Vingila ti “Mpusa ya Ngolo”

“Bima yonso ya Nzambi salaka ke vingila kaka [“ti mpusa ya ngolo,” NW] kilumbu yina ya Nzambi ta songa bana na yandi.”​—ROMA 8:19.

1. Inki mambu Bakristu kemona ntangu yai bonso na mvu-nkama ya ntete?

BAKRISTU ya bubu yai kele na kumona mambu ya Bakristu ya mvu-nkama ya ntete kumonaka. Na mvu-nkama ya ntete, mbikudulu mosi ya Yehowa sadisaka bansadi na yandi na kuzaba ntangu ya bau lendaka kumona Mesia. (Daniele 9:​24-26) Mbikudulu yina tubilaka mpi lufwa ya Yeruzalemi. Kansi, yau monisaka ve ata kidimbu mosi ya kuzabila kilumbu ya lufwa ya Yeruzalemi na ntwala. (Daniel 9:26b, 27) Mutindu mosi na mvu-nkama ya 19, mbikudulu mosi nataka balongoki ya kyeleka ya Biblia na kubanda kukinga mambu ya nene. Ntangu bau wakanisaka “bantangu nsambwadi” yina Daniele 4:25 ketubila ti “bantangu ya Mimpani,” bau bakisaka na ntwala nde Yezu tabaka kiyeka ya Kimfumu na 1914. (Luka 21:​24, King James Version; Ezekiele 21:​25-27) Mukanda ya Daniele kele ti bambikudulu mingi, kansi mosi ve na kati na yau lenda sadisa balongoki ya Biblia bubu yai na kuzaba kilumbu kibeni ya lufwa ya ngidika ya bima ya Satana yonso. (Daniele 2:​31-44; 8:​23-25; 11:​36, 44, 45) Kansi, yau tasalama kaka, ntama mingi ve, sambu beto kezinga na “ntangu ya nsuka.”​—⁠Daniele 12:⁠4.a

Kukangula Meso na Ntangu Yai ya Kristu Kele ti Beto

2, 3. (a) Inki kemonisa mpenza nde beto kezinga na ntangu Kristu kele na kiyeka ya kimfumu? (b) Inki kesonga nde Bakristu fwete kangula meso na ntangu ya Kristu kele ti bau?

² Ya kyeleka, na ntwala nde Kristu kubaka kiyeka ya Kimfumu na 1914, mbikudulu mosi nataka Bakristu na kuyantika kukinga. Kansi “kidimbu” yina Yezu pesaka, sambu beto zaba nde yandi kele ti beto mpi nde nsuka ya ngidika ya bima yai melunga, yau vandaka dati ve; yau vandaka mambu ya beto fwete mona. Yandi fwete kuvanda ntete ti beto, na ntwala mambu yai kubanda kumonana. Bitumba, nzala, kunikana ya ntoto, bamaladi, kikalulu ya kufwa nsiku, kunyokula Bakristu, ti kusamuna nsangu ya mbote ya Kimfumu kele mambu ya kemonisa mpenza nde na ntangu yai, Kristu kele dezia na kiyeka ya kimfumu.​—⁠Matayo 24:​3-14; Luka 21:​10, 11.

³ Kansi, na ntwala ya kukwenda, Yezu pesaka balongoki na yandi ndongisila yai ya kuluta mfunu: “Beno keba, . . . beno kangula meso!” (Marko 13:​33, 37; Luka 21:36) Kana beto metanga mbotembote mambu ya kele na ndongisila ya Yezu, yau kemonisa nde ngindu na yandi ya ntete vandaka ve ya kusonga balongoki na yandi, na kukangula meso sambu na kumona bidimbu ya kesonga nde yandi kele ti bau. Ngindu na yandi vandaka ya kupusa bau na kukangula kaka meso na ntangu yonso ya yandi tavanda ti bau. Kukangula meso ntangu yonso na inki mambu?

