Lusadisu Yina Bibuti Fwete Pesa Bana

KONSO muntu yina kekumaka tata to mama kelungisaka dyambu mosi ya bantu kekukaka ve kubakisa mbotembote. Konso muntu na kati na bo zole kepesaka kima mosi ya kekatukaka na nitu na yandi. Nsukansuka, kima ya kekwendaka kuyela na kati ya divumu ya mama kevandaka muntu ya mvimba ya kezinga. Yo yina, mpila ya kuyituka kele ve na kumona nde ntangu mwana kebutukaka, bantu ketubaka nde “kubuta kevandaka kima mosi ya kuyituka.”

Na kutuba ya mbote, kubuta bana kele kaka luyantiku ya mukumba ya bibuti. Na luyantiku, bana kevandaka na mfunu ya bibuti na bo na mambu yonso, kansi kana bana mebanda kuyela, bo kevandaka na mfunu nde bibuti kutudila bo dikebi na mambu yankaka mingi kansi na nitu mpamba ve. Bo kevandaka na mfunu ya lusadisu sambu na kuyela na mabanza, na mawi, na bikalulu, mpi na kimpeve.

Sambu na kuyela mbote, bana kevandaka mingimingi na mfunu nde bibuti kuzola bo. Ata yo kevandaka mfunu nde bibuti kutubila bo na munoko nde bo kezolaka bo, bo fwete monisaka yo mpi na mambu ya bo kesala. Ya kyeleka, bana kevandaka na mfunu ya mbandu ya mbote ya bibuti. Bana kevandaka na mfunu ya lutwadisu yina kemonisa bo bikalulu ya mbote, ti minsiku ya bo fwete landaka na luzingu na bo. Bo kevandaka na mfunu ya lutwadisu ti minsiku yai banda na bumwana na bo. Mbala mingi, mambu ya kepesaka basusi mingi lenda kumina bibuti mpi nkutu yo kekuminaka bo mpenza kana bo mebikisa nde bana kuyela kaka mutindu yina tii kuna kukonda kupesa bo lusadisu.

Minsiku ya kuluta mbote yina beto lenda zwa ve kisika yankaka kele minsiku yina kele na Biblia. Malongi yina kekatukaka na Biblia kele na mambote yina beto lenda fwanisa ve ti kima yankaka. Na nsadisa ya malongi ya mutindu yina, bana keyantikaka kubakisa nde mambu ya bo kelongaka bo kekatukaka ve na mambu ya bantu ketubaka, kansi na yina ya Ngangi na bo, to Tata na bo ya zulu ketubaka. Yo kepesaka bandongisila ngolo yina beto lenda fwanisa ve ti kima yankaka.

Biblia kesyamisa bibuti na kusalaka ngolo sambu na kukotisa minsiku ya mbote na mabanza ya bana na bo. Kansi, ntangu bana keyelaka, bibuti kekumaka kumona mbala mingi mpasi na kusolula ti bo mambu yina kele mpenza mfunu mingi. Mukanda yai Longuka na Longi ya Nene mebasika sambu na kusadisa bibuti na kusala ve mambu ya mutindu yina. Yo tapesa nge ti bana na nge mambu ya kimpeve yina beno tatangaka kumosi. Yo fwete pesa baleke kikesa ya kusolulaka ti bantu yina talongukaka mukanda yai ti bo.

Nge tamona nde mukanda yai kepesa bana baokazio ya kupesa bamvutu. Na kati ya baparagrafe, bo metula bangyufula mingi ya mefwana mpenza. Kana nge kuma na bangyufula yina, nge tamona tire (—) mosi. Kidimbu yai kele sambu na kuyibusa nge nde nge fwete pema sambu na kusyamisa mwana nde yandi kupesa mvutu yina yandi mosi keyindula. Bana kezolaka nde bo kotisa bo na masolo. Kana nge kepesa ve mwana baokazio ya kupesa bamvutu to ya kubasisa mambu yina kele na ntima na yandi, mpusa na yandi ya kulonguka tasukinina ve na kumana.

Kansi, dyambu ya kuluta mfunu kele nde bangyufula yina tasadisa nge na kuzaba mambu yina kele na mabanza ya mwana. Ya kyeleka, mwana lenda pesa bamvutu ya kifu. Kansi, bamvutu yina mukanda kepesa na nima ya konso ngyufula kele sambu na kusadisa mwana na kulonguka mutindu ya mbote ya kuyindula.

Dyambu ya kebenda dikebi mingi na mukanda yai kele bifwanisu na yo kuluta 200 yina kele na kati. Bisono mingi yina kele na lweka ya bifwanisu yango kesyamisa mwana na kutendula mambu ya yandi kemona mpi ya yandi metanga. Yo yina, tadila bifwanisu ti mwana. Yo lenda vanda mutindu ya mbote ya kulonga yina tayibusaka mwana malongi ya mfunu ya beno melonguka.

Kana mwana kelonguka kutanga, syamisa yandi na kutanga mukanda na ndinga ya ngolo sambu na beno zole. Kana yandi ketanga yo mingi, bandongisila na yo ya mbote takota mpenza na mabanza ti na ntima na yandi. Kansi sambu zola ti luzitu kukuma ngolo na kati na nge ti mwana na nge, beno fwete salaka yonso sambu na kutanga mukanda kumosi, mpi mbala na mbala.

Bana mekumaka kumona ntangu yonso mambu ya nsoni, ya mazi, ti mambu yankaka mingi ya mbi yina bantu vandaka kundima ve ata fyoti nde bana kumona yo na bamvula meluta. Yo yina, bo kele na mfunu ya lutaninu, yina mukanda yai kepesa na mutindu mosi ya luzitu mpi ya pwelele. Kansi bana kevandaka mingimingi na mfunu nde bo twadisa dikebi na bo na Nto ya mayele yonso, Tata na beto ya zulu, Yehowa Nzambi. Yo yina mambu Yezu, yina kele Longi ya Nene, vandaka kusala ntangu yonso. Beto ketula ntima na masonga yonso nde mukanda yai tasadisa nge ti dibuta na nge na kutomisa luzingu na beno na mpila nde yo sepedisa Yehowa mpi yo sadisa beno na kubaka balusakumunu ya mvula na mvula.