“Beno Kangula Meso”

“Beno kangula meso, sambu beno kuzaba ve nki kilumbu Mfumu na beno ta kwisa.”​—MATAYO 24:42.

1. Inki mutindu bansadi ya Yehowa yina mesalaka ntangu mingi na kisalu kekudiwaka sambu na bamvula yina bo lutisaka na kisalu ya kudipesa? Pesa mbandu mosi.

BANSADI ya Yehowa mingi yina kesalaka banda ntama kulongukaka kyeleka ntangu bo vandaka batoko. Kaka bonso komersa yina kumonaka mayaka ya ntalu mpi kwendaka kuteka bima na yandi yonso sambu na kusumba, balongoki ya Biblia yina ya kikesa kudibuyaka bo mosi mpi bo pesaka luzingu na bo na Yehowa. (Matayo 13:45, 46; Marko 8:34) Inki mutindu bo kekudiwaka sambu bo mekinga mingi sambu na kumona balukanu ya Nzambi kulungana na ntoto mutindu bo vandaka kutula kivuvu? Bo kemona ve ntima mpasi ata fyoti. Bo kendima mambu yina Mpangi A. H. Macmillan, yina kulutisaka kiteso ya bamvula 60 na kisalu ya kudipesa na Nzambi, tubaka: “Mono mebaka mpenza lukanu ya mono mebakaka ntete ve sambu na kukwamina na lukwikilu na mono. Yo mesadisa mono na kumona mfunu ya luzingu. Yo kelanda kusadisa mono na kukinga mambu yina tasalama na bilumbu kekwisa kukonda boma.”

2. (a) Inki ndongisila ya kufwana Yezu pesaka na balongoki? (b) Inki bangyufula beto tatadila na disolo yai?

² Ebuna nge? Kutala ve bamvula ya nge kele na yo, tala mambu Yezu ketuba: “Beno kangula meso, sambu beno zaba ve nki kilumbu Mfumu na beno ta kwisa.” (Matayo 24:42) Nsa yai ya fyoti kele na dilongi ya nene. Beto kezaba ve nki kilumbu Mfumu takwisa sambu na kusambisa ngidika yai ya mbi, mpi yo kele mfunu ve nde beto zaba yo. Kansi beto fwete zinga na mpila nde kana yandi kwisa, beto mona ve mpasi. Sambu na kununga na kusala yo, nki bambandu beto kekuta na Biblia yina tasadisa beto na kubikala meso ya kukangula? Inki mbandu Yezu pesaka sambu na kumonisa mfunu yango? Mpi nki mambu kendimisa beto bubu yai nde beto kezinga na bilumbu ya nsuka ya inza yai ya kuzaba ve Nzambi?

Mbandu yina kekebisa

3. Inki mutindu bantu mingi bubu yai kele bonso bayina kuzingaka na ntangu ya Noa?

³ Na mambu mingi, bantu bubu yai kele bonso babakala ti bankento yina vandaka kuzinga na ntangu ya Noa. Na ntangu yina, ntoto fulukaka na mambu ya nku, mpi ntangu yonso bantu vandaka “kaka na bangindu ya mbi mpenza na bantima na bo.” (Kuyantika 6:5) Bantu vandaka kulutisa ntangu na bo mingi kaka na bisalu na bo ya luzingu ya konso kilumbu. Kansi, na ntwala ya kunokisa Mvula ya ngolo, Yehowa pesaka bantu dibaku ya kubalula ntima. Yandi pesaka Noa kisalu ya kusamuna, ebuna Noa mpi kulemfukaka, yandi ‘longaka malongi ya Nzambi’ kiteso ya bamvula 40 to 50 to nkutu kuluta. (2 Piere 2:5) Kansi, bantu zolaka ve kulanda nsangu ya kukebisa yina Noa vandaka kuzabisa bo. Bo vandaka ve meso ya kukangula. Yo yina na nsuka, kaka Noa mpamba ti dibuta na yandi kugulukaka ntangu Yehowa kulungisaka bangogo na yandi ya kusambisa.​—Matayo 24:37-39.

4. Na nki mutindu beto lenda tuba nde kisalu ya Noa kulungisaka lukanu na yo, mpi nki mutindu beto lenda tuba mpi kiteso mosi sambu na kisalu na nge ya kusamuna?

