Kivuvu ya Lufutumuku Kele ti Ngolo

“Mono me bikisaka mambu yonso. . . . Mambu ya mono ke zola kaka yo yai: Mono zola zaba [Yezu] Kristo ti ngolo yina ya Nzambi tedimisaka yandi na lufwa.”​—FILIPI 3:8-10.

1, 2. (a) Bamvula mingi meluta, nki mutindu mfumu ya dibundu mosi kutendulaka lufutumuku? (b) Inki mutindu lufutumuku tasalama?

NA LUYANTIKU ya mvu 1890, bazulunalu kubasisaka diskure mosi ya mfumu ya dibundu mosi kusalaka na Brooklyn, New York, na États-Unis. Yandi tubaka nde na lufutumuku, bo tavukisa kisika mosi mikwa ti misuni yonso yina vandaka na nitu ya bantu, na nima bo tapesa yo luzingu, yo vanda yo fwaka na tiya to na aksida, yo vanda bo dyaka yo na mbisi to bo sadilaka yo bonso fimie sambu na kukunina bimenina. Mfumu ya dibundu yango vandaka kuyindula nde na kilumbu mosi ya bangunga 24, mupepe yonso takuma ndombe sambu na maboko, makulu, misapi, mikwa, misisa ti bampusu ya bamilio ya bantu yina mefwaka. Bitini yai ya nitu takwendaka kusosa bitini yankaka yina bo kele na yo nitu mosi. Na nima, myoyo takatuka na zulu ti na bilungi, yo takwisa kukota na banitu yina tafutumuka.

² Lufutumuku lenda salama ve na kuyidika dyaka bitini ya nitu yina muntu kuvandaka na yo. Bantu kevandaka mpi ve ti moyo mosi ya kekondaka kufwa. (Longi 9:5, 10; Ezekiele 18:4) Yehowa, Nzambi ya lufutumuku, kele na mfunu ve ya kuvukisa dyaka bitini ya nitu ya muntu kuvandaka na yo ntete sambu na kufutumuna yandi. Yandi lenda sala banitu yankaka ya mpa sambu na bantu yina ya yandi tafutumuna. Yehowa pesaka Mwana na yandi, Yezu Kristu, ngolo ya kutedimisa bafwa, sambu bo vanda na luzingu ya mvula na mvula. (Yoane 5:26) Yo yina, Yezu tubaka nde: “[Mono kele lufutumuku mpi luzingu, NW]. Konso muntu yina me ndimaka mono ta vanda na moyo, ata yandi me fwa.” (Yoane 11:25, 26) Lusilu yai kepesa mpenza kyese na ntima! Yo kepesa beto, bantu kele Bambangi ya kwikama ya Yehowa, ngolo ya kukanga ntima na ntwala ya mimekamu to nkutu na ntwala ya lufwa.

3. Sambu na nki yo lombaka nde Polo kunwanina dilongi ya lufutumuku?

³ Platon, filozofe mosi ya bwala Grese, vandaka kuyindula nde, lufutumuku kewakanaka ve ti dilongi yina ketubaka nde bantu kele ti moyo mosi ya kefwaka ve. Kansi, inki kusalamaka na ntangu ntumwa Polo kutaka kimbangi na bantu ya nene ya Grese na Areopage na Atene, na ntangu yandi tubaka mambu ya metala Yezu, nde Nzambi kufutumunaka yandi? Disolo ketuba nde: “Ntangu bo waka nde Nzambi tedimisaka muntu na lufwa, bantu ya nkaka yantikaka kuseka yandi.” (Bisalu 17:29-34) Ata bo vandaka kuseka bo, bantu mingi yina kumonaka Yezu Kristu yina kufutumukaka vandaka dyaka na luzingu, mpi bo taka kimbangi nde Nzambi tedimisaka yandi na lufwa. Kansi, balongi ya luvunu yina vandaka na dibundu ya Korinto vandaka kundima ve dilongi ya lufutumuku. Yo yina, Polo kunwaninaka dilongi yai ya Bukristu na kikesa yonso na 1 Korinto kapu 15. Kana beto longuka na dikebi yonso bangindu yina yandi basisaka, beto tamona nde yo kendimisa kukonda ntembe nde kivuvu ya lufutumuku kele ya kyeleka mpi ya ngolo.

