Daniele na Dibulu ya Bantambu

Dariusi, muntu ya Media vandaka mpi ntotila ya Babilone. Dariusi monaka nde Daniele vandaka mfunu mingi. Yandi tulaka Daniele mfumu ya bantu ya kuluta mfunu ya insi. Bantu yina wilaka Daniele kimpala mpi bo vandaka kuzola kukatula yandi. Bo zabaka nde Daniele vandaka kusamba Yehowa mbala tatu konso kilumbu, yo yina bo songaka Dariusi nde: ‘O ntotila, basisa nsiku sambu bantu yonso kusamba kaka nge. Muntu yina ta lemfuka ve, bo fwete losa yandi na dibulu yina me fuluka ti bantambu.’ Dariusi sepelaka na ngindu yina, mpi yandi tulaka maboko na nsiku yango.

Ntangu Daniele waka nsiku yina ya mpa, yandi kwendaka na nzo na yandi. Na ntwala ya fenetre ya kukanguka, yandi fukamaka mpi sambaka Yehowa. Bantu yina ya kimpala kotaka na kintulumukina na nzo ya Daniele mpi bo kangaka yandi ke samba. Bo kwendaka ntinu kusonga Dariusi nde: ‘Daniele me kolamina nge. Yandi ke samba Nzambi na yandi mbala tatu konso kilumbu.’ Dariusi vandaka kuzola Daniele mpi yandi zolaka ve nde yandi fwa. Kilumbu ya mvimba yandi sosaka mpila ya kugulusa Daniele. Kansi ata ntotila vandaka ve ti nswa ya kusoba nsiku yina yandi me tula dezia maboko. Yo lombaka nde yandi songa bantu na yandi na kulosa Daniele na dibulu ya bantambu.

Na mpimpa yina, Dariusi vandaka kudiyangisa mingi sambu na Daniele yo yina yandi lalaka ve. Na suka, yandi kwendaka ntinu na dibulu mpi tubilaka Daniele nde: ‘Keti Nzambi na nge gulusaka nge?’

Dariusi waka ndinga mosi. Ndinga ya Daniele! Yandi tubilaka Dariusi nde: ‘Wanzio ya Yehowa kangaka bantambu minoko. Bo me sala mono ve mbi ata fioti.’ Dariusi waka kiese mingi! Yandi songaka bantu na kubasisa Daniele na dibulu. Daniele vandaka ve ata ti ka mputa na nitu. Ebuna ntotila tubaka nde: ‘Beno losa bantu yina fundaka Daniele na dibulu.’ Ntangu bo losaka bo na dibulu, bantambu diaka bo.

Dariusi tindaka nsiku yai na bantu na yandi: ‘Bantu yonso fwete wa Nzambi ya Daniele boma. Yandi gulusaka Daniele na maboko ya bantambu.’

Keti nge ke sambaka Yehowa konso kilumbu bonso Daniele?