BANGINDU YA NKAKA C
Mutindu ya Kulonguka Biblia ti Muntu na Zinga Mvula na Mvula!
Bampangi sambaka mingi mpi bo tadilaka na dikebi yonso inki malongi yo lombaka nde bo tula na mukanda Zinga Mvula na Mvula! Sambu na kusadila mukanda yango mbote, tala mambu nge lenda sala ntangu nge ke longuka Biblia ti bantu.
Na ntwala ya kulonguka
1. Kudibongisa mbote-mbote. Ntangu nge ke kudibongisa, yindula bampusa ya longoki na nge, luzingu na yandi mpi mambu ya yandi ke ndimaka. Meka kuyindula na ntwala malongi yina lenda vandila yandi mpasi na kubakisa to na kusadila. Tadila mutindu malongi ya kele na kitini “Tala Mpi” lenda sadisa longoki na nge, mpi vanda ya kuyilama sambu na kusadila yo kana mpila kele ntangu beno ke longuka.
Na ntangu ya kulonguka
2. Beno yantika mpi beno sukisa ti kisambu kana longoki me ndima.
3. Kutuba ve mingi. Benda dikebi na malongi ya bo me yidika, mpi bika nde longoki kutuba.
4. Kana beno ke yantika kitini ya nkaka ya mukanda, tanga mambu ya kele na kitini mambu yina kitini yai ke tubila mpi tubila mwa bantu-diambu ya malongi.
5. Kana beno me manisa kitini mosi, sadila lupangu inki nge me simba? sambu na kusadisa longoki na nge na kuyibuka bakieleka yina yandi me longuka.
6. Ntangu nge ke longuka konso dilongi ti longoki na nge:
Beno tanga mambu ya bo me sonika.
Beno tanga baverse yonso ya bo me sonika nde “Tanga.”
Beno tanga baverse yina bo me tula kana yo kele mfunu.
Songisa bavideo yonso ya bo me sonika nde “Tala” (kana yo kele).
Yula longoki konso ngiufula.
Benda dikebi na yandi na bifwanisu ya kele na kitini “Longuka Mambu Mingi,” mpi lomba longoki na kutubila yo.
Sadila lupangu “Mambu ya Kusala” sambu na kusadisa longoki na kulandila kuyela na yandi na kimpeve. Nge lenda siamisa yandi na kusadila mbandu ya mambu ya kusala ya bo me pesa, na kuditudila balukanu ya nkaka, to mpi yonso zole.
Yula longoki kana yandi sepelaka ti masolo to ti bavideo yina kele na kitini “Tala Mpi” ntangu yandi vandaka kuyidika dilongi.
Sala yonso sambu na kumanisa konso dilongi na konso mbala ya beno ke longuka.
Na nima ya kulonguka
7. Landa kuyindula longoki na nge. Samba Yehowa sambu yandi sadisa longoki na nge na kuyela mpi sambu yandi pesa nge mayele ya kuzaba mutindu ya kusadisa yandi.