4. Kidimbu ya Yezu pesaka vandaka sambu na kuzaba inki?

⁴ Mbikudulu yai ya nene ya Yezu kele mvutu ya yandi pesaka na ngyufula yai: “Tubila beto, mambu yina yonso [mambu ya tasonga nsuka ya ngidika ya bima ya Bayuda] ta bwa nki ntangu? Nki [“tamonisa nde nge kele ti beto, mpi nde nsuka ya ngidika ya bima yai melunga,” NW]?” (Matayo 24:⁠3) Kidimbu yina Yezu pesaka vandaka ve kaka sambu balandi na yandi kuzaba nde yandi kele ti bau, kansi yau vandaka mpi kidimbu yina tasonga nsuka ya ngidika ya bima yai ya mbi.

5. Inki mutindu Yezu monisaka nde ntete yandi tavanda na kimpeve ti balandi na yandi, na nima yandi “ta kwisa”?

⁵ Yezu monisaka nde, na bilumbu yina yandi ‘tavanda ti’ (pa·rou·siʹa na Kigreki) balandi na yandi, yandi takwisa ti ngolo mpi nkembo. Na yina metala “kukwisa” na yandi (na Kigreki erʹkho·mai), yandi tubaka nde: “Ebuna kidimbu yina ke songa nde Mwana-muntu me kwisa yo ta monika na zulu. Na ntangu yina bantu ya makanda yonso ta dila, bo ta mona Mwana-muntu ke kwisa na zulu ya matuti, na ngolo ti na lukumu ya nene. Beno longuka malongi ya nti ya bafige. Kana balutangu na yo me yantika kubasisa matiti, beno zaba mbote nde ntangu ya mvula me kuma penepene. Mutindu mosi, beno mpi kana beno mona nde mambu yina yonso ke bwa, beno fweti zaba nde ntangu yina me kuma penepene, [“Yezu kele penepene ya munoko ya nzo,” NW]. Yo yina, beno kangula meso, sambu beno kuzaba ve nki kilumbu Mfumu na beno ta kwisa. . . . Beno yilama, sambu Mwana-muntu ta kwisa na ntangu yina ya beno ta zaba ve nde yandi ke kwisa.”​—⁠Matayo 24:​30, 32, 33, 42, 44.

Sambu na Inki Yezu Kristu Kekwisa?

6. Inki Yehowa tasala na kufwa ‘Babilone ya Nene’?

⁶ Ata Yezu Kristu kele dezia Ntotila kubanda 1914, yandi fwete sambisa bimvuka ya bantu mesalaka ti bau mosi bantu, na ntwala ya kupesa ndola na bayina yandi takanga bantu ya mbi. (Fwanisa ti 2 Korinto 5:10.) Kubika fyoti Yehowa ketula na ntima ya bantu ya politiki, dibanza ya kufwa ‘Babilone ya Nene,’ kimvuka ya lusambu ya luvunu yonso na inza. (Kusonga 17:​4, 5, 16, 17) Polo tubaka pwelele nde Kristu tafwa “Muntu ya Mbi.” Muntu ya Mbi yai kele bamfumu ya Kikristu, kitini ya kuluta nene ya ‘Babilone ya Nene,’ yina mebuyaka lukwikilu. Polo sonikaka nde: “Muntu ya Mbi ta kwisa kubasika, kansi Mfumu Yesu ta fwa yandi na mupepe ya munoko na yandi [“na ntangu ya bantu tamona nde yandi kele ti bau,” NW].”​—⁠2 Tesalonika 2:​3, 8.