⁴ Keti kisalu ya Noa kubutaka mbuma ya mbote? Kutala ve ntalu ya fyoti ya bantu yina kundimaka. Ya kyeleka, kusamuna ya Noa kulungisaka lukanu na yo ata bantu mingi ve kundimaka. Sambu na nki? Sambu yo pesaka bantu dibaku ya kupona kana bo tasadila Yehowa to ve. Inki beto lenda tuba sambu na teritware ya nge kekwendaka kulonga? Ata bantu fyoti mpamba kundima, nge kesala kisalu ya mbote. Sambu na nki? Sambu ntangu nge kesamuna, nge kezabisa lukebisu ya Nzambi, ebuna nge kelungisa kisalu yina Yezu pesaka balongoki na yandi.​—Matayo 24:14; 28:19, 20.

Kubuya Baprofete ya Nzambi

5. (a) Inki mambu vandaka kusalama na Yuda na ntangu ya Habakuki, keti bantu kundimaka nsangu na yandi? (b) Inki mutindu bantu ya Yuda kumonisaka nku na bo na baprofete ya Yehowa?

⁵ Bamvu-nkama mingi na nima ya Mvula ya Ngolo, mambu ya mbi mpenza kukotaka na kimfumu ya Yuda. Kusambila biteki, kukonda kuzenga mambu na nzila ya mbote, nku, ti nkutu kufwa bantu kukumaka kusalama mpambampamba. Yehowa tindaka Habakuki na kukebisa bantu nde kana bo balula ve ntima, mpasi ya nene tabwila bo na maboko ya bantu ya Kaldea, to bantu ya Babilone. (Habakuki 1:5-7) Kansi bantu yango kubuyaka na kuwa. Ziku bo vandaka kuyindula nde, ‘Sambu, bamvula kuluta nkama mosi meluta dezia, profete Yezaya kuzabisaka nsangu ya mutindu mosi, kansi ata kima mosi ve kusalamaka.’ (Yezaya 39:6, 7) Bamfumu mingi ya Yuda vandaka kuzola ve kaka kuwa nsangu, kansi bo vandaka mpi nku mingi na meso ya binati-nsangu yina. Kilumbu mosi, bo mekaka na kufwa profete Yeremia, mpi bo zolaka kusala yo kana Ahikami kukotilaka yandi ve. Ntangu mbikudulu yankaka kupesaka yandi makasi mingi, Ntotila Yoyakimi sosaka mpila ya kufwa profete Uria.​—Yeremia 26:21-24.

6. Inki mutindu Yehowa kupesaka Habakuki kikesa?

⁶ Nsangu ya Habakuki vandaka ya mbi kaka bonso ya Yeremia, muntu yina Nzambi tindaka na kuzabisa nde Yuda yo tabikala ya kufwa na nsungi ya bamvula 70. (Yeremia 25:8-11) Yo yina, beto lenda bakisa mpasi yina Habakuki kumonaka na ntima ntangu yandi bokutaka nde: “Mfumu Nzambi, tii nki ntangu mono fweti binga nge sambu nge kwisa kusadisa beto ti kugulusa beto na maboko ya bantu ya nku, ebuna nge ndima?” (Habakuki 1:2) Na kyese yonso, Yehowa pesaka Habakuki mvutu na bangogo yai ya kepesa kikesa: “Sonika yo [mbona-meso] na kusonika sambu ntangu na yo me lunga ntete ve. Kansi ntangu ke kwisa nswalu, ebuna mambu yai ya mono ke songa nge yo ta bwa mpidina. Yo lenda kwisa malembe-malembe, kansi vingila yo; yo ta bwa kaka, yo ta konda ve [“yo tasukinina ve,” NW].” (Habakuki 2:3) Yo kesonga nde Yehowa metulaka “ntangu” sambu na kusukisa kukonda ya lunungu mpi mpasi. Kana yo vandaka kumonana bonso nde yo kesukinina, yo lombaka nde Habakuki kulemba nitu ve, to kuyantika kutula bumolo na kisalu. Olie ya kusala mpidina, yandi vandaka “vingila yo,” mpi kukonda kuvila konso kilumbu nde mambu yina tasalama nswalu. Kilumbu ya Yehowa tasukinina ve!

