“Mono Ke Zolaka Tata”

1, 2. Ntumwa Yoane tubaka inki na yina me tala nkokila ya nsuka yina bantumwa lutisaka ti Yezu?

BAKALA mosi ya mununu ke dindisa dinsala na yandi na kati ya tinta, mabanza na yandi kele ya kufuluka ti mambu mingi ya me lutaka. Zina na yandi Yoane, mpi yandi kele ntumwa ya nsuka ya Yezu Kristu yina kele na luzingu. Yandi me kuma ti bamvula kiteso ya 100. Yandi ke yindula nkokila mosi ya yandi ta vilaka ve ata fioti. Yo vandaka bamvula 70 me luta. Yo vandaka nkokila ya nsuka yina yandi mpi bantumwa ya nkaka lutisaka ti Yezu na ntwala nde bo fwa Yezu. Mpeve santu ya Nzambi ke sadisa yandi na kuyibuka mambu mingi yina salamaka na mpimpa yina mpi na kusonika yo.

² Na mpimpa yina, Yezu tubaka pwelele nde bo ta fwa yandi ntama mingi ve. Yoane mpamba muntu sonikaka kikuma yina Yezu ndimaka nde bo fwa yandi na mutindu yina ya mpasi. Yezu tubaka nde: “Nsi-ntoto kuzaba nde mono ke zolaka Tata, mono ke sala mutindu Tata songaka mono na kusala. Beno telama, beto katuka awa.”​—Yoane 14:31.

3. Inki mutindu Yezu monisaka nde yandi vandaka kuzola Tata na yandi?

³ “Mono ke zolaka Tata.” Sambu na Yezu, zola na yandi sambu na Tata vandaka mfunu mingi kuluta mambu yonso. Kansi Yezu vandaka ve kuvutukila bangogo yina mbala na mbala. Ya kieleka, Yoane 14:31 kele kisika mosi kaka na Biblia yina beto ke mona Yezu ke monisa zola na yandi sambu na Tata na yandi na pwelele yonso. Ata mpidina, mambu yonso ya Yezu salaka monisaka nde yandi ke zolaka tata na yandi mingi. Konso kilumbu, yandi vandaka kumonisa nde yandi ke zolaka Yehowa. Kikesa, bulemfu, mpi kukanga-ntima ya Yezu vandaka kumonisa nde yandi ke zolaka Nzambi mingi. Zola yina vandaka kupusa yandi na kisalu ya kusamuna.

4, 5. Biblia ke tubilaka zola ya nki mutindu, mpi nki beto lenda tuba na yina me tala zola ya Yezu sambu na Yehowa?

⁴ Bubu yai, kana bo ke tubila zola, ngindu ya bantu ke kwendaka mbala mingi na zola na kati ya bakala ti nkento, zola yina me simbama na mawi. Mbala mingi, bo ke tubilaka zola yai na bankunga mpi na bapoemi. Biblia ke tubilaka mpi zola na kati ya bakala ti nkento kansi yo ke tubilaka yo na mutindu ya me fwana. (Bingana 5:15-21) Kansi, Ndinga ya Nzambi ke tubilaka mingi zola ya mutindu ya nkaka. Zola yango kele ve kaka mawi ya ngolo to ya ntangu fioti. Diaka yo me simbama ve na bangindu, na mayele to na mambu mosi buna. Yo ke tadilaka ntima mpi mabanza. Zola ya mutindu yai ke katukaka kibeni na ntima. Kima ya ke twadisaka yo kele mambu yina Nzambi ke tubaka nde yo kele mbote, mpi yo ke monanaka na mambu ya mbote yina muntu ke salaka. Yo kele ve zola ya zulu-zulu. Ndinga ya Nzambi ke tuba nde, “zola ke sukaka ve.”​—1 Bakorinto 13:8.

⁵ Yezu zolaka Yehowa mingi kuluta bantu yonso. Ata muntu mosi ve me lemfukaka na nsiku ya kuluta mfunu yina Nzambi me pesaka kuluta Yezu. Nsiku yango ke tubaka nde: “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.” (Marko 12:30) Inki mutindu Yezu kumaka ti zola ya mutindu yai? Inki yandi salaka sambu zola na yandi sambu na Nzambi kuvanda kaka ngolo ntangu yandi vandaka na ntoto? Ebuna inki mutindu beto lenda landa mbandu na yandi?

Zola ya Kuluta Ngolo na Kati ya Bantu Zole

6, 7. Inki mutindu beto me zaba nde Bingana 8:22-31 ke tubila Mwana ya Nzambi, kansi ve kaka mayele?