Dyambu ya nene yina kendimisa nde Yezu kufutumukaka

4. Inki bantu Polo ketuba nde bo monaka Yezu na meso na bo ntangu yandi futumukaka?

⁴ Tala mutindu Polo keyantika na kunwanina dilongi yango. (1 Korinto 15:1-11) Kana bantu ya Korinto vandaka ti kikuma yina kupusaka bo na kukuma bankwikidi, bo zolaka kukangama ngolo na nsangu ya mbote ya luguluku. Kristu kufwaka sambu na masumu na beto, bo zikaka yandi, na nima Nzambi kutedimisaka yandi. Ya kyeleka, Yezu yina kutelamaka na lufwa, kumonikaka na Sefasi (Piere), na nima yandi monikaka na “bantumwa yonso kumi na zole.” (Yoane 20:19-23) Ziku na ntangu yandi pesaka ntuma yai nde: ‘Beno kwenda kukumisa bantu balongoki,’ bantu kiteso ya 500 kumonaka yandi. (Matayo 28:19, 20) Yakobo kumonaka yandi, bantumwa yonso ya kwikama mpi kumonaka yandi. (Bisalu 1:6-11) Penepene na bwala Damasi, Yezu kumonikaka na Saule bonso na “mwana yina butukaka matsiombe.” Disongidila, bonso nde Saule kutelamaka dezia na lufwa sambu na kubaka luzingu ya kimpeve. (Bisalu 9:1-9) Bantu ya Korinto kukumaka bankwikidi sambu Polo kulongaka bo, ebuna bo ndimaka nsangu ya mbote.

5. Inki mutindu Polo kuyindulaka kana beto tala mambu yina kele na 1 Korinto 15:12-19?

⁵ Tala mutindu Polo kuyindulaka. (1 Korinto 15:12-19) Bantu yina kumonaka Yezu na meso na bo na ntangu yandi futumukaka kelonga nde Kristu kufutumukaka, inki mutindu bantu lenda tuba nde lufutumuku kele ve? Kana Yezu kutelamaka ve na kati ya bafwa, kisalu na beto ya kusamuna ti lukwikilu na beto kele ya mpamba, ebuna mpi beto kele bantu ya luvunu yina keta luvunu na zina ya Nzambi na ntangu beto ketuba nde yandi futumunaka Kristu. Kana bafwa tafutumuka ve, ‘beto kele kaka na masumu na beto,’ ebuna bantu yina mefwaka na Kristu bo mefwaka ka bo kimakulu. Dyaka, “kana beto fweti tula ntima na Kristo kaka na luzingu yai mpamba, beto fweti mona mawa mingi kuluta bantu yonso.”

6. (a) Inki mambu Polo kutubaka sambu na kundimisa bantu nde Yezu kufutumukaka? (b) Inki kele “mbeni ya nsuka,” mpi nki mutindu bo tasukisa yo?

⁶ Polo kendimisa lufutumuku ya Yezu. (1 Korinto 15:20-28) Sambu Kristu kele “muntu ya ntete na kutelama” na kati ya bantu yina melalaka na lufwa, bantu yankaka mpi tafutumuka. Sambu lufwa kukatukaka na kukonda bulemfu ya muntu mosi yai Adami, lufutumuku mekatuka mpi na muntu mosi yai Kristu. Yo lombaka nde bantu yina kele ya yandi, kubanda kutelama na ntangu yandi tayantika na kuyala. Kristu “tasukisa baluyalu yonso ti biyeka yonso ti bimfumu” (NW) yina kenwanisaka kimfumu ya Nzambi mpi yandi tayala bonso Ntotila tii kuna Yehowa tatula bambeni na yandi yonso na nsi ya makulu na yandi. Ata “mbeni ya nsuka,” disongidila lufwa yina beto bakaka na Adami, Yezu tasukisa yo na nsadisa ya kimenga na yandi. Na nima, Kristu tapesa Kimfumu na maboko ya Nzambi mpi Tata na yandi, ebuna yandi takuma na nsi ya kiyeka ya “Nzambi yina me tulaka bima yonso na nsi ya kiyeka na yandi Mwana; mpidina Nzambi ta yalaka bima yonso mpenza.”

