KAPU 40

Inki Mutindu Kupesa Nzambi Kyese

INKI beto le sala sambu na kupesa Nzambi kyese? Keti beto le pesa yandi kima?— Yehowa ketuba nde: “Bambisi yonso ya mfinda kele ya mono.” Yandi ketuba dyaka nde: “Arza ti wolo yonso ya nsi-ntoto kele ya mono.” (Nkunga 24:1; 50:10; Agai 2:8) Kansi, kele ti kima mosi ya beto le pesa Nzambi. Inki kima yango?—

Yehowa kepesaka beto nzila ya kupona kana beto tasadila yandi to ve. Yandi kepusaka beto ve na ngolo na kusala mambu ya yandi kezola nde beto sala. Beto sosa na kubakisa sambu na nki Nzambi mesalaka beto na mpila nde beto mosi kupona kana beto tasadila yandi to ve.

Ziku nge mezaba inki bo kebingaka nde robo. Yo kele masini mosi ya bo meyidikaka na mpila nde yo sala mambu yonso ya muntu yina kusalaka yo kezolaka nde yo sala. Yo yina robo keponaka ve mambu ya yo kezola kusala. Yehowa lendaka kusala nde beto yonso kuvanda bonso barobo. Yandi lendaka kusala beto na mpila nde beto salaka kaka mambu yina ya yandi kezolaka nde beto sala. Kansi Nzambi kusalaka ve mpidina. Keti nge mezaba sambu na inki?— Bima mingi ya kusekinina kevandaka barobo. Kana nge nyema buto mosi, yo kesalaka kaka mambu yina muntu yina kusalaka yo kutulaka na kati na yo nde yo fwe sala. Keti nge memonaka dezia kima ya kusekinina ya mutindu yina?— Mbala mingi, bantu kelembaka na kusekana ti kima ya kusekinina yina kesalaka kaka mambu ya bo metulaka na kati na yo. Nzambi kezolaka ve nde beto lemfukila yandi bonso barobo yina ya bo mekotisaka dezia na kati na yo mambu yonso ya beto fwete sadila yandi. Yehowa kezolaka nde beto sadila yandi sambu beto kezolaka yandi mpi sambu beto ke na luzolo ya kulemfukila yandi.

Nge keyindula nde Tata na beto ya zulu kewaka nki mutindu ntangu beto kelemfukilaka yandi na luzolo na beto mpenza?— Songa munu, bibuti na nge kekudiwaka nki mutindu ntangu bo kemonaka bikalulu na nge?— Biblia ketuba nde mwana ya mayele “ke pesaka kiese na tata [na yandi]” kansi mwana ya zoba “ke pesaka mawa na mama na yandi.” (Bingana 10:1) Keti nge kebakisa nde kana nge kesala mambu yina mama ti tata na nge kelombaka nge na kusala, yo kepesaka bo kyese?— Kansi, inki mutindu bo kewaka kana nge kelemfukila bo ve?—

Ntangu yai, beto yindula Tata na beto ya zulu, Yehowa. Yandi ketubila beto mutindu ya beto le pesa yandi kyese. Baka fyoti Biblia na nge, mpi kangula yo na Bingana 27:11, NW. Kuna, Nzambi kezabisa beto nde: “Vanda mayele mwana na mono, mpi sepedisa ntima na mono, na mpila nde mono lenda kupesa mvutu na muntu yina kesosilaka mono.” Keti nge mezaba kana kusosila muntu ketendula inki?— Sambu na kusosila nge, muntu le seka nge mpi kusonga nge nde nge kukaka ve kusala mambu yina ya nge tubaka nde nge tasala. Inki mutindu Satana kesosilaka Yehowa?— Beto tala.

Yibuka nde na Kapu 8 ya mukanda yai beto longukaka nde Satana kezolaka kuvanda Muntu ya Nene mpi nde yandi kezolaka nde bantu yonso kulemfukila yandi. Satana ketubaka nde bantu kesambilaka Yehowa kaka sambu Yehowa tapesa bo luzingu ya mvula na mvula. Na nima ya kupusa Adami ti Eva na kukolama na Yehowa, Satana kutulaka ntembe ti Nzambi. Yandi zabisaka Nzambi nde: ‘Bantu kesadilaka nge kaka sambu na bima yina ya bo kebakaka na nge. Pesa mono kaka nswa, nge tamona mpila mu tabenda bantu yonso na mpila nde bo sadila nge dyaka ve.’

Yo kele ya kyeleka nde bangogo ya mutindu yai kele ve na Biblia. Kansi, na ntangu beto ketangaka disolo ya Yobi, yo kemonanaka pwelele nde Satana kuzabisaka Nzambi dyambu mosi ya mutindu yina. Yo vandaka mfunu mpenza nde Yehowa ti Satana kuzaba kana Yobi vandaka ya kwikama na Nzambi to ve. Bika beto kangula ba Biblia na beto na Yobi kapu ya 1 ti ya 2 sambu beto mona mutindu dyambu yango kulutaka.

Beto kemona na Yobi kapu ya 1 nde Satana kele pana na zulu ntangu bawanzyo mekwisa kutala Yehowa. Ebuna, Yehowa meyula Satana nde: “Nge me katuka wapi?” Satana mevutula nde yandi mekatuka kutambula na ntoto. Ebuna Yehowa meyula nde: ‘Keti nge memona Yobi, yina kesadilaka mono mpi kesalaka ve mambu ya mbi?’—Yobi 1:6-8.

