Keti Nge Ta Zola Kuzaba Kieleka?

KIELEKA ya me tala inki? Kieleka ya me tala mwa bangiufula ya kuluta mfunu yina bantu ke kudiyulaka. Ziku nge me kudiyulaka bangiufula yai:

Keti Nzambi ke kudibanzaka mpenza sambu na beto?
Keti kilumbu kele bitumba ti bampasi ta suka?
Inki ke kuminaka beto kana beto me fwa?
Keti kivuvu kele sambu na bafwa?
Inki mutindu mu lenda samba Nzambi mpi yandi kuwidikila munu?
Inki mutindu mu lenda zwa kiese ya kieleka na luzingu?

Wapi nge lenda baka bamvutu na bangiufula yai? Kana nge yula bantu, nge ta baka bamvutu ya kuswaswana. Bantwadisi ya mabundu lenda pesa nge bamvutu yina ke wakanaka ve. Kana nge kwenda na babiblioteke to na bisika ya bo ke tekaka mikanda, nge lenda mona mikanda mingi yina bantu ke tubaka nde yo ke pesaka bamvutu. Kansi, mbala mingi yo ke wakanaka ve. Ya nkaka ke monanaka mfunu na ntangu yina, kansi ntama mingi ve yo ke manaka ngala mpi bo ke sobaka mambu na yo to ke yingisaka yo.

Kansi, kele ti mukanda mosi yina kele ti bamvutu ya kutudila ntima. Yo kele mukanda mosi ya ke tubaka ve luvunu. Yezu Kristu tubilaka Nzambi na kisambu nde: “Ndinga na nge kele kieleka.” (Yoane 17:17) Bubu yai beto me zaba nde Ndinga yango kele Biblia ya Santu. Na balutiti ya ke landa, nge ta mona bamvutu ya pwelele mpi ya kieleka ya bangiufula yina kele awa na zulu.

Keti Nzambi Ke Kudibanzaka Mpenza Sambu na Beto?

Muntu mosi ke tambula na kati ya kibuka ya bantu

KIKUMA YA NGIUFULA YAI: Beto ke zinga na nsi-ntoto ya me fuluka na nku mpi kukonda lunungu. Mabundu mingi ke longaka nde bampasi ya beto ke monaka kele luzolo ya Nzambi.

MAMBU BIBLIA KE LONGAKA: Nzambi kele ve ata fioti na kisina ya mambu ya mbi. Yobi 34:10 ke tuba nde: “Ngindu lenda kwisila ve ata fioti Nzambi ya kieleka na kusala mambu na nku yonso, ngindu lenda kwisila ve ata fioti Nkwa-Ngolo Yonso na kusala mambu ya mbi!” Nzambi kele ti lukanu ya zola sambu na bantu. yo yina Yezu longaka beto na kusamba nde: “Tata na beto yina kele na zulu, . . . Kimfumu na nge kukwisa. Luzolo na nge kusalama na ntoto, bonso na zulu.” (Matayo 6:9, 10) Nzambi ke kudibanzaka mingi sambu na beto yo yina yandi me pesaka kima ya ntalu mingi sambu na kulungisa lukanu na yandi.—Yoane 3:16.

Tala mpi Kuyantika 1:26-28; Yakobo 1:13; mpi 1 Piere 5:6, 7.

Keti Kilumbu Kele Bitumba ti Bampasi Ta Suka?

Mwana mosi ya bakala kele na mbeto ya lupitalu mpi bo me kanga yandi bambande na luse

KIKUMA YA NGIUFULA YAI: Bitumba ke landa kufwa bantu mingi mpenza. Bampasi ke kuminaka beto yonso.

MAMBU BIBLIA KE LONGAKA: Nzambi tubilaka ntangu mosi yina yandi tatula ngemba na ntoto ya mvimba. Na nsi ya Kimfumu na yandi, yina kele guvernema ya zulu, bantu “ta longuka mpi diaka ve bitumba.” Kansi, “bo ta kumisa bambele na bo ya bitumba bima ya kubundudila ntoto.” (Yezaya 2:4) Nzambi ta sukisa bampasi mpi mambu yonso ya kukonda lunungu. Biblia kesila nde: “[Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama [tanga mpi mambu ya kukonda lunungu mpi bampasi ya bubu yai] me vila.”—Kusonga 21:3, 4.