7. Ntangu Mwana-muntu kekuma, inki mutindu yandi tasambisa?

⁷ Ntama mingi ve, Kristu kesambisa bantu ya makanda na kutalaka mambu ya bau salaka bampangi na yandi yina kele ntete na zulu ya ntoto. Beto ketanga nde: “Ntangu Mwana-muntu ta kwisa bonso Mfumu ya nene ti bawanzio yonso, yandi ta vanda na zulu ya kiti na yandi ya kimfumu, ebuna bawanzio ta tula bantu yonso ya nsi-ntoto kisika mosi na meso na yandi. Yandi ta kabula bo na makabu zole, mutindu ke salaka [ngungudi] ntangu yandi ke kabulaka mameme na bankombo: yandi ta tula mameme na diboko na yandi ya kibakala, ebuna bankombo na diboko na yandi ya kinkento. . . . Mfumu ta vutula na [mameme] nde: ‘Mono ke tubila beno mambu ya kieleka: Konso ntangu ya beno salaka mambu yina na mpangi mosi . . . na kati ya bampangi na mono yai . . . beno salaka yo na mono.’ . . . Ebuna [bankombo] ta kwenda kubaka ndola ya mvula na mvula; kansi bantu yina salaka mbote bo ta kwenda kubaka moyo ya mvula na mvula!”​—⁠Matayo 25:​31-46.

8. Polo ketuba inki na yina metala kukwisa ya Kristu sambu na kufwa bantu ya mbi?

⁸ Kingana ya mameme ti bankombo kemonisa mbote nde Yezu tafwa bantu yonso ya mbi. Polo tubilaka bampangi na yandi yina vandaka na mpasi nde Nzambi “ta katula mpasi na beto ti mpasi na beno bantu yina ke monaka mpasi. Yandi ta sala yo ntangu [“yandi tasonga Mfumu Yezu na zulu,” NW] ti bawanzio na yandi ya ngolo, na kati ya tiya yina ke pela ngolo, sambu na kupesa ndola na bantu yina kuzaba Nzambi ve, bayina ke zola kulanda ve Nsangu ya Mbote ya Mfumu na beto Yesu. Ndola ya bo ta baka kele lufwa ya mvula na mvula; bo ta vandaka mpi penepene na Mfumu Yesu ve to penepene na ngolo na yandi ya lukumu, ntangu yandi ta kwisa na Kilumbu yina sambu na kubaka lukumu na bantu na yandi [to, “bantu ya santu,” NW].” (2 Tesalonika 1:​7-10) Mambu ya kyese yai yonso kekinga beto, keti beto fwete tula ve lukwikilu ti kukangula meso ntangu yonso sambu na kukwisa ya Yezu?

Beto Kinga Kusongama ya Kristu ti Mpusa Yonso

9, 10. Sambu na inki Bakristu ya kupakulama yina kele dyaka na zulu ya ntoto kekinga ntangu yina ya Nzambi ta songa Yezu Kristu?

⁹ ‘Kusongama ya Mfumu Yezu na zulu’ tavanda ve kaka sambu na kufwa bantu ya mbi. Kansi yau tavanda mpi sambu na kupesa lufutu na bantu ya lunungu. Bantu ya kupakulama to bampangi ya Kristu yina mebikala dyaka na ntoto, ata bau mona mpasi na ntwala ya kusongama ya Kristu, bau kele kaka na kyese sambu na kivuvu na bau ya nkembo, ya kukwenda na zulu. Piere sonikilaka bau nde: “Beno vanda na kiese kana beno ke mona mpasi yina ya Kristo monaka, sambu kana beno ke mona mpasi yina, ebuna beno ta vanda na kiese mpenza ntangu lukumu na yandi ta monika.”​—⁠1 Piere 4:⁠13.

¹⁰ Bakristu ya kupakulama kezola kukangama na Kristu tii kuna yandi ‘kutikisa bo kisika mosi ti yandi’ na mpila nde “ntangu Nzambi ta songa Yesu Kristu,” bau baka “lukumu” sambu na lukwikilu na bau ya ‘kumekama.’ (2 Tesalonika 2:1; 1 Piere 1:⁠7) Na yina metala Bakristu yai ya mebutuka na mpeve, Biblia ketuba nde: “Nsangu ya Kristo me kotilaka beno mpenza; yo yina, beno ke na mambote yonso ntangu beno ke vingila Kilumbu yina ya [Nzambi ta songa] Mfumu na beto Yesu Kristo.”​—⁠1 Korinto 1:​6, 7.