7. Sambu na nki bo fwaka dyaka Yeruzalemi na mvu-nkama ya ntete ya T.B.?

⁷ Kiteso ya bamvula 20 kulutaka na nima ya Yehowa kusolulaka na Habakuki, bo fwaka Yeruzalemi, ntu-mbanza ya Yuda. Na nima, bo tungaka yo dyaka, ebuna mambi yina vandaka kupesa Habakuki mpasi na ntima kumanaka. Kansi, na mvu-nkama ya ntete ya T.B., yo lombaka nde bo fwa dyaka mbanza yina, sambu bantu na yo vandaka kusala ve mambu ya mbote. Kansi na mawa na yandi, Yehowa salaka na mpila nde bantu ya ntima ya mbote kuguluka. Kansi ntangu yai, yandi sadilaka Yezu Kristu bonso profete sambu na kuzabisa nsangu yina. Na mvu 33 ya T.B., Yezu zabisaka balongoki na yandi nde: “Ntangu beno ta mona basoda me kwisa kuziunga bwala Yeruzalemi, beno ta zaba nde me bika fioti Yeruzalemi ke fwa. Ntangu yina, bantu yina ta vanda na ntoto ya Yudea, mbote bo tina na ndambu yina kele bangumba.”​—Luka 21:20, 21.

8. (a) Inki bangindu kukuminaka Bakristu mingi sambu bo monaka nde ntangu keluta na nima ya lufwa ya Yezu? (b) Inki mutindu mbikudulu ya Yezu yina metala Yeruzalemi kulunganaka?

⁸ Na nima ya bamvula, ziku Bakristu yankaka na Yeruzalemi yantikaka kudiyula kana nki ntangu mbikudulu ya Yezu zolaka kulungana. Ntembe kele ve nde bankaka na kati na bo kusalaka bibansa. Ziku bo yambulaka bisalu na bo ya kitoko sambu na lukanu na bo ya kubikala meso ya kukangula. Keti bo lembaka sambu ntangu vandaka kuluta ata kima kesalama ve? Keti bo tubaka nde bo kelutisa ntangu na bo mpamba, na kuyindulaka nde mambu yina Yezu tubaka tasalama na mbandu yina kekwisa, kansi na mbandu na bo ve? Na mvu 66 ya T.B., mbikudulu ya Yezu yantikaka kulungana ntangu basoda ya Roma kwisaka kuzyunga Yeruzalemi. Bayina kuvandaka meso ya kukangula kubakisaka kidimbu yina, bo basikaka na mbanza, bo gulukaka mpi bo monaka kufwa ya Yeruzalemi.

Mbandu yina kumonisaka mfunu ya kubikala meso ya kukangula

9, 10. (a) Inki mutindu nge tatendula na bunkufi kifwani ya bampika yina Yezu pesaka, bayina vandaka kukinga mfumu na bo sambu yandi kwisa kuvutuka na feti na yandi ya makwela? (b) Sambu na nki kukinga mfumu na bo kukumaka dyambu ya mpasi sambu na bampika? (c) Sambu na nki yo vandaka mbote nde bampika kukanga ntima?

⁹ Ntangu yandi vandaka kumonisa mfunu ya kubikala meso ya kukangula, Yezu fwanisaka balongoki na yandi na bampika yina kekinga kuvutuka ya mfumu na bo yina kukwendaka na feti na yandi ya makwela. Bo zabaka nde yandi tavutuka na mpimpa mosi, kansi nki ntangu? Na ntangu ya kukengila ya ntete? Ya zole? Ya tatu? Bo vandaka kuzaba ve. Yezu tubaka nde: “Kiese na bo kana mfumu na bo kwisa kuvutuka na [ntangu ya kukengila ya zole, ata na ntangu ya kukengila ya tatu, NW] ebuna yandi kwisa kukuta bo ya kutelama [“meso ya kukangula,” NW]!” (Luka 12:35-38) Yindula mutindu bampika yai kukumaka ntima zulu-zulu! Konso nki makelele yina bo zolaka kuwa, to konso nki kima yina bo zolaka kumona, yo vandaka kupusa bo na kukangula meso mpi kudiyula: ‘Keti yina mfumu na beto?’

