Bo Salaka Luzolo ya Yehowa

Filipo Botikaka Ministre Mosi ya Etiopia

NA KUTAMBULAKA na kati ya pusupusu na yandi, muntu ya Etiopia mosi vandaka kusadila ntangu na yandi mbote. Yandi vandaka kutanga na ndinga ya ngolo​—mutindu yau vandaka kikalulu ya bantambudi na mvunkama ya ntete. Muntu yai vandaka “ministre ya [Kandake] ntotila-nkento ya Etiopia.”a Yandi vandaka “kukeba bima yonso ya ntalu mingi”​—na kutuba ya mbote, yandi vandaka ministre ya finanse. Muntu yai vandaka kutanga Ndinga ya Nzambi sambu na kubaka nzayilu.​—Bisalu 8:​27, 28.

Evanzelizatere Filipo vandaka na nzyunga yina. Wanzyo mosi tindaka yandi kisika yina, ye yandi songaka yandi ntangu yai nde: “Kwenda kuvanda penepene na pusu-pusu yina.” (Bisalu 8:​26, 29) Beto lenda yindula Filipo kekudibanza nde, ‘Nani yango yai? Inki yandi ketanga? Sambu na inki mono metindama na yandi?’

Ntangu Filipo vandaka kwenda na lweka ya pusupusu, yandi waka muntu ya Etiopia ketanga bangogo yai: “Yandi vandaka bonso dimeme yina ya bo ke nata na kisika ya bo ke fwaka mameme. Yandi vandaka bonso mwana-dimeme yina ke tuba ve na ntwala ya muntu yina ke zenga yo mika; yandi tubaka kima ve. Bo vwenzaka yandi, bo buyaka mpi na kuzenga mambu na yandi mbote. Nani muntu lenda zabisa nsangu ya dikanda na yandi? Sambu bantu me fwaka yandi, yandi kele diaka ve awa na nsi-ntoto.”​—Bisalu 8:​32, 33.

Filipo bakisaka mbala mosi mukapu yina. Yau vandaka na mukanda ya Yezaya. (Yezaya 53:​7, 8) Muntu ya Etiopia kumaka bisakasaka na mambu yina ya yandi vandaka kutanga. Filipo yantikaka disolo na kuyulaka nde: “Keti nge ke bakisa mambu ya nge ke tanga?” Muntu ya Etiopia vutulaka nde: “Nki mutindu mono lenda bakisa yo kana muntu ya kutendula mono yo kele ve?” Yandi dodukilaka Filipo na kuvanda ti yandi na pusupusu.​—Bisalu 8:​30, 31.

“Nki Mambu Ta Kanga Mono Nzila na Kubaka Mbotika?”

Muntu ya Etiopia songaka Filipo nde: “Pardo, . . . Profete ke tuba mambu yai sambu na nani? Keti yandi ke tuba yo sambu na yandi mosi to sambu na muntu ya nkaka?” (Bisalu 8:34) Kukonda kubakisa ya muntu ya Etiopia vandaka kima ya kuyituka ve sambu kuzaba “mameme,” to “nsadi,” ya mbikudulu ya Yezaya, vandaka diswekamu tuka ntama. (Yezaya 53:11) Yau kumaka kibeni pwelele na ntangu Filipo songaka muntu ya Etiopia “Nsangu ya Mbote ya Yesu.” Na nima ya ntangu fyoti, muntu ya Etiopia tubaka nde: “Tala masa. Nki mambu ta kanga mono nzila na kubaka mbotika?” Ebuna Filipo botikaka yandi kaka pana na ntangu yina.​—Bisalu 8:​35-38.

Keti bau lutisaka ntinu? Ata fyoti ve! Muntu ya Etiopia vandaka prozelite ya Bayuda.b Na yau, yandi yitaka kuvanda nsambidi ya Yehowa ti nzayilu mosi ya Masonuku, kumosi ti mbakisa ya bambikudulu ya Mesia. Kansi, nzayilu na yandi vandaka ya kulunga ve. Ntangu yandi mezaba nsangu ya kuluta mfunu yina metadila mukumba ya Yezu Kristu, muntu ya Etiopia bakisaka mambu ya Nzambi vandaka kulomba na yandi mpi zolaka kundima yau. Mbotika fwanaka mpenza.​—Matayo 28:​18-20; 1 Piere 3:21.

Na nima, “Mpeve ya Mfumu Nzambi katulaka Filipo.” Yandi kwendaka kusala kisalu yankaka. Muntu ya Etiopia “landaka kaka nzila na yandi na kiese yonso.”​—Bisalu 8:​39, 40.

Dilongi Sambu na Beto

Bonso bansadi ya Yehowa ya bilumbu yai, beto kele na ntuma ya kusadisa bantu ya ntima-masonga na kulonguka kyeleka ya Ndinga ya Nzambi. Bantu mingi mezwaka mbutu ya mbote na kusongaka nsangu ya mbote na bankaka na ntangu ya nzyetolo mpi na mabaku yankaka ya mbote. Bonso mbutu ya Kisalu ya kusamuna Kimfumu, konso mvula bankama ya mafunda kemonisaka kidimbu ya kudipesa na bau na Yehowa na kubakaka mbotika.

Ya kyeleka, ntinu fwete lutana ve na kunata bantu ya mpa na mbotika. Bau fwete baka ntete nzayilu ya sikisika ya Yehowa Nzambi mpi ya Mwana na yandi Yezu Kristu. (Yoane 17:3) Na nima, bau fwete balula ntima, na kubikisaka bikalulu ya mbi mpi kubaluka sambu na kulanda bansiku ya Nzambi. (Bisalu 3:19) Yau kelombaka ntangu, mingimingi kana mabanza ya mbi kunamaka kibeni ngolo. Bantu ya mpa fwete tadila mbotembote mukumba ya kilongoki ya Mukristu tanatila yandi, kansi lusakumunu kele ya nene na kukota na kati ya ngwisana ya kudipesa na Yehowa Nzambi. (Fwanisa ti Luka 9:23; 14:​25-33.) Bayina kele Bambangi ya Yehowa kenataka na tiya yonso bantu ya mpa ya mutindu yina na organizasio yina Nzambi kesadila na kulungisa luzolo na yandi. (Matayo 24:​45-47) Bonso muntu ya Etiopia, bantu ya mpa yai tasepela na kulongukaka na yina metadila mambu yina ya Nzambi kelombaka bau mpi kulanda yau.

[Banoti na nsi ya lutiti]

[Lupangu ya kele na lutiti 8]

Sambu na Inki Tongu?

Na nsangu yonso ya Bisalu kapu 8, muntu ya Etiopia kebingama “tongu.” Kansi, mutindu Nsiku ya Moize vandaka kundima ve muntu ya kutongula na kati ya dibundu, yau kele pwelele nde muntu yai vandaka tongu ve na sansa ya kyeleka. (Kulonga 23:⁠1) Ngogo ya Kigreki sambu na “tongu” lenda sadilama sambu na muntu yina kele ti kisalu ya nene. Ebuna, muntu ya Etiopia vandaka ministre ya ntotila-nkento ya Etiopia.