⁶ Keti nge me salaka dezia kisalu ti nduku mosi buna mpi na nima beno zole, beno kumaka banduku ya mbote mpi ya ngolo? Diambu yai lenda sadisa nge na kubakisa zola yina Yehowa mpi Mwana na yandi mosi kaka ya kubutuka kumaka ti yo. Beto me tubila dezia mbala mingi Bingana 8:30 na mukanda yai. Kansi sesepi beto tadila yo na kutadila baverse yina kele na ntwala mpi na nima na yo. Banda na verse 22 tii na 31, bo ke tubila mayele bonso kima mosi ya lenda tuba mpi kusala mambu bonso muntu. Inki mutindu beto me zaba nde bangogo yai ke tadila Mwana ya Nzambi?

⁷ Na verse 22, mayele ke tuba nde: “Yehowa salaka mono bonso luyantiku ya nzila na yandi, kisalu ya ntete-ntete na kati ya bisalu na yandi ya ntama.” Verse yai ke tubila ve kaka mayele, sambu kima ya Nzambi “salaka,” vandaka ve makuki yai. Yo vandaka ve ti luyantiku sambu Yehowa ke vandaka kaka ntangu yonso na luzingu mpi yandi ke vandaka ntangu yonso mayele. (Nkunga 90:2) Kansi, Mwana ya Nzambi vandaka “mwana ya ntete ya lugangu yonso.” Nzambi salaka yandi, to gangaka yandi; yandi vandaka kisalu ya ntete na kati ya bisalu yonso yina Yehowa salaka. (Bakolosai 1:15) Mwana vandaka na luzingu na ntwala nde Nzambi kuganga ntoto ti zulu, mutindu mukanda ya Bingana ke monisa yo. Yandi vandaka mpi Ndinga, yo yina mambu yonso ya yandi tubaka monisaka mayele ya Yehowa na mutindu ya kukuka.​—Yoane 1:1.

8. Inki kisalu Mwana vandaka kusala na ntwala ya kukwisa na ntoto, mpi beto lenda yindula inki ntangu beto ke tala ti kiese bima ya Nzambi me salaka?

⁸ Inki kisalu Mwana vandaka kusala na bantangu yonso yina ya mingi ya yandi vandaka ti Tata na yandi na zulu na ntwala ya kukwisa awa na ntoto? Verse 30 ke songa beto nde yandi vandaka na lweka ya Nzambi bonso “kapita ya kisalu.” Yo ke tendula inki? Bakolosai 1:16 ke tuba nde: “Na nzila na yandi, bo gangaka bima yonso ya nkaka na zulu mpi na ntoto . . . Bo gangaka bima yonso ya nkaka na nzila na yandi mpi sambu na yandi.” Yehowa Muntu Gangaka Bima Yonso, kansi Yandi sadilaka Mwana na yandi Kapita ya Kisalu, sambu na kusala bima yonso ya nkaka mu mbandu bawanzio, bambwetete, ntoto ti bima ya kele na kati, bambisi, mpi bantu na nsuka. Na mutindu mosi buna, beto lenda fwanisa mutindu Yehowa ti Yezu salaka kisika mosi ti mutindu arshitekte ti maso ke salaka. Maso ke tungaka nzo na kutadila mambu yina arshitekte me songa yandi. Konso ntangu ya kima mosi ya Nzambi me salaka ke yitukisaka beto, beto ke pesaka Yehowa nkembo. (Nkunga 19:1) Kansi, beto lenda yibuka mpi Mwana “kapita ya kisalu.” Yandi salaka ti kiese yonso kisika mosi ti Tata na yandi, Ngangi, bamvula mingi kibeni.

9, 10. (a) Inki salaka nde zola na kati ya Yehowa ti Mwana na yandi kukuma ngolo? (b) Inki lenda sala nde zola na nge ti Tata na nge ya zulu kukuma ngolo?