11. Inki bapakulami kesala ntangu bau kekinga ntangu Nzambi tasonga Yezu Kristu?

¹¹ Bapakulami ya kele dyaka awa na ntoto kewaka mutindu yai bonso Polo: “Mono ke mona nde beto lenda fwanikisa ve bampasi ya beto ke mona ntangu yai ti lukumu yina ya Nzambi ta songa na ntwala.” (Roma 8:18) Bau kele na mfunu ya kusosa kuzaba dati ve sambu na kutula lukwikilu. Bau kekudipesaka na kisalu ya Yehowa, mpidina bau kepesaka mbandu ya mbote na bampangi na bau, “mameme ya nkaka.” (Yoane 10:16) Bapakulami yai kezabaka nde nsuka ya ngidika ya mbi yai mefinama. Yoyina bau kelandaka ndongisila ya Piere pesaka nde: “Mabanza na beno fweti vanda ya kuyilama; beno kangula meso, beno tula ntima na beno na makabu yina ya Nzambi ta pesa beno ntangu [yandi ta songa] Yesu Kristo.”​—⁠1 Piere 1:⁠13.

‘Bima Yonso Ke Vingila ti Mpusa ya Ngolo’

12, 13. Inki mutindu lugangu “yalamaka na kima ya mpamba,” ye inki mameme yankaka kekinga na mpusa yonso?

¹² Keti mameme yankaka kele mpi na kima ya bau kekinga na mpusa ya mingi? Yau kele. Polo tubilaka ntete kivuvu ya nkembo ya “bana” ya Yehowa yina mebutukaka na mpeve, bayina tayala “na kimvuka ti Kristo.” Na nima yandi tubaka nde: “Bima yonso ya Nzambi salaka ke vingilaka kaka [ti mpusa ya ngolo] kilumbu yina ya Nzambi ta songa bana na yandi. [“Sambu lugangu yalamaka na kima ya mpamba, na luzolo na yau mosi ve, kansi na nzila ya muntu yina yalaka yau, na lufulu ya kivuvu nde lugangu yau mosi mpi takatuka na kimpika ya mbebisa mpi tabaka kimpwanza ya lukumu ya bana ya Nzambi,” NW].”​—⁠Roma 8:​14-21; 2 Timoteo 2:​10-12.

¹³ Disumu ya Adami kotisaka bana na yandi yonso na kimpika ya disumu mpi ya lufwa, to ‘kima ya mpamba kumaka kuyala bau.’ Bau vandaka ve na mpila ya kudikatula na kimpika yina. (Nkunga 49:7; Roma 5:​12, 21) Mameme yankaka kele na mpusa mingi mpenza ya ‘kukatuka na kimpika ya mbebisa’! Kansi, kele ti mambu ya fwete salama ntete, na kulandaka bantangu ti bansungi ya Yehowa.

14. Inki mutindu ‘Nzambi ta songa bana na yandi,’ ye inki mutindu dyambu yai takatula bantu yonso “na kimpika ya mbebisa”?

