Kitini ya 5

Bikalulu ya Kuluta Nene ya Nzambi

MASONUKU ya Santu ketubila bikalulu mingi ya kitoko yina Nzambi kele ti yo, ya kesadisaka beto na kuzaba yandi. Mumbandu, Masonuku kezabisa beto bikalulu ya Nzambi iya ya nene​—ngolo, lunungu, mayele, mpi zola. Bika beto tadila konso kikalulu.

Ngolo ya Kukonda Nsuka

Yehowa kuzabisaka Abrahami nde: “Mono kele Nzambi Nkwa-Ngolo Yonso.” (Kuyantika 17:1, NW) Ngolo na yandi meluta ya bantu yonso, yo kele ya kukonda ndilu mpi yo kemanaka ve. Nzambi gangaka luyalanganu ya mvimba na ngolo na yandi.

Nzambi kesadilaka ve ata fyoti ngolo na yandi na mutindu ya mbi. Ntangu yonso, yandi kesadilaka yo na mutindu ya mbote mpi sambu na kulungisa lukanu mosi buna. Yandi kesadilaka ngolo na yandi na mutindu mosi ya kukuka na kuwakana ti lunungu, mayele, mpi zola na yandi.

Na luzolo yonso, Yehowa kesadilaka ngolo na yandi sambu na mambote ya bansadi na yandi. Yandi “ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi.” (2 Bansangu 16:9) Keti yo kepusa nge ve na kukwenda penepene ya Nzambi yai ya kele ti ngolo mingi kansi ya kekudibanzaka sambu na nge?

Nzambi ya Lunungu

“Mfumu Nzambi ke zolaka [lunungu, NW].” (Nkunga 37:28) Yandi kesalaka ntangu yonso mambu ya mbote mpi ya lunungu na kuwakana ti minsiku na yandi ya kukuka.

Nzambi kemengaka kukonda lunungu. “Yandi ke talaka bantu yonso kiteso mosi, yandi ke ndimaka avoka mpi ve.” (Kulonga 10:17) Yandi ketelaminaka bantu yina kenyokulaka bankaka, mpi yandi kesalaka mambu sambu na kusadisa bantu yina mekonda lutaninu, tanga mpi ‘mufwidi to mwana-nsiona.’ (Kubasika 22:21) Nzambi kebakaka bantu yonso kiteso mosi, kukonda kupona-pona. “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Lunungu ya Yehowa kele mpenza ya bukatikati. Yandi kekangaka ata fyoti ve meso na mambu ya mambi. Yandi kevandaka ata fyoti mpi ve makambu ngolo. Yandi kepesaka ndola na bantu ya mbi yina kebalulaka ve ntima kansi yandi kelolulaka bantu yina kebalulaka ntima. “Mfumu Nzambi ke zolaka bantu ti kuwila bo mawa, yandi ke bakaka makasi nswalu ve, yandi ke songaka kaka mambote na yandi konso ntangu. Yandi ke nganaka ve tii kuna, yandi ke waka mpi makasi ve tii kuna. Yandi ke pesaka beto ndola ve mutindu kele masumu na beto, yandi ke vutulaka beto mbi ve mutindu kele mbi na beto.” (Nkunga 103:8-10) Nzambi keyibukaka mpi mambu ya mbote yina bansadi na yandi ya kwikama kesalaka mpi yandi kesakumunaka bo. Keti yo mefwana ve na kutula ntima na Nzambi ya lunungu ya mutindu yai?

Nzambi ya Mayele

Yehowa kele Nto ya mayele yonso. “Nzambi ke na kimvwama mingi mpenza! Mayele na yandi ti mambu yina ya yandi zaba yo ke kwendaka ntama mpenza!” (Roma 11:33) Yandi mosi mpamba kele ti mayele ya mingi mpi yo kele ya kukonda nsuka.

Mayele ya Nzambi kemonanaka pwelele na lugangu. Muyimbi-bankunga kuyimbaka nde: “Mfumu, nge me salaka bima mingi mpenza! Bima yonso nge me salaka yo na mayele!”​—Nkunga 104:24.

Mayele ya Nzambi kemonanaka mpi na Masonuku ya Santu. Ntotila Davidi sonikaka nde: “Bansiku ya Mfumu Nzambi bantu lenda tula yo ntima, yo ke pesaka mayele na bantu yina ke na mayele ve.” (Nkunga 19:8) Yindula dyambu yai: nge lenda baka mambote na mayele ya Nzambi ya kukonda nsuka! Keti nge tasadila dibaku yai?