Kubaka mbotika sambu na bantu yina mefwaka?

7. Banani ‘kebakaka mbotika sambu na kuvanda bantu ya kufwa,’ mpi yo ketendula nki sambu na bo?

⁷ Bo keyula ngyufula yai na bantu yina kendimaka ve nde lufutumuku kele: “Nki mfunu bantu na kubaka mbotika sambu na [kuvanda bantu ya kufwa, NW]?” (1 Korinto 15:29) Polo zolaka kutuba ve nde bantu yina kele na luzingu fwete baka mbotika na zina ya bantu yina mefwaka, sambu konso longoki ya Yezu fwete longuka, kukwikila mpi kubaka mbotika yandi mosi. (Matayo 28:19, 20; Bisalu 2:41) Bakristu ya kupakulama ‘ke bakaka mbotika sambu na kuvanda bantu ya kufwa,’ na mutindu bo kekudikotisaka na luzingu mosi yina kenataka bo na lufwa ti na lufutumuku. Mbotika ya mutindu yai keyantikaka na ntangu mpeve ya Nzambi kebutaka na kati na bo kivuvu ya kuzinga na zulu, ebuna yo kesukaka na ntangu bo ketelamaka na lufwa sambu na kubaka luzingu na zulu bonso bampeve yina kefwaka ve.​—Roma 6:3-5; 8:16, 17; 1 Korinto 6:14.

8. Inki dyambu Bakristu fwete ndimaka na ntima mosi ata Satana ti bansadi na yandi kusosa kufwa bo?

⁸ Mutindu bangogo ya Polo kemonisa yo, kivuvu ya lufutumuku kepesaka Bakristu kikesa ya kunwana ti bigonsa konso ntangu mpi ti lufwa konso kilumbu sambu na kisalu ya kusamuna Kimfumu yina bo kesala. (1 Korinto 15:30, 31) Bo kezabaka nde Yehowa lenda futumuna bo kana yandi pesa Satana ti bansadi na yandi nswa ya kufwa bo. Kaka Nzambi mpamba muntu lenda fwa moyo to luzingu na bo na Gehena, yina kele kidimbu ya lufwa ya mvula na mvula.​—Luka 12:5.

Mfunu ya kubikala meso ya kukangula

9. Kana kivuvu ya lufutumuku kele ti ngolo ya kupesa beto kikesa na luzingu, nki mambu beto fwete buya?

⁹ Kivuvu ya lufutumuku kupesaka Polo kikesa. Ntangu yandi vandaka na Efezo, ziku bambeni na yandi kulosaka yandi na kisika yina bo vandaka kusadila bansaka sambu yandi nwana ti bambisi ya makasi. (1 Korinto 15:32) Kana mambu ya mutindu yina kusalamaka, Nzambi kugulusaka yandi, mutindu yandi gulusaka Daniele na maboko ya bantambu. (Daniele 6:16-22; Baebreo 11:32, 33) Sambu yandi vandaka kutula kivuvu na lufutumuku, Polo vandaka ve ti kikalulu yina Bayuda ya kubuyaka lusambu ya kyeleka kuvandaka na yo na ntangu ya Yezaya. Bo vandaka kutuba nde: “Beto kudia, beto kunwa, sambu mbasi beto ke fwa.” (Yezaya 22:13) Kana beto kezola nde kivuvu ya lufutumuku kuvanda na ngolo ya kupesa beto kikesa na luzingu mutindu yo vandaka kupesa Polo, beto mpi fwete buya kuvanda ti bantu yina kele na kikalulu ya mbi ya mutindu yina. Polo kukebisaka nde: “Bantu kukusa beno ve, sambu: ‘Banduku ya mbi ke bebisaka bikalulu ya mbote.’” (1 Korinto 15:33) Ntembe kele ve nde munsiku yai beto lenda sadila yo na mambu mingi na luzingu.