¹⁰ Inki bo zolaka kusala kana mfumu na bo kumaka na ntangu ya kukengila ya zole, yina vandaka kuyantika na ntangu ya uvwa tii na midi ya mpimpa? Keti bampika yai yonso, ti bayina kusalaka kisalu ngolo banda suka, zolaka kuvanda ya kuyilama sambu na kupesa yandi mbote, to bankaka zolaka kuvanda ya kulala? Inki zolaka kusalama kana mfumu kuvutukaka na ntangu ya kukengila ya tatu, disongidila kubanda na minwi ya mpimpa tii na ngunga ya tatu ya suka? Keti bampika yankaka zolaka kulemba nitu, to kukuma mawa-mawa sambu bo kemona bonso nde mfumu na bo kesukinina?a Ntangu mfumu kwisaka, kaka bayina bo zolaka kukuta kekengila bantu zolaka kuvanda na kyese. Bangogo yina kele na Bingana 13:12 zolaka kulungana na bo kukonda ntembe, sambu yo ketuba nde: “Kana [muntu ketula ntima nde yandi tabaka kima mosi, yo kepesaka mawa na ntima kana yo kekuma ve, NW], kansi kana nge me baka kima ya nge vandaka kutula ngindu, nge fweti vanda kaka kikesa.”

11. Inki mutindu bisambu lenda sadisa beto na kubikala meso ya kukangula?

¹¹ Na ntangu yina bo vandaka kumona bonso nde yandi kesukinina, nki kima zolaka kusadisa balongoki ya Yezu na kubikala meso ya kukangula? Ntangu fyoti na ntwala nde bo kwisa kukanga yandi, ntangu bo vandaka na masamba ya Getsemane, Yezu zabisaka bantumwa na yandi tatu nde: “Beno lala ve mpi beno sambaka kukonda kulemba, sambu beno kubwa ve na mpukumuna.” (Mat. 26:41, NW) Bamvula mingi na nima, Piere ya kuvandaka mpi na kisika yina, pesaka ndongisila ya mutindu mosi na bampangi na yandi Bakristu. Yandi sonikaka nde: “Nsuka ya mambu yonso me kuma penepene. Beno yindula mambu mbote-mbote, beno kangula meso, mpidina beno ta kuka kusamba Nzambi.” (1 Piere 4:7) Yo kele pwelele nde beto fwete salaka bisambu ya tiya-tiya mbala na mbala na luzingu na beto ya Bukristu. Ya kyeleka, beto fwete landa na kubondila Yehowa nde yandi sadisa beto na kubikala meso ya kukangula.​—Roma 12:12; 1 Tesalonika 5:17.

12. Inki luswaswanu kele na kumeka kupesa dati ti kubikala meso ya kukangula?

¹² Simba mpi nde Piere tubaka dyaka nde: “Nsuka ya mambu yonso me kuma penepene.” Inki ntangu yo tasalama? Bantu lenda kuka ve kupesa dati to ngunga ya sikisiki. (Matayo 24:36) Kansi luswaswanu kele na kumeka kusosa kuzaba dati, dyambu yina Biblia kebuya, ti kubikala meso ya kukangula sambu na kukinga nsuka, dyambu ya Biblia kesyamisaka bantu na kusala. (Fwanisa ti 2 Timoteo 4:3, 4; Tito 3:9.) Inki kele mutindu mosi yina lenda sadisa beto na kuvingila nsuka? Yo kele kutula dikebi mpi kundima nde nsuka mekuma penepene. Yo yina, bika beto tadila ntangu yai mambu sambanu ya kemonisa nde beto kezinga na bilumbu ya nsuka ya inza yai ya kuzaba ve Nzambi.

Mambu sambanu ya kendimisa beto

13. Inki mutindu mambu yina Polo ketuba na 2 Timoteo kapu 3 kendimisa beto nde beto kezinga na “bilumbu ya nsuka”?

¹³ Ya ntete, beto kemona mpenza kulungana ya mambu yina Polo tubaka sambu na “bilumbu ya nsuka.” Polo kusonikaka nde: “Na bilumbu ya nsuka ta vanda mpasi mingi. Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; bo ta zitisaka mambu ya Nzambi ve; bo ta vandaka nku mingi, bo ta zingaka kaka na kimbeni, bo ta kumaka songi-songi, bo ta waka makasi nswalu, bo ta zolaka kusala bantu ya nkaka mpasi, bo ta zolaka ve mambu ya mbote; bo ta zolaka kuteka bantu ya nkaka; bo ta vandaka na kifu ya kusala mambu kukonda kuyindula ntete; ntima na bo ta vanda me fuluka na lulendo mingi; bo ta zolaka kiese ya nsi-ntoto, kansi Nzambi ve; bo ta songaka na meso ya bantu nde bo kele [ya kukangama na Nzambi, NW], kisi na ntima na bo, bo ke buyaka ngolo ya kieleka ya [kukangama na Nzambi]. Kuvanda kimvuka mosi ve ti bantu ya mutindu yina! Kansi bantu ya mbi ti bantu ya luvunu, mbi na bo ta kwisa mingi, sambu bo ta kusaka bantu ya nkaka, bantu ya nkaka mpi ta kusaka bo.” (2 Timoteo 3:1-5, 13) Keti beto kemona ve kulungana ya mambu yai na bilumbu na beto? Bantu yina lenda tuba nde bo kemona yo ve kele kaka bayina kekanga meso na bo na luzolo yonso na mambu ya bo mosi ke na kumona!b

14. Inki mutindu mambu yina bo ketubila na Kusonga 12:9 ya metala Dyabulu kelungana bubu yai, mpi nki kima tasalama ntama mingi ve?