“Nzambi Kele Zola”

Kikalulu ya kuluta nene ya Yehowa kele zola. Masonuku kezabisa beto nde: “Nzambi kele zola.” (1 Yoane 4:8, NW) Zola kepusaka mpi ketwadisaka yandi na kusala mambu yonso yina yandi kesalaka.

Nzambi kemonisilaka beto zola na yandi na mitindu mingi. Yandi kepesaka beto bima ya mbote. “Yandi ke songaka beno mambu ya mbote ya yandi ke salaka. Yandi ke pesaka beno mvula yina ke katukaka na zulu, yandi ke pesaka beno ntangu ya kukatula bima na bilanga. Yandi ke pesaka beno madia; yo ke pesaka beno kiese mingi.” (Bisalu 14:17) Nkutu, “makabu yonso ya mbote mpenza ke katukaka na zulu; yo ke katukaka na Nzambi yina salaka bamwinda ya zulu.” (Yakobo 1:17) Na nzila ya Masonuku yina kele dikabu mosi ya kuluta mfunu, Nzambi kezabisaka kyeleka ya metala yandi mpi kelongaka beto bansiku ti minsiku na yandi ya zola. Yezu tubaka na kisambu nde: “Mambu yina ya nge ke tubaka kele mambu ya kieleka.”​—Yoane 17:17.

Nzambi kesadisaka beto mpi ntangu beto kekutanaka ti bampasi. “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.” (Nkunga 55:23) Yandi kelolulaka masumu na beto. “Mfumu Nzambi, nge kele muntu ya mbote, nge ke wilaka bantu mpi mawa; bantu yina ke sambaka nge, nge ke talaka bo na disu ya mbote.” (Nkunga 86:5) Nkutu, yandi mepesa beto luzingu ya mvula na mvula. “Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Kusonga 21:4) Inki nge tasala sambu na zola yina Nzambi memonisilaka nge? Keti nge mpi tazola yandi?

Kwenda Penepene na Nzambi

Nzambi kezola nde nge zaba yandi mbote-mbote. Ndinga na yandi kesyamisa nge nde: “Kwenda penepene na Nzambi, ebuna yandi ta kwisa penepene na beno.” (Yakobo 4:8) Nzambi kubingaka profete ya kwikama Abrahami, “nduku na mono.” (Yezaya 41:8) Yehowa kezola nde, nge mpi kuvanda nduku na yandi.

Kana nge kelonguka mambu mingi na yina metala Nzambi, nge takwenda penepene na yandi mpi tavanda na kyese mingi. “Kiese na muntu . . . yina ke monaka kiese na bansiku ya Mfumu Nzambi,” mpi “ke yindulaka yo mpimpa ti mwini.” (Nkunga 1:1, 2) Yo yina, landa kulonguka Masonuku ya Santu. Yindulula na bikalulu mpi bisalu ya Nzambi. Monisa zola na nge sambu na Nzambi na kusadilaka mambu yina nge kelonguka. “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” (1 Yoane 5:3) Ebuna, samba bonso muyimbi-bankunga: “Mfumu, songa mono nzila ya nge zola nde mono landa, longa mono na kuzinga mutindu nge zola. Longa mono na kulanda nzila na nge ya kieleka.” (Nkunga 25:4, 5) Nge tabakisa nde Nzambi “kele ntama ve na konso muntu . . . na kati na beto.”​—Bisalu 17:27.

Inki Nge Keyindula?

• Na bikalulu yonso ya Nzambi, inki kikalulu kesepedisaka nge mingi-mingi? Sambu na nki?

• Inki mutindu nge lenda kwenda penepene na Nzambi?

[Kifwanisu ya kele na lutiti 12]

Nzambi kele nkwa-ngolo

[Kifwanisu ya kele na lutiti 13]

Nzambi kepona-ponaka ve

[Kifwanisu ya kele na lutiti 13]

Mayele ya Nzambi kemonikaka na lugangu mpi yo kepusaka beto na kuzitisa yandi

[Kifwanisu ya kele na lutiti 13]

Mayele ya Nzambi kemonanaka na Masonuku ya Santu

[Kifwanisu ya kele na lutiti 14]

Kusamba mpi kuyindulula na bikalulu ya Nzambi tasadisa beto na kukwenda penepene na yandi