Ndembikilu Ya Kekatuka Na “Nzambi Ya Ndembikilu Yonso”
“Lusakumunu kuvanda na Nzambi mpi Tata ya Mfumu na beto Yezu Kristu, Tata ya kufuluka na nkenda mpi Nzambi ya ndembikilu yonso, ya kelembikaka beto na bampasi na beto yonso.”—2 KORINTO 1:3, 4, NW.
BANTU ya kele na ntantu kele na mfunu ya ndembikilu—dyambu ya nsaka ve, ya mpamba mpi ve. Beto yonso mewaka ntubilu yai nde ‘ntangu ya keluta kebelulaka mputa,’ kansi na luyantiku ya matanga, inki muntu ya kufuluka na ntantu mebakaka ndembikilu na dibanza yina? Bakristu kezabaka nde Nzambi kusilaka lufutumuku, kansi yau kekandikaka bau ve na kuvanda na mawi ya mpasi ya lufwa ya kintulumukina. Mpi yau kele ya kyeleka nde kana nge mefwisa mwana, bana ya mebikala lenda kuyinga ve mwana yina ya mbalu.
2 Na ntangu ya lufwa, beto kesadisamaka mingi na ndembikilu ya kyelaka, ndembikilu ya kele ti lufulu ya kyeleka na balusilu ya Nzambi. Beto mpi kevandaka na mfunu nde bankaka kubakisa beto. Dyambu yai kukumaka kyeleka na bantu ya Rwanda, mingimingi na bankama ya mabuta ya Bambangi ya Yehowa ya kuvidisaka bantu na bau ya zolwa, na ngondama yina ya kidyabulu na kati ya makanda. Bantu yonso ya kele na ntantu lenda kubaka ndembikilu na nani?
Yehowa—Nzambi ya Ndembikilu
3 Yehowa memonisaka mbandu na kupesaka beto yonso ndembikilu. Yandi tindaka Mwana na yandi mosi kaka, Yezu Kristu, na ntoto sambu na kupesa beto ndembikilu ti kivuvu ya mvula na mvula. Yezu kulongaka nde: “Nzambi me lutaka kuzola bantu yonso; yo yina yandi pesaka bo mwana mosi yina ya kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Yandi songaka balandi na yandi dyaka nde: “Kuzola ya kuluta nene ya muntu lenda vanda na yo na ntima yo yai: kana yandi pesa moyo na yandi sambu na banduku na yandi.” (Yoane 15:13) Na okazio ya nkaka yandi kutubaka nde: “Mutindu mosi bonso Mwana-muntu; yandi kwisaka ve sambu bantu kusadila yandi, kansi yandi kwisaka na kusadila bantu ti na kupesa bo moyo na yandi bonso mbongo ya kukatula bantu mingi na kimpika ya masumu.” (Matayo 20:28) Ebuna Polo kutubaka nde: “Kansi Nzambi songaka beto mutindu yandi ke zolaka beto: Kristu fwaka sambu na beto na ntangu beto vandaka kaka bantu ya masumu.” (Roma 5:8) Na nsadisa ya mikapu yai ti ya nkaka mingi, beto kemona zola ya Nzambi mpi ya Yezu Kristu.
4 Ntumwa Polo ntetentete vandaka kubakisa lemvo ya Yehowa ya beto mekuka ve na kubaka. Yandi gulusamaka tuka nkadilu ya kimpeve mosi ya kufwa, tuka kwa yandi vandaka munyokudi ya nganzi ya balandi ya Kristu, tii na kukuma Mukristu ya kenyokwama yandi mosi. (Efezo 2:1-5) Yandi ketendula dyambu na yandi nde: “Sambu mono kele fyoti na kati ya bantumwa, ye mono mefwana ve na kubingama ntumwa, sambu mono nyokulaka dibundu ya Nzambi. Kansi na nlemvo ya Nzambi mono kele yina ya mono kele. Ebuna nlemvo ya yandi monisaka na mono yau kuvandaka ya mpamba ve, kansi mono salaka ngolo kuluta bau yonso, kansi mono ve kansi nlemvo ya Nzambi ya kele na mono.”—1 Korinto 15:9, 10, NW.
