KAPU 8
Inki mono fwete sala sambu na kuzwa banduku ya mbote?
“Ntangu mono ke waka makasi, mono ke vandaka na mfunu ya kusonga muntu ya nkaka mpila mono ke kudiwa. Ntangu mono ke vandaka mawa-mawa, mono ke vandaka na mfunu nde muntu ya nkaka kusonga mono nde kudiyangisa ve, yo ta luta. Ntangu mono ke vandaka na kiese, mono ke zolaka kuvanda ti muntu yina kele mpi na kiese. Sambu na mono, kuvanda ti banduku kele mfunu mingi.”—Brittany
NTANGU nge vandaka mwana-fioti, nge vandaka kuzola kusakana ti bana ya nkaka. Beno vandaka kulutisa ntangu ti bo yo yina nge vandaka ve nge mosi. Kansi bubu yai, nge ke vandaka na mfunu ya banduku ya mbote, disongidila bantu yina kele pana sambu na kulutisa ntangu ti nge mpi sambu na kusala mambu yina nge ke zolaka kusala.
Nkutu Biblia ke tubaka nde: “Nduku ya kieleka ke zolaka konso ntangu, mpi yandi kele mpangi yina me butukaka sambu na bantangu ya mpasi.” (Bingana 17:17) Verse yai ke tubila kinduku ya ngolo mpenza kuluta yina nge vandaka kusala ti bana ya nkaka ntangu nge vandaka mwana-fioti!
Kieleka: Mutindu nge kele na kuyela mpi ke kuma mbuta, nge kele na mfunu ya banduku yina
1. Kele ti bikalulu ya mbote
2. Ke salaka mambu ya mbote
3. Ta sadisa nge na kukuma muntu ya mbote
Ngiufula: Inki nge fwete sala sambu na kuzwa banduku ya mutindu yai? Beto tadila mambu yango mosi-mosi.
Diambu ya Ntete: Pona Banduku Yina Kele ti Bikalulu ya Mbote
Mambu ya nge fwete zaba. Bantu yonso ve ta vanda banduku ya mbote sambu na nge. Biblia ke tubaka nkutu nde “kele ti banduku yina ke vandaka ya kuyilama na kusalana mbi.” (Bingana 18:24) Keti yo kele mpenza ya kieleka? Yindula diambu yai: Keti nge me vandaka dezia ti nduku mosi yina kangamaka ti nge kaka sambu nge pesa yandi kima mosi buna? To keti nge me vandaka dezia ti nduku mosi yina vandaka kutonga nge to kutuba mambu ya mbi sambu na nge? Kana yo me kuminaka nge dezia, mbala ya nkaka nge ke tudilaka diaka ve nduku yina ntima.a Kuvila ve nde kima ya mfunu kele ve kuvanda ti banduku mingi kansi kuvanda ti banduku ya mbote!
Mambu yina nge lenda sala. Pona banduku yina kele ti bikalulu ya mbote.
Yvette, leke mosi ya nkento yina kele ti bamvula 17, ke tuba nde: “Bantu yonso ke tubaka mambu ya mbote sambu na nduku na mono Fiona. Mono ke zolaka mpi nde bantu kutuba mambu ya mbote sambu na mono. Mono kele na mfunu nde nsangu na mono kukwenda bonso ya yandi. Mono ke sepelaka ti yandi mpi mono ke vandaka na mfunu ya kukuma bonso yandi.”
Meka kusala diambu yai.
1. Tanga Bagalatia 5:22, 23.
2. Kudiyula nde: ‘Keti banduku na mono ke vandaka ti bikalulu yina baverse yai ke tubila?’
3. Sonika awa na nsi bazina ya banduku na nge ya ngolo. Na lweka ya konso zina, sonika bikalulu na bo ya mbote to ya mbi.
Zina
․․․․․
Bikalulu ya mbote to ya mbi
․․․․․
Ndongisila: Kana nge ke mona nde banduku na nge ke vandaka kaka ti bikalulu ya mbi, pana yo ta lomba nde nge sosa banduku ya mbote!
Diambu ya Zole: Pona Banduku Yina Ke Salaka Mambu ya Mbote
Mambu ya nge fwete zaba. Kana nge kele mpenza na nzala ya ngolo ya kuvanda ti banduku, yo lenda pusa nge na kundima ata banduku ya mbi. Biblia ke tubaka nde: “Muntu yina [ke kangama] ti bazoba ta suka mbi.” (Bingana 13:20) Bazoba ya verse yai ke tubila kele ve bantu yina ke belaka na nzo-nkanda to bantu yina ke vandaka ve mayele. Kansi bo kele bantu yina ke waka ve bandongisila ya mbote mpi ke salaka mambu ya mbi. Nge fwete buya kibeni banduku ya mutindu yai!