⁹ Kana bantu zole ya kukonda kukuka ke sala kisika mosi, bantangu ya nkaka yo ke vandaka mpasi nde bo sala na ngemba. Kansi, yo vandaka ve mpidina sambu na Yehowa mpi Mwana na yandi. Mwana salaka ti Tata bamvula mingi kibeni. Kansi tala mambu ya yandi ke tuba: “Mono vandaka kuwa kiese na ntwala na yandi konso ntangu.” (Bingana 8:30) Ya kieleka, yandi vandaka kibeni na kiese ya kuvanda ti Tata na yandi. Tata mpi vandaka kibeni na kiese ya kuvanda ti yandi. Na bantangu yina yonso, Mwana vandaka kukuma bonso Tata, yandi kumaka ti bikalulu bonso ya Tata na yandi. Yo yina, beto lenda yituka ve na kumona nde zola na kati ya Tata ti Mwana kumaka ngolo kibeni. Beto lenda tuba na masonga yonso nde zola yina vandaka ya kuluta ntama mpi ya kuluta ngolo yina bantu me vandaka ntete ve ti yo.

¹⁰ Kansi, nge lenda yindula nde zola na nge ti Yehowa lenda kuma ve ngolo mpidina. Ya kieleka, zola na kati ya Yehowa ti Yezu kele ya mutindu ya nkaka, sambu Yezu kele mwana mosi kaka ya kubutuka ya Nzambi. Ata mpidina, beto kele na dibaku mosi ya mbote. Yibuka nde, Yezu kumaka nduku ya Tata na yandi sambu yandi vandaka kusala ti Yandi. Yehowa ke zolaka beto, yo yina yandi ke lomba beto na kukuma “banduku ya kisalu” na yandi. (1 Bakorinto 3:9) Ntangu beto ke landa mbandu ya Yezu na kisalu ya kusamuna, beto fwete yibuka ntangu yonso nde beto kele banduku ya kisalu ya Nzambi. Ebuna, zola na beto ti Yehowa ta kuma ngolo kibeni. Ata kima mosi ve kele mfunu kuluta yo.

Inki Yezu Salaka Sambu Zola na Yandi ti Yehowa Kuvanda Kaka Ngolo

11-13. (a) Inki mbandu beto lenda baka sambu na kusadisa beto na kubakisa nde beto fwete kumisa zola na beto ngolo, inki Yezu vandaka kusala sambu zola na yandi sambu na Yehowa kuvanda kaka ngolo? (b) Inki mutindu Mwana ya Nzambi monisaka nde yandi vandaka ti nzala ya ngolo ya kulonguka malongi ya Yehowa, yo vanda na zulu mpi ntangu yandi kumaka mbuta awa na ntoto?

¹¹ Sambu na kusadisa beto na kuzaba inki beto fwete sala sambu zola na beto sambu na Yehowa kuvanda kaka ngolo, beto baka mbandu mosi. Kaka mutindu beto ke losilaka kintuntu mosi ya kitoko masa sambu yo yela mpi yo vanda mbote, beto fwete sala yonso yina beto lenda sala sambu zola na beto sambu na Yehowa kukuma ngolo. Kana beto sala ve mpidina, zola na beto ta kuma fioti mpi yo ta fwa. Yezu vandaka ve kubaka zola na yandi sambu na Yehowa na nsaka. Yandi vandaka kukumisa yo ngolo bamvula yonso ya yandi salaka awa na ntoto. Yandi salaka yonso sambu zola yina kuvanda kaka ngolo mpi yo landa kutoma. Beto tala inki yandi vadaka kusala.

¹² Yibuka diaka ntangu yina Yezu vandaka leke mpi yandi vandaka kusolula ti bantu na tempelo na Yeruzalemi. Yibuka mambu yina yandi songaka bibuti na yandi yina vandaka kudiyangisa: “Sambu na nki beno vandaka kusosa mono? Keti beno zabaka ve nde mono fwete vanda na nzo ya Tata na mono?” (Luka 2:49) Ntangu Yezu vandaka leke, ntembe kele ve nde, yandi vandaka ntete ve kuyibuka ata kima mosi na yina me tala luzingu yina yandi vandaka ti yo na zulu. Kansi, yandi vandaka dezia kuzola Tata na yandi Yehowa ngolo kibeni. Yandi zabaka nde muntu yina ke zolaka Yehowa ke zolaka kusambila Yandi. Yo yina sambu na Yezu, ata kisika mosi ve awa na ntoto vandaka kusepedisa yandi mingi kuluta tempelo, kisika yina bantu vandaka kukwenda sambu na kusambila Yehowa. Yandi vandaka kuzola kuvanda kuna mpi yandi vandaka kuzola ve kukatuka. Diaka, yandi vandaka ve kuvanda pana kaka sambu na kutala inki ke salama kuna. Yandi vandaka na mpusa ya ngolo ya kulonguka mambu ya Yehowa mpi ya kutubila mambu yina yandi zabaka sambu na Yehowa. Yezu kumaka ti nzala yina na ntwala nde yandi lungisa bamvula 12 mpi yandi vandaka kaka ti nzala yina luzingu na yandi ya mvimba.