5 Na mutindu ya kufwana, Polo kusonikaka nde: “Lusakumunu kuvanda na Nzambi mpi Tata ya Mfumu na beto Yezu Kristu, Tata ya kufuluka na nkenda mpi Nzambi ya ndembikilu yonso, ya kelembikaka beto na bampasi na beto yonso, sambu beto lenda, na nsadisa ya ndembikilu ya Nzambi mepesaka beto, kulembika bayina kele na mpasi ya mitindu yonso. Mutindu mosi bampasi ya Kristu mefuluka na beto, mutindu mosi mpi, na nzila ya Kristu, ndembikilu ya beto kebaka kefuluka. Ntangu yai, ata beto kele na mpasi, yau kele sambu na ndembikilu na beto mpi sambu na luguluku na beto; to kana beto kepesama ndembikilu, yau kele sambu na ndembikilu na beto; yau kenatila beto mvibudulu ya bampasi ya beto mpi kemona. Mpila yina, kivuvu na beto sambu na beno kele ya ngolo, na kuzabaka nde, mutindu beno kebaka kabu na bampasi, na mutindu mosi beno mpi tabaka kabu ya ndembikilu.”—2 Korinto 1:3-7, NW.
6 Bangogo ya kupemama ya inki mutindu yai! Ngogo ya Kigreki ya mebalulama awa na “ndembikilu” mekwelana ti “kubingama na kuvanda na ntwala ya muntu.” Yau yina, “yau kele kutelama na lweka ya muntu sambu na kupesa yandi nsyamisa ntangu ya yandi kenyokwama na bampasi ya ngolo.” (A Linguistic Key to the Greek New Testament) Ntendudi mosi ya Biblia kusonikaka nde: “Ngogo yango . . . ntangu yonso kesongidilaka mingi kuluta lusadisu ya mawa. . . . Ndembikilu ya Bakristu kele ndembikilu ya kenataka kikesa, ndembikilu ya kesadisaka muntu na kununga bampasi yonso ya luzingu.” Na kati na yau kele mpi bangogo ya ndembikilu ya kele na lufulu na lusilu mpi kivuvu mosi ya ngolo—yina ya lufutumuku ya bafwa.
Yezu ti Polo—Bandembiki-mbundu ya Nkenda
7 Mbandu ya mbote ya inki mutindu Polo kuvandaka na yau na kupesaka ndembikilu! Yandi lendaka kusonikila bampangi ya Tesalonika nde: “Beto vandaka kusala na ntima mosi ya pima, bonso mama yina ya ke baka bana na yandi. Beto zolaka beno mingi yo yina beto kabilaka beno Nsangu ya Mbote ya Nzambi kaka ve, kansi beto vandaka me yilama mpi na kukabila beno moyo na beto mosi, sambu kuzola yina ya beto zolaka beno yo vandaka kuzola mosi ya nene! Beno zaba nde beto salaka na konso muntu na kati na beno bonso tata ke salaka na bana na yandi mosi. [Na kusyamisaka konso muntu na kati na beno, mpi na kutaka kimbangi na beno, NW].” Kaka bonso bibuti ya zola, ya kesungiminaka, beto yonso lenda kukabula tiya na beto ti mbakisa na beto ti bankaka na ntangu ya bau kele na yau mfunu.—1 Tesalonika 2:7, 8, 11.
8 Na kumonisaka lusungiminu mpi mambote ya mutindu yina, Polo vandaka kaka kulanda Mbandu na yandi ya kuluta nene, Yezu. Yibuka imvitasio ya nkenda ya Yezu kepesa na beto yonso ya mutindu yau mesonama na Matayo 11:28-30 nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balongoki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.” Ee, malongi ya Yezu kepemisaka, sambu yau kepesaka kivuvu ti lusilu—lusilu ya lufutumuku. Yau yai kivuvu ti lusilu ya beto kele na kupesaka na bantu, mu mbandu kana beto mebikisila bau kamukanda Quand la mort frappe un être aimé. Kivuvu yai lenda kusadisa beto yonso, ata yau kuvanda nde nge mevandaka na ntantu bilumbu mingi.
