KUYANTIKA DISOLO
DILONGI 6
Kuwa Ve Boma
Munsiku: “Beto bakaka kikesa na nzila ya Nzambi na beto sambu na kuzabisa beno nsangu ya mbote.”—1 Bate. 2:2.
Mambu ya Yezu Salaka
1. Tala VIDEO, to tanga Luka 19:1-7. Na nima, tadila bangiufula yai:
Sambu na nki bantu ya nkaka vandaka ve kuzola Zasheo?
Ata mpidina, inki pusaka Yezu na kulonga yandi?
Mbandu ya Yezu Ke Longa Beto Inki?
2. Sambu na kulonga nsangu ya Kimfumu kukonda kupona-pona, nge fwete wa ve boma.
Landa Mbandu ya Yezu
3. Tudila Yehowa ntima. Mpeve ya Nzambi pesaka Yezu ngolo ya kulonga, yo lenda pesa nge mpi ngolo yina. (Mat. 10:19, 20; Luka 4:18) Lomba Yehowa na kupesa nge kikesa sambu nge longa bantu yina nge ke waka boma.—Bis. 4:29.
4. Kusambisa ve bantu na ntwala. Nge lenda vanda ti badute sambu na kulonga bantu ya nkaka sambu na mutindu bo ke monika, sambu bo kele ti mbongo mingi, sambu na luzingu na bo to balukwikilu na bo. Kansi kuvila ve nde:
Yehowa ti Yezu ke zabaka mambu ya kele na ntima ya bantu; kansi beto ve.
Yehowa lenda sadisa muntu yonso.
5. Kuwa ve boma kansi vanda mayele mpi luzitu. (Mat. 10:16) Kuswana ve ti bantu. Kana muntu ke ndima ve nsangu ya mbote to nge ke mona nde nge kele na kigonsa, na luzitu yonso, zenga disolo ti yandi.—Bing. 17:14.