¹³ Ntangu Mwana vandaka na zulu, yandi vandaka kundima malongi ya Tata na yandi na kiese yonso. Kima mosi ya Biblia tubaka na ntwala ya kele na Yezaya 50:4-6 ke monisa nde, Yehowa longaka Mwana na yandi mambu yina yandi ta kutana ti yo mutindu yandi ta vanda Mesia. Ata Yezu zabaka nde kuvanda Mesia ta vanda ve pete, yandi vandaka kaka ti nzala ya ngolo ya kuzaba mambu yonso ya Yehowa fwete longa yandi. Ebuna ntangu Yezu kwisaka awa na ntoto mpi yandi kumaka mbuta, yandi vandaka kaka ti nzala ya ngolo ya kukwenda na nzo ya Tata na yandi sambu na kusamba yandi mpi kulonga mambu na yandi. Biblia ke songa beto nde, Yezu vandaka kukwenda mbala na mbala na tempelo mpi na sinagoga. (Luka 4:16; 19:47) Kana beto ke zola nde zola na beto sambu na Yehowa kubwa ve madidi mpi yo vanda kaka ngolo, beto fwete vandaka ti nzala ya ngolo ya kukwendaka na balukutakanu ya Bukristu, kisika yina beto ke sambilaka Yehowa mpi beto ke landaka kulonguka mambu na yandi sambu na kukuma banduku na yandi ya ngolo.

14, 15. (a) Sambu na nki bantangu ya nkaka Yezu vandaka kuzola kuvanda yandi mosi? (b) Inki mutindu bisambu ya Yezu na Tata na yandi monisaka nde bo vandaka banduku ya ngolo mpi nde yandi vandaka kuzitisa yandi ngolo?

¹⁴ Yezu vandaka mpi kusamba mbala na mbala sambu zola na yandi sambu na Yehowa kuvanda kaka ngolo. Yandi vandaka kuzola mingi kuvanda ti bantu mpi kulutisa ntangu ti bo. Kansi, beto me zaba nde yandi vandaka mpi kuzola kuvanda yandi mosi bantangu ya nkaka. Mu mbandu, Luka 5:16 ke tuba nde: “Mbala mingi yandi vandaka kukwenda kusamba na bisika ya kingenga.” Mutindu mosi, Matayo 14:23 ke tuba nde: “Na nima ya kusonga bimvuka ya bantu na kukwenda, yandi tombukaka yandi mosi na ngumba sambu na kusamba. Ntangu nkokila bwaka, yandi vandaka kuna yandi mosi.” Bantangu ya nkaka, Yezu vandaka kuzola kuvanda yandi mosi mutindu yina. Yo ke tendula ve nde yandi vandaka ve kuzola bantu, kansi yandi vandaka kuzola kuvanda yandi mosi ti Yehowa sambu na kusolula ti yandi na kisambu.

¹⁵ Ntangu Yezu vandaka kusamba, bantangu ya nkaka yandi vandaka kusadila bangogo “Aba, Tata.” (Marko 14:36) Na bilumbu ya Yezu, “Aba” vandaka ngogo mosi ya zola yina bana vandaka kusadila sambu na kubinga “tata.” Mbala mingi, yo vandaka na kati ya bangogo ya ntete yina mwana vandaka kulonguka. Ata mpidina, yo vandaka ngogo mosi ya luzitu. Ntangu Yezu vandaka kusadila ngogo yina, yo vandaka kumonisa nde yandi vandaka nduku ya ngolo ya Tata na yandi yina yandi vandaka kuzola mingi. Kansi, yo vandaka mpi kumonisa nde yandi vandaka kuzitisa Tata na yandi ngolo. Konso kisambu yina Yezu sambaka Yehowa ya kele na Biblia ke monisa nde, yandi kele nduku ya ngolo ya Tata na yandi mpi yandi ke zitisaka yandi. Mu mbandu, Yoane kapu 17 kele ti kisambu ya nda mpi ya katukaka na ntima yina Yezu salaka na mpimpa na yandi ya nsuka. Yo kele kibeni kisambu mosi ya mbote na kulonguka mpi yo kele mfunu nde beto samba bonso Yezu. Sambu na kusala buna, yo ke lomba ve nde beto vutukilaka bangogo yina Yezu sadilaka, kansi beto fwete sosa mbala na mbala mutindu ya kusonga Tata na beto ya zulu mambu ya kele na ntima na beto. Kusala mpidina ta sala nde, zola na beto sambu na Yehowa kubwa ve madidi kansi yo vanda kaka ngolo.

