Nzambi Salaka Bakala ti Nkento ya Ntete

Yehowa kunaka kilanga mosi na kisika mosi ya bo ke bingaka Edeni. Kilanga yina vandaka ya kufuluka ti bintuntu, banti, mpi bambisi. Na nima, Nzambi salaka bakala ya ntete, Adami, na putulu ya ntoto mpi fulaka na mbombo na yandi. Keti nge me zaba nki salamaka? Muntu kumaka kigangwa ya ke zinga! Yehowa pesaka Adami kisalu ya kukeba kilanga, mpi Nzambi songaka yandi na kupesa bambisi yonso bazina.

Yehowa pesaka Adami nsiku mosi ya mfunu. Yandi songaka Adami nde: ‘Nge lenda dia mbuma ya banti yonso katula kaka mbuma ya nti mosi ya mfunu. Kana nge dia mbuma ya nti yina, nge ta fwa.’

Na nima Yehowa tubaka nde: ‘Mono ke sadila Adami nsadisi.’ Nzambi bwisaka Adami na mpongi ya ngolo, na nima yandi sadilaka mukwa mosi ya mpanzi na yandi sambu na kusadila Adami nkento. Zina na yandi Eva. Adami ti Eva kumaka dibuta ya ntete. Inki mutindu Adami kudiwaka sambu na nkento na yandi? Yandi vandaka na kiese mingi, yo yina yandi tubaka nde: ‘Tala kima ya Yehowa me sala ti mukwa mosi ya mpanzi na mono! Masonga! Yai muntu ya me fwanana ti mono.’

Yehowa songaka Adami ti Eva na kubuta bana mpi na kufulusa ntoto. Yandi vandaka kuzola nde bo sala kumosi sambu na kukumisa ntoto ya mvimba paladisu, to masamba ya kitoko, kiteso mosi ti kilanga ya Edeni. Kansi, mambu salamaka ve mutindu yina. Sambu na nki? Beto ta longuka mambu mingi na kapu yina ke landa.