Mambu yina nge lenda sala. Kupona ve banduku bika kaka nge pona kansi pona banduku ya mbote. (Nkunga 26:4) Yo ke tendula ve nde nge fwete bakila bo bangindu ya mbi. Kansi yo ke tendula kaka nde, nge fwete sala “luswaswanu na kati ya muntu ya [mbote] ti muntu ya mbi, mpi na kati ya muntu yina ke sadilaka Nzambi ti muntu yina ke sadilaka yandi ve.”—Malaki 3:18.
Christopher, ya kele ti bamvula 13, ke tuba nde: “Mono ke vandaka na kiese sambu bibuti na mono sadisaka mono na kupona banduku ya mbote, disongidila banduku yina kele mvula mosi ti mono mpi yina ke zolaka Nzambi mpi ke zolaka kusepedisa yandi.”
Pesa mvutu na bangiufula ya ke landa:
Ntangu mono kele ti banduku na mono, keti mono ke bangaka nde bo lenda pusa mono na kusala kima mosi ya mbi?
□ Ee
□ Ve
Keti mono ke bangaka nde kana bibuti na mono kukutana ti banduku na mono bo ta sepela ve ti bo?
□ Ee
□ Ve
Ndongisila: Kana nge me pesa mvutu ee na bangiufula yai ya kele na zulu, pana nge fwete sosa banduku yina ke salaka mambu ya mbote, bayina ke sosaka kusepedisa Nzambi.
Diambu ya Tatu: Pona Banduku Yina Ta Sadisa Nge na Kukuma Muntu ya Mbote
Mambu ya nge fwete zaba. Biblia ke tubaka nde: “Banduku ya mbi ke bebisaka bikalulu ya mbote.” (1 Bakorinto 15:33, Bible en Kituba) Lauren, leke mosi ya nkento, ke tuba nde: “Bana ya klase na beto vandaka kundima mono kaka kana mono ke sala mambu yina bo vandaka kusonga mono na kusala. Mono vandaka kudiwa mono mosi yo yina mono kumaka kusala mambu bonso bo kaka sambu na kusepedisa bo.” Lauren bakisaka nde kana nge ke sala mambu yonso yina banduku na nge ke songa nge na kusala, bo ta kuma kuyala nge. Yo me fwana ve nde nge vanda ti banduku ya mutindu yai!
Mambu yina nge lenda sala. Zenga kinduku ti bantu yina ke pusaka nge na kusala mambu yina bo ke zolaka. Kana nge sala yo, nge ta vanda ve ti banduku mingi kansi nge ta pona banduku ya mbote yina ta sadisa nge na kukuma muntu ya mbote.—Baroma 12:2.
Jason ke tuba nde: “Nduku na mono ya ngolo Clint ke bakaka balukanu ya mbote mpi yandi ke kuditulaka mpenza na kisika ya bantu. Yandi ke sadisaka mono mingi kibeni.”
Pesa mvutu na bangiufula ya ke landa:
Keti mono ke lwataka, ke tubaka to ke salaka mambu na mutindu ya mbi kaka sambu na kusepedisa banduku na mono?
□ Ee
□ Ve
Keti mono ke kwendaka na bisika ya mbi ya mono fwete kwenda ve kaka sambu na kusepedisa banduku na mono?
□ Ee
□ Ve
Ndongisila: Kana nge me pesa mvutu ee na bangiufula yai ya me luta, kwenda kulomba bandongisila na bibuti na nge to na mbuta ya nkaka. Kana nge kele Mbangi ya Yehowa, nge lenda lomba bankuluntu ya dibundu na beno na kusadisa nge na kupona banduku yina ta sadisa nge na kukuma muntu ya mbote.
[Noti na nsi ya lutiti]
a Ya kieleka beto yonso ke salaka bifu. (Baroma 3:23) Yo yina kana nduku mosi me sala kima ya me pesa nge mpasi mpi na nima yandi me lomba nge pardo na masonga yonso, kuvila ve nde “zola ke fikaka masumu mingi.”—1 Piere 4:8.
VERSE YA MFUNU
“Kele ti nduku yina ke kangamaka ngolo kuluta mpangi.”—Bingana 18:24.
NDONGISILA
Kana nge ke sala mambu yonso yina banduku na nge ke songa nge na kusala, bo ta kuma kuyala nge
[Bangogo sambu na kubenda dikebi]
Cole, leke mosi ya bakala, ke tuba nde: ‘‘Ntangu bibuti na mono songaka mono na kulutisa diaka ve ntangu ti banduku na mono ya nkaka, yo sepedisaka mono ve sambu mono vandaka kuzola bo kaka mingi. Kansi mambu yina bo songaka mono vandaka mbote mpi ntangu mono yindulaka yo, mono bakisaka nde mono lenda zwa banduku ya nkaka ya kuluta mbote.”