Masolo ya Nsuka Ti Bantu Yina Ke Zola Kubaka Mbotika

Mbala mingi bo ke pesaka mbotika na balukutakanu ya nziunga mpi ya distrike ya Bambangi ya Yehowa. Na nsuka ya diskure ya mbotika, mutubi ta lomba bantu yina ke zola kubaka mbotika na kutelama mpi kupesa na ndinga ya ngolo bamvutu na bangiufula yai zole:

1. Keti nge me balula ntima na masumu na nge, nge me kudipesa na Yehowa mpi nge ke ndima nde yandi ta gulusa beto na nzila ya Yezu Kristu?

2. Keti nge ke bakisa nde mbotika yai ya nge ke baka ke kumisa nge Mbangi ya Yehowa mpi nde nge ke vukana ti organizasio yina Yehowa ke twadisaka?

Bamvutu ya pwelele na bangiufula yai kele mutindu bantu yina ke zola kubaka mbotika ke monisaka “na meso ya bantu yonso” lukwikilu na bo na kimenga ya Yezu mpi nde bo me kudipesaka ya mvimba na Yehowa. (Bar. 10:9, 10) Yo yina bantu yina ke zola kubaka mbotika fwete yindula na ntwala bangiufula yai mpi bo fwete samba sambu bo pesa bamvutu ya ke wakana ti mambu yina bo mosi ke kwikilaka.

Keti nge me kudipesaka na Yehowa na kisambu, nge me silaka nde nge ta sadilaka kaka yandi mpi nde nge ta tulaka luzolo na yandi na kisika ya ntete na luzingu na nge?

Ntangu yai, keti nge ke ndima kibeni nde nge fwete baka mbotika kana dibaku me monana?

Inki bilele me fwana sambu na mbotika? (1 Tim. 2:9, 10; Yoa. 15:19; Bafil. 1:10)

Beto fwete lwata “kukonda kulutisa ndilu mpi [beto fwete] vanda ti mabanza ya mbote” sambu na kumonisa nde beto ke “kangamaka na Nzambi.” Yo yina, bantu yina ke zola kubaka mbotika fwete lwata ve bilele ya kuyobidila ya ke monisa kibeni nitu to bilele yina bo me sonika-sonika. Bo fwete lwata bilele ya bunkete, ya mbote mpi ya me fwana sambu na dibaku yai.

Inki bikalulu muntu fwete monisa ntangu yandi ke baka mbotika? (Luka 3:21, 22)

Bubu yai Bakristu ke bakaka mbotika na kulanda mbandu ya Yezu. Yezu bakisaka nde mbotika kele diambu mosi ya mfunu mpenza mpi yandi monisaka yo na bikalulu mpi na bisalu na yandi. Yo yina, kisika ya mbotika fwete vanda ve kisika ya kusakana, ya kukasa, to ya kusala mambu ya nkaka yina lenda manisa valere ya dibaku yai. Diaka, Mukristu ya mpa lenda sala ve mambu bonso nde yandi me katuka kununga bitumba ya nene. Ata mbotika kele dibaku mosi ya kiese, beto fwete monisa kiese yango na luzitu yonso.

Inki mutindu kukwenda mbala na mbala na balukutakanu mpi kusala kinduku ti bampangi ta sadisa nge na kulungisa lusilu yina nge salaka ya kudipesa na Yehowa?

Ata na nima ya kubaka mbotika, sambu na nki yo ta vanda mfunu nde nge vanda ti manaka ya mbote ya kulonguka nge mosi mpi ya kusamuna mbala na mbala?

BANTUMA SAMBU NA BANKULUNTU

Ntangu nsamuni mosi ya me bakaka ntete ve mbotika me tuba nde yandi ke zola kubaka mbotika, beno fwete siamisa yandi na kutadila na dikebi yonso “Bangiufula Sambu na Bantu Yina Ke Zola Kubaka Mbotika;” yo kele na balutiti 185-207 ya mukanda yai. Beno fwete benda dikebi na yandi na “Nsangu Sambu na Nsamuni ya Me Bakaka Ntete Ve Mbotika,” yina ke yantika na lutiti 182; yo ke tendula mutindu yandi lenda kudibongisa sambu na kusolula ti bankuluntu. Mutindu bo ke monisa yo kuna, muntu yina ke zola kubaka mbotika lenda sadila banoti na yandi mpi yandi lenda bika mukanda yai ya kukangula ntangu yandi ke solula ti bankuluntu. Kansi, yo kele mfunu ve nde muntu ya nkaka kutadila bangiufula yai yonso ti muntu yango na ntwala nde yandi kutana ti bankuluntu.

