Mwana ya Mufwidi Mosi Me Vutuka na Luzingu

Na nsungi ya kuyuma, Yehowa songaka Eliya nde: ‘Kwenda na Sarefati. Nkento mosi ya mufwidi ta pesa nge madia kuna.’ Na bakielo ya mbanza, Eliya monaka mufwidi mosi ya nsukami ke lokuta nkuni. Yandi lombaka nkento yina dikopa ya masa. Ntangu nkento yina vandaka kwenda kubaka yo, Eliya bingaka yandi mpi tubaka nde: ‘Pardo, natila mono kitini ya dimpa.’ Kansi nkento yina tubaka nde: ‘Mono kele ve ti dimpa ya kupesa nge. Mono kele kaka ti ka fufu mpi mafuta ya kulamba mwa madia sambu na mono mpi mwana na mono.’ Eliya songaka yandi nde: ‘Yehowa me sila nde kana nge sadila mono dimpa, fufu ti mafuta na nge ta mana ve tii kuna mvula ta noka diaka.’

Mufwidi kwendaka na nzo mpi sadilaka profete ya Yehowa dimpa. Mutindu Yehowa silaka, mufwidi ti mwana na yandi vandaka ntangu yonso ti madia na nsungi yina ya kuyuma. Dibungu na yandi ya fufu mpi ya mafuta vandaka kaka ya kufuluka.

Ebuna diambu mosi ya mbi salamaka. Mwana ya mufwidi yina belaka mingi ebuna yandi fwaka. Mufwidi bondilaka Eliya na kusadisa yandi. Eliya bakaka mwana yina na maboko mpi nataka yandi na suku mosi ya kele na etaze na nzo ya nkento yina. Yandi ladisaka yandi na mbeto mpi sambaka nde: ‘Yehowa, pardo, vutula mwana yai na luzingu.’ Keti nge ke zaba sambu na nki yo ta vanda kima ya kuyituka kana Yehowa kusala yo? Sambu mutindu beto me zaba, ata muntu mosi ve me vutukaka dezia na luzingu. Mpi mufwidi ti mwana na yandi vandaka ve nkutu bantu ya Izraele.

Kansi luzingu ya mwana yina vutukilaka yandi mpi yandi yantikaka kupema! Eliya tubilaka mufwidi nde: ‘Tala! Mwana na nge kele na moyo.’ Yandi sepelaka mingi mpi tubilaka Eliya nde: ‘Nge kele kibeni muntu ya Nzambi. Mono me zaba yo sambu nge ke tubaka kaka mambu yina Yehowa ke songaka nge na kutuba.’