16, 17. (a) Inki mutindu Yezu monisaka zola na yandi sambu na Tata na yandi na bangogo? (b) Inki mutindu Yezu monisaka kikalulu ya kukaba ya Tata na yandi?

¹⁶ Mutindu beto tubilaka yo dezia, Yezu vandaka ve kuvutukila mbala na mbala bangogo “mono ke zolaka Tata.” Kansi mbala mingi, yandi vandaka kumonisa nde yandi ke zolaka tata na yandi na bisalu. Inki mutindu? Mu mbandu, yandi tubaka nde: “Tata, Mfumu ya zulu ti ya ntoto mono ke kumisa nge na ntwala ya bantu.” (Matayo 11:25) Ntangu beto longukaka Kitini 2 ya mukanda yai, beto monaka nde Yezu vandaka kusadisa bantu na kuzaba Tata na yandi. Mpidina, yandi monisaka nde yandi vandaka kuzola kukumisa Tata na yandi. Mu mbandu, yandi fwanisaka Yehowa ti tata yina vandaka na mpusa ya ngolo ya kulolula mwana na yandi ya ntu-ngolo mpi ya yandi vandaka kuvingila nde yandi vutuka na yandi. Ebuna, ntangu Tata yina monaka mwana yango ke kwisa na kintama, yandi bakaka ntinu sambu na kukwenda kukutana ti yandi mpi kuyamba yandi. (Luka 15:20) Ntangu beto ke tangaka mutindu Yezu ke tubilaka zola ya Yehowa mpi kikalulu na yandi ya kulolula, yo ke simbaka kibeni ntima na beto.

¹⁷ Mbala mingi Yezu vandaka kukumisa Tata na yandi sambu na kikalulu na yandi ya kukaba. Yandi sadilaka mbandu ya bibuti ya kukonda kukuka sambu na kundimisa beto kibeni nde, Tata na beto ta pesa beto mpeve santu yonso yina beto kele na yo mfunu. (Luka 11:13) Yezu tubilaka mpi kivuvu ya luzingu ya mvula na mvula yina Tata me pesa beto. Mbala mingi, Yezu vandaka kuzola kutubila kivuvu yina yandi mosi vandaka ti yo ya kuvutuka na zulu sambu na kuvanda ti Tata na yandi. (Yoane 14:28; 17:5) Yandi songaka balongoki na yandi nde, Yehowa me pesa bantu ya kele na “kimvuka ya fioti” kivuvu ya kukwenda na zulu mpi ya kuyala ti yandi na Kimfumu. (Luka 12:32; Yoane 14:2) Yandi songaka mpi muntu mosi ya mbi yina bo tulaka na nti ya mpasi pene-pene ti yandi nde yandi ta zinga na Paladisu. (Luka 23:43) Mpila Yezu tubilaka bima yai yonso ya mbote ya Tata na yandi me pesaka, yo sadisaka yandi kibeni na kulanda kuzola Yehowa ngolo. Balongoki mingi ya Kristu me monaka nde kima yina ke sadisaka bo mingi na kukumisa zola na bo na Yehowa ngolo mpi lukwikilu na bo, kele kutuba mambu ya me tala yandi mpi kivuvu yina yandi ke pesa na bantu yina ke zolaka yandi.

Keti Nge Ta Landa Mbandu ya Zola ya Yezu Sambu na Yehowa?

18. Inki kikalulu ya kuluta mfunu beto fwete vanda ti yo sambu na kulanda Yezu, mpi sambu na nki?

¹⁸ Na mambu yonso yina beto fwete landa Yezu, diambu ya kuluta mfunu kele yai: Beto fwete zola Yehowa na ntima na beto ya mvimba, na moyo na beto ya mvimba, na mabanza na beto yonso, mpi na ngolo na beto yonso. (Luka 10:27) Beto ke monisaka zola yango kaka ve na mutindu beto ke kudiwaka kansi mpi na mambu ya beto ke salaka. Yezu vandaka kusuka kaka ve na kuvanda ti mawi ya zola sambu na Tata na yandi to na kutuba kaka nde, “Mono ke zolaka Tata.” Yandi tubaka nde: “Sambu nsi-ntoto kuzaba nde mono ke zolaka Tata, mono ke sala mutindu Tata songaka mono na kusala.” (Yoane 14:31) Satana tubaka nde ata muntu mosi ve lenda sadila Yehowa ti zola ya kukonda bwimi. (Yobi 2:4, 5) Sambu na kupesa mvutu ya kuluta mbote na luvunu ya mbi ya Satana, Yezu monisaka bantu na kikesa yonso na nki kiteso yandi ke zolaka Tata na yandi. Nkutu yandi lemfukaka tii na lufwa. Keti nge ta landa mbandu ya Yezu? Keti nge ta monisa na mutindu na nge ya kuzinga nde nge ke zolaka kibeni Yehowa Nzambi?