Mutindu ya Kulembika Bayina Kele na Ntantu
9 Ntantu kesukaka ve na mwa nsungi ya ntangu ya keyita kuzabana mbala mosi na nima ya lufwa ya muntu ya zolwa. Bantu ya nkaka kenataka kilo ya ntantu na bau na luzingu na bau ya mvimba, mingimingi bayina ya mevidisaka bana. Bankwelani zole, Bakristu ya kwikama na Espagne, kuvidisaka mwana na bau ya bakala ya bamvula 11 na 1963 na maladi ya méningite. Tii bubu yai, mansanga kekitaka bau na meso kana bau meta masolo ya Paquito. Dati ya muntu kufwaka, bafoto, ngibuka, lenda kuyibusa beto mambu ya mawa. Yau yina, beto lenda kusuka ntima ve mpi kuyindula nde bankaka zolaka kuvanda mebeluka na mpasi na bau ya mafwa ntangu yai. Muntu mosi ya kuzaba kimunganga kendima nde: “Kyadi mpi nsobana ya mawi lenda kubikala bamvula mingi.” Yindula ntangu yai, mutindu mosi bonso bandulu ya bamputa ya kinsuni na zulu ya nitu lenda kubikala ti beto na luzingu ya mvimba, bandulu ya bamputa mingi ya mawi kebikala mpi kiteso mosi.
10 Inki bima ya nsadilu ya beto lenda kusala na kati ya dibundu ya Bukristu, na kulembika bayina ya kele na ntantu? Na masonga yonso, beto lenda kusonga na mpangi ya nkento to ya bakala ya kele na mfunu ya ndembikilu nde: “Kana kele ti kima ya mono lenda kusala sambu na kusadisa, songa mono.” Kansi, mbala ikwa muntu ya kele na mafwa kebingaka beto na kutuba nde, “Mono meyibuka kima mosi ya nge lenda kusala sambu na kusadisa mono”? Yau kemonana pwelele nde, kele beto bantu fwete kuzwa dibanza kana beto kezola kulembika muntu ya kele na mafwa. Ebuna, inki beto lenda kusala na nzila ya lusadisu? Mwa bangindu ya nsadilu yau yai.
11 Widikila: Kima mosi ya kuluta mfunu ya beto lenda kusala, kele kukabula mpasi ya muntu ya kele na mafwa na kuwidikilaka. Nge lenda kuyufula nde, “Keti nge kezola kutubila yau?” Bika muntu yango kubaka lukanu. Mukristu mosi keyibuka ntangu tata na yandi kufwaka nde: “Yau kusadisaka mono mpenza ntangu bankaka kuyufulaka mono nde inki kubwaka ye na nima bau kuwidikilaka mpenza.” Mutindu Yakobo kulongisilaka, vanda ya kuyilama na kuwidikila. (Yakobo 1:19) Widikila ti kukanga ntima mpi ti mawa. Na Roma 12:15, Biblia ketuma nde: “Beno dila ti bantu yina ke dila.” Yibuka nde Yezu ti Marta mpi Maria kudilaka.—Yoane 11:35.
12 Pesa nsyamisa: Tula na ntu nde muntu ya kele na mafwa lenda kuvanda ntete na mawi ya kunata dikambu, na kuyindulaka nde mbala ya nkaka kuvandaka ti bima mingi ya yandi lendaka kusala. Syamisa yandi nde mambu yonso ya lendaka kusalama kusalamaka (to mambu ya nkaka yonso ya kyeleka mpi ya mbote ya nge kezaba). Syamisa yandi nde mawi na yandi kele ve ya konda kuzabana. Tela yandi mambu ya bantu ya nkaka ya nge kezaba ya kunungaka lufwa ya mutindu mosi. Na ntubilu ya nkaka, monisa nde dyambu mesimba nge na ntima mpi mepesa nge mawa. Lusadisu na beto ya mbote lenda kutuba mingi! Salomo kusonikaka nde: “Mambu ya mbote ya muntu ke tubaka yo kele sukadi bonso bwiki, ntomo kana nge dia yo sambu na nitu.”—Bingana 16:24; 25:11; 1 Tesalonika 5:11, 14.
13 Kudipesa na lusadisu: Kudipesa ve na lusadisu kaka na bilumbu ya ntete ntangu ya banduku mingi ti bampangi kele ntete pana, kansi kana mpila kele sala yau bangonda mingi na nima, ntangu bankaka mevutuka na bisalu na bau ya konso kilumbu. Nsungi ya ntantu lenda kusobana mingi na konso muntu. Dikebi na beto ya Bukristu ti mawa lenda kusongidila mingi na konso ntangu ya mfunu. Biblia ketuba nde “ke na kinduku me luta kimpangi.” Yau yina kingana yai nde, “Nduku ya kyeleka kemonanaka na ntangu ya mpasi,” kele dyambu ya kyeleka ya beto fwete kusadila.—Bingana 18:24; fwanisa ti Bisalu 28:15.
