Luzayisu Mosi ya Mfunu

NA NSUKA ya lukutakanu ya nsuka ya mvula ya Watch Tower Bible and Tract Society of Pennsylvania yina bo salaka na Oktobri 7, 2000, John E. Barr, mambre ya Nto-Kimvuka mpi ntwadisi ya lukutakanu yango, kuzabisaka nsangu mosi ya mfunu. Luzayisu yai kumonisaka pwelele mambu yina Theodore Jaracz ti Daniel Sydlik kutubaka na badiskure yina bo salaka kilumbu yango.​—Tala balutiti 11-15 mpi 29-32 ya zulunalu yai.

Ntangu yandi zabisaka dyambu mosi ya mfunu, Mpangi Barr kutubaka nde: “‘Bo mepesaka mpika ya kwikama mpi ya mayele’ ti Nto-Kimvuka mikumba mingi ya kuluta mfunu mpi ya ketadilaka mambu mingi kibeni kuluta yina bimvuka ya mezabanaka na nsiku ya leta kele na yo. Na mukanda ya bansiku ya ketwadisaka la Société yina kele ti balukanu ya konso kimvuka ya mezabana na nsiku ya leta fwete lungisa, bo metulaka mambu ya konso kimvuka fwete sala. Kansi, Mfumu na beto, Yezu Kristu, mepesaka kimvuka ya mpika ya kwikama mukumba ya kutala ‘bima’ na yandi yonso, to mambote ya Kimfumu awa na zulu ya ntoto.”​—Matayo 24:45-47, NW.

Sambu na yina metala kimvuka ya Pennsylvanie, Mpangi Barr kuyikaka nde: “Banda yo mesalamaka na mvu 1884, kimvuka ya beto kebingaka nde Watch Tower Bible and Tract Society of Pennsylvania mesalaka kisalu mosi ya mfunu na istware na beto ya bilumbu yai. Ata mpidina, yo kele kaka kisadilu mosi ya mezabanaka na nsiku ya leta yina ‘mpika ya kwikama mpi ya mayele’ kesadilaka na ntangu yandi kevandaka na yo mfunu.”

Na badiskure na bo, Mpangi Sydlik ti Mpangi Jaracz kutendulaka nde ata Mfumu mepesaka “mpika ya kwikama mpi ya mayele” mukumba ya kutala bima na yandi yonso yina kele na zulu ya ntoto, yo kele mbi ve nde kimvuka yai ya mpika kupesa nswa na babakala ya kufwana yina kele na kati ya “mameme ya nkaka” mikumba yankaka ya kutwadisa bisalu ya babiro ya kesalamaka konso kilumbu. (Yoane 10:16) Masonuku kepesa mpi ve ata kikuma mosi yina lenda nata beto na kukangama kaka nde bantwadisi yonso ya bimvuka yina mezabanaka na nsiku ya leta yina Bambangi ya Yehowa kesadilaka fwete vanda kaka Bakristu ya kupakulama.

Mpangi Barr kuzabisaka bawi nde ntama mingi ve, bamambre yankaka ya Nto-Kimvuka ya Bambangi ya Yehowa yina kuvandaka bantwadisi na bimvuka yonso ya mezabanaka na nsiku ya leta yina “mpika ya kwikama mpi ya mayele” kesadilaka na États-Unis mebikisa na luzolo yonso bisika yina. Bo mepona bampangi ya mefwana na kutudila ntima na kati ya mameme yankaka sambu bo yinga na bisika yango.

Desizio yai kele na mambote mingi mpenza. Yo tasadisa bamambre ya Nto-Kimvuka na kuvanda ti ntangu mingi ya kudipesa na kubongisa madya ya kimpeve mpi na kulungisa bampusa ya kimpeve ya bampangi na inza ya mvimba.

Sambu na kusukisa, ntwadisi ya lukutakanu kuzabisaka bawi yina vandaka dezia na kyese nde: “Ata mikumba ya mutindu na mutindu yina ketadila bimvuka ya mezabanaka na nsiku ya leta ti ya kutwadisa bisalu ya babiro mekuma na maboko ya bankengi yina kele ti eksperiansi, . . . beto fwete zaba nde bo yonso kesala na lutwadisu ya kimpeve ya Nto-Kimvuka. . . . Beto yonso kesamba nde Yehowa kusakumuna bikesa yonso ya beto kesala kumosi sambu na kulungisa luzolo na yandi, mpi na kupesa lukumu ti nkembo na zina na yandi ya nene.”