¹⁴ Dyambu ya zole, beto kemona mambu yina kesalama sambu bo kulaka Satana ti bademo na yandi na zulu, sambu na kulungisa Kusonga 12:9. Beto ketanga mutindu yai na verse yina: “Dragoni yina ya nene, bo losaka yandi na nganda. Yandi kele nioka yina ya ntama, ya bo ke bingaka Satana [mpi Dyabulu]; yandi muntu ke kusaka bantu yonso. Bo losaka yandi ti bawanzio na yandi na ntoto.” Dyambu yai menata mpasi ya nene na ntoto. Ya kyeleka, bantu kemonaka mpasi mingi, mingimingi banda mvu 1914. Kansi mbikudulu yina kele na Kusonga keyika nde banda bo melosaka Dyabulu na ntoto, yandi kezaba nde “ntangu mingi ve me bika na yandi.” (Kusonga 12:12) Ntangu yai, Satana kenwanisa balongoki ya Kristu ya kupakulama. (Kusonga 12:17) Ntembe kele ve nde beto kemona mambu yina kunwanisa na yandi yina kenata na bilumbu na beto.c Kansi ntama mingi ve, bo talosa Satana na dibulu ya nda sambu yandi “kumona diaka mpila ve ya kukusa bantu.”​—Kusonga 20:1-3.

15. Inki mutindu Kusonga 17:9-11 kepesa nzikisa ya kesonga nde beto kezinga na ntangu ya nsuka?

¹⁵ Dyambu ya tatu, beto kezinga na ntangu ya “ntotila” ya nana mpi ya nsuka yina bo ketubila na mbikudulu yina kele na Kusonga 17:9-11. Na baverse yai, ntumwa Yoane ketubila bantotila sambanu, yina kele kifwani ya bangolo ya inza: Ezipte, Asiria, Babilone, Medo-Perse, Grese, Roma, mpi ngolo ya mevukisaka bangolo zole disongidila Anglo-americaine. Yandi kemona dyaka “ntotila ya nana” yina “kele na kati ya bantotila yina ya ntete nsambwadi.” Ntotila ya nana, disongidila ya nsuka ya Yoane kemona, kele kifwani ya Nations unies. Yoane ketuba nde ntotila yai ya nana “fweti fwa,” na nima na yandi bo ketubila dyaka ve ata ntotila yankaka ya ntoto.d

16. Inki mutindu mambu yina kelungana ti kiteki ya Nabukodonozore kumonaka na ndosi kemonisa nde beto kezinga na bilumbu ya nsuka?

¹⁶ Dyambu ya iya kemonisa nde beto kezinga na nsungi yina bo mefwanisa na makulu ya kiteki yina Nabukodonozore kumonaka na ndosi. Profete Daniele pesaka ntendula ya ndosi yai ya boma ya kiteki ya nene yina vandaka bonso muntu. (Daniele 2:36-43) Bitini iya ya bibende ya kiteki kele kifwani ya bangolo ya kuswaswana ya inza, kubanda na ntu (Kintinu ya Babilone) mpi kulumuka tii na makulu mpi misapi ya makulu (baluyalu yina keyala bubu yai). Bangolo yonso ya inza ya kiteki yango kesonga memonanaka dezia. Beto kezinga nsungi yina kele kifwani ya makulu ya kiteki yina. Bo ketubila dyaka ve ata bangolo yankaka yina fwete kwisa.e

