Adami ti Eva Kolamaka na Nzambi

Kilumbu mosi, ntangu Eva vandaka yandi mosi, nioka mosi solulaka ti yandi. Yo tubaka nde: ‘Keti yo ke kieleka nde Nzambi lenda pesa beno ve nzila ya kudia mbuma ya banti yonso?’ Eva tubaka nde: ‘Beto lenda dia mbuma ya banti yonso katula kaka mbuma ya nti mosi. Kana beto dia mbuma ya nti yina, beto ta fwa.’ Nioka tubaka nde: ‘Beno ta fwa ve. Ya kieleka, kana beno dia yo, beno ta kuma bonso Nzambi.’ Keti yo vandaka kieleka? Ve, yo vandaka luvunu. Kansi Eva ndimaka yo. Ntangu yandi vandaka kutala kaka mbuma yina, yandi kumaka kuzola yo mingi. Eva diaka mbuma yina mpi pesaka Adami ndambu. Adami zabaka nde bo ta fwa kana bo kolama na Nzambi. Kansi yandi diaka mbuma yina.

Na nima, kaka na kilumbu yina, Yehowa solulaka ti Adami mpi Eva. Yandi yulaka bo sambu na nki bo kolamaka na yandi. Eva pesaka foti na nioka, mpi Adami pesaka foti na Eva. Sambu Adami ti Eva kolamaka na Yehowa, yandi kulaka bo na kilanga. Sambu na kuzikisa nde bo ta vutuka diaka ve na kilanga yina, yandi tulaka bawanzio ti mbele ya bitumba ya ke pela tiya na munoko ya kilanga.

Yehowa tubaka nde kigangwa yina kusaka Eva ta baka mpi ndola. Nioka mpenza ve muntu solulaka ti Eva. Yehowa salaka ve banioka yina lenda tuba. Yo vandaka wanzio mosi ya mbi muntu tubisaka nioka yina. Yandi salaka yo sambu na kukusa Eva. Zina ya wanzio yina kele Satana Diabulu. Na bilumbu ke kwisa, Yehowa ta fwa Satana sambu Satana kulanda ve kukusa bantu na kusala mambu ya mbi.