14 Tubila bikalulu ya mbote ya muntu ya mefwa: Yai kele lusadisu ya nkaka yina kele ya nene kana yau mepesama na ntangu ya mbote. Ta bankenda ya mbote ya muntu yango ya nge keyibuka. Kuwa boma ve na kusadila zina ya muntu yango. Kusala ve bonso muntu ya zolwa ya mefwa kuzingaka ve to kuvandaka muntu ya kukonda mfunu. Yau kele ndembikilu na kuzaba mambu ya mukanda mosi ya Nzo-nkanda ya Bamingaga ya Harvard yina kutubaka nde: “Mutindu mosi ya kubeluka kesalamaka kana muntu ya kele na mafwa lenda kuyindula muntu ya kufwaka nkatu kunyokwama na mawa . . . Mutindu mvwandilu ya mpa mezabana mpi mendimama, mawa kekitukaka mbambuka ya kyese.” “Mbambuka ya kyese”—Ndembikilu ya inki mutindu na kuyibuka bantangu ya mbalu yina ya beto kulutisaka ti muntu na beto ya zolwa! Mbangi mosi ya kuvidisaka tata na yandi mwa bamvula meluta kutubaka nde: “Mbambuka mosi ya sipesiale sambu na mono kele kutanga Biblia kumosi ti Tata bilumbu fyoti na nima ya ntangu ya yandi bandaka kulonguka Biblia. Ya nkaka kele ntangu ya beto vandaka kulala na zelo penepene na masa, na kusolulaka makambu na mono ya nkaka. Mono vandaka kumona yandi kaka na nima ya bamvula tatu to iya, ebuna baokazio yina vandaka ya mbalu.”
15 Baka dibanza ya kusadisa ntangu yau kelombama: Bantu mingi ya kele na ntantu lenda kununga kuluta bankaka. Ebuna, na kutalaka mvwandilu, sala bitambi ya kyeleka sambu na kusadisa. Nkento mosi ya Mukristu ya kuvandaka na ntantu kuyibukaka nde: “Bamingi kutubaka nde ‘kana kele ti kima ya mono lenda kusala, zabisa mono.’ Kansi mpangi ya nkento mosi ya Mukristu kuyulaka ve. Yandi kwendaka na kati ya suku ya kulala, yandi kungulaka bilele ya mvindu yonso ye yandi kuyobisaka yau. Ya nkaka kubakaka kantine, masa, ti bisadilu ya nkaka ya kuyobisila, yandi kuyobisaka ti brose tapi ya bakala na mono kulukilaka. Bau kuvandaka banduku ya kyeleka ye mono lenda kuvila bau ve.” Kisika mfunu ya lusadisu kemonana pwelele, baka dibanza ya kusadisa—mbala ya nkaka na kulambaka madya, na kusadisaka na kutula bunkete to bisalu ya nkaka ya kemonana. Ya kyeleka, beto fwete kutomatala na kukota ve ti mavwanga kana muntu ya kele na mafwa kezola dyambu ya kinsweki. Yau yina beto fwete kusala bikesa ya masonga na kusadila bangogo yai ya Polo: “Beno kele bantu ya Nzambi; Nzambi zolaka beno, yandi solaka beno na kuvanda bantu na yandi. Yo yina beno fweti wila bantu mawa mingi, beno fweti vanda bantu ya mbote, beno lenda kudisonga ve, beno fweti vanda pima, beno fweti kanga ntima.” Ntima ya mbote, kukanga ntima, ti zola lenda kufwa ve.—Kolosai 3:12; 1 Korinto 13:4-8.
16 Sonika mukanda to tinda karte ya ndembikilu: Kima ya bantu kevilaka mbala mingi kele mbalu ya mukanda to karte ya kitoko ya kumonisa mawa. Inki kele mbalu na yau? Yau lenda kutangama mbala na mbala. Mukanda ya mutindu yina fwete kuvanda nda ve, kansi yau fwete kumonisa nkenda na nge. Yau mpi fwete kumonisa nsonikilu mosi ya kimpeve kansi bonso kusamuna ve. Ntubilu ya mutindu yai nde, “Beto kele awa sambu na nge,” lenda kuvanda ndembikilu.