10. Inki beto lenda sala sambu kivuvu na beto ya lufutumuku kuvanda kaka ngolo?

¹⁰ Bantu yina ketulaka ntembe nde lufutumuku kele, Polo ketubila bo nde: “Beno fweti vutukila mabanza na beno yina ya mbote. Beno bikisa masumu. Sambu bantu ya nkaka na kati na beno kuzaba Nzambi ve; mono ke tuba mpidina sambu na kumonisa beno nsoni.” (1 Korinto 15:34) Na “ntangu ya nsuka” yai, beto fwete sala mambu yina kewakana ti nzayilu ya sikisiki ya Nzambi ti ya Kristu. (Daniele 12:4; Yoane 17:3) Yo tasadisa beto na mpila nde kivuvu na beto ya lufutumuku kuvanda kaka ngolo.

Kufutumuka ti nki nitu?

11. Inki mbandu Polo pesaka sambu na kutendula lufutumuku ya Bakristu ya kupakulama?

¹¹ Na nima, Polo ketubila bangyufula yankaka. (1 Korinto 15:35-41) Ziku sambu na kutula ntembe na yina metala lufutumuku, muntu lenda yula nde: “Inki mutindu bantu yina me fwaka bo lenda telama diaka? Nki mutindu ya nitu bo ta vanda na yo?” Mutindu Polo kumonisaka, kana bo mekuna nkeni na ntoto, ya kyeleka yo kefwaka ebuna yo kebalukaka sambu na kukuma kimenina. Mutindu mosi mpi, muntu yina mebutuka na mpeve fwete fwa. Kaka mutindu kimenina keyelaka banda na nkeni tii yo baka nitu ya mpa, nitu ya Mukristu ya kupakulama yina kefutumukaka kevandaka ya kuswaswana ti nitu ya kinsuni ya bantu. Ata mutindu na yandi ya kusala mambu tavanda kiteso mosi ti yina yandi vandaka na yo na ntwala ya kufwa, yandi tatelama bonso kigangwa ya mpa ti nitu ya kimpeve yina mefwana na kuzinga na zulu. Yo kele pwelele nde bantu yina tafutumuka sambu na kuzinga na ntoto fwete vanda ti nitu ya kimuntu.

12. Bangogo ‘banitu ya zulu’ ti ‘banitu ya ntoto’ ketendula nki?

¹² Mutindu Polo kutubaka, nitu ya bantu kele kiteso mosi ve ti ya bambisi. Nkutu konso mutindu ya mbisi kevandaka na nitu ya mutindu na yo. (Kuyantika 1:20-25) Nkembo ya ‘banitu ya zulu’ ya bigangwa ya kimpeve kele ya kuswaswana ti nkembo ya ‘banitu ya ntoto’ ya bigangwa ya kinsuni. Luswaswanu mpi kele na nkembo ya ntangu, ya ngonda, ti ya bambwetete. Kansi, bapakulami yina tafutumuka kele ti nkembo ya kuluta nene mpenza.

13. Na 1 Korinto 15:42-44, nki bo kekunaka mpi nki bo ketedimisaka?

¹³ Na nima ya kutubila baluswaswanu yina imene, Polo kuyikaka nde: “Kutelama ya bantu ta telama na lufwa ta vanda mutindu yina mpi.” (1 Korinto 15:42-44) Yandi tubaka nde: “Bo zikaka yo nitu ya kubeba, yo telamaka nitu yina lenda kubeba ve.” Ziku awa Polo ketubila bapakulami na kimvuka. Sambu bo kekunaka yo ya kubeba na lufwa, yo ketelamaka ya kukonda kubeba, ya kukonda masumu. Ata inza kemonaka yo kima mosi ya mpamba, yo ketelamaka sambu na kwenda kuzinga na zulu mpi yo kekumaka na lukumu bonso yina ya Kristu. (Bisalu 5:41; Kolosai 3:4) Na lufwa, bo kezikaka yo ‘na nitu ya kimuntu’ kansi yo ketelamaka ‘na nitu ya kimpeve.’ Sambu mambu yai kesalamaka na Bakristu yina kebutukaka na mpeve, beto fwete ndima mpenza nde bantu yankaka mpi lenda telama sambu na kuzinga awa na ntoto.

