Ntotila ya Ntete ya Izraele

Yehowa vandaka kupesa bantu ya Izraele bazuzi sambu na kutwadisa bo, kansi bo kumaka kuzola kuvanda ti ntotila. Bo songaka Samuele nde: ‘Makanda yonso ya nziunga na beto kele ti bantotila. Beto ke zola mpi kuvanda ti ntotila.’ Samuele monaka nde yo kele mbi, yo yina yandi sambaka Yehowa sambu na yo. Yehowa songaka yandi nde: ‘Bantu ke buya nge ve. Bo ke buya mono. Songa bo nde bo lenda vanda ti ntotila, kansi nde ntotila ta lombaka bo bima mingi.’ Ata mpidina, bantu tubaka nde: ‘Yo me tala beto ve. Beto ke zola kuvanda ti ntotila!’

Yehowa songaka Samuele nde bakala mosi, zina na yandi Saule, ta kuma ntotila ya ntete. Ntangu Saule kwendaka kutala Samuele na Rama, Samuele tulaka Saule mafuta na ntu sambu na kusonga nde yandi me kuma ntotila.

Na nima, Samuele bingaka bantu yonso ya Izraele sambu na kusonga bo ntotila na bo ya mpa. Kansi bo vandaka kumona ve Saule ata kisika mosi. Keti nge me zaba sambu na nki? Sambu yandi bumbanaka na kati ya bima. Nsuka-nsuka ntangu bo monaka Saule, bo basisaka yandi mpi bo tedimisaka yandi na kati-kati ya bantu. Saule lutaka bantu yonso na nda, mpi yandi vandaka kitoko mingi. Samuele tubaka nde: ‘Beno tala muntu yina Yehowa me pona.’ Bantu tubaka na ndinga ya ngolo nde: ‘Luzingu ya nda na ntotila!’

Na luyantiku, ntotila Saule vandaka kuwila Samuele mpi kulemfuka na Yehowa. Kansi na nima, yandi sobaka. Mu mbandu, yo vandaka kulomba ve nde ntotila kupesa bimenga. Kilumbu mosi, Samuele songaka Saule na kuvingila yandi tii ntangu yandi ta kwisa, kansi Samuele kwisaka ve nswalu. Yo yina, Saule bakaka lukanu ya kupesa bimenga yandi mosi. Samuele salaka nki? Yandi songaka Saule nde: ‘Yo lombaka ve nge kolama na Yehowa.’ Keti Saule bakaka dilongi na kifu na yandi?

Na nima, ntangu Saule kwendaka kunwana ti bantu ya Amaleki, Samuele songaka yandi nde yandi bikisa ve ata muntu mosi na luzingu. Kansi Saule fwaka ve ntotila Agagi. Yehowa songaka Samuele nde: ‘Saule me bikisa mono, mpi yandi ke wila mono ve.’ Samuele waka mawa mingi, mpi yandi tubilaka Saule nde: ‘Sambu nge me yambula kulemfukila Yehowa, yandi ta pona ntotila ya nkaka.’ Ntangu Samuele pesaka mukongo sambu yandi kwenda, Saule simbaka yandi ebuna nsongi ya kazaka ya Samuele pasukaka. Na nima, Samuele songaka Saule nde: ‘Yehowa me katula kimfumu na maboko na nge.’ Yehowa ta pesa kimfumu na muntu yina ta zolaka yandi mpi ta lemfukilaka yandi.