Muntu yina ke zola kubaka mbotika fwete zabisa mutambusi ya kimvuka ya bankuluntu. Kana yandi me tanga “Bangiufula Sambu na Bantu Yina Ke Zola Kubaka Mbotika,” mutambusi ya kimvuka ya bankuluntu ta yula yandi kana yandi me salaka kisambu ya kudipesa na Yehowa sambu na kusala luzolo na yandi. Kana yandi me kudipesaka dezia na Yehowa, mutambusi ya kimvuka ya bankuluntu ta pona bankuluntu zole sambu bo tadila ti muntu yango “Bangiufula Sambu na Bantu Yina Ke Zola Kubaka Mbotika.” Bangiufula yai kele na bitini zole mpi konso nkuluntu fwete tadila kitini mosi ti yandi. Yo kele ve mfunu na kuvingila tii ntangu lukutakanu mosi ya nziunga to ya distrike ke finama sambu na kutadila ti yandi bangiufula yai.

Mbala mingi, yo ke lombaka nde beno lutisa kiteso ya ngunga mosi sambu na kutadila konso kitini. Ata mpidina, yo kele ve mbi na kulutisa ntangu mingi kana yo ke lomba nde beno sala yo. Na konso kitini, beno fwete yantika mpi kusukisa ti kisambu. Muntu yina ke zola kubaka mbotika mpi bankuluntu fwete tadila ve bangiufula yina ntinu-ntinu. Bankuluntu yina bo me pona fwete sala nswalu sambu na kusolula ti muntu yina ke zola kubaka mbotika.

Mbala mingi yo ke vandaka mbote na kusolula ti bantu yina ke zola kubaka mbotika mosi-mosi, kansi ve na kimvuka. Bamvutu yina muntu ya ke zola kubaka mbotika ke pesa na konso ngiufula, ta sadisa bankuluntu na kubakisa mbote kana yandi ke bakisa kibeni malongi ya Biblia mpi na kutala kana yandi me fwana mpenza na kubaka mbotika to ve. Diaka, muntu yina ke zola kubaka mbotika ta tuba kukonda mpasi kana yandi kele yandi mosi. Beno lenda tadila bitini yai ti bankwelani kisika mosi.

Kana muntu yina ke zola kubaka mbotika kele nkento, beno fwete solula kisika yina bantu mingi ke mona beno kansi bo fwete wa ve masolo na beno. Kana yo ke lomba nde nge nata mpangi ya nkaka, yandi fwete vanda nkuluntu to nsadi ya kisalu, na kutadila kitini yina beno ke tadila ti yandi, mutindu paragrafe ya ke landa ke monisa yo.

Na mabundu yina kele ti bankuluntu fioti, bansadi ya kisalu yina me fwana mpi yina me monisaka mayele mpi luswasukusu lenda tadila ti bantu ya ke zola kubaka mbotika, bangiufula ya kele na “Kitini 1: Malongi Yina Bakristu Ke Kwikilaka.” Bankuluntu mpamba bantu fwete tadila “Kitini 2: Mutindu Bakristu Fwete Zinga.” Kana dibundu kele ve ti bampangi ya babakala mingi ya me fwana, beno lenda solula ti nkengi ya nziunga sambu na kuzaba kana bankuluntu ya dibundu mosi ya pene-pene lenda sadisa beno.

Kana muntu ya ke zola kubaka mbotika kele mwana yina me kuma ntete ve mbuta na kutadila nsiku ya leta, kibuti to bibuti na yandi yina kele Bambangi ya Yehowa fwete vanda pana. Kana bo ta vanda ve, bankuluntu zole (to nkuluntu mosi ti nsadi ya kisalu, na kutadila kitini yina bo ke tadila) fwete tadila ti yandi konso kitini.