17 Samba ti bau: Kukitisa ve mbalu ya bisambu kumosi ti bau, sambu na bankundi Bakristu ya kele na mafwa. Na Yakobo 5:16, Biblia ketuba nde: “Bisambu ya ngolo ya muntu ya mbote yo ke sadisaka bantu mingi.” Mu mbandu, kana bantu ya kele na ntantu mewa beto kesamba sambu na mambote na bau, yau tasadisa bau na kununga mawi ya mbi bonso yina ya kunata dikambu. Na ntangu na beto ya kulemba, ya kunyokwama na mabanza, Satana kemekaka na kufwa beto ti “mayele” na yandi. Yau yai ntangu ya beto kevandaka na mfunu ya ndembikilu, ti lusadisu ya kisambu, mutindu Polo kutubaka nde: ‘Beno samba Nzambi na bisambu ya mutindu na mutindu, sambu yandi kusadisa beno. Beno samba yandi ntangu yonso mutindu Mpeve-Santu ke songaka beno. Yo yina, beno fweti kangula meso, beno lemba ve. Beno samba Nzambi sambu na bantu ya Nzambi yonso.’—Efezo 6:11, 18; fwanisa Yakobo 5:13-15.
Mambu ya Kutina
18 Kana muntu kele na ntantu, kele mpi ti bima ya lenda kusalama ve to ya lenda kutubama ve. Bingana 12:18 kekebisa nde: “Bituba-tuba ya bantu yo ke lwadisaka bantu ya nkaka bonso mbele, kansi mambu ya muntu ya mayele yo ke belulaka.” Mbala mingi, nkatu kubakisa, beto kenungaka ve na kumonisa ntubilu ya mbote. Mu mbandu, beto lenda kutuba nde, “Mono kezaba mutindu nge kele na kuwa.” Kansi, keti yau kele ya kyeleka? Keti nge mpi mefwisaka muntu ya mutindu kaka mosi yina? Ata mpila yina, bantu kemonisaka mawi na mitindu mingi. Mawi na nge kuvandaka mbala ya nkaka na luswaswanu ti muntu ya kele na ntantu. Mutindu ya mbote ya kumonisa mawa na nge lenda kuvanda ya kutuba nde, “Mono kewila nge mawa sambu mono mpi mekutanaka ti lufwa ya mutindu mosi ntangu ya . . . na mono kufwaka na bilumbu meluta.”
19 Yau mpi tavanda kumonisa mawa na kuta ve masolo ya lufutumuku to kukonda lufutumuku ya muntu ya mefwa. Bampangi mingi ya bankento ti ya babakala melwalaka na mawi sambu na masolo na yina metala mambu ya makwisa ya lenda kubwila bankwelani na bau ya bampani ya mefwaka. Beto kele bazuzi ve na yina metala bantu ya tafutumuka to ya tafutumuka ve. Beto lenda kusepela sambu Yehowa, ya kemonaka ntima, tamonisa nkenda ya bantu mingi na kati na beto tabikaka kumonisa ve.—Nkunga 86:15; Luka 6:35-37.
Mikapu ya Kelembikaka
20 Nto mosi na kati ya banto ya kuluta nene ya lusadisu, kana yau mepesama na ntangu ya mbote, kele kundima balusilu ya Yehowa sambu na bafwa. Mabanza yina ya Biblia tavanda mfunu mingi ata muntu ya kele na mafwa kele Mbangi to muntu ya beto mekutana na yandi na kisalu ya kusamuna. Wapi ndambu na kati ya mikapu yango? Beto kezaba nde Yehowa kele Nzambi ya ndembikilu yonso sambu yandi tubaka nde: “Mono—mono mosi kele muntu ya kelembika beno.” Yandi tubaka dyaka nde: “Bonso muntu yina ya mama na yandi mosi kelembikaka, mutindu mono mosi talembikaka beno.”—Yezaya 51:12; 66:13, NW.