Tala mpi Nkunga 37:10, 11; 46:9; mpi Mika 4:1-4.

Inki Ke Kuminaka Beto Kana Beto Me Fwa?

KIKUMA YA NGIUFULA YAI: Mabundu mingi ya nsi-ntoto ke longaka nde kima mosi ya ke vandaka na kati ya muntu ke landaka kuzinga na nima ya lufwa. Bantu ya nkaka ke kwikilaka nde bantu yina me fwaka lenda sadisa to kusala mbi na bantu ya ke zinga, to nde Nzambi ke pesaka bantu ya mbi ndola, yandi ke zengilaka bo nkanu ya mpasi ya mvula na mvula na bilungi ya tiya.

MAMBU BIBLIA KE LONGAKA: Ntangu muntu ke fwaka, luzingu na yandi ke sukaka. Longi 9:5 ke tuba nde: “Bafwa ke zabaka kima ve.” Sambu bafwa ke zabaka kima ve, ke vandaka ve ti mawi, mpi ke salaka ata kima ve, bo lenda sala ve bantu ya ke zinga mbi to kusadisa bo.—Nkunga 146:3, 4.

Tala mpi Kuyantika 3:19; mpi Longi 9:6, 10.

Keti Kivuvu Kele Sambu na Bafwa?

KIKUMA YA NGIUFULA YAI: Beto ke zolaka kuzinga, mpi ke zolaka kusepela na luzingu ti bantu yina beto ke zolaka. Yo me fwana mpenza nde beto vanda na mpusa ya ngolo ya kumona diaka bantu ya beto ke zolaka yina me fwaka.

MAMBU BIBLIA KE LONGAKA: Bantu mingi yina me fwaka ta futumuka. Yezu silaka nde ‘bantu yina kele na maziamu ya kuyibuka ta basika.’ (Yoane 5:28, 29) Na kuwakana ti lukanu ya kisina ya Nzambi, bantu yina ta futumuka ta vanda ti dibaku ya kuzinga mvula na mvula na paladisu na ntoto. (Luka 23:43) Na kati ya lusilu yai yina ta lungana na bilumbu ke kwisa, beto lenda tanga mpi mavimpi ya kukuka ti luzingu ya mvula na mvula sambu na bantu ya bulemfu. Biblia ke tuba nde: “Bantu ya lunungu ta baka ntoto, mpi bo ta zinga kimakulu na zulu na yo.”—Nkunga 37:29.

Tala mpi Yobi 14:14, 15; Luka 7:11-17; mpi Bisalu 24:15.

Inki Mutindu Mu Lenda Samba Nzambi mpi Yandi Kuwidikila Munu?

KIKUMA YA NGIUFULA YAI: Bantu ya mabundu yonso ke sambaka. Kansi, bantu mingi ke yindulaka nde Nzambi ke pesaka ve mvutu na bisambu na bo.

MAMBU BIBLIA KE LONGAKA: Yezu longaka beto na kuvutukila ve bangogo ya mutindu mosi na bisambu na beto. Yandi tubaka nde: “Ntangu nge ke samba, kuvutukila ve mambu ya mutindu mosi mbala na mbala.” (Matayo 6:7) Kana beto ke zola nde Nzambi kuwidikila bisambu na beto, beto fwete samba na mutindu yina yandi ke ndimaka. Sambu na kusala yo, beto fwete longuka ntete luzolo ya Nzambi, mpi kusamba na kuwakana ti luzolo yango. Mukanda ya 1 Yoane 5:14 ke tendula nde: “Konso kima yina beto ke lomba na kuwakana ti luzolo [ya Nzambi], yandi ke wa beto.”

Tala mpi Nkunga 65:2; Yoane 14:6, 14; mpi 1 Yoane 3:22.

Inki Mutindu Mu Lenda Zwa Kiese ya Kieleka na Luzingu?