Bankuluntu ta sosa kuzaba kana muntu yango ke bakisa na mutindu ya kufwana malongi ya Biblia yina yo ke lombaka nde muntu kuzaba ntete. Diaka, bo ta sosa kuzaba kana yandi ke sepelaka kibeni ti kieleka mpi ke zitisaka organizasio ya Yehowa. Kana muntu yango ke bakisa ve malongi ya Biblia yina yo ke lombaka nde muntu kuzaba ntete, bankuluntu ta sala yonso sambu na kusadisa yandi na kulungisa mambu ya bo ke lombaka sambu yandi baka mbotika na bilumbu ke kwisa. Yo ke lombaka kubikila bantu ya nkaka ntangu sambu bo monisa nde bo me bakisa mfunu ya kusamuna to ya kulemfuka na mambu yina organizasio ya Yehowa me yidikaka. Bankuluntu ta tala mutindu bo lenda sadila mbote ngunga mosi na konso kitini sambu na kuzaba kana muntu yango me fwana na kubaka mbotika. Beno lenda lutisa ntangu mingi na bangiufula ya nkaka, ata mpidina beno fwete tadila bangiufula yonso.

Bankuluntu yina me tadila bangiufula yai ti muntu yina, ta kutana mpi ta tala kana yandi fwete baka mbotika to ve na nima ya kutadila ti yandi kitini ya zole. Bankuluntu ta tadila luzingu, mayele mpi mambu ya nkaka ya me tala konso muntu. Bankuluntu ke sosaka kuzaba kana muntu yina me kumaka nduku ya Yehowa mpi kana yandi ke bakisaka malongi ya Biblia yina yo ke lombaka nde muntu kuzaba ntete. Lusadisu na beno ya zola ta sala nde bantu yina ke zola kubaka mbotika kuvanda ya kuyilama mbote-mbote sambu na kusala kisalu na bo ya mfunu ya kusamuna nsangu ya mbote.

Na nima, nkuluntu mosi to bankuluntu zole yina solulaka ti yandi fwete kutana ti yandi sambu na kuzabisa yandi kana yandi me fwana na kubaka mbotika to ve. Kana yandi me fwana, bankuluntu fwete tadila ti yandi “Masolo ya Nsuka ti Bantu Yina Ke Zola Kubaka Mbotika;” yo kele na balutiti 206-207. Kana muntu yina ke zola kubaka mbotika me manisa ntete ve kulonguka mukanda Ke Longa Beto mpi mukanda Bikala na Zola ya Nzambi, bankuluntu fwete siamisa yandi na kumanisa yo na nima ya kubaka mbotika. Beno songa yandi nde bo ta sonika dati yina yandi ta baka mbotika na Karte na yandi ya Nsamuni ya Dibundu. Beno yibusa yandi nde bankuluntu ta baka bansangu na yandi sambu organizasio kulanda kutadila mambu ya Bambangi ya Yehowa ya ntoto ya mvimba mpi sambu yandi kudipesa na mambu yina dibundu ke salaka mpi sambu yandi baka lusadisu ya kimpeve. Diaka, bankuluntu lenda yibusa bansamuni ya mpa nde bo ke sadilaka bansangu ya muntu mosi na kuwakana ti Bansiku ya Kubumba Bansangu ya Bambangi ya Yehowa yina kele na jw.org. Masolo yai fwete sala kaka minuta kumi to na nsi.

Mvula mosi na nima ya mbotika ya nsamuni yina, bankuluntu zole fwete kutana ti yandi sambu na kupesa yandi kikesa mpi bandongisila yina yandi kele na yo mfunu. Nkuluntu mosi fwete vanda nkengi ya kimvuka ya mpangi yina. Kana mpangi yina me kuma ntete ve mbuta na kutadila nsiku ya leta, kibuti to bibuti na yandi ya kele Bambangi ya Yehowa fwete vanda pana. Beno fwete tuba ti tiya mpi na mutindu ya ke pesa kikesa ntangu beno ke solula ti yandi. Bankuluntu ta tubila kuyela na yandi ya kimpeve mpi ta pesa yandi bandongisila ya mfunu sambu yandi landa kuvanda ti bikalulu ya mbote ya kulonguka yandi mosi mpi ya kutanga Biblia konso kilumbu, ya kusala lusambu ya dibuta konso mposo, ya kukwisa mbala na mbala na balukutakanu mpi kupesa bamvutu mpi ya kusamuna konso mposo. (Baef. 5:15, 16) Kana yandi me manisa ntete ve kulonguka mukanda Ke Longa Beto mpi mukanda Bikala na Zola ya Nzambi, bankuluntu fwete yidika mambu sambu mpangi mosi kusadisa yandi na kumanisa yo. Bankuluntu fwete sikisa yandi na zola yonso. Mbala mingi, bandongisila mpi bangindu ya ke tubila diambu mosi to mambu zole me fwana.