KITINI 5

Beno Vutuka na “Ngungudi mpi Nkengi ya Mioyo na Beno”

Keti nge me kutanaka dezia ti diambu mosi to mambu mingi na kati ya mambu yai ya bo me tubila na kamukanda yai, ya ke salaka nde yo vanda mpasi na kuvutuka na Yehowa? Kana yo kele mpidina, bantu ya nkaka mpi me kutanaka ti yo. Bansadi mingi ya kwikama ya Nzambi—ya ntangu ya ntama mpi ya bilumbu na beto—me kutanaka ti bampasi ya mutindu mosi. Kaka mutindu Yehowa sadisaka bo na kununga bampasi yina, yandi lenda sadisa nge mpi.

Yehowa ta vanda pana sambu na nge kana nge vutuka na yandi

NDIMA nde Yehowa ta vanda pana sambu na nge kana nge vutuka na yandi. Yandi ta sadisa nge na kukangila basusi ntima, na kununga mawi yina me lwala, mpi na kukuma ti ngemba na mabanza mpi na ntima, ngemba yina ke katukaka na kansansa ya bunkete. Na nima, nge lenda wa diaka nzala ya kusadila Yehowa ti bampangi-Bakristu. Luzingu na nge ta fwanana ti ya Bakristu ya nkaka ya mvu-nkama ya ntete, bayina ntumwa Piere sonikilaka nde: “Beno vandaka bonso mameme yina ke vila nzila, kansi ntangu yai beno me kwisa kuvutuka na ngungudi mpi nkengi ya mioyo na beno.”—1 Piere 2:25.

Kuvutuka na Yehowa kele kibeni kima ya kuluta mbote yina nge lenda sala. Sambu na nki? Nge ta pesa ntima ya Yehowa kiese. (Bingana 27:11) Mutindu nge me zaba yo, Yehowa ke waka kiese mpi mawa, disongidila nde mambu yina beto ke salaka lenda pesa yandi mpasi to kiese. Ya kieleka, Yehowa ke lombaka beto ve na kuzola yandi mpi na kusadila yandi na kingolo-ngolo. (Kulonga 30:19, 20) Muntu mosi ya mayele yina ke longukaka Biblia tubilaka diambu yina mutindu yai: “Ata muntu mosi ve lenda kangula ntima na nge. Nge mosi fwete kangula yo.” Beto lenda ndima kukangula ntima na beto kana beto ke sambila Yehowa ti ntima ya kufuluka na zola. Kana beto sala mutindu yina, beto ta pesa yandi dikabu mosi ya mfunu mingi—kwikama na beto—mpi beto ta pesa ntima na yandi kiese ya mingi. Ya kieleka, ata kima mosi ve lenda fwanana ti kiese yina beto ke waka ntangu beto ke sambilaka Yehowa na mutindu yina ke sepedisaka yandi.—Bisalu 20:35; Kusonga 4:11.

Bampangi ke yamba na kiese yonso mpangi-nkento mosi ya vandaka kuvukana diaka ve ti dibundu

Diaka, kana nge vutukila lusambu na nge ya Bukristu, nzala na nge ya mambu ya kimpeve ta mana. (Matayo 5:3) Inki mutindu? Bantu yina kele na nsi-ntoto ke kudiyulaka nde, ‘Sambu na nki beto kele awa?’ Bo kele ti nzala ya kubaka bamvutu na bangiufula yina me tala lukanu ya luzingu. Bantu kele ti nzala yina sambu Yehowa me gangaka bo ti yo. Yandi ke zola nde beto lungisa nzala yina ntangu beto ke sadila yandi. Ata kima mosi ve lenda fwanana ti kiese ya mingi yina beto ke bakaka ntangu beto ke zabaka nde beto ke sambila Yehowa na zola.—Nkunga 63:1-5.