14. Inki mutindu Polo kufwanisaka Kristu ti Adami?

¹⁴ Na nima Polo kumonisaka luswaswanu yina kele na kati ya Kristu ti Adami. (1 Korinto 15:45-49) Adami, muntu ya ntete, “kukumaka moyo ya kezinga.” (Kuyantika 2:7, NW) Kansi Yezu, “Adami ya nsuka kukumaka mpeve yina kepesaka luzingu.” (NW) Yandi pesaka luzingu na yandi bonso kimenga ya nkudulu, ntetentete sambu na balongoki na yandi ya kupakulama. (Marko 10:45) Sambu bo kele bantu, bo ‘kele na kifwani ya muntu yina kusalamaka na pusiere ya ntoto,’ kansi na lufutumuku bo kekumaka bonso Adami ya nsuka. Ntembe kele ve nde bantu ya bulemfu yonso, kumosi ti bayina tafutumuka sambu na kuzinga na ntoto, tabaka mambote ya kimenga ya Yezu.​—1 Yoane 2:1, 2.

15. Sambu na nki Bakristu ya kupakulama kefutumukaka ve na kinsuni, mpi nki mutindu bo ketelama na ntangu yina Yezu keyala?

¹⁵ Na ntangu Bakristu ya kupakulama kefwaka, bo ketelamaka ve na nitu ya kimuntu. (1 Korinto 15:50-53) Nitu ya kimuntu ya kepolaka mpi yina kele ti menga lenda baka ve nitu ya kepolaka ve to kukota na Kimfumu ya zulu. Bapakulami yankaka zolaka kubikala ve ntangu mingi na lufwa. Bayina kemanisa luzingu na bo ya kwikama awa na zulu ya ntoto na ntangu yina Yezu keyala dezia, bo “ta baluka mutindu ya nkaka na mbala mosi, na nswalu yonso mpi.” Bo tafutumuka na mbala mosi sambu na kubaka luzingu ya kimpeve yina kepolaka ve mpi ya nkembo. Nsukansuka, ntalu ya bantu yina kele ‘nkento ya makwela’ ya Yezu yina tazinga na zulu takuma 144 000.​—Kusonga 14:1; 19:7-9; 21:9; 1 Tesalonika 4:15-17.

Bo menunga lufwa!

16. Kana beto tadila mambu yina Polo ti baprofete ya ntama kutubaka, nki takumina lufwa yina beto mebakaka na muntu ya masumu Adami?

¹⁶ Polo kutubaka na kyese yonso nde Nzambi tasukisa lufwa kimakulu. (1 Korinto 15:54-57) Na ntangu bantu yina nitu na bo lenda pola ti kufwa tabaka nitu yina lenda pola ve mpi yina lenda fwa ve, bangogo yai talungana: “Yandi ta sukisa lufwa kimakulu.” “Lufwa, keti nge me nunga? Lufwa, wapi [ntunga, NW] na nge ya kufwa bantu?” (Yezaya 25:8; Ozea 13:14) Ntunga yina kenataka lufwa kele disumu, ebuna ngolo ya disumu kuvandaka Nsiku, yina vandaka kupesa bantu ya masumu ndola ya lufwa. Kansi, sambu na kimenga ti lufutumuku ya Yezu, lufwa yina beto bakaka na muntu ya masumu yai Adami tanunga dyaka ve.​—Roma 5:12; 6:23.