19, 20. (a) Sambu na nki yo kele mfunu nde beto kwendaka mbala na mbala na balukutakanu? (b) Inki mutindu beto lenda tadila kulonguka na beto mosi, kuyindula na mudindu mpi kisambu?

¹⁹ Yehowa me salaka beto ti mpusa ya ngolo ya kuzola yandi. Yo yina, Yehowa me yidikilaka beto mambu sambu beto sambila yandi na mutindu yina ke salaka nde beto kuma kuzola yandi mingi mpi ya ke kumisaka zola na beto sambu na yandi ngolo. Mu mbandu, ntangu nge ke kwendaka na balukutakanu ya Bukristu, sala yonso sambu na kuyibuka nde nge kele pana sambu na kusambila Nzambi na nge. Mambu ya nkaka ya lusambu yango kele: kusamba ti bampangi ya nkaka, kuyimba ti bo bankunga sambu na kukumisa Nzambi, kuwidikila na dikebi yonso na balukutakanu, mpi kupesa bamvutu kana mpila kele. Balukutakanu yina ke pesaka nge mpi dibaku ya kupesa bampangi-babakala mpi bankento kikesa. (Baebreo 10:24, 25) Kusambila Yehowa mbala na mbala na balukutakanu ya Bukristu ta sadisa nge na kukumisa kibeni ngolo zola na nge sambu na Nzambi.

²⁰ Beto ta kumisa mpi zola na beto sambu na Yehowa ngolo kana beto ke sala kulonguka na beto mosi, beto ke yindula na mudindu mambu ya beto ke longuka mpi beto ke samba. Tadila mabaku yai bonso ntangu ya kuvanda nge mosi ti Yehowa. Na ntangu nge ke longuka Biblia mpi nge ke yindula na mudindu mambu ya nge ke tanga, Yehowa ke sadisa nge na kuzaba bangindu na yandi mpi mutindu yandi ke kudiwaka. Ntangu nge ke samba, nge fwete songa yandi mambu ya nge kele ti yo mpi mutindu nge ke kudiwa. Yibuka nde kisambu ke lombaka mambu mingi, kansi ve kaka kulomba Nzambi nde yandi pesa nge kima mosi to yandi sadila nge kima mosi. Kisambu kele mpi dibaku ya kupesa Yehowa matondo sambu na balusakumunu yina nge me bakaka mpi sambu na kukumisa yandi sambu na bisalu na yandi ya kuyituka. (Nkunga 146:1) Diaka, kulonga bantu ya nkaka mambu ya Yehowa ti kiese mpi na kikesa kele mutindu ya kuluta mbote ya kupesa yandi matondo mpi ya kumonisa nde nge ke zolaka yandi.

21. Sambu na nki kuzola Yehowa kele mfunu, mpi inki beto ta tadila na bakapu yina ke landa?

²¹ Kana beto ke zola kuvanda na kiese ya mvula na mvula, beto fwete zola Nzambi. Kana Adami ti Eva vandaka kuzola Nzambi, bo mpi bo zolaka kuvanda na kiese ya mvula na mvula. Kuzola Nzambi kele kima ya kuluta mfunu yina nge fwete vanda ti yo sambu na kununga konso kima ya ke meka lukwikilu na nge, sambu na kubuya konso mpukumuna, mpi sambu na kukanga-ntima na konso mpasi. Beto lenda vanda balongoki ya masonga ya Yezu kaka kana beto ke zolaka Nzambi. Ya kieleka, yo ke vandaka ti kuwakana na kati ya zola na beto sambu na Nzambi mpi zola na beto sambu na bantu ya nkaka. (1 Yoane 4:20) Na bakapu yina ke landa, beto ta tadila mutindu Yezu monisaka nde yandi ke zolaka bantu. Na kapu ya ke landa, beto ta sosa kuzaba sambu na nki bantu mingi vandaka kumona nde bo lenda solula ti Yezu kukonda mpasi.