyambulaka muntu yina kukonda kusadisa yandi? Keti yandi yindulaka nde: ‘Sambu na nki mu fwe sadisa Muyuda yai? Keti Muyuda yai zolaka kusadisa munu kana munu muntu kuvandaka na mpasi’?

Musamaria kutalaka muntu yina vandaka ya kulala na lweka ya nzila, mpi yandi wilaka yandi mawa. Yandi kukaka ve kuyambula yandi pana mpi kubika yandi nde yandi fwa. Yo yina yandi kitaka na mpunda na yandi, yandi kwendaka penepene na muntu yango, mpi yandi yantikaka na kusansa bamputa na yandi. Na nima yandi tulaka mafuta ti vinu na bamputa yango. Yo zolaka kubelula bamputa. Na nima, yandi kangisaka bamputa yango ti lele.

Musamaria kutulaka na malembe yonso muntu yina ya bamputa na mpunda na yandi. Ebuna bo kwendaka malembe-malembe tii na nzo mosi ya fyoti ya banzenza. Ntangu bo kumaka kuna, Musamaria kuzwaka kisika mosi sambu na muntu yango, mpi yandi sansaka yandi mbote.

Ntangu yai, Yezu kuyulaka muntu yina yandi vandaka kusolula ti yandi nde: ‘Nge keyindula nde nani kuvandaka mpangi ya mbote na kati ya bantu yai tatu?’ Kana kuvandaka nge, nge zolaka kuvutula nde nani? Nde nganga-Nzambi, Mulevi, to Musamaria?—

Muntu yina kuvutulaka nde: ‘Mpangi ya mbote kuvandaka muntu yina kutelamaka mpi kusadisaka muntu yina ya bamputa.’ Yezu kutubaka nde: ‘Nge mepesa mvutu ya mbote. Nge mpi kwenda kusala mutindu yina.’—Luka 10:25-37.

Disolo yai mevanda ya mbote mpenza, mpidina ve? Yo kemonisa pwelele bantu yina ke bampangi na beto. Bo kele ve kaka banduku na beto ya ngolo. Mpi bo kele ve kaka bantu yina kele ti mpusu ya nitu mosi ti beto to bayina ketubaka ndinga mosi ti beto. Yezu kulongaka beto na kumonisa ntima ya mbote na bantu kukonda kutala kisika ya bo mekatuka, mutindu ya bo kele, to ndinga ya bo ketuba.

Yehowa Nzambi ke mutindu yina. Yandi kevandaka ve na bangindu ya mbi sambu na bantu. Yezu kutubaka nde: ‘Tata na beno yina kele na zulu kebasisaka ntangu na yandi na zulu sambu na bantu ya mbi ti na bantu ya mbote. Yandi kenokisaka mpi mvula na bantu ya mbote ti na bayina kevandaka mbote ve.’ Yo yina, beto fwe monisaka ntima ya mbote na bantu yonso, mutindu Nzambi kesalaka.—Matayo 5:44-48.

Ebuna, kana nge memona muntu mosi ke na mpasi, inki nge tasala?— Inki nge tasala kana muntu yango kele ya insi yankaka to kana mpusu ya nitu na yandi kele ve bonso ya nge? Yandi ke kaka mpangi na nge, nge fwe sadisa yandi. Kana nge keyindula nde nge ke fyoti mingi sambu na kusadisa yandi, nge le lomba lusadisu na mbuta mosi. To nge le binga polisi mosi to longi mosi ya nzo-nkanda. Kana nge sala mpidina yo tasonga nde nge ke na ntima ya mbote bonso Musamaria.

Longi ya Nene kezolaka nde beto vanda na ntima ya mbote. Yandi kezolaka nde beto sadisa bankaka, kukonda kupona. Yo yina yandi taka disolo ya Musamaria ya ntima ya mbote.

Na dilongi yai ya kemonisa nde beto fwe vanda ti ntima ya mbote na bantu kukonda kutala mpusu ya nitu na bo to insi na bo, tanga Bingana 19:22; Bisalu 10:34, 35; mpi 17:26.

[Bifwanisu ya kele na lutiti 83]

Inki mutindu beto fwe bakaka bayina le vanda ya kuswaswana ti beto?

[Bifwanisu ya kele na lutiti 84, 85]

Sambu na nki Musamaria kuvandaka mpangi ya mbote?

[Kifwanisu ya kele na lutiti 86]

Inki mutindu nge le vanda mpangi ya mbote?