17. Inki mutindu beto lenda sadila bangogo ya 1 Korinto 15:58 bubu yai?

¹⁷ Polo tubaka nde: “Yo yina, bampangi na mono ya mono ke zolaka, beno vanda ngolo, beno vanda bonso bantu yina lenda bwa ve. Beno kudipesa ntangu yonso na kisalu ya Mfumu Yesu, sambu beno zaba nde konso kisalu ya Mfumu ya beno ke salaka yo kele ya mfunu.” (1 Korinto 15:58) Bangogo yai kelungana na bapakulami ya bubu yai yina kele dyaka na zulu ya ntoto ti na “mameme ya nkaka” ya Yezu ata bo fwa na bilumbu yai ya nsuka. (Yoane 10:16) Kisalu na bo ya kusamuna Kimfumu kele ve ya mpamba, sambu lufutumuku kevingila bo. Yo yina, beto bansadi ya Yehowa, beto landa na kudipesa mingi na kisalu ya Mfumu na ntangu ya beto kevingila kilumbu yina ya beto tatuba na ndinga ya ngolo mpi ya kyese nde: “Lufwa, keti nge me nunga?”

Kivuvu ya lufutumuku melungana!

18. Kivuvu yina Polo vandaka na yo na lufutumuku kuvandaka na ngolo nki kiteso?

¹⁸ Bangogo ya Polo yina kele na 1 Korinto kapu 15 kemonisa pwelele nde kivuvu ya lufutumuku vandaka ti ngolo na luzingu na yandi. Yandi vandaka kundima na ntima yonso nde Yezu kufutumukaka na kati ya bafwa mpi nde bantu yankaka mpi tabasika na mazyamu. Keti nge kele na lukwikilu ya ngolo ya mutindu yina? Polo vandaka kumona bima ya bwimi ya kinsuni bonso “mvindu,” mpi yandi ‘bikisaka mambu yonso’ sambu na ‘kuzaba Kristo ti ngolo na yandi ya lufutumuku.’ Ntumwa Polo vandaka ya kuyilama na kundima lufwa bonso yina ya Kristu sambu yandi vandaka na kivuvu ya ‘kutelama mbala ya ntete na lufwa.’ Bo kebingaka yo mpi “lufutumuku ya ntete.” (NW) Bantu kefutumukaka na mutindu yai kele balongoki ya kupakulama ya Yezu 144 000. Ee, Nzambi ketedimisaka bo sambu bo baka luzingu ya kimpeve na zulu, kansi “bantu ya nkaka ya kufwa” yina mebikala tafutumuka sambu na kuzinga na ntoto.​—Filipi 3:8-11; Kusonga 7:4; 20:5, 6.

19, 20. (a) Inki bantu Biblia ketuba nde bo tatelama sambu na kuzinga na zulu ya ntoto? (b) Lufutumuku ya banani nge kevingila?

¹⁹ Kivuvu ya lufutumuku mekumaka dyambu mosi ya kyeleka mpi ya lukumu sambu na bapakulami yina kebikalaka ya kwikama tii na lufwa. (Roma 8:18; 1 Tesalonika 4:15-18; Kusonga 2:10) Bantu yina taguluka na “mpasi ya nene” tamona mutindu kivuvu ya lufutumuku talungana na zulu ya ntoto na ntangu ‘nzadi-mungwa tavutula bantu ya kufwa yina kufwaka na masa. Lufwa ti Hadesi, yo tavutula mpi bantu na yo.’ (Kusonga 7:9, 13, 14, NW; 20:13) Yobi, yina kufwilaka bana-babakala nsambwadi ti ya bankento tatu, tavanda na kati ya bantu yina Nzambi tafutumuna sambu na kuzinga na ntoto. Yindula kyese yina yandi tavanda na yo na kuyamba bo dyaka, mpi kyese yina bana na yandi tavanda na yo ntangu bo tamona nde bo mekuma ti bampangi yankaka nsambwadi ya babakala ti bankaka tatu ya bankento ya kitoko!​—Yobi 1:1, 2, 18, 19; 42:12-15.

