Samuele Landaka Kusala Mambu ya Mbote

Tuka ntangu Samuele vandaka leke, yandi vandaka kuzinga mpi kusala na nzo-tenta, kisika bantu vandaka kukwisa kusambila Yehowa. Keti nge me zaba mutindu Samuele kumaka kuzinga kuna? Ntete, bika beto longuka disolo ya Ana, mama ya Samuele.

Tuka bamvula mingi, Ana vandaka ve kubuta ata yandi vandaka na mfunu ya mwana. Yo yina, yandi sambaka Yehowa na kusadisa yandi. Yandi silaka nde kana yandi buta mwana-bakala, yandi ta tinda yandi na kukwenda kuzinga mpi kusala na nzo-tenta. Yehowa pesaka mvutu na kisambu na yandi mpi Ana butaka mwana-bakala. Yandi pesaka yandi zina Samuele. Mpi kaka mutindu Ana silaka, ntangu Samuele lungisaka bamvula tatu to iya, Ana nataka yandi na nzo-tenta sambu na kusadila Nzambi kuna.

Eli vandaka nganga-nzambi ya nene na nzo-tenta. Bana na yandi zole ya babakala vandaka mpi kusala kuna. Kuvila ve nde, nzo-tenta vandaka kisika bo vandaka kusambila Nzambi, mpi yo lombaka nde bantu kusala mambu ya mbote kuna. Kansi, bana ya Eli vandaka kusala mambu ya mbi kibeni. Samuele vandaka kumona mambu yina bo vandaka kusala. Keti Samuele mpi kumaka kusala mambu ya mbi bonso bana ya Eli?— Ve, yandi landaka kusala mambu ya mbote kaka mutindu bibuti na yandi longaka yandi.

Na mabanza na nge, Eli fwete sala bana na yandi nki?— Yandi fwete pesa bo ndola. Yandi fwete bika bo ve na kusala diaka kisalu na nzo ya Nzambi. Kansi, Eli salaka ve mpidina, yo yina Yehowa wilaka yandi mpi bana na yandi zole makasi. Yehowa bakaka lukanu ya kupesa bo ndola.

Kilumbu mosi na mpimpa ntangu Samuele lalaka, yandi waka muntu mosi ke binga yandi nde: ‘Samuele!’ Yandi kwendaka ntinu na Eli, kansi Eli tubaka nde: ‘Mono me binga nge ve.’ Diambu yai salamaka diaka mbala zole. Ntangu Samuele kwendaka na Eli sambu na mbala ya tatu, yandi zabisaka Samuele nde kana yandi wa diaka ndinga yina, yandi fwete tuba nde: ‘Yehowa tuba, mono ke widikila.’ Samuele salaka mutindu yina. Ebuna, Yehowa songaka Samuele nde: ‘Zabisa Eli nde mono ta pesa dibuta na yandi ndola sambu na mambi yina bo me sala.’ Nge ke yindula nde yo vandaka pete sambu Samuele kuzabisa Eli nsangu yina?— Ve. Kansi ata Samuele vandaka kuwa boma, yandi salaka mambu yina Yehowa zabisaka yandi. Mambu yina Yehowa tubaka lunganaka. Bo fwaka bana zole ya Eli, mpi Eli fwaka.

Samuele kele mbandu ya mbote sambu na beto. Yandi salaka mambu ya mbote ata yandi vandaka kumona bantu ya nkaka ke sala mambu ya mbi. Ebuna nge? Keti nge ta landa mbandu ya Samuele mpi ta sala mambu ya mbote? Kana nge sala mpidina, nge ta sepedisa Yehowa mpi bibuti na nge.