Nkento mosi me tula Biblia na yandi na ntulu mpi ke mweta

KIKUMA YA NGIUFULA YAI: Bantu mingi ke yindulaka nde mbongo, lukumu, to kitoko ta natila bo kiese. Yo yina, bo ke landaka mambu yina, kansi bo ke zwaka ve kiese yango.

MAMBU BIBLIA KE LONGAKA: Yezu monisaka kima ya ke nataka kiese ya kieleka ntangu yandi tubaka nde: “Kiese na bantu yina ke bakisaka mbote nde bo kele ti nzala ya mambu ya kimpeve.” (Matayo 5:3) Beto lenda zwa kiese ya kieleka kaka kana beto sala mambu sambu na kulungisa mpusa na beto ya kuluta mfunu, disongidila, mpusa ya kuzaba Nzambi mpi lukanu na yandi sambu na beto. Kieleka yina kele na Biblia. Kuzaba kieleka yango lenda sadisa beto na kubakisa mambu yina kele mfunu mpenza, ti yina kele ve mfunu. Kana beto ke bika nde kieleka ya Biblia kutwadisa badesizio mpi bisalu na beto, luzingu na beto ta vanda ti lukanu.—Luka 11:28.

Tala mpi Bingana 3:5, 6, 13-18; mpi 1 Timoteo 6:9, 10.

Mbangi ya Yehowa ke tangila nkento mosi vere ya Biblia

Beto me tadila kaka na bunkufi bamvutu yina Biblia ke pesa na bangiufula sambanu ya beto me katuka kutubila. Keti nge ke zola kuzaba mambu mingi kuluta yai? Kana nge kele na kati ya bantu yina “ke bakisaka mbote nde bo kele ti nzala ya mambu ya kimpeve,” ntembe kele ve nde nge ta zola. Mbala ya nkaka nge ke kudiyula bangiufula yai ya nkaka: ‘Kana Nzambi ke kudibanzaka sambu na beto, sambu na nki yandi me pesaka nzila nde mambi mpi bampasi mingi kuvanda na luzingu ya bantu? Inki mutindu mu lenda tomisa luzingu ya dibuta na munu?’ Biblia ke pesaka bamvutu ya ke sepedisaka na bangiufula yai mpi mingi ya nkaka.

Kansi, bantu mingi bubu yai ke vandaka ti badute ya kusosa bamvutu na Biblia. Bo ke monaka bonso yo kele ti mambu mingi yina ke vandaka bantangu ya nkaka mpasi na kubakisa. Keti nge ta zola nde bo sadisa nge sambu na kubaka bamvutu na Biblia? Bambangi ya Yehowa ke zabisa nge mambu zole yina lenda sadisa nge.

Ya ntete, mukanda Inki Biblia Kelongaka Mpenza? yina bo salaka sambu na kusadisa bantu yina kele ti kisalu mingi, sambu na kutadila bamvutu ya pwelele yina Biblia ke pesaka na bangiufula ya mfunu. Diambu ya zole kele programe ya kulonguka Biblia ya ofele na nzo. Mbangi mosi ya Yehowa yina ke zingaka penepene na nge mpi yina me fwana na kulonga Biblia lenda kwisa na nzo na nge to na kisika ya nkaka ya me fwana, mpi kulutisa ntangu fioti konso mposo sambu na kulonguka Biblia ti nge. Bamilio ya bantu na nsi-ntoto ya mvimba me bakaka mambote mingi na programe yai. Mingi na kati na bo me tubaka nde: “Mu me sengumuna kieleka!”

Mbangi ya Yehowa ke solula ti bakala mosi mambu ya Biblia

Kele ti kimvwama ya kuluta nene ve ya muntu lenda sengumuna. Kieleka ya Biblia ke katulaka beto na kimpika ya binkulu ti bansiku ya bambuta, malongi ya kisaka-saka, mpi boma ya mbi. Yo ke pesaka beto kivuvu, lukanu, mpi kiese na luzingu. Yezu tubaka nde: “Beno ta zaba kieleka, ebuna kieleka ta katula beno na kimpika.”—Yoane 8:32.