²⁰ Yo tavanda lusakumunu mosi ya nene na ntangu Abrahami ti Sara, Izaki ti Rebeka, ee ti bantu yankaka mingi dyaka, ti “baprofete yonso” tatelama na lufwa sambu na kuzinga na ntoto! (Luka 13:28) Daniele kele mosi na kati ya baprofete yina Nzambi kupesaka lusilu nde yandi tafutumuna yandi na ntangu Mesia tayala. Kiteso ya bamvula 2 500 melunga banda Daniele kepemaka na mazyamu, kansi na ngolo ya lufutumuku, kubika fyoti yandi ‘ta telama na kubaka matabisi na yandi’ ya kuvanda mosi na kati ya “bantotila na nsi-ntoto yonso.” (Daniele 12:13; Nkunga 45:17) Yo tavanda kyese mingi kibeni na kuyamba dyaka bantu ya kwikama ya ntangu ya ntama mpamba ve, kansi mpi tata na nge mosi, mama na nge, mwana na nge ya bakala, ya nkento, to bantu yankaka ya nge vandaka kuzola mingi yina mbeni yai lufwa mebakaka!

21. Sambu na nki beto fwete sukininaka ve na kusala mambu ya mbote na bantu yankaka ?

²¹ Ziku banduku na beto yankaka ti bantu yankaka ya beto kezolaka mesadilaka Nzambi bamvula mingi, ebuna ntangu yai bo mekuma mpenza minunu. Kimununu na bo lenda sala nde bo mona mpasi na kunwana ti bampasi ya luzingu. Kana beto kepesa bo konso lusadisu yina ya beto lenda pesa bo ntangu yai, beto tamonisa mpenza nde beto kezolaka bo! Mpidina, kana kilumbu bo mefwa, beto tawa ve mpasi na ntima nde beto kondaka kusala kima mosi sambu na kusadisa bo. (Longi 9:11; 12:1-7; 1 Timoteo 5:3, 8) Beto kendima nde Yehowa tavila ve mambu ya mbote yina beto kesalaka sambu na bantu yankaka, ata bo vanda na bamvula ikwa to na luzingu ya nki mutindu. Polo kusonikaka nde: “Ntangu yonso ya beto ke mona mpila, beto sala bantu yonso mbote, nkutu [kuluta mingi na, NW] bampangi na beto bakristo.”​—Galatia 6:10; Baebreo 6:10.

22. Tii kuna ya kivuvu ya lufutumuku talungana, beto fwete vanda ti lukanu ya kusala nki?

²² Yehowa kele “Tata yina ke wilaka beto mawa [mpi Nzambi ya kepesaka beto kikesa na mambu yonso, NW].” (2 Korinto 1:3, 4) Ndinga na yandi kepesaka beto kikesa mpi kesadisaka beto na kupesa bantu yankaka kikesa na nsadisa ya kivuvu ya ngolo ya lufutumuku. Tii kuna ya beto tamona mutindu kivuvu yango talungana na ntangu bafwa tafutumuka sambu na kuzinga na ntoto, bika beto sala bonso Polo, yina vandaka kukwikila na lufutumuku. Bika beto landa mingimingi mbandu ya Yezu, yina kumonaka mutindu kivuvu na yandi na ngolo yina Nzambi kele na yo ya kufutumuna yandi kulunganaka. Kubika fyoti, bantu yina kele na mazyamu, bayina Nzambi mevilanaka ve tawa ndinga ya Kristu ebuna bo tabasika. Bika mambu yai kupesa beto yonso kikesa ti kyese. Kima ya kuluta mfunu, bika beto pesa Yehowa matondo sambu yandi muntu kusalaka nde Mfumu na beto Yezu Kristu kununga lufwa!

Mvutu na Nge Kele Nki?

• Polo kutubaka nde banani kumonaka Yezu na meso na bo ntangu yandi futumukaka?

• Inki kele “mbeni ya nsuka,” mpi nki mutindu bo tasukisa yo?

• Sambu na yina metala Bakristu ya kupakulama, bo kekunaka bo nki mutindu mpi bo ketedimisaka bo nki mutindu?

• Inki bantu Biblia ketubila yina nge kewa nzala ya kukutana ti bo na ntangu bo tafutumuka sambu na kuzinga na ntoto?

[Kifwanisu ya kele na lutiti 16]

Ntumwa Polo kunwaninaka dilongi ya lufutumuku na kikesa yonso

[Kifwanisu ya kele na lutiti 20]

Lufutumuku ya Yobi, ya dibuta na yandi, ti ya bantu yankaka mingi tapesa kyese mingi mpenza!