¹⁴ Nzambi fwete “songa” ntete ndambu ya ‘bana na yandi’ ya kupakulama ya kele dyaka awa na ntoto. Inki mutindu yau tasalama? Kana ntangu ya Nzambi melunga, mameme yankaka tazaba pwelele nde bapakulami yonso ‘mebaka bidimbu’ ti lukumu mpi bau mekwenda kuyala ti Kristu. (Kusonga 7:​2-4) Nzambi “ta songa” mpi ‘bana na yandi’ ya mefutumuka, ntangu bau tavukana ti Kristu sambu na kufwa ngidika ya Satana ya bima ya mbi. (Kusonga 2:​26, 27; 19:​14, 15) Na nima, na ntangu ya Luyalu ya Kristu ya Bamvula Funda, Nzambi “ta songa” dyaka bana na yandi bonso banganga-nzambi, nzila ya kunokisa lusakumunu ya nkudulu ya Yezu na zulu ya “lugangu” to bantu. Na ntangu yina, bantu “takatuka na kimpika ya mbebisa” mpi nsukansuka, bau “tabaka kimpwanza ya lukumu ya bana ya Nzambi.” (Roma 8:21; Kusonga 20:5; 22:​1, 2) Taleti bivuvu ya mutindu yai, keti yau kelomba ve nde mameme yankaka ‘kuvingila ti mpusa ya ngolo kilumbu yina ya Nzambi ta songa bana na yandi’?​—⁠Roma 8:⁠19.

Yehowa Kekanga Ntima Sambu na Kugulusa Beto

15. Inki beto lenda vila ve sambu na Yehowa na yina metala kuyidika ntangu ya mambu kebwaka?

¹⁵ Yehowa kele Muntu ya Ketalaka Makambu ya Ntangu. Mutindu na yandi ya kutula ntangu ya konso dyambu kele ti kifu ve ata fyoti. Ntangu yankaka mambu tasalama ve mutindu ntima na beto kezola. Kansi, beto fwete vanda na lukwikilu ya ngolo nde mambu yonso ya Nzambi mesilaka beto, yau tasalama. (Yozue 23:14) Mambu ya beto kezola kumona nswalu, yandi pesa yau dyaka ntangu ya nda na ntwala yau kulungana. Kansi, kana beto sosa kuzaba banzila na yandi, beto tayituka mingi na ntwala ya mayele na yandi. Polo sonikaka nde: “Nzambi ke na kimvwama mingi mpenza! Mayele na yandi ti mambu yina ya yandi zaba yo ke kwendaka ntama mpenza! Nani lenda tendula mambu yina ya yandi ke zengaka? Nani lenda landa banzila na yandi? . . . ‘Nani zaba mabanza ya Mfumu Nzambi? Nani lenda pesa yandi bandongisila?’ ”​—⁠Roma 11:​33, 34.

16. Banani kebaka mambote ya kukanga ntima ya Yehowa?

¹⁶ Piere sonikaka nde: “Bampangi na mono, ntangu beno ke vingila kilumbu yina [kilumbu ya Nzambi tafwa “zulu” ti “ntoto” ya ntama mpi tayingisa “zulu ya mpa” ti “ntoto ya mpa”], beno tula ngolo na kuvanda bantu ya mbote ti ya kukonda kifu na meso ya Nzambi, beno tula mpi ngolo sambu na kuzinga na ngemba ti yandi. Beno fweti baka kukanga ntima yina ya Mfumu na beto . . . ke kangaka bonso nde nzila ya kuguluka.” Ntima ya Yehowa kekanga bubu kepesa bantu mingi nzila ya kuguluka na ‘kilumbu na yandi,’ yina takwisa na kintulumukina, “mutindu muyibi ke kwisaka.” (2 Piere 3:​9-15) Kukanga ntima na yandi kepesa beto mpi ntangu ya ‘kulanda kaka kisalu ya Nzambi na boma ti na matekita’ sambu ‘beto guluka.’ (Filipi 2:12) Yezu tubaka nde beto fwete “keba,” beto fwete ‘kulala mpongi ve,’ kana beto kezola kundimama mpi “kutelama na meso ya Mwana-muntu,” ntangu yandi takwisa kusambisa bantu.​—⁠Luka 21:​34-36; Matayo 25:​31-33.

