Nti ya Ke Pela

Moize zingaka bamvula 40 na Madiani. Yandi kwelaka mpi butaka bana. Kilumbu mosi, ntangu yandi vandaka kukeba mameme na yandi pene-pene ya Ngumba ya Sinai, yandi monaka diambu mosi ya kuyituka. Nti ya bansende vandaka kupela tiya, kansi yo vandaka kuzika ve! Ntangu Moize kwendaka pene-pene sambu na kubakisa mambu mbote, yandi waka ndinga mosi na kati ya nti ke tuba nde: ‘Moize! Kupusana ve pene-pene. Katula basandale na nge sambu nge me telama na ntoto ya santu.’ Yehowa muntu vandaka kutubila yandi na nzila ya wanzio.

Moize waka boma, yo yina yandi fikaka luse. Ndinga tubaka nde: ‘Mono me mona bampasi ya bantu ya Izraele. Mono ta gulusa bo na maboko ya bantu ya Ezipte mpi mono ta nata bo na ntoto ya mbote. Nge muntu ta twadisa bantu na mono ntangu bo ta basika na Ezipte.’ Keti nge ke yindula ve nde diambu yai yitukisaka Moize?

Moize yulaka nde: ‘Mono ta tuba nki kana bantu ku yula mono nani me tinda mono?’ Nzambi vutulaka nde: ‘Songa bo nde Yehowa, Nzambi ya Abrahami, Nzambi ya Izaki, mpi Nzambi ya Yakobi muntu me tinda nge.’ Na nima Moize tubaka nde: ‘Ebuna kana bo buya kuwa mono?’ Yehowa pesaka Moize nzikisa ya ke monisa nde yandi ta sadisa yandi. Yandi songaka Moize na kulosa nti na yandi na ntoto. Na nima nti yina kumaka nioka! Ntangu Moize simbaka nioka yina na mukila, yo kumaka diaka nti. Yehowa tubaka nde: ‘Ntangu nge ta sala kidimbu yai, yo ta ndimisa nde mono me tinda nge.’

Moize tubaka nde: ‘Mono me zaba ve kutuba mbote.’ Yehowa silaka yandi nde: ‘Mono ta songa nge mambu ya nge ta tuba, mpi mono ta tinda mpangi na nge Aroni sambu na kusadisa nge.’ Sambu Moize zabaka nde Yehowa kele ti yandi, yandi bakaka nkento na yandi ti bana na yandi mpi bo vutukaka na Ezipte.