21 Muyimbi Bankunga kusonikaka nde: “Yai kele ndembikilu na mono na bampasi na mono, sambu ndinga na nge mebumbaka mono ya moyo. Bansiku na nge mono mebumbaka yau kimakulu, O Yehowa, mpi mono kubakaka ndembikilu. Bika nde lemvo na nge kuvanda ndembikilu na mono, bonso nge tubaka na nsadi na nge.” Simba nde ngogo “ndembikilu” mesadilama mbala na mbala na mikapu yai. Ee, beto lenda kuzwa ndembikilu ya kyeleka sambu na beto mpi sambu na bankaka na kutulaka dikebi na Ndinga ya Yehowa na ntangu na beto ya bampasi. Mambu yai ya kuvukisa ti zola mpi nkenda ya bampangi na beto, lenda kusadisa beto na kuvibidila mbotembote kyadi ya lufwa mpi kufulusa dyaka luzingu na beto ti kisalu ya kyese na kisalu ya kusamuna ya Bakristu.—Nkunga 119:50, 52, 76, NW.
22 Beto mpi lenda kununga ntantu na beto na kusadisaka mingi bankaka na bampasi na bau. Kana beto ketula dikebi na bankaka ya kele na mfunu ya ndembikilu, beto mpi kebaka kyese ya kyeleka ya kukaba na sansa ya kimpeve. (Bisalu 20:35) Bika nde beto kukabula ti bau mbonameso ya kilumbu ya lufutumuku ntangu bantu yonso ya bansi ya nkulu, bambandu na nima ya bambandu, tayamba bantu na bau ya zolwa ya tatelema na lufwa, na kati ya nza ya mpa. Makwisa ya inki mutindu! Mansanga ya kyese ya inki mutindu tabasika na ntangu yina mutindu beto kezaba nde Yehowa kele ya kyeleka Nzambi “ya kelembikaka bankwa ntantu”!—2 Korinto 7:6, NW.
[Study Questions]
1, 2. Bantu ya kele na ntantu kele na mfunu ya ndembikilu ya inki mutindu?
3. Inki mutindu Yehowa kupesaka mbandu na kupesaka ndembikilu?
4. Sambu na inki Polo kuvandaka na mfuka ya kuvutula na Yehowa?
5. Inki Polo kusonikaka na yina metala ndembikilu ya kekatukaka na Nzambi?
6. Ngogo ya Kigreki ya mebalulama na “ndembikilu” kemonisa inki?
7. Inki mutindu Polo vandaka ndembiki-mbundu ya bampangi na yandi?
8. Sambu na inki malongi ya Yezu kele ndembikilu sambu na bayina kele na ntantu?
9. Sambu na inki beto fwete kusuka ntima ve na bayina kele na ntantu?
10. Inki beto fwete kusala sambu na kusadisa bayina kele na ntantu?
11. Inki mutindu kuwidikila na beto lenda kuvanda ndembikilu sambu na bankaka?
12. Nsyamisa ya inki mutindu beto lenda kupesa na bayina kele na mafwa?
13. Kana beto mekudipesa na lusadisu, inki mutindu yau lenda kusadisa?
14. Inki beto lenda kutubila na kulembika bayina kele na mafwa?
15. Inki mutindu beto lenda kubaka dibansa ya kusadisa?
16. Sambu na inki mukanda to karte lenda kupesa ndembikilu?
17. Inki mutindu kisambu lenda kupesa ndembikilu?
18, 19. Inki mutindu beto lenda kusonga ntubilu ya mbote na masolo na beto?
20, 21. Inki kele ndambu ya mikapu yina lenda kulembika muntu ya kele na Mafwa?
22. Inki makwisa metulama na ntwala na beto?
[Caption on page 1]
[Bangyufula]
[Caption on page 31]
[Ntendula ya Bifwanisu ya lutiti 31]
Na ntubilu mosi ya mbote, baka dibanza ya kusadisa bayina kele na ntantu
[Caption on page 1]
Keti Nge Keyibuka
◻ Inki mutindu Yehowa kele “Nzambi ya Ndembikilu yonso”?
◻ Inki mutindu Yezu ti Polo kulembikaka bayina kuvandaka na ntantu?
◻ Tanga ndambu ya bima ya beto lenda kusala sambu na kulembika bayina kele na ntantu?
◻ Inki beto fwete kubuya na kusala ntangu beto kele ti bantu ya kele na mafwa?
◻ Inki mikapu nge kebakilaka ndembikilu mingi na ntangu ya lufwa?