Na mbala mosi, Satana mepesa mvutu sambu na kudinungisa. ‘Yobi kesambilaka nge kaka sambu yandi kemonaka ve ata mpasi mosi. Kana nge katula lutaninu mpi lusakumunu ya nge mepesaka yandi, yandi tafinga nge na meso ya bantu yonso.’ Ebuna Yehowa kuvutulaka nde: ‘Mambu ve, Satana, nge lenda sala yandi mambu yonso ya nge kezola, kansi kumonisa ve yandi mosi Yobi mpasi.’—Yobi 1:9-12.

Inki mambu Satana kusalaka?— Yandi pusaka bantu na kuyiba bangombe ti bampunda ya Yobi, mpi na kufwa bayina vandaka kutala bambisi yina yonso. Ebuna, nzasi kubwaka mpi yo fwaka mameme ti bangungudi na yo. Na nima, bantu kukwisaka ebuna bo yibaka bashamo mpi bo fwaka bantu yina vandaka kutala yo. Nsukansuka, Satana kutindaka mupepe mosi ya ngolo yina kwendaka kubwisa nzo yina bana kumi ya Yobi kuvandaka, ebuna, bo yonso kufwaka. Ata Yobi kukutanaka ti bampasi yai yonso, yandi landaka kaka na kusadila Yehowa.—Yobi 1:13-22.

Ntangu Yehowa kumonaka dyaka Satana, Yehowa kumonisaka nde Yobi kubikalaka kaka ya kwikama. Satana sosaka kudinungisa nde: ‘Kana nge bikisa kaka nde mu monisa nitu na yandi mpasi, yandi tafinga nge na meso ya bantu yonso.’ Ebuna Yehowa kubikisaka Satana nde yandi kumonisa nitu ya Yobi mpasi kansi yandi kebisaka Satana nde kufwa ve Yobi.

Satana kulosilaka Yobi bivimbu na nitu na yandi ya mvimba. Bivimbu yango vandaka kubasisa nsudi ya mbi mpenza yina vandaka kusala nde ata muntu mosi ve vandaka kuzola kuvanda penepene ti yandi. Nkutu nkento na yandi kutubilaka yandi nde: ‘Finga Nzambi ebuna nge fwa!’ Bayina vandaka kutuba nde bo vandaka banduku ya Yobi kwisaka kutala yandi ebuna bo pesaka yandi dyaka mpasi na ntima na kutubaka nde Yobi vandaka kumona bampasi yina yonso sambu yo fwete vanda nde yandi salaka mambu ya mbi mpenza. Kansi ata Satana kumonisaka Yobi bampasi yina yonso, Yobi kulandaka kaka na kusadila Yehowa na kwikama yonso.—Yobi 2:1-13; 7:5; 19:13-20.

Nge keyindula nde kwikama ya Yobi kusalaka nde Yehowa kuwa nki mutindu?— Yo pesaka Yehowa kyese sambu yo salaka nde Yandi kutubila Satana nde: ‘Tala Yobi! Yandi kesadilaka mono sambu yandi kezolaka kusadila mono.’ Keti nge tavanda bonso Yobi, muntu yina Yehowa lenda songa nde nge kele mbandu yina kemonisa Satana nde yandi kele muntu ya luvunu?— Ya kyeleka, yo kele lukumu mpenza na kupesa mvutu na luvunu yina Satana kutubaka nde yandi lenda benda bantu yonso na mpila nde bo sadila ve Yehowa. Ntembe kele ve nde, Yezu vandaka kumona yo nde yo vandaka kima mosi ya lukumu.

Longi ya Nene kupesaka ve Satana nzila ata fyoti nde yandi kupusa Yandi na kusala konso kima yina ya mbi. Mbandu na yandi kupesaka Tata na yandi kyese mingi mpenza! Yehowa kubakaka dibaku ya kusonga Yezu musapi sambu na kuvutudila Satana mvutu nde: ‘Tala Mwana na mono! Yandi mevanda ya kwikama na mono na mambu yonso sambu yandi kezolaka mono!’ Yindula mpi kyese yina Yezu kuvandaka na yo na mutindu yandi pesaka ntima ya Tata na yandi kyese. Kyese yina kusalaka nde Yezu kukanga ntima tii kuna yandi kufwa na zulu ya nti ya mpasi.—Baebreo 12:2, NW.

Keti nge kezola kuvanda bonso Longi na beto ya Nene mpi kupesa Yehowa kyese?— Kana mpidina, landa na kulonguka mambu yina Yehowa kezola nde nge sala, mpi salaka mambu yango sambu na kupesa yandi kyese!

Tanga mambu yina Yezu kusalaka sambu na kupesa Nzambi kyese mpi mambu ya beto fwete sala na Bingana 23:22-25; Yoane 5:30; 6:38; 8:28; mpi 2 Yoane 4.

[Kifwanisu ya kele na lutiti 207]

Sambu na nki Nzambi kusalaka beto ve nde beto vanda bonso robo yai?

[Kifwanisu ya kele na lutiti 208]

Inki mutindu nge le pesa kyese na Yehowa ti na bibuti na nge?

[Kifwanisu ya kele na lutiti 209]

Na nima ya kusumuka ya Adami ti Eva, inki mutindu Satana kutulaka ntembe ti Yehowa?

[Kifwanisu ya kele na lutiti 210]

Inki bampasi Yobi kumonaka, mpi sambu na nki yo pesaka Nzambi kyese?