Kinga Ntangu Yonso ti Kukanga Ntima

17. Inki ndongisila ya Polo beto fwete sadila?

¹⁷ Polo longisilaka bampangi na yandi ya kimpeve na ‘kutala ve bima yina ke monikaka na meso, kansi na kutala bima yina ke monikaka ve na meso.’ (2 Korinto 4:​16-18) Yandi zolaka ve nde kima ata mosi kufika bau na kumona lufutu ya zulu yina vandaka na ntwala na bau. Ata beto kele Bakristu ya kupakulama to beto kele mameme yankaka, beto vila ve kivuvu na beto, beto lemba mpi ve. Beto “kanga ntima na kuvingila,” beto tamonisa nde “beto kele ve bantu yina ke vutuka na nima [na lufwa, kansi] beto ke na lukwikilu ebuna beto [ta] baka moyo ya mvula na mvula.”​—⁠Roma 8:25; Baebreo 10:⁠39.

18. Sambu na inki beto fwete tula ntima na Yehowa, na kubikisaka ntangu ti bansungi na maboko na yandi?

¹⁸ Beto fwete tula ntima na Yehowa, beto bikisa bantangu ti bansungi na maboko na yandi. Balusilu na yandi talanda manaka na yandi na kulungana, yau “tasukinina ve.” (Habakuki 2:​3, NW) Kansi na ntwala yau kulungana, mambu ya Polo songaka Timoteo mekuma mfunu mingi sambu na beto. Yandi tubaka nde: “Na meso ya Nzambi ti na meso ya Yesu Kristo yina ta sambisa bantu ya moyo ti bantu ya kufwa ntangu yandi ta kwisa kuyala bantu, mono ke songa nge na kusala mambu yai: Longa nsangu ya Nzambi, tula ngolo na kuzabisa yo, ata na ntangu ya mpasi ata na ntangu ya mbote; . . . Sala kisalu na nge ya kulonga Nsangu ya Mbote; lungisa kisalu na nge yonso ya nge fweti sala sambu na kusadila Nzambi.”​—⁠2 Timoteo 4:​1-5.

19. Inki bantu ya Yehowa fwete sala na nsungi yai, ye sambu na inki?

¹⁹ Luzingu na beto mosi ti ya bantu yankaka kele na kigonsa. Polo sonikaka nde: “Keba nge mosi, keba na malongi na nge. Vanda ngolo na mambu yina yonso. Sambu, kana nge sala mpidina, nge ta gulusa moyo na nge mosi, nge ta gulusa mpi moyo ya bantu yina ke waka malongi na nge.” (1 Timoteo 4:16) Ntangu mebikala fyoti mpenza sambu na ngidika ya bima yai ya mbi. Ntangu beto kekinga mambu ya kyese ti mpusa ya ngolo, beto vila ve ata fyoti nde yai kele dyaka ntangu mpi nsungi ya Yehowa meyidikaka sambu bantu na yandi kusamuna nsangu ya mbote ya Kimfumu. Kana kisalu yonso mesuka, Nzambi memona nde imene, Yezu ketuba nde: ‘Ebuna, nsuka ta kwisa.’​—⁠Matayo 24:⁠14.

[Noti na nsi ya lutiti]

Beto Vutukila

◻ Na dyambu ya kusosa kuzaba dati, inki mutindu beto mefwanana ti Bakristu ya mvu-nkama ya ntete?

◻ Sambu na inki Bakristu fwete fula na ‘kukangula meso’ na ntangu yai ya Kristu kele ti bau?

◻ Sambu na inki bantu yonso kevingila ti mpusa yonso, kilumbu yina “Nzambi ta songa bana na yandi”?

◻ Sambu na inki beto fwete tula ntima na Yehowa, na kubikisaka ntangu ti bansungi na maboko na yandi?

[Kifwanisu ya kele na lutiti 15]

Bakristu fwete lala mpongi ve sambu na kukinga kukwisa ya Yezu

[Kifwanisu ya kele na lutiti 16]

Bakristu ya kupakulama mekudipesa na kisalu ya Yehowa, lukwikilu na bau ketadila ve makambu ya kuzaba badati