Zaba nde Yehowa ke zola nde nge vutuka na yandi. Inki mutindu nge lenda ndima diambu yina? Tadila diambu yai: Bo yidikaka kamukanda yai mbote-mbote na nsadisa ya bisambu mingi. Ziku, nkuluntu mosi to na mpangi-Mukristu mosi muntu natilaka nge yo. Na nima, nge bakaka kikesa ya kutanga yo mpi ya kusadila malongi yina kele na kati. Mambu yai yonso ke monisa nde Yehowa me vilaka nge ve. Kansi na mawete yonso, yandi ke benda nge sambu nge vutuka na yandi.—Yoane 6:44.

Beto lenda baka kikesa ya kuzaba nde Yehowa ke vilaka ve ata fioti bansadi na yandi yina me vilaka. Mpangi-nkento mosi na zina ya Donna bakisaka diambu yai. Yandi tubaka nde: “Mono yantikaka kuyambula kieleka malembe-malembe, kansi mono yindululaka Nkunga 139:23, 24 yina ke tuba nde: ‘Fimpa mono, O Nzambi, mpi zaba ntima na mono. Tala mono, mpi zaba bangindu ya ke yangisa mono. Tala kana na kati na mono kele ti nzila ya ke pesa mpasi, mpi twadisa mono na nzila ya mvula na mvula.’ Mono zabaka nde mono vandaka ve muntu ya nsi-ntoto—yo vandaka ve kisika na mono—mpi mono zabaka nde organizasio ya Yehowa vandaka kisika yina mono fwete vanda. Mono yantikaka kumona nde Yehowa me yambulaka mono ve; mono vandaka kaka ti mfunu ya kumona nzila ya kuvutuka na yandi. Yo yina, mono kele kibeni na kiese sambu mono vutukaka!”

“Mono yantikaka kumona nde Yehowa me yambulaka mono ve;mono vandaka kaka ti mfunu ya kumona nzila ya kuvutuka na yandi”

Beto kele ti kivuvu nde nge mpi ta wa diaka “kiese ya Yehowa” yina nge vandaka kuwa ntete. (Nehemia 8:10) Nge ta wa ve mawa ata fioti kana nge vutuka na Yehowa.

Bamvutu na Bangiufula Yina Me Tala Kuvutuka na Yehowa

MONO TA YANTIKA NA WAPI?

Muntu yina vandaka kubela lenda vanda ti mfunu ya kuvutukila malembe-malembe mambu yina yandi vandaka kusala. Kiteso mosi, nge lenda baka diaka ngolo ya kuvanda Mukristu kana nge ke sala bikesa ya kuyantika kudia ndambu-ndambu madia ya kimpeve konso kilumbu. Kuyindula ve nde nge fwete sala mambu yonso na mbala mosi. Ziku nge lenda baka minuta fioti sambu na kutanga to kuwidikila kitini mosi ya Biblia yina bo me tula ndinga, kulonguka mukanda mosi na kati ya mikanda na beto, kukota na site Internet jw.org, to kutala manaka mosi na kati ya manaka yina kele na tv.jw.org. Diaka, sala bikesa sambu na kukwenda na lukutakanu mosi ya dibundu kana mpila kele. Kuluta yonso, samba Yehowa mpi lomba lusadisu na yandi. ‘Beno losa basusi na beno yonso na yandi sambu yandi ke kudibanzaka sambu na beno.’—1 Piere 5:7.

“Ntangu mono lembaka na lusambu na mono, mono kumaka nkutu kuwa nsoni kibeni sambu na kusamba. Ntangu mono bakaka diaka kikesa ya kusamba, nkuluntu mosi kwisaka kusolula ti mono. Yandi sadisaka mono na kubakisa nde Yehowa me yambulaka mono ve. Yandi lombaka mono na kuyantika kutanga Biblia konso kilumbu. Ntangu mono salaka yo, mono bakaka kikesa sambu na kuvutukila balukutakanu. Na nima, mono yantikaka diaka kisalu ya kusamuna. Mono kele kibeni na kiese sambu Yehowa yambulaka mono ve ata fioti.”—Eeva.

INKI MUTINDU DIBUNDU TA YAMBA MONO?

Nge lenda ndima nde bampangi ya dibundu ta yamba nge na masonga yonso. Na kisika ya kutonga nge to ya kusambisa nge, bo ta monisa kibeni nde bo ke zolaka nge mpi ta sala yonso yina bo lenda sala sambu na kupesa nge kikesa.—Baebreo 10:24, 25.