17. Inki mutindu kisalu na beto ya kusamuna Kimfumu kepesa nzikisa yankaka nde beto kezinga na ntangu ya nsuka?

¹⁷ Dyambu ya tanu, beto kemona kisalu ya kusamuna ya kesalama na bisika yonso, yina Yezu tubilaka nde yo tasalama na ntwala ya nsuka ya ngidika yai. Yezu tubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:14) Bubu yai, mbikudulu yai ke na kulungana na kiteso mosi ya mesalamaka ntete ve. Ya kyeleka, na bisika mingi nsangu mekumaka ntete ve, mpi yo lenda vanda mpi nde na ntangu yina Yehowa yandi mosi mezola, yandi tapesa nzila nde kisalu ya nene kusalama. (1 Korinto 16:9) Kansi, Biblia ketuba ve nde Yehowa takinga tii kuna konso muntu yina kele na zulu ya ntoto kuzwa ntete kimbangi yandi mosi. Kansi, beto fwete longa nsangu ya mbote tii na kiteso yina Yehowa yandi mosi tasepela. Na nima nsuka takwisa.​—Fwanisa ti Matayo 10:23.

18. Na kutuba ya mbote, nki dyambu tasalama sambu na bapakulami yankaka ntangu mpasi mosi ya ngolo tayantika, mpi nki mutindu beto lenda zaba yo?

¹⁸ Dyambu ya sambanu, ntalu ya balongoki ya Kristu ya kupakulama yina ke na luzingu kele na kukulumuka ngolo, ata yo kele kyeleka nde bankaka tavanda na luzingu ntangu mpasi mosi ya ngolo tayantika. Na kati ya bapakulami yina mebikalaka, mingi mekuma minunu, mpi mutindu bamvula keluta, ntalu ya bayina kele kibeni bapakulami ya kyeleka kekuma fyoti kibeni. Kansi, na ntangu yandi vandaka kutubila mpasi mosi ya ngolo, Yezu tubaka nde: “Kana Nzambi kulumusaka ve ntalu ya bilumbu yina, ata muntu mosi ve zolaka kuguluka. Kansi Nzambi ta kulumusa ntalu ya bilumbu sambu na bantu yina ya yandi solaka.” (Matayo 24:21, 22) Ntembe kele ve nde bankaka na kati ya “bantu” ya Kristu ‘yina ya yandi me solaka’ tavanda dyaka na ntoto ntangu mpasi yina ya ngolo tayantika.f

Inki mambu tasalama na bilumbu kekwisa?

19, 20. Sambu na nki yo mekuma mfunu kuluta nde beto bikala meso ya kukangula ntangu yai?

¹⁹ Inki mambu bilumbu ya kekwisa kebumbila beto? Ntangu ya kyese kekwisa na ntwala. Polo kebisaka nde “kilumbu ya [Yehowa] ta kwisa yo ta vanda bonso kilumbu ya muyibi ke kwisa na kati ya mpimpa.” Ntangu yandi ketubila bantu ya inza yina kemonaka nde bo kele mayele, yandi ketuba nde: “Kana bantu kutuba nde: ‘Beto ke na ngemba, mambu yonso kele mbote,’ tuba nde, kaka na ntangu yo yina lufwa ta kwisila bo nswalu.” Yo yina, Polo kekebisa batangi na yandi nde: “Yo yina beto fweti lala mpongi ve bonso bantu ya nkaka, kansi beto fweti kangula meso na beto, beto fweti mpi kudiyala.” (1 Tesalonika 5:2, 3, 6) Ya kyeleka, bayina ketulaka ntima nde bimvuka ya inza tatula ngemba ti lutaninu, bo kebuya kundima mambu ya kyeleka. Bantu ya mutindu yina ke na kulota kibeni!

²⁰ Lufwa ya ngidika ya bima yai takwisa na kintulumukina kibeni. Yo yina, bika beto vila ve kilumbu ya Yehowa. Nzambi yandi mosi zabisaka Habakuki nde: “Yo tasukinina ve”! Ya kyeleka, bika beto bikala meso ya kukangula na mpila mosi ya kuluta kibeni ntangu yai.

[Banoti na nsi ya lutiti]

Keti Nge Keyibuka?

• Inki bambandu Masonuku kepesa yina lenda sadisa beto na kubikala meso ya kukangula?

• Inki mbandu Yezu pesaka sambu na kumonisa mfunu ya kubikala meso ya kukangula?

• Inki mambu sambanu kemonisa nde beto kezinga na bilumbu ya nsuka?

[Bifwanisu ya kele na lutiti 3]

A. H. Macmillan kusadilaka Yehowa na kwikama yonso bamvula kiteso ya makumi sambanu

[Bifwanisu ya kele na lutiti 4]

Yezu fwanisaka balongoki na yandi na bampika yina vandaka meso ya kukangula