Kitini ya 10

Bo Metungulula Mbeni ya Lukwikilu

BAMVULA mingi na ntwala nde Yehowa Nzambi kusala ntoto, yandi gangaka bawanzyo na zulu. Kansi, na nima ya mwa ntangu, wanzyo mosi kumaka na mpusa ya lusambu yina mefwana kaka na Nzambi. Sambu yandi sadilaka mpusa yina, yandi kudikumisaka Satana, disongidila “Mutelemini,” yina ketendula muntu yina ketelamina Nzambi. Inki mutindu Satana telaminaka Nzambi?

Satana kusaka Eva na kukolama na Nzambi. Yandi sadilaka mayele ya mbi mpi monisaka Eva nde Yehowa Nzambi piminaka yandi kima mosi ya kitoko na mutindu Nzambi buyisaka yandi na kudya mbuma ya nti mosi buna. Kukonda nsoni, Satana bingaka Nzambi muntu ya luvunu mpi monisaka Eva nde yandi fwete buya lutwadisu ya Nzambi. Yandi tubaka nde: “[Nzambi] zaba nde kilumbu ya beno ta dia yo, meso na beno ta kanguka, beno ta vanda bonso yandi Nzambi, beno ta zaba mambu ya mbote ti mambu ya mbi bonso yandi.” (Kuyantika 3:5) Na buzoba yonso, Eva kwikilaka na luvunu ya Satana. Yandi fwaka nsiku ya Nzambi mpi pusaka Adami na kusala mutindu mosi. Banda ntangu yina, Satana mekumaka mbeni ya bantu yonso yina kevandaka na lukwikilu ya kyeleka. Mpi yandi kelanda kukusa bantu tii bubu yai. Inki mutindu?

Lukwikilu ya Mbi Keyalumuka

Satana sadilaka lusambu ya biteki mpi binkulu ya bantu sambu na kubebisa bana ya Izraele. Yezu, Mesia, zabisaka bamfumu na bo ya mabundu nde sambu bo kelongaka “bansiku ya bantu bonso nde yo kele malongi ya Nzambi” lusambu na bo kele ya mpamba. (Matayo 15:9) Ntangu dikanda yai buyaka Mesia, Nzambi mpi buyaka bo. Yezu songaka bo nde: “Nzambi ta katula beno Kimfumu na yandi, ebuna yandi ta pesa yo na bantu yina ta salaka bisalu ya Kimfumu.” (Matayo 21:43) Yo yina, balongoki ya Yezu kumaka bantu yina Nzambi kendimaka.

Na nima, Satana salaka bikesa sambu na kubebisa balongoki ya Yezu. Keti yandi nungaka? Na nzila ya kingana mosi ya mbikudulu, Yezu tubaka na ntwala mambu yina tasalama. Kingana yango ketuba nde, muntu mosi kunaka ble ya mbote na kilanga. Na nima, mbeni mosi kunaka matiti ya mbi na kati ya ble. Munkwa-bilanga yambulaka bimenina yonso zole na kuyela nzila mosi tii na ntangu ya kukatula mbuma. Ebuna bo kabulaka ble ti matiti ya mbi mpi bo yokaka matiti ya mbi na tiya. Kansi, bo vukisaka ble yonso mpi kubumbaka yo na nzo yina bo kebumbaka bima.

Na nima, Yezu tendudilaka balongoki na yandi kingana yina. Yandi mosi kele muntu yina kunaka. “Bambuma ya mbote kele bantu ya Kimfumu ya Nzambi; bambuma ya mbi kele bantu ya Muntu ya Mbi. Mbeni yina kunaka matiti ya mbi kele Satana. Ntangu ya kukatula bambuma kele ntangu ya nsuka ya ntoto; bantu yina ke katulaka bambuma kele bawanzio.” (Matayo 13:38, 39) Yezu fwanisaka balongoki na yandi ya kyeleka ti ble. Kansi, Satana kunaka na kati na bo, balongoki ya luvunu yina mefwanana ti matiti ya mbi. Yo yina, mutindu Yezu yandi mosi tubaka yo na ntwala, bamvu-nkama mingi na nima ya lufwa na yandi balongoki ya luvunu basikaka. Baaposta yai vandaka kulonga malongi ya luvunu bonso Butatu, disongidila Nzambi mosi na bapersona tatu. Dyaka, balongoki ya luvunu yantikaka kusambila biteki mpi kudikotisa na mambu ya politiki. Kaka balongoki fyoti mpamba kukangamaka na malongi ya Yezu.

Lukwikilu ya Kyeleka Metaninama

Kansi, mutindu Yezu tendulaka yo, nsukansuka nsoba mosi tasalama. Bawanzyo ya Nzambi takatula bantu yina kele ti lukwikilu ya mbi na kati ya bantu yina kele ti lukwikilu ya mbote mpi tafwa bo. Mpidina, yo tavanda mpasi ve na kuzaba bantu yina kele ti lukwikilu ya kyeleka. Nsukansuka, bo tafwa Satana Diabulu, mbeni ya ntete-ntete ya lukwikilu. Ee, lukwikilu ya kyeleka tanunga!

Kansi, inki mutindu nge lenda zaba bantu yina kele ti lukwikilu ya kyeleka bubu yai? Beto tatubila ngyufula yai na disolo ya kelanda.

Inki Mvutu Nge Tapesa?

• Satana vandaka ntete nani na luyantiku?

• Inki mutindu Satana mekaka kubebisa lukwikilu?

• Tendula kingana ya Yezu ya ble mpi matiti ya mbi.

[Kifwanisu ya kele na lutiti 25]

Satana sadilaka nyoka sambu na kukusa Eva

[Kifwanisu ya kele na lutiti 25]

Satana sadilaka lusambu ya biteki mpi binkulu ya bantu sambu na kukusa bantu

[Kifwanisu ya kele na lutiti 25]

Bawanzyo ya Nzambi kesosa bantu yina kele na mpusa ya lukwikilu ya kyeleka