Yezu Vandaka Kulemfuka Ntangu Yonso

Keti nge ke lemfukilaka bibuti na nge kukonda mpasi?— Bantangu ya nkaka yo ke vandaka mpasi. Keti nge me zaba nde Yezu vandaka kulemfukila Yehowa mpi bibuti na yandi?— Mbandu na yandi lenda sadisa nge na kulemfukila bibuti na nge ata ntangu yo kele ve pete. Bika beto longuka diambu yango.

Na ntwala nde Yezu kubutuka na ntoto, yandi vandaka na zulu ti Tata na yandi Yehowa. Kansi, Yezu vandaka mpi ti bibuti awa na ntoto. Bazina na bo kele Yozefi mpi Maria. Keti nge me zaba mutindu bo kumaka bibuti ya Yezu?—

Yehowa katulaka luzingu ya Yezu na zulu mpi tulaka yo na divumu ya Maria sambu nde, Yezu kubutuka bonso muntu mpi kuzinga na ntoto. Yo vandaka kimangu kibeni! Yezu yelaka na divumu ya Maria kaka bonso mwana yonso ke yelaka na divumu ya mama na yandi. Na nima ya bangonda 9, Yezu butukaka. Na mutindu yina, Maria mpi bakala na yandi Yozefi kumaka bibuti ya Yezu awa na ntoto.

Ntangu Yezu vandaka kaka ti bamvula 12, yandi salaka diambu mosi yina monisaka nde yandi vandaka kuzola mingi Tata na yandi, Yehowa. Yo salamaka ntangu Yezu mpi bantu ya dibuta na yandi salaka nzietelo mosi ya nda sambu na kukwenda kuta Nkinsi ya Paki na Yeruzalemi. Ntangu bo vandaka kuvutuka na bwala na bo, Yozefi ti Maria monaka ve Yezu. Keti nge me zaba kisika yandi vandaka?—

Yozefi ti Maria vutukaka nswalu na Yeruzalemi mpi sosaka Yezu bisika yonso. Bo kudiyangisaka mingi sambu bo vandaka kumona yandi ve. Kansi, na nima ya bilumbu tatu, bo monaka yandi na tempelo! Nge me zaba sambu na nki Yezu kwendaka na tempelo?— Sambu kuna yandi lendaka kulonguka mambu ya me tala Tata na yandi, Yehowa. Yandi vandaka kuzola Yehowa mpi vandaka na mfunu ya kulonguka mutindu ya kusepedisa yandi. Ata ntangu yandi yelaka mpi kumaka mbuta, Yezu vandaka kulemfukila Yehowa ntangu yonso. Yezu lemfukaka ata ntangu yo vandaka mpasi sambu na yandi mpi yo lombaka nde yandi mona mpasi. Keti Yezu vandaka mpi kulemfukila Yozefi ti Maria?— Ee, Biblia ke tuba nde yandi vandaka kulemfukila bo.

Inki dilongi nge lenda baka na mbandu ya Yezu?— Nge fwete lemfukila bibuti na nge, ata ntangu yo kele mpasi na kulemfuka. Keti nge ta sala yo?—