“Mono vandaka kuwa nsoni sambu na kuvutuka na Nzo ya Kimfumu. Mono vandaka kudiyula inki mutindu banduku na mono ta sadila mono mambu. Mpangi-nkento mosi ya mbuta yina vandaka na dibundu bamvula 30 me luta tubilaka mono nde, ‘Mwana, kukwisa ya mbote na nzo!’ Yo simbaka kibeni ntima na mono. Mono vandaka kibeni na nzo.”—Javier.

“Mono kwendaka na Nzo ya Kimfumu mpi mono vandaka na ban ya nsuka sambu ata muntu mosi ve kumona mono. Kansi, bantu mingi yantikaka kuzaba mono sambu bo zabaka mono ntangu mono yantikaka kukwenda na balukutakanu ntangu mono vandaka mwana fioti. Bo zodilaka mono kukwisa ya mbote mpi yambaka mono na zola na mpila nde mono kudiwaka na ngemba. Yo vandaka bonso nde mono vutukaka na nzo.”—Marco.

INKI MUTINDU BANKULUNTU TA SADISA MONO?

Bankuluntu ta sadila nge mambu na mawete yonso. Bo ta sikisa nge sambu na mpusa na nge ya kutedimisa diaka “zola yina nge vandaka na yo ntete.” (Kusonga 2:4) Bo ta sadisa nge na kusungika bifu yonso yina nge salaka; bo ta sala yo ti “mawete.” (Bagalatia 6:1; Bingana 28:13) Bankuluntu lenda baka bangidika sambu mpangi mosi kukwisa kulonguka ti nge, ziku na nzila ya mukanda mosi mu mbandu Kwenda Penepene na Yehowa to “Beno Bikala na Zola ya Nzambi.” Ndima nde bankuluntu ta pesa nge kikesa mpi ta sadisa nge na konso kitambi.—Yezaya 32:1, 2.

“Na nsungi ya bamvula nana yina mono vandaka kuvukana diaka ve ti dibundu, bankuluntu landaka kusadisa mono. Kilumbu mosi, nkuluntu mosi songaka mono bafoto yina yandi kangaka beto. Yo yibusaka mono mambu mingi ya mbote, ebuna mono yantikaka kuyindula kiese yina mono vandaka kuwa ntangu mono vandaka kusadila Yehowa. Na zola yonso, bankuluntu sadisaka mono na kuvutukila diaka mambu ya kimpeve yina mono vandaka kusala.”—Victor.

“Yandi Takumisa Nge Ngolo”

Mukanda na beto ya bankunga, Beto Yimbila Yehowa, kele ti bankunga mingi ya kitoko yina lenda lembika nge mpi kupesa nge kikesa kana nge vutukila mambu ya kimpeve yina nge vandaka kusala. Mu mbandu, tala bangogo ya nkunga 60. Yo me simbama na bangogo yina kele na 1 Piere 5:10; ntu-diambu ya nkunga yina kele “Yandi Takumisa Nge Ngolo.”

Nzambi katulaka nge na mpimpa, mpi me

Sadisaa nge na kuzwa kyeleka.

Sa yandi monaa nde nge vandaa ti mpusa

Ya kusosa’andi na ntima’a mvimba.

Nge silaka na kusadila’andi;

Yandi kesadisaka nge mingi.
Nzambi pesaka Mwana nandi sa na nge;

Mpi yandi kezola nde nge nunga.

Kana yandi buyaa ve kupesa Yezu,

Yandi tapesaka nge kikesa.

Yandi tavilana ve kundima,

Ti zola ya nge memonisaka.

(REFRAIN)

Nzambi kusumbaka nge na menga ya Mwana.

Ya takumisa nge ngolo mpi kikesa.

Nge, yandi tatwadisaa mpi tataninaka.

Ya takumisa nge ngolo mpi kikesa.

Sambu na kuwa nkunga yai ya bo me yimba mpi bankunga ya nkaka ya Kimfumu, Tala na nsi ya MIKANDA > MIZIKI.