Yehowa Kumisaka Samsoni Ngolo

Bantu mingi ya Izraele vutukilaka diaka kusambila biteki, yo yina Yehowa bikaka nde bantu ya Filistia kuyala insi na bo. Kansi kuvandaka ti bantu ya nkaka ya Izraele yina vandaka kuzola Yehowa. Manoa ke na kati na bo. Yandi ti nkento na yandi vandaka ve ti bana. Kilumbu mosi, Yehowa tindaka wanzio na nkento ya Manoa. Wanzio songaka yandi nde: ‘Nge ta vanda ti mwana-bakala. Yandi ta gulusa Izraele na maboko ya bantu ya Filistia. Yandi ta vanda Munazire.’ Keti nge me zaba kana Banazire vandaka banani? Bo vandaka bansadi ya sipesiali ya Yehowa. Bo vandaka kupesa bo ve nzila ya kuzenga nsuki na bo.

Na nima, Manoa butaka mwana-bakala, mpi yandi pesaka yandi zina Samsoni. Ntangu Samsoni yelaka, Yehowa kumisaka yandi ngolo mingi. Yandi vandaka ti ngolo ya kufwa ntambu na maboko mpamba. Kilumbu mosi, Samsoni fwaka bantu ya Filistia kaka yandi mosi. Bantu ya Filistia mengaka yandi mpi bo vandaka kusosa mpila ya kufwa yandi. Kilumbu mosi na mpimpa, ntangu Samsoni vandaka ya kulala na Gaza, bo kwendaka na kielo ya mbanza mpi bo vingilaka kuna sambu bo fwa yandi na suka. Kansi, na kati-kati ya mpimpa, Samsoni telamaka, kwendaka na kielo ya mbanza, mpi katulaka kielo yina na kibaka. Yandi nataka yo na mapeka tii na nsongi ya ngumba mosi ya kele pene-pene ya Ebroni!

Na nima, bantu ya Filistia kwendaka na makangu ya Samsoni, Dalila, mpi bo songaka yandi nde: ‘Beto ta pesa nge mafunda ya mbongo ya bibende kana nge zaba sambu na nki yandi kele ngolo mingi. Dalila vandaka na nzala ya mbongo, yo yina yandi ndimaka. Ntete, Samsoni buyaka kuzabisa yandi sambu na nki yandi vandaka ngolo. Kansi yandi vandaka kuyangisa Samsoni mbala na mbala tii kuna Samsoni songaka yandi kinsweki na yandi. Samsoni songaka yandi nde: ‘Mono me zengaka ntete ve nsuki na mono sambu mono kele Munazire. Kana bo zenga nsuki na mono, ngolo na mono ta mana.’ Samsoni salaka kifu ya nene mutindu yandi songaka yandi diambu yina, mpidina ve?

Na mbala mosi, Dalila songaka bantu ya Filistia nde: ‘Mono me zaba kinsweki na yandi!’ Yandi ladisaka Samsoni na mabolongo na yandi, ebuna yandi lombaka muntu mosi na kuzenga nsuki ya Samsoni. Dalila bokaka nde: ‘Samsoni, bantu ya Filistia kele awa!’ Samsoni telamaka, mpi ngolo na yandi vandaka diaka ve. Bantu ya Filistia simbaka yandi, fwaka yandi meso, mpi bo tulaka yandi na boloko.

Kilumbu mosi, bantu ya Filistia mingi vukanaka na tempelo ya nzambi na bo Dagoni, mpi bo tubaka na ndinga ya ngolo nde: ‘Nzambi na beto me pesaka beto Samsoni! Beno basisa Samsoni! Bika beto seka ti yandi.’ Bo tedimisaka yandi na kati-kati ya makunzi zole, mpi bo vandaka kuseka yandi. Samsoni bingaka na ndinga ya ngolo: ‘O Yehowa, pardo pesa mono ngolo mbala mosi diaka.’ Na ntangu yina, nsuki ya Samsoni vandaka me yela diaka. Yandi pusaka makunzi ya tempelo na ngolo na yandi yonso. Nzo ya mvimba bwilaka bo, ebuna yo fwaka bantu yonso yina vandaka na tempelo, Samsoni mpi fwaka.